ការផ្លាស់ប្រែនៃកូនខ្ជះខ្ជាយ (កូនពៅវង្វេង) ជាមួយនឹង លោក ខែល អាយឌលមេន (Kyle Idleman)គំរូ

"គ្រឿងផ្សំសម្រាប់គ្រានៃ AHA - អាហ្អា៎"

ភរិយារបស់ខ្ញុំគាត់មានសៀវភៅចម្អិនម្ហូបនៅឯផ្ទះ ដែលជាកាដូបានមកពីពេលយើងរៀបអាពាហ៍ពិពាហ៍។ សៀវភៅនោះមានឈ្មោះថា «សៀវភៅចម្អិន ដែលមានគ្រឿងផ្សំបីមុខ»។​ ប្រពន្ធខ្ញុំចង់ឱ្យខ្ញុំប្រាប់អ្នកថា គាត់មិនសូវដែលបានប្រើសៀវភៅនោះទេ។ ជាធម្មតា នៅពេលគាត់ចម្អិនម្ដងៗ គាត់ប្រើគ្រឿងផ្សំ ច្រើនជាង ៣ មុខ ទៅទៀត។ ការពិតទៅ ខ្ញុំទៅវិញទេ ដែលជាអ្នកប្រើនូវ «សៀវភៅចម្អិនដែលមានគ្រឿងផ្សំបីមុខ» នោះ។

មានពេលម្ដងម្កាលដែរ ដែលខ្ញុំត្រូវបានអនុញ្ញាតឱ្យចូលចង្រ្កាន ហើយសៀវភៅនេះ​ គឺជាមិត្ដ ដែលខ្ញុំតែងទៅរកពេលត្រូវធ្វើម្ហូបម្ដងៗ ដោយសារតែ​រូបខ្ញុំពូកែពេករឿងគ្រឿងផ្សំ ព្រោះថា​គ្រឿងផ្សំបីមុខ ពិតជាល្មមសម្រាប់សមត្ថភាពរបស់ខ្ញុំ។ អ្វីមួយដែលខ្ញុំបានរៀន តាមធម៌ក្ដៅ​ នៅពេលដែលខ្ញុំប្រើសៀវភៅចម្អិននេះម្ដងៗ នោះគឺថា គ្រប់គ្រឿងផ្សំពិតជាសំខាន់—មែន គឺថាខ្វះមួយមុខ មិនបានទេ។

នេះគឺជាផលលំបាកនៃសៀវភៅចម្អិនដែលមានគ្រឿងផ្សំបីមុខ។ អ្នកមិនអាចស៊ីខ្សែលើបានទេ។ ប្រសិនបើអ្នកប្រើតែគ្រឿងផ្សំតែ ២ មុខ នោះរសជាតិម្ហូប គឺទទួលយកមិនបានទេ។

សេចក្ដីនេះ គឺពិតដូចគ្នារវាងនឹងបទពិសោធន៍នៅពេលអ្នកចាប់បានអ្វីមួយ ដូចពាក្យថា "អាហ្អា៎ ហ្នឹងហើយ"។

ខ្ញុំបានឮពីបទពិសោធន៍របស់មនុស្ស ដែលនៅក្នុងគ្រាគាត់ចាប់បាន (យល់) ពីអ្វីមួយ ជាច្រើនរយនាក់—បើមិនរាប់ជាពាន់នាក់ទេ— នៅប៉ុន្មានឆ្នាំកន្លងមក។ ខ្ញុំបានសិក្សា បទពិសោធន៍ផ្លាស់ប្រែនៃតួអង្គសំខាន់ៗជាច្រើននៅក្នុងព្រះគម្ពីរ។ ដោយមានភាពជាប់លាប់ អ្វីដែលក្រុមមនុស្សទាំងនោះគាត់ចាប់បាន នោះគឺតែងតែមាន គ្រឿងផ្សំ ៣​ មុខជានិច្ច។​ ប្រសិនបើ គ្រឿងផ្សំណាមួយ ក្នុងចំណោមគ្រឿងផ្សំទាំង ៣ បានបាត់ នោះដំណើរបំផ្លាស់បំប្រែ ក៏មានការរអាក់រអួល ដូចខ្សែភ្លើង ដើរខុសចរន្ត ដូចគ្នា៖

គ្រឿងផ្សំនោះមាន៖ (១) ការភ្ញាក់ដឹងខ្លួនភ្លាមៗ (២) ភាពស្មោះទៀងត្រង់ឥតលាក់លៀម (៣) សកម្មភាពអនុវត្ដភ្លាមៗ — (ភ្ញាក់ដឹងខ្លួន ទៀងត្រង់ និងសកម្មភាព — អក្សរកាត់អង់គ្លេសថា Awakening, Honesty, Action = AHA - អាហ្អា៎)

ប្រសិនបើមាន ការភ្ញាក់ដឹងខ្លួន ហើយមានភាពទៀងត្រង់ ប៉ុន្តែគ្មាននូវសកម្មភាព នោះគ្រានៃ AHA នឹងមិនកើតមានឡើងទេ។

ប្រសិនបើមាន ការភ្ញាក់ដឹងខ្លួន និងមានសកម្មភាព ប៉ុន្តែ ភាពស្មោះទៀងត្រង់ ត្រូវបានមើលរំលង នោះគ្រានៃ AHA ក៏នឹងមិននៅបានយូរនោះដែរ។

ប៉ុន្តែ នៅពេលដែលព្រះបន្ទូលនៃព្រះ ហើយនិងព្រះវិញ្ញាណដ៏វិសុទ្ធ នាំសេចក្ដីទាំង ៣ មកក្នុងជីវិតរបស់យើងរួមគ្នា នោះអ្នកនឹងទទួលបទពិសោធន៍នៃគ្រា AHA — ដែលជាគ្រាព្រះជាម្ចាស់បានផ្ដល់ឱ្យ ដើម្បីធ្វើការបំផ្លាស់បំប្រែរាល់គ្រប់អ្វីៗទាំងអស់។

* តើអ្នកត្រៀមខ្លួនសម្រាប់គ្រានៃ AHA ដែលអាចបំផ្លាស់បំប្រែរូបអ្នក ហើយឬនៅ? តើអ្នកស្ម័គ្រចិត្ដ ហ៊ានដើរឆ្លងកាត់នូវជំហានទាំង ៣ នៅក្នុងដំណើរនេះ ដែរ ហើយឬយ៉ាងណា?