Marocohacha Laenai 15
15
Coberenadoro Filato acatiha niha Jesosone
(Mt 27.1-2, 11-14; Lc 23.1-5; Jn 18.28-38)
1Nii jana jetaote, jataain janohetiin netaojiaaure saseredotecuru curuaanaacuru aina Jorioocuru bichauhenaauru, Moisesa aitoonjoan que cacha relaaureraauru, chaaen niha chatohaneine rucuheraneein nenacaauru Junta Supremacuru, naaonjoainuri. Nitohaneein jetaote, Jesoso biji ichojoaain amaain Roma curuaanaacha letoai Jorionelanaala nenaa coberenadoro Filato rai tiha cuure. 2Inae nii Filato rene turuaauruhane jana jetaote:
“Iina Jorioocuru Curuaanaa Reey niha”, naa rai Filatone jana jetaote:
“Ejeen. Esinae rauhijiriin acanichaaunne quete aitohi”, nae jetao rai Jesoso.
3Nii jana saseredotecuru curuaanaacuru jetaote, jataain araai laurii itolere ichaain nihane que aitiin colurujeeure.
4Nii jaun jetaote, nacoaauneein rai jetao:
“Aonaaun, jataain araai laurii itolere ichaain neeine que aitiinte icholuruhecure. Chanuna jana tonaain acaauru tonoraeneei”, nae jetao rai Filato.
5Nejetaote, tonoraeniha Jesosone jaun: “Chatohanihane jaunna caa catoonraene”, nae suujua cuhane Filato.
Atinanohi niha Jesosone coina rucuhecuruhane
(Mt 27.15-31; Lc 23.13-25; Jn 18.38—19.16)
6Nitohaneein beseta bana naineein niha chuni colurujuenojoine jetaote, jerecuruha nii cachaaurune rijijieein jianenajaque Filato. 7Nii jana jetaote, caresero cuhane ne leinjiin cacha Barabasineein niicha curuaateeuri. Nii Barabasite leeochaauru aina acaauru curuaanaacuru que nejerateein sonajaain jaaorera ne. 8Nii jana jetaote Filato rene turuhin, nii beseta bana naineein ichanajaaocane rijijieein ichaa Filatone coina caje bajaaure cachaauru. 9Nii jaun jetaote, acaauru rai jetao:
“Aihane jaunna, inara Jorionequichene Curuaanaa Reey jianichaaunne jeriquiche”, nae jetao acaauru rai Filato, 10saseredotecuru curuaanaa amurijiriin coitucuhin cachaauru relaa Jesosone jaun, arajiin cachaauru esenetaain sacuuruhane jaun que necoelai caaun mucuhin rai teeuruhane que nainaane jaun. 11Nejetaote, cachaauru suujuau tacaaure saseredotecuru curuaanaacuru, Barabasi jianeratecuruhane coina. 12Nii jana jetaote, acaauru rai jetao:
“Chatoanai jana ichacaaunne jeriquiche caa Jorioocuru curuaanaa Reeyneein inaraacha curuaatei aina”, naain acaauru caje bajaa Filatone jana jetaote:
13“Coroso que teeinene jerichaanura”, naauruha ehequiinne jaun jetaote:
14“Chatoanai baasonajia ichae”, naa acaauru rai Filatone jana jetaote, nacoaauneein ehequiin jetao:
“Coroso que teechaau”, naaure cachaauru.
15Nii jaun jetaote cachaauru aina caohachaain nenaa jerihane jaun Barabasi jianeein, Jesoso bisichatihane baiha acaauru rai te Filato, coroso que teeuruhane coina.
16Nii jana jetaote, nii cocoainanacai loreri chajeniha Jesoso amaain, soondaro nejesinanejeein ecu satiin netaojiaaure. 17Nitohaneein netaojiaain jetaote, que cajione jichoajiojoai lanajai curujuaain, ojoa caje ichanohin comai lauriaaure coturi que. 18Nii baiha jetaote:
“Acaneein neeine Jorioocuru Curuaanaa Reey”, naaure jetao ehequiin nechu jataain cairichaa que nocoatijiaa.
19Niritiin jetaote, enuha que rai couturi faojoaain colunecuruhane baiha, nechu jataain que ninichaajia nacatiha neseeonriaaure soondarooru. 20Nitohaneein jataain que ninichaajeeuruhane baiha jetaote, nii cajione lanajai jichoajiojoai que niicha curuhacuri rocohin jetao, rai cajione esine curujuaain, jelai caje amaain coroso que tiha cuure.
Coroso que Jesoso teeuruhane
(Mt 27.32-44; Lc 23.26-43; Jn 19.17-27)
21Nii jana jetaote, ocoana caje caaujiha Alejaandoro, Rofo, naaonjoainuri inaca leinjiin cacha Sirene cocoaicha Simoonne jana coaraain jetao cotihacure, nii Jesoso teeuruhane jaanu coroso amaane coina.
22Nitohaneein jetaote, Golgotau Jesoso amaaure. Golgota naane jetaote, “Niha couturi bejerona jaan”, naane aite. 23Inae ecu turuhin sacari mirra jujuaain nenaa que jasiiteein bino que cocoanaa jerecuruhane jana jetaote conaa jerene Jesoso. 24Nitohaneein cairichaain jetaote coroso que teein, “Chariji raineeincha nedareein”, naain que nocoatijiaain ecu nejesinajeein ita rai Jesoso cajione chaluure soondarooru. 25-26Janone nichae nuna macohi ichoae teejia enotone jana coroso que teein jetaote: Jorioocuru curuaanaa niha nocoetohane jaunte, “Jorioocuru curuaanaa Reey ne”, naain que aitiin, laenanohineein nenaa tabara teeure coturiniha. 27Chaaen jetaote ecu aina coroatajai asijiatooru teeure coroso que, leinjiin raotono nichajique, leeocha rai najaabiji nichajique, naaonjoaain. 28Nitohaneein jetaote: “Necha aansai asijiautooruneein nenaa rijijieeinte nereein”, naain laenanohineein niha Cana Coaunera Quiricha inoaensi cuhanene nainae.
29Nii jana jetaote, coturi rurujuaain:
“Ichalaraa. Chajaain aihane Teenforo itajeein nichata janojoin cuhane nacoaauneein michunaa jereeine rijijieein 30ichaajenihane ijiabereeo ichoterateein coroso caje faau”, naain jetao Jesoso nocoeje chanuure satiin ecu situnacaauru.
31Saseredotecuru curuaanaacuru, Moisesa aitoonjoan que cacha relaaureraauru, naaonjoainuri netonai jetaote:
“Leeochaauru ichoteratiha niqui, nete raajenihane jaberoco ichoteratena nainene. 32Chajaain aihane caa coroso caje fauhine Mesihasi- Isaraelitaauru curuaanaa Reeyte coaraain esenetaacache”, naain jetao que ninichaajeeure nii Moisesa aitoonjoan que cacha relaaureraauru. Nii ecu jiniichaain coroso que nenacaauru netonai jetaotechu Jesoso necoejechanuure.
Oha Jesosone
(Mt 27.45-56; Lc 23.44-49; Jn 19.28-30)
33Nii jana jetaote, enoto chujutora caje coaauneein nunuheteein nocohena ne satiin caa chauratane nuna macohi ichoae teejia sonanereentiaain. 34Nii rijieeoritiin jetaote, jataain tonijiaain jetao:
“Eli, Eli, lema sabactani”, naane jetao: “Cana Coaunera cacorataaneeu, chanuna catohaneein canu nainatejeei”, naa jetao aite Jesoso.
35Nii jana nii ecuuneein aonajeeurera tabaauru jetaote:
“Aonacuche profeta inoaensi Erihasi cotihacate aite”, naaure jetao ita rai.
36Nii jaun jetaote, leinjiin acaauru caje nenaa cacha jetao, jeluhariin cuhin cajione que bino baaso elohanti sisiaain amaain jetao, Jesoso rai sijirichae jiarana nujuan macohi que teein cohane coina. “Coa rerohecaachete aihane coroso caje fauha uha Erihasine coaracaache”, naain.
37Nii jana jetaote, jataain tonijiaain auhaquiin inae ohe Jesoso. 38Nii jaun jetaote, ecui nichajai caje nunuheteein ocoai nichaae cuhin nesoaiheite nii Teenforo bujuatecuruhane jaan cajione. 39Nii jana, ecu neein coarajiha Roma rai soondarooru curuaanaane jana niritiin oha Jesosone jaun jetaote:
“Esinae rauhijiriinte, Cana Coaunera Calaohinecaiha caa cachara”, naain jetao ecu coaraje.
40Chaaen enecuru tabaauru jetaote, caje icharajeriin neein coarajeeuruhane jana, ecu acaauru aina ne Maadala bene Mariha, chaaen Jose ocoala Saantiaao neba Mariha, chaaen Salomee, naaonjoainuri. 41Nii ecu neein coarajeeurera enecuru jetaote, aina cuhin Calileea niha Jesosone bana coroatajaneraneein nenacaauru ne. Chaaen jetaotechu, ecu neeure arajiin leeochaauru cachaauru, Jerosaleeun cuha Jesosone jana aina cunacaauru.
Jesoso jaberoco rucuhecuruhane
(Mt 27.57-61; Lc 23.50-56; Jn 19.38-42)
42Inae nocoheca nebetacanaa cojoanonaa que janohane coinane jana, neruujeeuruha Jorioocurune jaa cojoanonaa jana jetaote, 43Filato coaraa cue Arimatea cocoaicha Jose, Jesoso jaberoco bajaane coina. Nii Josete Jorioocuru rai nelateein nenacaauru Jorioocuru bichauhenaauru- Junta Supremacuru caje jataain nelateein nenaa ne. Acaaentonaite tururichaain Cana Coaunera Cojoanonaane cohajeein nelu. 44Nii jaun jetaote, rene turuhin inae oha Jesosone que aitohane jaun cojoelatohane jaun jetao soondarooru curuaanaa cotiharate Filato, esinae rauhijiriin ohane biha raine coitcuhane coina.
45Nii jana rene turuhin inae ohane bihane jaun jetaote Jose rai nii Jesoso jaberoco terate Filato. 46Nii jaun jetaote, Jesoso jaberoco fauhin jataain cajione caohacha lino coreteein nii cajione que conajae Jose. Nitohaneein conaacane baiha jetaote, ajeri jachu cuhane teein, rai bacuujua fuhin ratiri ajeri jaberoco que. 47Nii jana jetaote, ecu aina neein nii Jesoso jaberoco teeuruhane jaa jelai coarajeeure Maadala bene Mariha, chaaen Jose neba Mariha, naaonjoainuri.
ទើបបានជ្រើសរើសហើយ៖
Marocohacha Laenai 15: URA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2005, 2024, Wycliffe Bible Translators, Inc.