Jooni 2
2
Jiisuu'ke Taa'ni'antananka Nko Tutumpuu'na'
(2:1–4:54)
Minkunaa Nampeesi Nkoau'nung-koong Kana-navuntu'koo
1Ke'munta doong tankinuio' nampeesi-koong paroro Kana-navuntu'koo nkoau' Kaaleli'nameng-koonoo'ke. Jiisuu' bauko te' otou'. 2Jiisuu' ee'noko nii' bakaning barevare-nupoong nanampiru' tee-koo ee'nara-koo paroro-koo nampeesi-koong-koo. 3Teketa tee, ookara uaini oparako Jiisuu' baukoi aa'puu', “Uaini oparing. Enang oto'evoroa'.” 4Ee'noko Jiisuu'ke aa'puu', “Ee nko', arekee'? Nkaang batei mme' makotua'.” 5Teketa Jiisuu' baukoi teing taamang banto'nuka teke otoroko'ning nauvurima aa'puru', “Kapoo' naururiaing nkoveriai.”
6Teke ˜nareng-taa utau kapang-kooning ntong-po'ning te' otoko' taramu-pina' basi pankaing-pina', Ju'nupoonge temurii'keta ntong nke'aama amutemurii' kapoo' duu'paako'ning biikaang toomo siompai. 7Ee'noko Jiisuu'ke teing taamang banto'nuka aa'puru', “Aing utauning maanto'eriaing ntonge.” Ee'noko teinge maanto'ama koonto' a'dei'ke karange basiau'. 8Ee'noko maanto'aio' Jiisuu'ke nauvurima aa'puru', “Enang tee-koo ntong-koo nii'naru' nke'erira tavo'eriaing tee-anko paroro okovenung-anko.” Ee'noko tee-anko tavo'au'. 9Ee'noko ntong avaio' mantompuu', koonto' uaini deempario'. Teie noru'uaruu' aung uaini okora'noo'. Teinge nainge taamang banto'nankai ntong nke'au'ninge noru'au'. Ee'noko teie paroro okovenunge mantompura tee naning nampeesiarako'nung bokuvura aa'puu', 10“Nii'ke ookarai uaini tampara masikung tutung avorompimaung, ee'noko nantoonge tee opaako dama'ke tamunsi'nung uaini avorompikoo'. Ee'noko dake tampara uaini pinka'eing bera enang dama'ke amerimaang.”
11Aung Jiisuu' bakaning taa'ni'antananka-koo tutuna'nung. Tee nkovuu'nung Kana-navuntu'koo, Kaaleli'nameng-koonoo'ke. Teke ee'noo'ke bakaang meenasi sira'paru' ee'noko nii'ke bakaning barevare-nupoonge masika'antavampiru'.
12Ee'noko teketa Jiisuu' ee'noko bauko ee'noko baara'mainkaang ee'noko nii' bakaning barevare-nupoong nanampiru' Kapaneume'navuntu'aape. Ee'noko temono-koo nii'ning doong o'noru'.
Jiisuu'ke Dootuu'nava Pankava-koo Baave Nkonuka Bata'uru'na'
(Mat 21:12-13; Mak 11:15-17; Luk 19:45-46)
13Tenang Ju'nupoong biikaang Taamang Baari'koong˜ due'uio' Jiisuu' Jerusalema'aape nanuu'. 14Ee'noko Jiisuu'ke nantoong oovuru' parang-koo dootuu'nava pankava-koong-koo kuunge baaveveeko boromaka' dovang, sipisipi' dovang, kuukuu' dovang parekanumpo'. Ee'noko napo' nantoong mooni' aampari'aako'ning oovuru' biikaang ba'nava'nang-koo ba'namparirio'. 15Ee'noko Jiisuu'ke mo'ming nerivura nipo'urima ookara kau' karenaumo bata'uru' dootuu'nava pankava-ita, sipisipi' dovang, boromaka' dovang. Ee'noko Jiisuu'ke batanang-nanka pe'dempuru' mooni' aampari'aako'ning biikaning, ee'noko biikaang mooni' purarinka'evuru'. 16Ee'noko teing nantoong kuukuu' baaveaako'ning Jiisuu'ke nauvurima aa'puru', “Te'nemperiaing anketa. Mma' bakaang pava baaveroma deeng-antaveriauka'.” 17Ee'noko nii'ke bakaning barevare-nupoonge noru'ampiru' Daari Meekunge minkuvuu'na', aa'puu'na',
“Nkaang domang-eta pia aa'na' o'nong dakaang pava meekung otoi oto'koo.” (Kena 69:9)
18Teketa tee Ju'koong ovontunge maku'aama tuu'ai nia'aama aa'pau', “Da' pankaing deeko', tee' nkovepeu'nung, taa'ni'anta naumeriaing.” 19Jiisuu'ke maku'urima aa'puru', “Aung pava dootuu'nava turamperiko beenang doong-koo napo' daa'ampaing.” 20Teketa napo' teinge nia'aama aa'pau', “Beenang doong-koo masika' kaniepeu'? Makotua'. Ava dootuu'nava pankava pankaroonge kaniampiru'nava karenaumo kivora-ita ˜namare'taa-koo.”
21Tee dootuu'nava tampuko'nung miru'noo' tee ee'nara Jiisuu'nung mono. 22Dama'ke boo'keta daa'ario' nii'ke bakaning barevare-nupoonge napo' noru'ampiru' tee' minkuvuu'na'. Ee'noko Daari Meekung masika'antavampiru' ee'noko tee kara Jiisuu'ke minkuvuu'nung.
Jiisuu'ke Ookara Nantoong Biikaang Aarumo Noru'uri Otong.
23Teketa tee Jiisuu' otou' Jerusalema' Taamang Baari'koong-koo˜. Ee'noko te' otoko mmau'ke masika'antavau' taa'ni'antananka nkovuu'ning ooaama te' otoroitaa'. 24Nka Jiisuu'ke tee masika'antavuriaruko' ookara biikaang aarumo noru'uitaa'. 25Bane naninge kapoo' nauvuaruko tampa' noru'uko' nantoong-koo tunsi-koo otoing.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Jooni 2: nasNTpo
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
© 1994, Wycliffe Bible Translators, Inc. All rights reserved.
