ܡܪܩܘܣ 3
3
ܝܼܫܘܿܥ ܒܲܣܘܼܡܹܐ ܐ݇ܢܵܫܵܐܐܝܼܕܹܗ ܒܪܝܼܙܬܵܐ
ܡܬܝ 12:9‐14؛ ܠܘܩܐ 6:6‐11
1ܡܸܢܕܪܸܫ ܥܒ݂ܝܼܪܹܗ ܝܼܫܘܿܥ ܠܟܢܘܼܫܬܵܐ، ܘܬܵܡܵܐ ܐܝܼܬ ܗ݇ܘܵܐ ܚܲܕ ܐ݇ܢܵܫܵܐ ܐܝܼܕܹܗ ܒܪܝܼܙܬܵܐ. 2ܘܨܵܝܕܝܼ ܗ݇ܘܵܘ ܠܹܗ ܕܐܸܢ ܒܸܬ ܒܲܣܸܡ ܠܹܗ ܒܝܵܘܡܵܐ ܕܫܲܒܬܵܐ، ܩܵܐ ܕܩܵܒ݂ܠܝܼ ܗ݇ܘܵܘ ܥܲܠܘܼܗܝ. 3ܐ݇ܡܝܼܪܹܗ ܠܗ̇ܘ ܐ݇ܢܵܫܵܐ ܐܝܼܕܹܗ ܒܪܝܼܙܬܵܐ، ”ܟܠܝܼ ܒܹܝܬ݇ ܦܲܠܓܵܐ.“
4ܘܒܘܼܩܸܪܹܗ ܡ̣ܢ ܐܵܢܝܼ ܕܝܼܗ݇ܘܵܘ ܬܵܡܵܐ، ”ܩܵܢܘܿܢܵܝܬܵܐ ܝܠܵܗ̇ ܠܸܥܒ݂ܵܕܵܐ ܛܵܒ݂ܬܵܐ ܝܲܢ ܒܝܼܫܬܵܐ ܒܝܵܘܡܵܐ ܕܫܲܒܬܵܐ، ܠܦܲܪܘܼܩܹܐ ܓܵܢܵܐ ܝܲܢ ܠܛܲܠܘܼܩܹܐ؟“ ܐܝܼܢܵܐ ܐܵܢܝܼ ܠܵܐ ܓ̰ܘܼܘܸܒ ܠܗܘܿܢ ܐܸܠܹܗ. 5ܘܚܝܼܪܹܗ ܝܼܫܘܿܥ ܒܝܼܲܝܗܝ ܒܟܲܪܒܵܐ ܘܒܦܵܫܲܡܬܵܐ ܥܲܠ ܩܸܫܝܘܼܬܵܐ ܕܠܸܒܲܝܗܝ، ܘܐ݇ܡܝܼܪܹܗ ܠܗ̇ܘ ܐ݇ܢܵܫܵܐ، ”ܦܲܫܸܛ ܐܝܼܕܘܼܟ݂.“ ܘܦܘܼܫܛܵܐ ܠܹܗ ܐܝܼܕܹܗ، ܘܒܣܝܼܡ ܠܵܗ̇. 6ܗ̇ܝܓܵܗ ܦܠܝܼܛ ܠܗܘܿܢ ܦܪ̈ܝܼܫܹܐ ܘܣܘܼܙܓܸܪܗܘܿܢ ܥܲܡ ܗܹܪ̈ܘܿܕܸܣܵܝܹܐ ܕܵܐܟ݂ܝܼ ܕܩܵܛܠܝܼ ܠܝܼܫܘܿܥ.
ܝܼܫܘܿܥ ܒܲܣܘܼܡܹܐ ܟܸܢܫܹ̈ܐ
7ܐܝܼܢܵܐ ܝܼܫܘܿܥ ܫܘܼܢܹܐ ܠܹܗ ܡ̣ܢ ܬܵܡܵܐ ܘܐ݇ܬܹܐ ܠܹܗ ܠܓܹܒܵܐ ܕܝܵܡܵܐ ܥܲܡ ܬܲܠܡܝܼܕܘܼ̈ܗܝ، ܘܐ݇ܙܝܼܠ ܠܗܘܿܢ ܒܵܬ݇ܪܹܗ ܟܸܢܫܹ̈ܐ ܪܵܒܵܐ ܡ̣ܢ ܓܠܝܼܠܵܐ ܘܡ̣ܢ ܝܼܗܘܼܕ، 8ܘܡ̣ܢ ܐܘܿܪܸܫܠܸܡ، ܘܡ̣ܢ ܐܲܕܘܿܡ، ܘܡ̣ܢ ܥܸܒ݂ܪܵܐ ܕܝܘܿܪܕܢܵܢ، ܘܚܵܕܸܪ̈ܘܵܢܹܐ ܕܨܘܿܪ ܘܕܨܲܝܕܘܿܢ، ܘܟܸܢܫܹ̈ܐ ܪܵܒܵܐ ܕܫܡܝܼܥ ܠܗܘܿܢ ܒܘܼܬ ܡܸܢܕܝܼܵܢܹ̈ܐ ܕܒܸܥܒ݂ܵܕܵܐ ܝܗ݇ܘܵܐ، ܐ݇ܬܹܐ ܠܗܘܿܢ ܠܟܸܣ ܠܹܗ. 9ܘܐ݇ܡܝܼܪܹܗ ܠܬܲܠܡܝܼ̈ܕܹܐ ܕܡܲܝܬܝܼ ܗ݇ܘܵܘ ܠܹܗ ܓܵܡܝܼ ܙܥܘܿܪܬܵܐ ܕܝܵܬܹܒ݂ ܗ݇ܘܵܐ ܓܵܘܘܼܗ̇ ܕܠܵܐ ܡܲܠܝܸܨܝܼ ܗ݇ܘܵܘ ܠܹܗ ܟܸܢܫܹ̈ܐ. 10ܣܵܒܵܒ ܒܘܼܣܸܡ ܠܹܗ ܪܵܒܵܐ، ܘܟܠܲܝܗܝ ܐܵܢܝܼ ܕܐܝܼܬ ܗ݇ܘܵܘ ܠܗܘܿܢ ܡܲܪ̈ܥܹܐ ܩܲܪܒܸܢܝܼ ܗ݇ܘܵܘ ܐܸܠܹܗ ܠܸܕܩܵܪܵܐ ܒܝܼܹܗ. 11ܘܐܵܢܝܼ ܕܐܝܼܬ ܗ݇ܘܵܘ ܒܝܼܲܝܗܝ ܪ̈ܘܼܚܹܐ ܛܲܡ̈ܐܹܐ، ܐܝܼܡܲܢ ܕܚܙܹܐ ܠܗܘܿܢ ܐܸܠܹܗ، ܢܦܝܼܠ ܠܗܘܿܢ ܩܵܕ݇ܡܘܼܗܝ ܡܲܩܘܘܼܚܹܐ ܘܒܹܐܡܵܪܵܐ، ”ܐܲܢ݇ܬ ܝܼܘܸܬ ܒܪܘܿܢܵܐ ܕܐܲܠܵܗܵܐ.“ 12ܐܝܼܢܵܐ ܗ̇ܘ ܩܲܫܝܵܐܝܼܬ ܦܩܝܼܕܲܝ ܠܹܗ ܕܠܵܐ ܓܵܠܝܼ ܗ݇ܘܵܘ ܒܘܼܬ ܕܝܼܹܗ.
ܓܲܒܵܝܬܵܐ ܕܬܪܸܥܣܲܪ ܬܲܠܡܝܼ̈ܕܹܐ
ܡܬܝ 10:1‐4؛ ܠܘܩܐ 6:12‐16
13ܐ݇ܣܝܼܩ ܠܹܗ ܝܼܫܘܿܥ ܠܛܘܼܪܵܐ ܘܩܪܹܐ ܠܹܗ ܠܐܵܢܝܼ ܕܒܵܥܹܐ ܗ݇ܘܵܐ. ܘܐ݇ܬܹܐ ܠܗܘܿܢ ܠܟܸܣ ܠܹܗ. 14ܦܪܝܼܫ ܠܹܗ ܬܪܸܥܣܲܪ ܕܗܵܘܝܼ ܗ݇ܘܵܘ ܥܲܡܹܗ، ܕܫܲܕܸܪ ܗ݇ܘܵܘ ܠܗܘܿܢ ܕܡܲܟܪܸܙܝܼ ܗ݇ܘܵܘ، 15ܘܕܗܵܘܹܐ ܗ݇ܘܵܐ ܠܗܘܿܢ ܫܘܼܠܛܵܢܵܐ ܠܦܲܠܘܼܛܹܐ ܫܹܐܕܹ̈ܐ. 16ܡܘܼܬܸܒ݂ ܠܹܗ ܫܸܡܵܐ ܕܫܸܡܥܘܿܢ، ”ܟܹܐܦܵܐ.“ 17ܘܠܝܲܥܩܘܿܒ݂ ܘܠܝܘܿܚܲܢܵܢ ܐܲܚܘܿܢܘܼܗܝ، ܒܢܘܿܢܹ̈ܐ ܕܙܲܒ݂ܕܲܝ، ܡܘܼܬܸܒ݂ ܠܹܗ ܫܸܡܵܐ، ”ܒܢܲܝ̈ ܪܲܓ݂ܫܝܼ،“ ܝܲܥܢܹܐ، ”ܒܢܘܿܢܹ̈ܐ ܕܪܲܥܡܵܐ.“ 18ܘܐܲܢܕܪܹܐܘܿܣ، ܘܦܝܼܠܝܼܦܘܿܣ، ܘܒܲܪ ܬܘܼܠܡܲܝ، ܘܡܲܬܲܝ، ܘܬܐܘܿܡܵܐ، ܘܝܲܥܩܘܿܒ݂ ܒܲܪ ܚܲܠܦܲܝ، ܘܬܲܕܲܝ، ܘܫܸܡܥܘܿܢ ܩܢܵܢܵܝܵܐ. 19ܘܝܼܗܘܼܕܵܐ ܣܟܲܪܝܘܿܛܵܐ، ܗ̇ܘ ܕܣܘܼܦܹܐ ܠܹܗ ܐܸܠܹܗ.
ܚܛܝܼܬܵܐ ܕܠܹܐ ܦܵܝܫܵܐ ܦܘܼܚܸܠܬܵܐ
ܡܬܝ 12:22‐32؛ ܠܘܩܐ 11:14‐23، 12:10
20ܐ݇ܬܹܐ ܠܹܗ ܝܼܫܘܿܥ ܠܒܲܝܬܵܐ، ܘܡܸܢܕܪܸܫ ܓ̰ܡܝܼܥ ܠܹܗ ܟܸܢܫܵܐ ܗܲܕܟ݂ܵܐ ܕܠܵܐ ܡܨܹܐ ܠܗܘܿܢ ܗ̇ܘ ܘܬܲܠܡܝܼܕܘܼ̈ܗܝ ܐܵܟ݂ܠܝܼ ܡܹܐܟ݂ܘܼܠܬܵܐ. 21ܐܝܼܡܲܢ ܕܫܡܝܼܥ ܠܗܘܿܢ ܚܸܙܡܵܢܘܼ̈ܗܝ، ܐ݇ܬܹܐ ܠܗܘܿܢ ܕܠܲܒܠܝܼ ܗ݇ܘܵܘ ܠܹܗ ܣܵܒܵܒ ܐ݇ܡܝܼܪܗܘܿܢ، ”ܫܘܼܕܸܢܹܗ.“ 22ܘܐܵܢܝܼ ܣܵܦܪܹ̈ܐ ܕܨܠܹܐ ܠܗܘܿܢ ܡ̣ܢ ܐܘܿܪܸܫܠܸܡ ܐܵܡܪܝܼ ܗ݇ܘܵܘ ܒܘܼܬ ܕܝܼܹܗ، ”ܐܝܼܬ ܒܝܼܹܗ ܒܥܸܠܙܒ݂ܘܿܒ݂، ܘܒܚܲܝܠܵܐ ܕܓܘܼܪܵܐ ܕܫܹܐܕܹ̈ܐ ܦܲܠܘܼܛܹܐ ܝܠܹܗ ܫܹܐܕܹ̈ܐ.“
23ܐܝܼܢܵܐ ܝܼܫܘܿܥ ܩܸܪܝܲܝ ܠܹܗ ܠܟܸܣ ܠܹܗ ܘܗܘܼܡܙܸܡ ܠܹܗ ܥܲܡܲܝܗܝ ܒܡܲܬܠܹ̈ܐ، ܒܹܐܡܵܪܵܐ، ”ܕܵܐܟ݂ܝܼ ܡܵܨܹܐ ܣܵܛܵܢܵܐ ܦܲܠܸܛ ܠܣܵܛܵܢܵܐ؟ 24”ܘܐܸܢ ܡܲܠܟܘܼܬܵܐ ܦܵܝܫܵܐ ܦܠܝܼܥܬܵܐ ܥܲܠ ܓܵܢܘܼܗ̇ ܠܹܐ ܡܵܨܝܵܐ ܟܵܠܝܵܐ. 25”ܘܐܸܢ ܒܲܝܬܵܐ ܥܲܠ ܓܵܢܹܗ ܦܵܐܹܫ ܦܠܝܼܥܵܐ ܠܹܐ ܡܵܨܹܐ ܟܵܠܹܐ. 26”ܘܐܸܢ ܣܵܛܵܢܵܐ ܩܵܐܹܡ ܠܕܲܠܩܘܼܒ݂ܠ ܕܓܵܢܹܗ ܘܦܵܐܹܫ ܦܠܝܼܥܵܐ، ܠܹܐ ܡܵܨܹܐ ܟܵܠܹܐ، ܐܸܠܵܐ ܒܸܬ ܡܵܛܹܐ ܠܚܘܼܬܵܡܵܐ. 27”ܐܘܼܦ ܚܲܕ ܠܹܐ ܡܵܨܹܐ ܥܵܒܹܪ ܠܒܲܝܬܵܐ ܕܚܲܕ ܐ݇ܢܵܫܵܐ ܚܲܝܠܵܢܵܐ ܘܣܵܠܹܒ ܠܡܸܢܕܝܼܹܗ، ܐܸܢ ܠܵܐ ܩܵܕ݇ܡܵܝܬܵܐ ܐܵܣܹܪ ܠܚܲܝܠܵܢܵܐ ܘܗ̇ܝܓܵܗ ܣܵܠܹܒ ܠܒܲܝܬܹܗ. 28”ܬܪܘܼܨܵܐ ܒܹܐܡܵܪܵܐ ܝܘܸܢ ܐܸܠܵܘܟ݂ܘܿܢ، ܟܠܲܝܗܝ ܚܛܝܼܵܬܹ̈ܐ ܒܸܬ ܦܵܝܫܝܼ ܦܘܼܚܠܹܐ ܠܒܢܲܝ̈ܢܵܫܵܐ، ܘܟܠܲܝܗܝ ܓܘܼܕܵܦܹ̈ܐ ܕܓܵܕܦܝܼ ܠܗܘܿܢ ܒܸܬ ܦܵܝܫܝܼ ܦܘܼܚܠܹܐ ܐܸܠܲܝܗܝ، 29”ܐܝܼܢܵܐ ܡ̇ܢ ܕܓܵܕܹܦ ܥܲܠ ܪܘܼܚܵܐ ܕܩܘܼܕܫܵܐ، ܠܲܝܬ ܠܹܗ ܦܘܼܚܵܠܵܐ ܗܲܠ ܥܵܠܲܡ، ܐܝܼܢܵܐ ܚܲܝܵܒ݂ܵܐ ܝܠܹܗ ܠܚܛܝܼܬܵܐ ܕܠܥܵܠܲܡ.“ 30ܣܵܒܵܒ ܐܵܡܪܝܼ ܗ݇ܘܵܘ، ”ܪܘܼܚܵܐ ܛܲܡܐܹܐ ܐܝܼܬ ܒܝܼܹܗ.“
ܝܸܡܵܐ ܘܐܲܚܘܿܢܘܵܬܹ̈ܐ ܕܝܼܫܘܿܥ
ܡܬܝ 12:46‐50؛ ܠܘܩܐ 8:19‐21
31ܒܗ̇ܝ ܥܕܵܢܵܐ ܐ݇ܬܹܐ ܠܗܘܿܢ ܝܸܡܹܗ ܘܐܲܚܘܿܢܘܵܬܹ̈ܗ، ܟܠܹܐ ܠܗܘܿܢ ܠܒܲܕܲܪ، ܘܫܘܼܕܸܪܗܘܿܢ ܠܟܸܣ ܠܹܗ ܕܐܵܬܹܐ ܗ݇ܘܵܐ. 32ܘܟܸܢܫܵܐ ܕܝ݇ܬܝܼܒ݂ܵܐ ܝܗ݇ܘܵܐ ܠܟܸܣ ܠܹܗ ܐ݇ܡܝܼܪܗܘܿܢ ܐܸܠܹܗ: ”ܗܵܐ ܝܸܡܘܼܟ݂ ܘܐܲܚܘܿܢܘܵܬܘܼ̈ܟ݂ ܟܸܠܝܹܐ ܝܢܵܐ ܠܒܲܕܲܪ، ܘܒܸܛܠܵܒܘܼܟ݂ ܝܼܢܵܐ.“ 33ܘܓ̰ܘܼܘܸܒ ܠܹܗ ܝܼܫܘܿܥ ܘܐ݇ܡܝܼܪܹܗ ܐܸܠܲܝܗܝ، ”ܡܵܢܝܼ ܝܠܵܗ̇ ܝܸܡܝܼ، ܘܡܵܢܝܼ ܝܢܵܐ ܐܲܚܘܿܢܘܵܬܝܼ̈؟“ 34ܘܚܝܼܪܹܗ ܒܐܵܢܝܼ ܕܝ݇ܬܝܼܒܹܐ ܝܗ݇ܘܵܘ ܠܚܵܕܸܪ̈ܘܵܢܘܼܗܝ ܘܐ݇ܡܝܼܪܹܗ، ”ܗܵܐ، ܝܸܡܝܼ، ܘܗܵܐ، ܐܲܚܘܿܢܘܵܬܝܼ̈. 35”ܣܵܒܵܒ ܟܠ ܡ̇ܢ ܕܥܵܒܹܕ ܨܸܒ݂ܝܵܢܵܐ ܕܐܲܠܵܗܵܐ، ܗ̇ܘ ܝܼܠܹܗ ܐܲܚܘܿܢܝܼ، ܘܚܵܬܝܼ، ܘܝܸܡܝܼ.“
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
ܡܪܩܘܣ 3: ABTAB
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Aramaic Bible Translation Assyrian Bible © 2025 Aramaic Bible Translation
