Lucas 10
10
Tiburan na lang Jesus ding Pitung Pulu't Adua
1Kaybat na nita, memili yang pitung pulu't adua#10:1 Karing aliwang kasulatan ing mabasa: pitung pulu. katau ing Ginu, at tinubud na lang tidua-tidua ban munta na lang mumuna keya king balang lugal a puntalan na. 2#Mt 9:37, 38.Sinabi na karela, Dakal ing palutan, oneng ditak la mu ding magobra. Ipanalangin yu king makibandi king palutan king parala yang dakal a talapagobra ba rang tipunan ing pupul na. 3#Mt 10:16.Lumakad na kayu! Tutubud da kayu antimong tupa libutad da ring asung-gubat.#10:3 Keng Inglis: wolves. 4E kayu magdalang pitaka o suput-magpalimus o sandalyas at e kayu tutuknang kabang dalan. 5Kapilan man lungub kayu king metung a bale sabian yu pa mu, Kapayapan king bale iti. 6Nung payapa ya ing makatuknang karin, manatili keya ing kapayapan; nung ali ne man, ibawi yu ing binie yung kagalangan keya. 7#1 Cor 9:14; 1 Tim 5:18.Manatili kayu king bale a tanggap kekayu; mangan kayu at minum king nanumang yapag da kekayu, uling ing magobra sukat yang mibayaranan. E kayu lilipat tuknangan. 8Nung munta kayu king isanu mang balen at tanggapan da kayu, mangan kayu king yapag da kekayu. 9Pakayapan yu la ding masakit karin at sabian yu karela, Ing Kayarian ning Dios malapit ne kekayu. 10#Dapat 13:51.Nung munta kayu king isanu mang balen at e ra kayu tanggapan, lual kayu karing dalan at sabian yu, 11#Mt 10:7-14; Mc 6:8-11; Lc 9:3-5.Agyang ing alikabuk ning balen yu a mipakat karing bitis mi ipagpag ming antimong tutul kekayu; oneng tandanan yu iti, ing Kayarian ning Dios malapit ne kekayu! 12#Gen 19:24-28; Mt 11:24; Mt 10:15.Sasabian ku kekayu king ing Sodoma tanggap yang mayan a parusa king Aldo ning Pamanukum kesa king balen a ita.
Ding Balen a E Bisang Maniwala
(Mateo 11:20-24)
13 # Isa 23:1-18; Eze 26:1—28:26; Joel 3:4-8; Amos 1:9, 10; Zac 9:2-4. Makalunus na ka Corazin! Makalunus ka naman Betsaida! Nung ding milagru a merapat libutad yu merapat la karin Tiro at Sidon, maluat na la sanang makasulud imalan a magaspang ding tau karin at makalukluk king abu antimong tanda ning karelang pamanisi! 14Lalung maragul ing parusang dugpa kekayu king Aldo ning Pamanukum kesa karing tau ning Tiro at Sidon. 15#Isa 14:13-15.At ika naman Capernaum, buri mung itas angga banua ing sarili mo? Misaldak ka angga king kalalalaman na ning impierno!
16 # Mt 10:40; Mc 9:37; Lc 9:48; Jn 13:20. Nganang Jesus karing alagad na, Ing ninumang makiramdam kekayu, makiramdam ya kanaku; ing ninumang tanggi kekayu, tatanggian na ku at ing ninumang tanggi kanaku, tatanggian ne itang mitubud kanaku.
Migbalik la ding Pitung Pulu't Adua
17Migbalik lang masaya ding pitung pulu't adua.#10:17 Karing aliwang kasulatan: pitung pulu. Ngarang sinabi, Ginu, memintu la kekami pati ding demonyu uli na ning lagyu mu!
18Nganang Jesus karela, Ikit ke i Satanas a antimong kildap a menakbag ibat banua. 19#Dalit 91:13.Makiramdam kayu! Dininan da kayung kayupayan damusak karing ubingan at alakdan at maygit king upaya ning Kalaban at alang nanumang makapanasakit kekayu. 20Oneng e kayu magsaya ngening mamintu la kekayu ding marawak a espiritu, nune tumula kayu uling makasulat la ding lagyu yu karin banua.
Masaya Ya i Jesus
(Mateo 11:25-27; 13:16-17)
21King oras mu ring ita kitmuan ya i Jesus king tula uli na ning Banal a Espiritu at sinabi na, Ibpa, Ginu na ning banua at yatu! Pasalamatan da ka uling pepabalu mu la karing e megaral ding bage a selikut mu karing biasa at megaral. Wa, Ibpa, iti depat mu uli na ning tula mu at kaburian.
22 # Jn 3:35; Jn 10:15. Binie nang Ibpa ku kanaku ing sablang bage. Ala metung mang makibalu nung ninu ing Anak subali mu ing Ibpa, at ala metung mang makibalu king Ibpa subali mu ing Anak at detang buri nang pabaluan ning Anak.
23Kanita belikdan na lang Jesus ding alagad at sinabi nang lihim karela, Kapalad da ring taung manakit king akakit yo! 24Dakal lang propeta at ari ding bisang manakit king akakit yu, oneng e ra ikit at bisang damdam king daramdaman yu, oneng e ra dimdam.
Ing Talimhaga tungkul king Mayap a Samaritano
25 # Mt 22:35-40; Mc 12:28-34. Linapit ya ing metung a talaturu ning Kautusan ba neng paniubukan i Jesus. Nganang mengutang, Maestro, nanu ing sukat kung daptan ba kung tanggapan ing bie alang angga?
26Pekibat nang Jesus, Nanu wari ing makasulat king Kautusan? Nanu ing aintindian mu kareti?
27 # Deut 6:5; Lev 19:18. Mekibat ya, Sukat meng luguran ing Ginung kekang Dios king mabilug mung pusu, at king mabilug mung kaladua, at king mabilug mung sikanan, at king mabilug mung kaisipan, at Sukat meng luguran ing kalupa mung tau antimo ing kekang sarili.
28 # Lev 18:5. Nganang Jesus, Ustu ing pakibat mu, daptan mu iti at mie ka.
29Oneng buri na ning talaturu ning Kautusan ing ipakit na king maka matulid ya; inya ngana pang kinutang kang Jesus, Ninu wari ing kalupa kung tau?
30Nganang mekibat Jesus, Ating metung a taung ibat Jerusalem; papunta ya Jerico. Sebatan de ring tulisan at kinua ra ing imalan a susulud na; pemalupalu re, at likuan deng halus mete na. 31Mipaintagun daralan ya ing metung a pari king lugal a ita; inyang ikit ne linipat ya kasumangid na ning dalan. 32Makanyan munaman, miras ya karin ing metung a Levita, at ikit ne ing biktima da ring tulisan; linipat ya naman king kasumangid na ning dalan. 33#2 Cro 28:15.Dinalan ya naman karin ing metung a Samaritanong maglakbe. Ikit nia munaman at melunus ya. 34Lepitan ne at tigtugan na lang laru at alak ding sugat na at saka na la tinali. Kaybat seke ne king asno na at dela ne king bale pipaglayunanan at sinese ne karin. 35Kabukasan, kinangwa yang aduang salaping pilak#10:35 King Griego: denaryu, ing sueldu o upa king patingapun a obra. king bulsa na at binie na la king mamahala king pipaglayunanan. Ngana, Sesen me at nung magkanu man ing maging kulang, bayaran ku pamagbalik ku.
36Ninu ngeni king pamalak mu, nganang Jesus, kareting atlu ing dinapat pamakilupang tau king sebatan da ring tulisan?
37Pekibat na ning talaturu ning Kautusan, Itang pepakit lunus keya.
Nganang Jesus, Nung makanyan, sige, anti munaman kaniti ing daptan mu.
Delawan neng Jesus i Maria at Marta
38 # Jn 11:1. Tiglus nang Jesus at ding alagad na ing pamaglakbe ra at miras la king metung a baryu. Tinggap na lang matula king pibalebale na ning metung a babaing milagyuan Marta. 39Atin yang kapatad a milagyuan Maria. Linukluk ya iti king arap na ning Ginu at mekiramdam ya king tuturu na. 40E na balu ing arapan nang Marta king dakal a obrang sukat nang daptan; inya linapit ya kang Jesus at sinabi na, Ginu, e mu apapansin king pepaburen na kung magobrang dili-dili ning kapatad ko? Pakisabi yu na mo kang Maria ing saupan na ko!
41Pekibat ning Ginu, Marta, Marta, maliligalig ka at mayayabala karing dakal a bage, 42oneng metung mu ing tune kailangan. Tinud yang memili i Maria at iti e milako keya.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Lucas 10: PmPV
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Philippine Bible Society New Testament © 1981, Bible © 1994
