LUK 22
22
Jisu ye Southeare Do
(Mt 26.1-5; Mk 14.1-2; Jn 11.45-53)
1Chuo Tachonüh tea kuyu raokonüh nasü ngheikoure. 2Alia napao adumaitao ea razhai dou-apei maitao nou maisouye piyu donou kheikheisoua Jisu ye southea loure bosü puletao nou phouwe.
Judas nou Jisu ye thoupeire lüpeiyu
(Mt 26.14-16; Mk 14.10-11)
3Süthaisü rozümai kiahaitao hrohinou ali soua buyu Iskariot tea kuyu Judas hisü Saitan nou louloure. 4Südonou Judasnou vakouhi süolouzü napao adumaitao ea rathoki khoyu adumaitao hi taloua kabüa puhnou Jisu ye sü puletao bah hi thoupei laisa touyu vanou kuloure. 5Alia puletao nou sasholoua puh hisü pousha peire donou paokoure. 6Südonou Judas-a aetoure ea süsü panou maisouye sükhaimoa puhye sü puletao bah hi thoupeire donou teile zhou aveisü phoushu tare.
Jisu nou Tachonüh Vai toure Soudayu
(Mt 26.17-25; Mk 14.12-21; Jn 13.21-30)
7Sükisü Tachonüh vei zhaotouye posheela laiyu raokonüh teithesü veloure. 8Südonou Jisu nou Pitar ea Johan hi, “Eletao-a Tachonüh vaisü toure donou taho Eletaoye donou souda khaio,” tea paopeiwu-a seitare.
9Puhainou puh hi noue, “Nenou Ehye panou süsü dai kinou soudayu züpawe?”
10Puhnou puhaihi chila peie, “Zhukhaio, nehainou nuhdu nahi talouyu kisü mai alinou dzükhou ali poa nehaiye daolai; puhnou talouyu ki süna hisü nehai-a puh thaifüa taloukhaio, 11alia ki süna paopu nahi, ‘Dou-apeionou nehi paowe, Enou Arozümai taoye koa Tachonüh vai toure kide nasü kahi bue?’ tea paokhaio. 12Alia puhnou nehai hi buh-züh bucheyu kipei kide alisü ngaopeilai; sühinou ha teitei sü soudalou khaio.”
13Alia puhai nou tave ha teiteisü Jisu nou puhaihi paopeiyu büa ngaoloure; alia sühinou puhai nou Tachonüh vaisü souda loure.
Mapao Lito
(Mt 26.26-30; Mk 14.22-26; 1 Kor 11.23-25)
14Alia pha teile süsü velouyu kisü, Jisu nou sei-atamai taoye koa kou arübuh hinou buloure. 15Alia puhnou puletao hi paoe, “Enou veamo nghojü hinou neletaoye koa Tachonüh vai haina hai tounü shoa bure. 16Daiolouzü Enou neletao hi paowe, Ramai Vedei hinou süsü veteloumo koutesü Enou haisü toupu khailaimoe.”
17Süthaisü Jisu nou pai ali poloua ea Ramai hi kalo paowu-a paoe, “Haihai polouwo, alia haisü neletao hrohinou zhisho khaio. 18Daiolouzü Enou neletao hi paowe süolouzü chu shonou Ramai Vedei vemo koutesü Enou darkha rashi dzü sü shokhai laimoe.”
19Süthaisü puhnou rao nasü poloua Ramai hi kalo paoyu thaisü puhnou süsü soukhore ea süsü puletao hi pola pei-a paoe, “Haisü neletaoye donou peiyu Apfüphaoe. Eye li-choloure donou haisü soukhaio.” 20Alia sübütoua vai süna toucheyu thaisü puhnou puletao hi pai nasü polapei-a paoe, “Neletaoye donou lapayu pai hainasü Azhe hinou paoshee souyu Ramai vei ashu vo nasüe.
21“Ana zhukhaio! Eye thoupeiyu puhsü haihinou Eye koa arübuh hinou bue! 22Daiolouzü Mai Nahpoutu sü Ramai nou chodayu thaifüa tabailai, ana puhye thoupeiyu mai süna donou daizhozhou zhuvea leshisa!”
23Alia sükisü puletao hrohinou thaohnou süsü soulaisa touyusü alinou lihi noushu loure.
Adukhana Saovayu
24Alia puletao hrohisü thaohye nou adukhana tea polaisa touyu vanou saovapa loure. 25Alia puhnou puletao hi paoe, “Tahrüh kukhevei vemaitao louzü lah puletao vei maikhe maitao pei hi paopu souwe; alia puletao pei hi khoyu maitaoye nou zhuvea peilou sümai tea kuwe. 26Ana neletaoye donou louzü sübü laimoe; süjüwo neletao hrohinou adukha nanou nakhana bülo, alia süthai peiyu puhnou kuvah soupeina bülo. 27Daiolouzü arübuh hinou toure donou buyu nanou duhi ho kuvah soua buyu nanou duhie? Arübuh hinou buyu nanou mowu? Ana Ewo neletao hrohinou kuvah souyumai ali büa bue.
28“Neletaowo louzü Avei vea-hoyu teiteihi Eye koa bukou tekhouyu taoe; 29alia Apuonou Ahi vedei ali peikhai touyu büa, 30neletaoye panou Avei Vedeihi Avei arübuh hinou tou-sho loure donou ea vebuhtao hinou bua Israelmai khü kiahaiye chi kuloure donou Enou neletao hi vedei ali peikhaitoue.
Jisu nou Raia Pitar nou Motoure Paosü Peiyu
(Mt 26.31-35; Mk 14.27-31; Jn 13.36-38)
31“Simon, Simon! Zhukhaio, Saitan nou neletaoye southou büa chedoure donou kholoure, 32ana nevei lüsü panou hata more donou Enou neye donou veachi paopeire. Alia nenou Ahi khaive puyu kisü, ne thaihou-jürai taoye soutsü peikhaio.”
33Ana Pitar nou puh hi chila peie, “Mapao, Enou neye koa hukhahi ea athaihi tare donou souda-a bue!”
34Jisu nou paoe, “Pitar, Enou nehi paowe, nenou Eye sümoe tea lüh asü paomo koutesü zhou houjünou khaolai moe.”
35Alia sükisü Jisu nou puh rozümai taohi noue, “Enou neletaoye raichoki shavü, lekhabvü moa phikha panou pfümoa seitayu kisü neletao hi chemoyu hatalia buwu?”
Puletao nou chila peie, “Hatalia chemoyu soumoe.”
36Puhnou puletao hi paoe, “Ana chuo shavü buyu puhnou sünasü pfülo, alia lekhabvü bumai-a sübüa pfülo. Alia khoche hayu puhnou puh sahsü zholoua ali hülo. 37Daiolouzü Enou neletao hi paowe, süolouzü sheeyu larübvü hinou, ‘Alia puhye sü mahsoumai taoye koa chothoure’ tea paoyu sü Ahinou vete vuzülai; daiolouzü Avanou rüthoukhai touyu sünasü chechenou veloure.”
38Alia puletao nou paoe, “Mapao, zhukhaio! Haihi khoche ahai bue.”
Alia puhnou puletao hi paoe, “Tai süre!”
Jisu nou Oliv Deichi hinou Veachi Paoyu
(Mt 26.36-46; Mk 14.32-42)
39Alia Jisu nou vakouhi tapaloua raichoki büa Oliv deichi hi tare; alia rozümai tao-a puhthaifü-a tare. 40Alia puhnou buh sühi velouyu kisü puletao hi paoe, “Neletao athaohi loulou more donou veachi pao-a bulo.”
41Alia puhnou puletao hinou chuh laikoulou süpha tadou kouloua sühinou kou khou khüloua veachi paotare, 42“Apuo, nenou züpae toulouzü, pai hainasü Ahinou potapeio; ana Enou li-choyu moa nenou li-choyu sü souloukhaio.” 43Alia sühisü raki vanou rakivamai ali puh hi kouloua puhye sü kou soutsü peie. 44Alia puhsü veayule-a lejünou khoupu-a veachi paoputa khaire; alia puh hudzü sü zhepo büa deiphihi kükou loure.
45Alia puhnou veachi paoyu hinou shuloua rozümai taohi khaikoue ea puletao nou le vealeyu vanou zhia buyu sü ngaoloua, 46puletao hi paoe, “Neletao daidonou zhia bue? Athaohi loulou more donou shuloua veachi paokhaio.”
Jisu ye Nilouyu
(Mt 26.47-56; Mk 14.43-50; Jn 18.3-11)
47Jisu nou sübüa chi paobu kinou, sühisü rozümai kiahai hrohinou ali soua buyu Judas tea kuyu mai sünanou maisouye sapoa tave loure. Puhnou Jisu ye kou münou mulai tea puh ngheikihi takoue. 48Ana Jisu nou puh hi paoe, “Judas, nenou Mai Nahpoutuye münou muloua ngaobamai bah hi thoupei bailaiwu?”
49Alia Jisu ye sühao-a buyu rozümai taonou paresü zhingaoloua puh hi noue, “Mapao, Ehnou khochenou poa daolaiwu?” 50Alia puletao hrohinou mai alinou napao peichana kilaiye sü daopeia puh nou zhoulosü jadere.
51Ana Jisu nou paoe, “Haibüyu hai soupu khaiso!” Alia puhnou mai süna nousü deipei-a puhye sü souvei peire.
52Süthaisü Jisu nou puhye süthai loulai tea taveyu napao adu maitao, rathoki khoyuhi peicha maitao, ea tsümai taohi paoe, “Maivei saotoumai aliye nilaiyu büa khoche ea süda poa neletao tavewu? 53Teithe tsünou Enou neletaoye koa rathoki hinou buyu kisü, neletao nou Eye niloure halia soumoe. Ana chu haisü neletao vei pha nasüe, alia teizhivei khoukonou tukha-salaiyu teile süe.”
Pitar nou Jisu ye Bayu
(Mt 26.57-58,69-75; Mk 14.53-54; Mk 14.66-72; Jn 18.12-18,25-27)
54Süthaisü puletao nou Jisu ye niloure ea puhye sü süthaipoa napao peichana kihi save; alia Pitar nou adou konou thaifüa laiwe; 55alia puletao nou kijü toutsü hinou mei souloua kou koa buyu hisü Pitar-a puletao hrohinou kou buloure. 56Alia kilai loumaina alinou Pitar nou mei voua buyu sü ngaoloua puhye sü pheteiloua paoe, “Mai haina-a Jisu ye koa laiwe!”
57Ana Pitar nou süsü baloua paoe, “Naotupai, Ewo puhye-a sümoe.”
58Phajü thaisü kukhemai alinou puhye ngaoloukhaia paoe, “Ne-a puletao hrohinou alie!”
Ana Pitar nou chila peie, “Mainare, E moe!”
59Alia teilecho alipha thaisü kukhemai alinou bakhao-a paoe, “Veimosoua mai haina-a puhye koa laiwe; daiolouzü puhsü Galilee himai alie.”
60Ana Pitar nou chila peie, “Mainare nenou daiye paosa touyu sü Enou sümoe!”
Alia sübü hinou puhnou chi paobebu kinou houjünou khaoloure. 61Sühinou Mapao nou reiveloua Pitarye zhutei loure. Sükisü Pitar nou Mapao nou puh hi paopeikhai touyu, “Zhou houjünou khaomo jühinou nenou Eye lüh asü koute balai,” touyu chipao nasü liloure. 62Sühinou puhsü vakouhi tapaloua shochesoua kraloure.
Jisu ye Konüyu ea Dapeiyu
(Mt 26.67-68; Mk 14.65)
63Chuo Jisu ye khoa buyu maitao nou puhye sü konü peiwu-a dapeire. 64Alia puletao nou puh nghisü sahnou zhüloua puh hi noue, “Neye dayu nahai thaoh-e? Paosükhaio!” 65Alia puletao nou kukhe chi alaosou puh pei hi paokhai peiwu-a puhye sü sou-ahrao peie.
Jisu ye Save Tsüme Nghojühi Layu
(Mt 26.59-66; Mk 14.55-64; Jn 18.19-24)
66Teinou thelouyu kisü maisouvei tsümai me süolouzü napao adu maitao ea razhai dou-apeimai taosü vedzü loure; alia puletao nou puhye sü puletao vei tsümehi saveloua paoe, 67“Ne Khristae toulouzü, Eletao hi paongaokhaio.”
Ana puhnou puletao hi paoe, “Enou neletao hi paolouzü, neletao nou Eye louchepei laimoe; 68alia Enou neletao hi chi noulouzü neletao nou chila peilaimoe. 69Ana chu shonou Mai Nahpoutu sü Ramai khoukovei bah zhoulova hinou butalai.”
70Alia puletao hrülainou paoe, “Sütoulouzü, ne sü Ramai Nahpoutuwu?”
Puhnou puletao hi chila peie, “E-e tea neletao nou paowe.”
71Alia puletao nou paoe, “Eletao nou kukhe zhopaoh phoupure dai bue? Eletao nou süsü Eletao lah puh mü vuzü hinou chouloure!”
ಪ್ರಸ್ತುತ ಆಯ್ಕೆ ಮಾಡಲಾಗಿದೆ:
LUK 22: POUMBSI
Highlight
ಶೇರ್
ಕಾಪಿ
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
