Jenesis 1
1
An Kreasyon
1Y'n dalleth Duw a formyas an nev ha'n nor. 2Heb form ha gwag o an nor. Yth esa tewolgow war enep an downder ha Spyrys Duw esa ow kwaya war enep an dowrow.
3Hag yn-medh Duw, ‘Bedhes golow’; hag y feu golow. 4Ha Duw a welas an golow, ev dhe vos da; ha Duw a wrug dibarth ynter an golewder ha'n tewolgow. 5Ha Duw a elwis an golewder Dydh ha'n tewolgow ev a elwis Nos. Hag y feu gorthugher hag y feu myttin, unn jydh.
6Hag yn-medh Duw, ‘Bedhes fyrmament yn mysk an dowrow, ow kul dibarth ynter an dowrow ha'n dowrow.’ 7Ha Duw a wrug an fyrmament ha gul dibarth ynter an dowrow esa yn-dann an fyrmament ha'n dowrow esa a-ugh an fyrmament. Hag y feu yndella. 8Duw a elwis an fyrmament Nev. Hag y feu gorthugher hag y feu myttin, an nessa dydh.
9Hag yn-medh Duw, ‘Bedhes an dowr yn-dann an nev kuntellys yn unn tyller, ha gwres omdhiskwedhes tir sygh.’ Hag y feu yndella. 10Duw a elwis an dor sygh Tir, ha kuntellva an dowrow ev a elwis Moryow. Ha Duw a welas henna dhe vos da.
11Hag yn-medh Duw, ‘Gwres an nor dri gwels yn-rag, losow ow toen has, ha gwydh ow toen frut war-lergh aga hinda, hag ynno has, war an dor.’ Hag y feu yndella. 12Ha'n tir a dhros gwels yn-rag, losow ow toen has war-lergh aga hinda ha gwydh ow toen frut gans has ynno war-lergh aga hinda; ha Duw a welas henna dhe vos da. 13Hag y feu gorthugher hag y feu myttin, an tressa dydh.
14Hag yn-medh Duw, ‘Bedhens golowys yn fyrmament an nev dhe wul dibarth ynter an jydh ha'n nos, ha bedhens avel toknys rag sesonyow, ha rag dydhyow ha blydhynyow. 15Ha bedhens avel golowys yn fyrmament an nev dhe ri golow war an nor.’ Hag y feu yndella. 16Duw a wrug dew wolow bras, an golow brassa dhe rewlya an jydh ha'n golow le dhe rewlya an nos. Ev a wrug an ster ynwedh. 17Ha Duw a's gorras yn fyrmament an nev dhe ri golow war an nor, 18ha dhe rewlya an jydh ha'n nos, ha dhe wul dibarth ynter an golewder ha'n tewolgow. Ha Duw a welas henna dhe vos da. 19Hag y feu gorthugher hag y feu myttin, an peswora dydh.
20Hag yn-medh Duw, ‘Re dhrollo an dowr yn-mes hesow a greaturs bew, hag ydhyn ow nija a-ugh an nor war enep fyrmament an nev.’ 21Ha Duw a formyas morviles bras ha pub kreatur bew ow kwaya, a wra an dowrow dri yn-mes yn hesow, war-lergh aga hinda, ha pub edhen askellek war-lergh hy hinda. Ha Duw a welas henna dhe vos da. 22Duw a's bennigas ha leverel, ‘Degewgh frut, ha kressya ha lenwel dowrow an moryow ha lieshens ydhyn war an nor.’ 23Hag y feu gorthugher hag y feu myttin, an pympes dydh.
24Hag yn-medh Duw, ‘Gwres an dor dri mes kreaturs bew war-lergh aga hinda, chatel ha pryves ha miles an nor war-lergh aga hinda.’ Hag y feu yndella. 25Ha Duw a wrug miles an nor war-lergh aga hinda, ha chatel war-lergh aga hinda hag oll an kreaturs ow slynkya war an dor war-lergh aga hinda. Ha Duw a welas henna dhe vos da. 26Ena yn-medh Duw, ‘Gwren ni gul den yn agan imaj, yn agan hevelep ni, ha gwrens i rewlya war buskes an mor ha war ydhyn an ayr, war an chatel ha war oll an nor, ha war bub pryv ow kramya war an dor.’
27Ytho Duw a formyas den war-lergh y imaj; war-lergh imaj Duw ev a'n formyas, gorow ha benow y hwrug ev aga formya. 28Ha Duw a's bennigas; ha Duw a leveris dhedha, ‘Degewgh frut ha kressya ha lenwel an nor ha'y dhova, ha rewlya puskes an mor hag ydhyn an ayr ha pub kreatur bew ow kwaya war an dor.’ 29Hag yn-medh Duw, ‘Awotta, my re ros dhywgh pub losow gans has war enep an norvys oll ha pub gwydhenn gans frut may ma ynni has. I a vydh dhywgh rag boes. 30Ha my re ros pub losowenn las avel boes dhe bub best a'n nor ha dhe bub edhen a'n ayr ha dhe bub kreatur may ma enev bew ynno ow kramya war an dor.’ Hag yndella y feu. 31Ha Duw a welas pup-tra re wrussa hag awotta, yth o pur dha. Hag y feu gorthugher hag y feu myttin, an hweghves dydh.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Jenesis 1: ABK
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
© Kesva an Taves Kernewek 2004, 2024
© Cornish Language Board 2004, 2024