Popular Bible Verses from Juan 10

ಶೇರ್

Ihuatëroꞌsaꞌ co noyahuëꞌ yonquipi. Ihuatacaisoꞌ, tëpatacaisoꞌ, ataꞌhuantacaiso inapita nicacaisoráchin yonquipi. Caso nipirinhuëꞌ oꞌmarahuë imarinacosopita Yosë nohuitacaiso marëꞌ. Noya noya nanpicaiso marëꞌ oꞌmarahuë.

Casoꞌ ohuica huaꞌanën pochin ninahuë. Imarinacosopita noya aꞌpairahuë. Huaꞌanën noya nipachina, ohuicanënpita aꞌpaiton, co chiminacasoꞌ tëꞌhuatërinhuëꞌ. Inapochachin cantaꞌ imarinacosopita marëꞌ chiminarahuë.

Casoꞌ ohuica pëꞌtahuanaꞌpi pochin ninahuë. Imarinacosopita ohuicanëhuëpita pochin niꞌnahuë. Nohuitërahuë. Noya nataninaco. Nontohuatëra, natëtonaco, imarinaco.

Ca nohuanto, nanpimiatapi. Co parisitopiquë paꞌsapihuëꞌ. Noya aꞌpaiarahuë. Co insontaꞌ osërëtarinacohuëꞌ.

Casáchin yaꞌcoana pochin ninahuë. Ca quëran yaꞌconpatamaꞌ, chaꞌësaramaꞌ. Ohuicaroꞌsaꞌ pipirahuatonaꞌ, noya coshatopi. Ina quëran yaꞌcoantapi. Inapochachin imarinacosopita noya paꞌsapi.

Caso nipirinhuëꞌ noya huaꞌanën pochin ninahuë. Imarinacosopita nohuitërahuë. Cantaꞌ nohuitërinaco.

Tata Yosë nohuanton, imarinaco. Inasoꞌ chini chiníquën nanantërin. Co insontaꞌ nanitërinhuëꞌ Yosë quëran osërëcaisoꞌ. Caso Tatahuëroꞌco napopináchin cancantërahuë, itërin Quisosori.

Tatahuërëꞌco ninohuitëraiso pochin nohuitërahuë. Nosoroato, inapita marëꞌ chiminarahuë.

Caora nohuanto, imarinacosopita marëꞌ chiminarahuë. Co nohuantërahuëꞌ naporini, co tëpainacosoꞌ nanichitonahuëꞌ. Tatahuë shaꞌhuitërinco niꞌton, chiminaꞌhuasoꞌ nohuantërahuë. Ina nohuanton, nanpiantararahuë huachi, itërin.

Napoaton itaantarin: —Tëhuënchachin casoꞌ yaꞌcoana pochin ninahuë. Ohuica pairapipiquë yayaꞌconpatëra, yaꞌcoana quëran yaꞌconëꞌ.

Inpriatoso nipirinhuëꞌ, paꞌpiniꞌ huëꞌpachina, ohuicaroꞌsaꞌ taꞌananpirin. Paꞌpiniri aꞌnaraꞌ macasoꞌ, yaꞌipi ohuicaroꞌsaꞌ yanquëëpi. Inpriatosoꞌ co huaꞌanënhuëꞌ niꞌton, co ohuicaroꞌsaꞌ paꞌpoyatërinhuëꞌ.

Ina quëran Quisosori aꞌchintaantarin. —Ohuicaroꞌsa naporin quëran aꞌchinchinquëmaꞌ natancoꞌ. Ohuicaroꞌsaꞌ aꞌpaicaiso marëꞌ pairapipi. Aꞌnaíchin yaꞌcoana yaꞌhuërin. Aꞌnaquën huëcaton, co yaꞌcoana quëran yaꞌconinhuëꞌ. Nanpërahuaton, yaꞌconin. Inasoꞌ co huaꞌanënhuëꞌ. Ihuatëꞌ, matararo, inapita ina pochin yaꞌconpi ohuica ihuatacaiso marëꞌ.