ម៉ាឡាគី 1:3-8 គឺយើងមិនពេញចិត្តនឹងអេសាវទេ យើងបានធ្វើឲ្យភ្នំនៅស្រុកអេសាវ ក្លាយទៅជាទីស្មសាន ហើយយើងបានឲ្យឆ្កែព្រៃមករស់នៅក្នុង ទឹកដីដែលជាចំណែកមត៌ករបស់គេ។ ប្រសិនបើអេដុមពោលថា “ពួកយើង | ព្រះគម្ពីរភាសាខ្មែរបច្ចុប្បន្ន ២០០៥ (គខប)

ម៉ាឡាគី 1:3-8 គខប

គឺយើងមិនពេញចិត្តនឹងអេសាវទេ យើងបានធ្វើឲ្យភ្នំនៅស្រុកអេសាវ ក្លាយទៅជាទីស្មសាន ហើយយើងបានឲ្យឆ្កែព្រៃមករស់នៅក្នុង ទឹកដីដែលជាចំណែកមត៌ករបស់គេ។ ប្រសិនបើអេដុមពោលថា “ពួកយើងនឹងសង់ស្រុក ដែលវិនាសនេះឡើងវិញ!” ឲ្យពួកគេសង់ទៅ! យើងនឹងកម្ទេចស្រុកនោះសាជាថ្មី។ គេនឹងហៅស្រុកនោះថា “ទឹកដីរបស់ជនទុច្ចរិត” “ប្រជា‌ជនដែលព្រះ‌អម្ចាស់ខ្ញាល់រហូត”។ - នេះជាព្រះ‌បន្ទូលរបស់ព្រះ‌អម្ចាស់ នៃពិភពទាំងមូល។ អ្នករាល់គ្នានឹងឃើញហេតុ‌ការណ៍នេះ ហើយពោលថា: “ព្រះ‌អម្ចាស់សម្តែងមហិទ្ធិ‌ឫទ្ធិ ហួសព្រំ‌ដែនស្រុកអ៊ីស្រា‌អែលទៅទៀត!”»។ «ធម្មតា កូនតែងតែគោរពឪពុក ហើយអ្នកបម្រើតែងតែគោរពម្ចាស់របស់ខ្លួន។ ប្រសិនបើយើងជាបិតាមែន ម្ដេចក៏មិនឃើញអ្នករាល់គ្នាគោរពយើង ក្នុងឋានៈជាបិតា? ប្រសិនបើយើងជាម្ចាស់មែន ម្ដេចក៏មិនឃើញអ្នករាល់គ្នាគោរពយើង ក្នុងឋានៈជាម្ចាស់? - នេះជាព្រះ‌បន្ទូលរបស់ព្រះ‌អម្ចាស់ នៃពិភពទាំងមូល។ រីឯអ្នករាល់គ្នា ដែលជាបូជា‌ចារ្យវិញ អ្នករាល់គ្នាមាក់‌ងាយនាមរបស់យើង តែអ្នករាល់គ្នាពោលថា “តើយើងខ្ញុំមាក់‌ងាយ ព្រះ‌នាមរបស់ព្រះអង្គត្រង់ណា?”។ អ្នករាល់គ្នាយកម្ហូបអាហារសៅហ្មង មកដាក់នៅលើអាសនៈរបស់យើង ហើយអ្នករាល់គ្នាពោលថា “តើយើងខ្ញុំបានធ្វើឲ្យព្រះអង្គសៅហ្មង ត្រង់ណា?” គឺមកពីអ្នករាល់គ្នាពោលថា: តុរបស់ព្រះ‌អម្ចាស់មិនសូវសំខាន់ទេ! ពេលអ្នករាល់គ្នាយកសត្វខ្វាក់ មកធ្វើយញ្ញ‌បូជា តើមិនមែនជាការអាក្រក់ទេឬ? ពេលអ្នករាល់គ្នាយកសត្វបាក់ជើង ឬសត្វមានជំងឺមកធ្វើយញ្ញ‌បូជា តើមិនមែនជាការអាក្រក់ទេឬ? បើអ្នកយកសត្វបែបនេះទៅជូន ទេសា‌ភិបាលរបស់អ្នក តើគាត់សុខចិត្តទទួលយក ហើយទទួលអ្នកដោយរាក់‌ទាក់ឬ?» - នេះជាព្រះ‌បន្ទូលរបស់ព្រះ‌អម្ចាស់ នៃពិភពទាំងមូល។

អាន ម៉ាឡាគី 1

ស្ដាប់នូវ ម៉ាឡាគី 1