Mātiu 1
1
Ko e Tohi Hohoko ‘o Si̇̄suú
(Luke 3:23-38)
1Ko e tohi hohoko ʻeni ʻo e tupuʻanga ʻo Si̇̄sū Kalaisi̇́, ʻa ia ko e hako ‘o Tēvita mo e hako ‘o ‘Ēpalahamé. 2Ko ʻĒpalahame naʻe tupu mei ai ʻa ʻAisake, pea ko ʻAisake naʻe tupu mei ai ʻa Sēkope pea ko Sēkope naʻe tupu mei ai ʻa Siuta mo hono ngaahi tokouá. 3Ko Siuta, naʻe tupu mei ai ʻa Fēlesi mo Sala, ʻa ia ko ʻena faʻeé ko Tema, pea ko Fēlesi̇ naʻe tupu mei ai ʻa Hesiloni, pea ko Hesiloni naʻe tupu mei ai ʻa ʻĀlame. 4Pea tupu meia ʻĀlame ʻa ʻAminatape, pea tupu meia ʻAminatape ʻa Nāsoni, pea tupu meia Nāsoni ʻa Salemone. 5Naʻe tupu meia Salemone ʻa Pōasi, ʻa ia ko ʻene faʻeé ʻa Lēhapi, pea tupu meia Pōasi ʻa ʻŌpeti, ʻa ia ko ʻene faʻeé ʻa Lute, pea tupu meia ʻŌpeti ʻa Sese.
6Naʻe tupu leva meia Sese ʻa e Tuʻi ko Tēvitá, pea tupu meia Tēvita ʻa Solomone, ʻa ia ko ʻene faʻeé, ko e uaifi ʻo ʻŪlaiá. 7Naʻe tupu meia Solomone ʻa Lehōpoame, pea tupu meia Lehōpoame ʻa ʻĒsafe, pea tupu meia ʻĒsafe ʻa ʻAsa. 8Pea tupu meia ʻAsa ʻa Sihosafate, pea tupu meia Sihosafate ʻa Siolame pea tupu meia Siolame ʻa ʻŪsaia. 9Pea tupu meia ʻŪsaia ʻa Siotame, pea tupu meia Siotame ʻa ‘Āhasi, pea tupu meia ʻĀhasi ʻa Hesekaia. 10Pea tupu meia Hesekaia ʻa Manase, pea tupu meia Manase ʻa ʻĀmoni, pea tupu meia ʻĀmoni ʻa Sōsaia; 11Pea tupu meia Sōsaia ʻa Sekonaia pea mo hono ngaahi tokouá, ko e kuonga ia ʻo e Takipōpula ki Pāpiloné.
12Pea hili ʻa e Takipōpula ki Pāpiloné naʻe tupu leva meia Sekonaia ʻa Saletili, pea tupu meia Saletili ʻa Seluipēpeli. 13Pea tupu meia Seluipēpeli ʻa ʻĀpaiuta, pea tupu meia ʻĀpaiuta ʻa ʻIlaiakimi, pea tupu meia ʻIlaiakimi ʻa ‘Āsoa. 14Pea tupu meia ʻĀsoa ʻa Sātoki, pea tupu meia Sātoki ʻa ‘Ākimi pea tupu meia ʻĀkimi ʻa ‘Ilaiuti. 15Pea tupu meia ʻIlaiuti ʻa ‘Eliesa, pea tupu meia ʻEliesa ʻa Mātani, pea tupu meia Mātani ʻa Sēkope. 16Pea tupu meia Sēkope ʻa Siosifa, ‘a ia ko e husepāniti ‘o Melé ko e fa‘ē ‘a Si̇̄suú, ‘a ē ‘oku ui ko e Mi̇̄saiá.
17Ko ia, ko e fakakātoa ʻo e toʻutangata meia ‘Ēpalahame kia Tēvitá, ko e toʻutangata ʻe hongofulu mā fā. Pea meia Tēvita ‘o aʻu ki he Takipōpula ki Pāpiloné ko e toʻutangata mo ia ʻe hongofulu mā fā. Pea mei he Takipōpula ki Pāpiloné ‘o aʻu ki he ‘alo‘i ‘o e Mi̇̄saiá, ko e toʻutangata mo ia foki ʻe hongofulu mā fā.
Ko e ‘Alo‘i ‘o Si̇̄sū Kalaisi̇́
(Luke 2:1-7)
18Pea ko hono ʻaloʻi ʻo Si̇̄sū Kalaisi̇́ naʻe anga pehē ni. Na‘e fakamaʻu ʻene faʻeé, ko Mele, ke mali mo e tangata ko Siosifá, ka ʻi he teʻeki ke fai ‘ena mali̇́, na‘e mahino kuo feitama ʻa Mele ki he Laumālie Mā‘oni‘oni̇́.
19Pea koeʻuhi̇̄ ko Siosifa, ʻa hono husepāniti̇́, ko e tangata faitotonu ia, na‘e ‘ikai te ne loto ke fakamaa‘i ‘a Mele ki he kakai̇́, ko ia naʻá ne fakakaukau ke tukuange fakafufū pē ia. 20Kae lolotonga ʻa e kei fifili ‘a Siosifa ki he ngaahi meʻá ni, naʻá ne mamata ki ha ʻāngelo ʻa e ʻEiki̇́ ‘oku tuʻu mai kiate ia, ʻi ha misi. Pea pehē mai ‘e he ‘āngeló ki ai, ‟‘E Siosifa, ‘oua te ke veiveiua ke maʻu ʻa Mele ko ho uaifi, he ko e tama ʻoku ʻiate iá, ʻoku mei he Laumālie Mā‘oni‘oni̇́ ia. 21Pea te ne fāʻeleʻi ha tama tangata, pea te ke fakahingoa ia ko Si̇̄sū, he ko ia ia te ne fakamoʻui hono kakai̇́ mei he‘enau ngaahi angahalá.” 22Pea ʻoku hoko ʻa e ngaahi meʻa kotoa pē, ke fakamoʻoni ʻa e lau ʻa e folofola ʻa e ʻEiki̇́ ʻi he palōfitá, ʻo pehē: 23Vakai, ʻE feitama ha tāupoʻou, pea te ne fā‘ele‘i ha tama tangata pea ‘e fakahingoa ia ko ‘Imānuela, ko hono ʻuhingá, ‟Ko e ‘Otuá ‘oku ‘iate kitautolu.” 24Pea ‘āhake ai ‘a Siosifa mei heʻene mohé, ʻo ne fai ʻo fakatatau ki he tuʻutuʻuni ʻa e ʻāngelo ʻa e ʻEiki̇́ pea ko ia, naʻá na mali mo Mele. 25Ka na‘e ‘ikai te na feʻiloaki fakamali kinaua ‘o aʻu ki he ʻaloʻi ʻo e tamasiʻi̇́, peá ne fakahingoa ia, ko Si̇̄sū.
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
Mātiu 1: TCNT
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Tongan Contemporary New Testament © Bible Society of the South Pacific, 2011.
