Gḭ-Néje 7
7
Noe andə mee kəi-kag’d lé
1Njesigənea̰ ula Noe pana: I gə njémeekəije ləi lai, a̰dje mee kəi-kag’d. Mbata m’ooi gə́ njemeekarabasur nɔm’g mbuna njé gə́ d’isi dɔ naŋg nee ɓasinè lé. 2I a mbər daje gə́ d’àr ŋgad-ŋgad joo-joo, bɔbee gə kea̰, bɔbee gə kea̰ loo siri-siri gə mba kɔm dee rɔi’g ləm, daje gə́ d’àr el lé i a mbər dee joo-joo, bɔbee gə kea̰, bɔbee gə kea̰ mba kɔm dee rɔi’g ləma, 3yelje gə́ d’aw dara lé kara i a mbər dee joo-joo, kóna gə ma̰dee, kóna gə ma̰dee loo siri-siri ləm tɔ mba ŋgəm dee kar dee d’unda kó na̰ dɔ naŋg nee bura ya. 4Mbata nai ndɔ siri ndá m’a kar ndi ər dɔ naŋg nee dan kàrá gə loondul’g as ndɔ rɔ-sɔ tɔɓəi m’a tuji nékundaje lai gə́ ma m’unda dee dɔ naŋg neelé ya. 5Noe ra néje lai gə́ Njesigənea̰ un ne ndia aree mba karee ra lé ya.
Man bélm
6Ləb koji Noe aḭ tɔl misa̰ (600) ɓa mán bélm taa dɔ naŋg nee ɓəi. 7Noe gə ŋganeeje gə́ diŋgam, gə dené ləa, gə denéje lə ŋganeeje gə́ diŋgam lé d’andə mee kəi-kag’d mbata lə mán bélm neelé . 8Mbuna daje gə́ d’àr ŋgad-ŋgad ləm, gə daje gə́ d’àr el ləm, gə yelje ləma, gə néje lai gə́ d’aw kəmba dɔ naŋg nee ləm tɔ lé 9deḛ d’andə goo Noe’g mee kəi-kag’d joo-joo, bɔbee gə kea̰, bɔbee gə kea̰, to gə́ Ala un ne ndia ar Noe mba karee ra lé tɔ. 10Ndɔ siri gogo lé ndá mán bélm taa naŋg nee pəl-pəl.
11Mee ndəa gə́ ləb Noe aḭ tɔl misa̰ (600) mee naḭ gə́ njekɔm’g joo, gə ndɔ dɔg-giree-siri lé mán bélm ḭ bwa gə́ naŋg teḛ budu-budu ləm, kəm dara ɔr wuyum gə mán ləm tɔ . 12Ndi ər dɔ naŋg nee dan kàrá gə loondul’g as ndəa rɔ-sɔ. 13Mee ndəa gən lé Noe gə ŋganeeje gə́ diŋgam, Sem gə Kam gə Japet ləm, gə dené lə Noe ləma, gə denéje lə ŋganeeje gə́ munda ləm tɔ lé deḛ lai d’andə mee kəi-kag’d lé na̰’d. 14Daje gə́ wala lai gə gel dee gel dee ləm, nékulje lai gə gel dee gel dee ləm, daje lai gə́ d’ag naŋg gə gel dee gel dee ləm, yelje lai gə gel dee gel dee ləm, yelje gə́ tḛ́-tḛ́ bèe lai ləma, gə néje lai gə́ d’ḭ gə bag dee ləm tɔ lé d’andə sə dee na̰’d mee kəi-kag’d ya. 15Nékundaje lai gə́ d’aw kəmba lé d’andə gə Noe na̰’d mee kəi-kag’d joo-joo. 16Nékundaje lai neelé, bɔbee gə kea̰ d’andə keneŋ, to gə́ Ala un ne ndia ar Noe lé. Bèe ɓa Njesigənea̰ udu tarəw dəa’g.
17Man bélm taa dɔ naŋg nee pəl-pəl as ndəa rɔ-sɔ. Manje neelé d’ḭ d’un kəi-kag dɔ naŋg’d lé gə́ tar kəŋgəŋ-kəŋgəŋ. 18Man lé ḭ mbaḭ-mbaḭ ula, tur dɔ naŋg nee ndá ar kəi-kag lé nun dɔ mán’g. 19Man lé ḭ dɔ maree’g gə́ kédé-kédé tur dɔ mbalje gə́ ŋgal léŋgé-léŋgé lai-lai dɔ naŋg nee tɔ. 20Man lé ḭ tur dɔ mbalje gə́ ŋgal léŋgé-léŋgé dəs as kəmkil dəw dɔg-giree-mi gə́ tar. 21Nékundaje lai gə́ d’aw kəmba dɔ naŋg neelé d’udu guduru ya, yelje ləm, gə nékulje ləm, gə daje gə́ wala ləm, gə daje lai gə́ d’ag naŋg ləma, gə dəwje lai ləm tɔ. 22Nékundaje lai gə́ d’əmə gə əm dee gə́ d’aw ne kəmba dɔ naŋg gə́ tudu’g lé d’wəi mburug ya. 23Nékundaje lai gə́ d’aw kəmba dɔ naŋg neelé d’udu guduru ya, un kudee dɔ dəwje’g aw njal teḛ dɔ nékulje’g ləm, gə daje gə́ d’ag naŋg ləma, gə yelje gə́ d’aw tar ləm tɔ, deḛ d’udu guduru dɔ naŋg nee ya. Noe gə deḛ gə́ d’isi səa na̰’d mee kəi-kag’d lé ba ya ɓa nai.
Noe unda loo mee kəi-kag’d teḛ
24Man bélm taa loo dɔ naŋg nee yəŋgəm-yəŋgəm as ndɔ tɔl dəa rɔ-mi (150).
ទើបបានជ្រើសរើសហើយ៖
Gḭ-Néje 7: SBA2015
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Ngambai Bible © Alliance Biblique du Tchad 1989, 2015.