Matyu 6
6
NAT NƗMBA KAT MIWA YIGA KWINGWEYA VAK KAT JISAS NDI KAT MBUTNDƗ
1Ngwuk vɨga wuka lɨgiyangwuk. Nat nɨmba kat apma vat yingweya vat kapmba ke kwuka. Nat nɨmba vɨlandi. Vɨnjeyan ngɨni ngwuk kat nyinangwupmba lɨga nyaek wenga ana kwigiyandɨ. 2Sanya lapman kwanda kwanda lapman tɨgiyaa nyan kat kwivat tɨngweyan nyaangɨt ke tak tapmba mbuka. Nat nɨmba avla ndina sɨ kwutaa kwusolɨga nɨmba ndi. Ndi Juda nyaangɨt ngambulɨga ngaymba wuleilaa ava yambɨmba yilaa nyaangɨt mbutaa mɨna kwilɨgandi. Nat nɨmba kat kwilɨnja vak vɨlaa ndina sɨ kwutaa katsonjangat tat tapmba nyaangɨt mbutɨgandi. Ndi ndina wenga nda ndinyangunanamba tamba klandi. Nyinangwupmba lɨga nɨna nyaeknanamba ana klaigandi. 3Sanya lapman kwanda kwanda lapman nyan kat kwivat tɨngweya nda pagwuga agwi ngwula. Ngwulogwinala lɨga nɨmba vɨlandi. 4Pagwuga kwingweyan nɨna nyaek vɨga lɨgandɨ. Vɨlaa apma wenga ngwuk kat kwigiyandɨ.
GOD KAT WAGALANGWA VAK KAT JISAS NDI KAT MBUTNDƗ
5God kat wagalangweya njɨmbla kapmba laataa wagala lɨnja vla ke wagalangwa. Wundi nɨmba avla ndina sɨ kwutaa kwuso lɨga nɨmba ndi. Ndi Judana nyaangɨt ngambulɨnja ngay wuleilaa way ava yambɨmba lɨga laataa God kat wagalalɨgandi. Nat nɨmba ndi kat vɨnjangat kapmba laataa wagalalɨgandi. Ngwuk kat woseka ana wowun. Ndi wenga lamba klandi ndinyangunanamba. 6God kat wagalangweya njɨmbla wupma ke wagalangwa. Ngay weleilaa ngay kamanga kwalalaaa pagwula lɨga kavamba tɨga God kat wagala ngwula. Nyinangwupmba lɨga nɨna nyaek papwula lɨga wagalangweya vat vɨga wutaa apma wenga ngwuk kat kwigiyandɨ. Ndɨno pagwula lɨgandɨ. Ndɨna mbangɨ ana vɨlɨganɨn.
7God kat wagalangweya njɨmbla nɨma sakwat kwo nyaangɨt ke ngambuga. Ngepma ngepma la God kat vɨlapman nɨmba ndina ngepma waagan kat wupma mandɨt mandɨt walɨgandi. Sɨvla mbundɨ nyaangɨt ngambuneyan nɨna waagan wukiyandɨ waa yelavɨtaa ngambulɨgandi. 8Wupma ngambulɨnja vak vla ngwuk ke ngambuga. Nɨna nyaek ngɨni wagalangweya vat ndɨ mbambala vɨga lɨgandɨ. Manda kat nɨma sakwat nyaangɨt ngambuga ndɨ kat wagalagiyangwuk. Nɨma sakwat nyaangɨt ngwuk ke wagalaga. 9God kat ngambuga wagalangweya njɨmbla kupma ngambungwula waa wandɨ Jisas.
Nɨna nyaek nyinangwupmba lɨgamɨn. Mɨna sɨ waga
kwutaa katsonjeyan apma vatna. Mɨn nɨma nyan mɨn.
10Kava kava kat vɨga lɨmeya njɨmbla yaandɨ. Wungi
vat yandeyangat woviyanguga lɨganɨn. Mbambala
nyinangwupmba lɨga nɨmba aywaa mɨna kwundi wuka
lɨgandi. Nɨno kɨpmamba lɨga nɨmba aywaa mɨna
kwundi wutneya njɨmbla nɨn kat yaandɨ. Wungi vat
yandeya njɨmbla kat woviyaguga lɨganɨn.
11Mbambala kɨneya kɨgɨnda nɨn kat agwi mɨla. 12Nɨn
nat nɨmba nɨn kat kavle vat yinja vak kat vɨlaa
kwagalaɨganɨn. Mɨno yina kavle vak kat vɨlaa
kwagala mɨla. 13Kavle vat nɨn kat yaa kwutandɨ.
Wamɨn maa ana nɨn kat yaa kwukiyandɨ. Seten nɨn
kat kwutaa lɨlɨndɨ. Wamɨn maa ndɨ ana nɨn kat
kwutaa lɨgiyandɨ waa God kat wagala ngwula.
14Jisas wandɨ. Ngwuk kat wowun. Nat nɨmba ngwuk kat kavle vat yinja vak kat vɨga kwagalangweyan nyinangwupmba lɨga nɨnɨ nyaek yingweya kavle vat vɨga kwagalagiyandɨ. 15Vɨga kwagalalapman yingweyan ndɨno ana vɨga kwagalagiyandɨ waa wandɨ Jisas.
KƗGƗNDA KƗVAK KAT KAI WALƗNGWA VAK KAT JISAS MBUTNDƗ
16Nat njɨmbla kɨgɨnda kɨvak kat kai walaa God kat mɨna wagalalɨgangwuk. Kɨgɨnda kɨvak kat kai waa lɨngweya vak nat nɨmba mbak vɨlandi. Mɨndama sɨli lɨpmwiga ke lɨga. Nat nɨmba avla ndina sɨ kwusolɨga nɨmba ndi wupma yilɨgandi. Wupma mɨndama sɨli lɨpmwiga nat nɨmba vɨnjangat tɨlɨgandi. Ndina mɨndama vɨlaa ndi kɨgɨnda kɨvak kat kai walaa kwo lɨgandi. Apma nɨmba ndi waa waigandi. Wan ana nglaatandɨ. Awuk ngwula. Ndi wenga tamba ndinyandgunanamba klandi. Ngɨni Godnamba ana klaigandi. 17Kɨgɨnda kɨvak kat kai waa kwagalalaa mbangɨ njangulaa sanda nɨmbi kwuka mbangɨ kwutaa apma mɨndama vɨga lɨngweyan wovuna. 18God kat wagalavat kɨgɨnda kɨvak kat kai waa kwagalalaa tɨngweya vat nat nɨmba vɨlandi. Nɨna nyaek ndɨ vɨlaa apma wenga ngwuk kat kwigiyandɨ. Ndɨno pogwula lɨga nyana. Nɨna mɨni ndɨna mbangɨ ana vɨga lɨganɨn.
NYINANGWUPMBA APMA NDA YISOGA TAAGANGWEYA VAK KAT JISAS NDI KAT MBUTNDƗ
19Kan kɨpmamba ke nɨma sakwat kwanda kwanda yisoga taagaga. Ndɨkna kwutɨndɨ, vɨlɨngɨni kalɨtɨgandɨ. Kun kɨga lɨgiyandi. Sɨkwutɨga nɨmba weleilaa tɨvwi ngɨlɨka sɨkwukiyandi. 20Nyinangwupmba nɨma sakwat kwanda kwanda yisoga taagangweyan wovuna. Ndɨkna ana kwukiyandɨ. Vɨlɨngɨni ana kalɨkiyandɨ. Kun ana kɨga lɨgiyandɨ. Sɨkwutɨga nɨmba ana tɨvwi ngɨlɨka sɨkwukiyandi. 21Ngwutna kwand kwanda nda yisoga taagangwa kavakat mɨna nɨmamba maawupmba yelavɨka lɨgiyangwuk. Kwanda kwand kɨpmamba yisoga taaga lɨga nɨmba kɨpmana nda kat mɨna yelavɨka lɨgandi. Kwanda kwanda nyinangwupmba yisoga taagalɨga nɨmba nyinangwutna nda kat mɨna yelavɨka lɨgiyandi.
MƗNI NGAYNA NDAAMANGE VLA LƗGANDƗ WAA JISAS MBUTNDƗ
22Ngwutna mɨni ngay wuleinja ndaamange vla lɨgandɨ. Mɨnimba vɨngwuk, nɨma sakwat vak ngwula mbangɨ wuleigiyandɨ. Apma nda mɨna vɨga lɨngweyan ngwula mbangɨ ngwula maawut apma vat tɨgiyandɨ. 23Kavle nda mɨna vɨga lɨngweyan ngwula mbangɨ maawut kavle yigiyandɨ. Apma nda ngwula maawut weleigiya nat yambɨ kai. Kavle vat mɨna wuleindyan wan kavle nglei vatna. Apma vat ana ndɨ.
NƗMA NYAN VƗLƗLƗKMBA KƗTA NYAN ANA ALƗPSƗGA NJƗVWA KWUKIYANDƗ WAA JISAS MBUTNDƗ
24Ndu nyan kɨta nɨma nyan vɨlɨlɨkmba ana njɨvwa kwukiyandɨ. Nat nɨma nyan kat kai walaa nat nɨma nyan kat mɨna yelavɨka lɨgiyandɨ. Nat nɨma nyana kwundi wupmak kat kai walaa nat nɨma nyana kwundi mɨna wuka lɨgiyandɨ. Ngwutno wungi vat tɨga nɨmba ngwuk. Godna njwvwa kwukawi sanya njɨvwa kwukawi ana kwukiyangwuk.
NƗMA MAAWUT YELAVƗKA LƗLƗNJA VAK KAT JISAS NDI KAT MBUTNDƗ
25Ngi vak kat ngwuk kat wowun. Kɨngweya nao kɨgɨnda ngu kat nɨmamba ke yelavɨtɨngwa. Kwusongweya waavwi kat ke nɨmbamba yelavɨtɨngwa. Wan kɨgɨnda nɨma vat ana ndɨ. Waavwi nɨma vat ana ndɨ. God waa nyaangɨt wuka apma vat mɨna yiga yetɨneyan wan nɨma vatna. 26Wan wiyaka yi yalɨga waavi kat avɨ ngwula. Ndi ambkat njɨvwa ana kwutɨgandi. Ndi ambukatna nda ana vaga yiga kɨga kwutɨgandi. Ndi ambukatna nda ana vaga yiga kɨga kavamba yisoga taagalɨgandi. Nyinangwupmba lɨga nɨna nyaek ndi kat vɨga lɨgandɨ. Nɨno nɨn kat vɨga lɨgandɨ. Waavi mat nda. Nɨn ndinyangu nɨma nda nɨn. 27Nɨma vak yelavɨka yetɨngwa vak nɨma njɨvwa kwutɨga vak ana ndɨ. Kɨta nyan wundumbu yivak kat vaaka nɨma maawut yelavɨka lɨndeyan ndɨna lɨvɨ nɨmba kat ana kwulakiyandɨ. Wundumbu yivak kat vaatapman tɨgiya nyan kat ana kwulala kwo yetɨgiyandɨ. Ndɨ kiyaigandɨ.
28Kwusoga yetɨngweya waavwi kat manda kat nɨmbamba yelavɨka lɨgangwuk. Kɨpmamba avla waataa lɨlɨga mwe ndi kwuso waavwi kat ana yelavɨka lɨlɨgandi. Mwe ana njɨvwa kwuka waavwi klalaa tavaga yelaga lɨgandi. 29Tamba la King Solomon ndɨ apma nglei waavwi kwusoga lɨndɨ. Ndɨna kwuso lɨnda waavwi mwena mbangɨ kat ana kwulatɨndɨ. Mwena mbangɨ ndɨna waavwi kat kwulatɨndɨ. 30Avla waatɨga nda kat God ndi kat apma yelaga nda kwilɨgandɨ. Avla waatɨga nda nɨma nda ana ndɨ. Sɨvla mbundɨ ana lɨlɨgandɨ. Ndinyangu kalɨka kɨta lɨvwimba yisolaa ya sagalandɨ, vɨka ngɨlɨlɨgandi. Nɨn ndinyangu wupma lɨga nda ana nɨn. Nɨn nɨma nda nɨn. God nɨn kat vɨga lɨga kwusoneya waavwi kwigiyandɨ. Ngwuk nɨma maawut ke yelavɨka lɨngweya. Ngwuk God kat wagala ngwula. 31Kɨweya nao kɨgɨnda ngu andamba lɨndɨ, klaigowun kwusoga yetɨweya waavwi andamba lɨndɨ, klaigowun waa ke nɨmamba yelavɨtɨngwa. 32Godna sɨ wutapman ta nɨmba ndino wupma nɨma maawut yelavɨka lɨndi. Ngwuk Godna nyangu ngwuk. Ndɨ ngwuk kat vɨga lɨga miwa yiga kwigiyandɨ. 33Wan nda kat ngwuk nɨma maawut ke yelavɨka lɨngwa. Godna kwundi wupmak kat mɨna nɨma maawut yelavɨka lɨngweyan ndɨna apma vak kwilaa kan kɨpmana nda ngwutna lak kwigiyandɨ. 34Ngɨni yaiga vak kat ke ngwuk nɨma maawut yelavɨka lɨngwa. Yaiga vak ngɨni yaigandɨ. Nandinya nandinya nɨma vat tɨgiyandɨ. Ngwuk mand kat yaiga vak kat nɨma maawut yelavɨka lɨgiyangwuk. Ana nglaatndɨ.
ទើបបានជ្រើសរើសហើយ៖
Matyu 6: ian
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2013, Wycliffe Bible Translators, Inc. All rights reserved.
