Gn 22
22
Li xmayej laj Abrahán
1Chirix chik a'an li Yos kixyal xpaab'aal laj Abrahán ut kixye: “Abrahán, Abrahán!”. Kichaq'ok a'an: “We'kin”, chan. 2Kixye li Yos: “K'am laawalal, li junaj chirib'il, a' laj Isahak li raaro aab'aan. Ayu sa' li tenamit Moria ut toxaayeechi'i aran cho'q k'atb'il mayej sa' xb'een li tzuul li tink'ut chawu”.
3Kiwakliik ut laj Abrahán toj hik'ho, kixyiib' rix li xb'uur, kixk'am chirix wiib' aj k'anjel chiru, rochb'een laj Isahak li ralal. Kixtz'ir xsi'ul li mayej ut koho sa' li na'ajej li kiyehe'k re xb'aan li Yos. 4Sa' rox li kutan laj Abrahán kixtaqsi li rilob'aal ut kiril li na'ajej chi toj najt. 5Toja' naq laj Abrahán kixye reheb' laj k'anjel chiru: “Kanaaqex arin wan wi' li b'uur. Laa'in ut li ch'ina'al xik qe toj le'. Toxooloq'oninq chaq, toja' naq toosutq'iiq chaq arin”, chan.
6Laj Abrahán kixchap xsi'ul li mayej, kixk'e chi riiqa laj Isahak li ralal; kixk'am sa' ruq' li xam ut li ch'iich', ut koheb' chi xkab'ichaleb'. 7Toja' naq laj Isahak kixye re laj Abrahán li xyuwa': “Wa'!”. Kichaq'ok a'an ut kixye: “K'aru, at walal?”. “Waye' li xam ut li si', ab'anan b'ar wank li karneer re li mayej?”, chan laj Isahak. 8Kixye laj Abrahán: “Matk'oxlak, at walal. Li Yos taanawoq re li karneer re li mayej”. Wotz yookeb' chi xik.
9Naq ke'wulak sa' li na'ajej kixye li Yos, laj Abrahán kixyiib' jun li artal ut kixtus li si' sa' xb'een; chirix a'an kixb'ak' laj Isahak li ralal ut kixk'e sa' xb'een li artal,#22,9 Stg 2,21. sa' xb'een li si'. 10Toja' naq laj Abrahán kixye' li ruq' ut kixchap li ch'iich' re xkamsinkil li ralal. 11A'ut li x'ánjel li Qaawa' kiraatina chaq toj sa' choxa: “Abrahán, Abrahán!”, chan re. Ut a'an kixye: “We'kin arin”.
12Kixye li ánjel: “Maataqsi laawuq' sa' xb'een li ch'ina'al ut mik'a' aab'aanu re: anaqwan ninnaw naq nakaxiwa ru li Yos, xb'aan naq ink'a' xaram chiwu laawalal, li junaj chirib'il”.
13Toja' naq laj Abrahán kixtaqsi li rilob'aal ut kiril jun karneer t'ilt'o chaq li xxukub' sa' li k'ix. Koho, kixchap chaq li karneer ut kixkamsi cho'q xmayej, reeqaj li ralal.#22,1-13 Sab 10,5; 1 Mak 2,52; Heb 11,17-19. 14Ut laj Abrahán kixk'e cho'q xk'ab'a' li na'ajej a'an: “Li Yos nanawok re”. Jo'kan nayeemank chalen toj anaqwan: “Sa' li tzuul, li Yos nanawok re”.
15Li x'ánjel li Qaawa' kiraatina laj Abrahán xka' wa toj sa' choxa 16ut kixye re: “Li Qaawa' xye chi jo'ka'in: «Xwil naq xab'aanu a'in ut ink'a' xaram chiwu laawalal li junaj chirib'il. 17Jo'kan naq xinye li waatin chi tz'aqal yaal naq q'axal tatwosob'tesi ut tink'ihob'resi chi yo'oon eb' laawalal aak'ajol, jo'aqeb' xk'ihal li chahim sa' choxa ut li samahib' chire li palaw.#22,16-17 Heb 6,13-14; 11,12. Eb' laawalal te'eechaninq re li xtenamiteb' li xik' neke'ilok reheb'. 18Sa' xk'ab'a'eb' laawalal aak'ajol osob'tesinb'ilaqeb' chixjunil li tenamit sa' ruuchich'och', xb'aan naq xapaab' li waatin»”.#22,18 Eklo 44,21; Hch 3,25; Gal 3,8.
19Kisutq'iik laj Abrahán wankeb' wi' laj k'anjel chiru, ut wotz ke'xchap xb'e re xik Berseba. Ut aran kikanaak laj Abrahán.
Eb' li ralal xk'ajol laj Najor
20Moqon chik kiyehe'k resil re laj Abrahán: “Lix Milká ajwi' kirala xk'uula'aleb' laj Najor laawiitz'in: 21laj Us, xb'een alalb'ej; laj Bus, riitz'in a'an, ut laj Kemuel, li xyuwa' laj Aram; 22laj Késed, laj Jasó, laj Pildás, laj Idlaf ut laj Betuel”. 23Laj Betuel a'an xyuwa' lix Rebeka. Eb' li waqxaqib' a'in ralaleb' laj Najor, li riitz'in laj Abrahán, rik'in lix Milká.
24Li xkab' rixaqil laj Najor, xRewmá xk'ab'a', kiwank ajwi' xk'uula'aleb': laj Tebaj, laj Kaján, laj Tajas ut laj Mahaká.
ទើបបានជ្រើសរើសហើយ៖
Gn 22: QQC
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Q'eqchi DC Bible © Bible Society in Guatemala, 2005.