Jooni 1
1
Kuunoo' Jiisuu' Karistoo' Kansi'koo Pou'nung-koong
(1:1-51)
Tee Kara Masikung Okonaa Paning-eta Naning-naumpuu'na'
1Tenang tutuna' masipo' Kumponing bakaang Kara˜ Matau Okonara#1:1 Aung tee Karistoo', tee Kumponinge uro'ke noru'ui pako'pari'uu'nung nantoong domaang moo'evurira tarevuriaing. Ooveai Mkn 19:13. ovorimpari otoko'nung. Tee aa'nung kansi' mme' pupu'aravaruko Kumponing ninka nari' otoresi Kumponing-naumpui otoko'.
2Ee', tee ee'nung tee' tutuna'noo'ka Kumponing ninka otoreko'. 3Ookara kapoo'nanka teing teie nkovuru'ning. Kapoo'nanka nkonii'nanka-koo narung kapoo' otoa' teie nkovuaruko tavo'aru'nung. 4Tee-koo kuunge domaang okora'ari otou', ee'noko tee domaang tee nantoong biikaang araka deempari otou'. 5Ee'noko tee araka mutaanang-koo arakavari otoi otomaung, teie mutaanange tee daka'koo punkaampuaruko˜.
6Aung aa' tee, naning nii'nara tavo'aru'nung miring Jooni. 7Kumponinge botovuio' pou' ookara nantoong nauvurii'naang tee araka, sira'parako masika'antavaavaina'. 8Jooni tee, tee araka deea', nka tee Jooni pou' tee araka minkuvuma. 9Tee minkuvuko'nung tee araka masikung, ookara nantoong a' kansi'koo ponto'arimaing araka-antavurimaung. 10Tee tee kansi'koo ponto'arara otoko', tee aa'nung kansi' nkovuu'nung, teka teing kansi'nupoonge tasi'paavaruko'nung tee. 11Bane baka bakaning meekupoong-anko poio', teka teinge tee aroo'aavaruko'nung. 12Nii'ninge deeko' aroo'aako teie teing ookara iri' avuru' Kumponing baurukaa' deemparii'naang, teing bakaang miring pankaing masika'antavau'ning deempariko. 13Teing teing Kumponing baurukaa' ponto'nii'nuka; biumaraang-koong erenge deea', mono-koong piai deea', ee'noko naning bakaang mataue deea'; teing baka Kumponinge baurukaa' deeng-antavuru'ning.
14Ee', tee Kumponing bakaang Kara Okonara tee mono-po'nung deemparu' ee'noko nii' ninka nari' otou' tee teinge piaa naankai ee'noko tee kara masikung aa'ninge maanto'. Bakaang domaang-eta arakavario' ooampiru'nung tee tee-pina' tee Bauring narung masikung kirokai bakaang meenasi Bauma-itaing.
15Joonie tee minkuvuu'; bokuma aa'puu', “Aung ee'nara naning minkuanko'nung, aa'panko'nung: Naning tee ning-koo dama'ke pomaang tee bakei ning puru'mui otong. Ning paramaavaruko teroita otou'nunge.” 16Biraanke-antamuriko nii' ookara bauta'nanka nkavampikoo' bakaang avusiro' pankaing okora'ario'. 17Kumponinge bakaang boto Moosesi avuio' teie nii' pare'muru'; piaa#1:17 Tee urikung kara Mosesie pare'uu'nung naninge toto'pura tee nau'ka dupisi'koong tampuu', piaa otoa' (Ibr 10:28). Ee'noko naning otoa' tee boto tampa' tarevui tee kiimata baari'upeu'nung (Rom 8:3).’ ee'noko kara masikung#1:17 Tee tee kara dupeari oto' (Ibr 10:1), aa'noko tee taung masikung domamariainavung ee'noko tee iri' Tanuaang Meekung-etaing makosi-antamurimaung tevung siong-koo. ta'ni'poi minku Jiisuu' Karistoo'koo kuunge po'antavuu'. 18Naning otoa' Kumponing oovuu'nung. Bauring narung masikung kirokai, tee narung bauma ninka navuaremaung. Teie ee'narai Kumponing tampa' naumurimang.
Jooni Minkinara Bakaang Daanki
(Mat 3:1-12; Mak 1:7-8; Luk 3:15-17)
19Ju'koong ovontung Jerusalema'nupoonge piristi'nanka ee'noko biikaning pakupakunanka botoaaru' Jooni tana'aava'naang, aa'paava'naang, “Da' baa ee'nara?” 20Ee'noko tana'aako Joonie kapoo' baku'ua' tampa' sira'pari aa'puru': “Ning tee Kumponing-etaing teroita Pako'pari'nii'˜ deea', nantoong domampurira tarevuriaing.” 21Tee'puko aa'pau', “Da' ee'nara baa, Eliasi ee?”#1:21 Teie nakaronarai˜ Malakai-e temu' Ju'nupoong nauvuru'nung tee temu'nung nakaronara pankaing, Eliasi, napo' tavo'aravaing nantoong maamu-antavurii'naang Ovoring poaing-koo. Ooveai Malakai 4:5. Ee'noko Joonie maku'urima aa'puru', “A, ning tee deea'.” Ee'noko napo' nia'aama aa'pau', “Da' ee tee nakaronung nempampimaung ee?”#1:21 Temu' urikamu' Kumponinge Moosesi karantavuma˜ Karistoo'koo minkuvui aa'puu', “Dama'ke ninge nii'nara nakaronara pankaiang teing Isireeli-nupoong-koo meu'keta daa'evorompaing da'pina' oro'nara.” (Boto 18:18) Ee'noko maku'urima aa'puru', “Otoa'.” 22Ee'noko napo' nia'aama aa'pau', “Nka da' ee'nara baa? Naumeriaing nantoong botomaarining nauarampiaina'. Da' baa daka tantaramaung?” 23Ee'noko Joonie maku'urima aa'puru', “Teie nakaronarai Aisaia'ke urikamu' ning-koo minkuvuu' Daari Meekung-koo aa'puu'noo'ka,
‘Aurong narung naning-koong, naning mee'bora' sirakamaa' otoi bokuma aa'pumaang, maamu-antaveriaing tee taung Ovoring bakaang. Koompevuriaing poainavung.’” (Aisaia' 40:3)
24Nii'ning napo' te' otoroko' Boto Keperuu'navitue˜ botoaario'. 25Teinge napo' Jooni nia'aama aa'pau', “Da' ee'nara Tee Pako'pari'nii', Eliasi, ee'noko tee nakaronung nempampimaung deeaung deeko' aming-koo ee'narai dake nantoong ntong-koo minkiverima meeka'antaverimaung?” 26Ee'noko Joonie kara maku'urima aa'puru', “A, tamung ntong-koo minkie meeka' antavarampimang. Nka nii'nung noru'eriaung naning pankaing dii'koo meu' donkonui otong. 27Tee ning-koo dama'ke poaing naurampimaung aa'na' apoo'mui otoing, doonge-taara˜. Tee ee'nara poko aa'na' tampa' taaraveriai!” 28Aung kapoo' ookara Beetani-namono-koo nkoaru' Joo'dani-nari-koo amenka'aapei, Joonie nantoong ntong-koo minkivurima meeka'antavuriko'noo'ke.
Joonie Tee Uripo'keta Pako'pari'nii' Poko Tasi'puu'na'
29Teketa tee dauna'mung Joonie Jiisuu' oovuu' poko, ee'noko aa'puru', “Ooveriko, aunkapeto tee ee'nara Kumponing Bakaang Sipisipi'koong Kampia aarumo orara tonta'uaing ookara kansi'nupoong-koo. 30Tee aung ee'nara tee naning ninge minkuamaung, aa'pama, ning-koo dama'ke poaing naning bakei ning-koo dau basi. Ning o'noaruko otou'. 31Aung ee'nara naning ninge noru'ampa' minkuanko'nung, ee'noko ning tavo'maru' dii' Isireeli-nupoong ntong-koo minkirampima meeka'antarampiko, dii'ke tasi'perii'naang aung naning.”
32Joonie daankivurima aa'puru', “Ninge Tanuaang Meekung kuukuu'pina' siarako paning-eta siarara tee-koo dau pantoko ooansing. 33Ee'noko ninge koonto' noru'ampa', nka Kumponinge, botomuu'nunge nantoong ntong-koo minkiarama meeka'antavarama'naang, aa'muu', ‘Dake Tanuaang Meekung siarara dau pantoko oovee'naang tee-koo naning-koo. Tee ee'nara tee Tanuaang Meekung ninka meeka'antavuriaing.’” 34Joonie aa'puru', “Ninge ooansing, ee'noko naurampimang, aung ee'nara tee Kumponing Bauring.”
Tutuna'ning Barevare-nupoong Jiisuu' Bakaning
35Teketa tee Jooni dauna'mung napo' te' otoko nee' ninka bakaning barevare-nupoong-koonaanka ninka. 36Ee'noko Joonie Jiisuu' nanuko oovura aa'muretu', “Aunkato ee'nara Kumponing Bakaang Sipisipi'koong Kampia.” 37Ee'noko tee nee'ke Jooni taaravampeta Jiisuu' siompampetu'. 38Jiisuu'ke dama'du-aape nee'ke siompampeko oomureta nia'muretu' aa'puma, “Dee'ke aming besi'eremang?” Ee'noko nee'ke maku'ampetu' kara, aa'pampema, “Raabai' ee, da' are' otomaung?” (Aung Raabai' miru'noo' Nau-anta Pankaing.) 39Ee'noko bokumurema aa'muretu', “Poreta oovereai.” Teketa tee nanampetai'nange ooampetu' te' ee'noo' otoko'noo'. Tenang ee'nang duaa' sirang poio'. Ee'noko te'mung doong tee ninka o'noru'.
40Tenang Joonie tasi'antamureko Jiisuu'koo bi'maresi nanampetu'. Nee' ee'naanka Aanduru', Saimoni' Piita baara'ma'nung ninka. 41Ee'noko namu'ke Aanduru'ke bataata Saimoni' besi'uu'. Ee'noko oovurai'nange nauvuma aa'puu', “Nee'ke pe'numpampesing tee Kumponinge Pako'pari'nii' nii' domang moo'murima taremuriaing-koong” (Kiriki'na' tee Karistoo' tampaamaung). 42Ee'noko Aanduru'ke enang Saimoni' Jiisuu'anko tavo'uu'. Jiisuu'ke oovurai'nange aa'puu', “Da' Saimoni', Jooni bauring. Dakaang miring Siipasi deemparavaing,” Kiriki'na' tee Piita#1:42 Tee Manto pina' nari'. tampaamaung.
Jiisuu'ke Pilipi'naanka Natanielo' Bokuvuretu'na'
43Aung aa' napo' dauna'mung Jiisuu' Kaaleli'navete-aape nanu'koo piavou'. Ee'noko Pilipi' oovurai'nange aa'puu', “Ni'ninka nanampeaing.” 44Aunoo' Pilipi' Besaida-nung. Te' osi Aanduru'namainta Piita otoreko'noo'. 45Ee'noko Pilipi'ke Natanielo' besi'uma oovura nauvuma aa'puu', “Nii'ke pe'numpampirieeng tee ee'nara naning Moosesie buuku-koo daarivuu'nung Kumponing bakaang boto-koong-koo, tee ee'nara naning nakaro-nupoong urikupoong daariau'nung biikaang buuku-koo. Aung bakaang miring Jiisuu', Josepa' bauring, Nasareti'nung.” 46Ee'noko Natanielo'ke maku'uma aa'puu', “Arekee'? Kapoo' ee tampara Nasareti'keta popeu'?” Ee'noko Pilipi'ke aa'puu', “Pora ooveaing.”
47Ee'noko Jiisuu'ke oovuu' Natanielo' tee-anko poko, ee'noko aa'puu', “Aung ee'nara koonto' Isireeli-nupoong-koong. Tosi nkovuaunge.” 48Natanielo'ke nia'uma aa'puu', “Dake arekee' ning noru'meing?” Jiisuu'ke aa'puu', “Da' ninge tero ooransing Pilipi'ke mme' bokuruaruko kokoki-navari-koo boong ueentari otoko.” 49Ee'noko Natanielo'ke maku'uma aa'puu', “Nau-anta Pankaing, da' ee'nara Daurarong˜ nii' Isireeli-nupoong niikaang.” 50Jiisuu'ke aa'puu', “Dake ee masika'antamemang aa'dansing-koo, ‘Da' ninge ooransing kokoki-koo boong ueentari otoko.’? Dake kapoo' mmau' pankainanka aung-koo dau basining ooveainge.” 51Ee'noko Jiisuu'ke aa'muru', “Masika' naurampimang, paning bere'arako ooveriainge, ee'noko Kumponing bakaning koosinunanka ee'deto ee'noko ee'depeto nanaako oovereriaing ning-anko Tee Naning-naumpo' Paning-etaing-anko.”
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Jooni 1: nasNTpo
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
© 1994, Wycliffe Bible Translators, Inc. All rights reserved.
