Gén 12
12
Toq ri Dios nroyoj ri Abram
1Ri Jehová kan kere' rubin chire ri Abram: Katel-el wawe'. Taya' kan re ruwach'ulew re', re awinaq y ri e aj pa rachoch ri atata' y xtink'ut chawech ri akuchi xkabe-wi. 2Y xkebek'oje' awijatzul y rik'in jun chike rije' xtinben jun nimalej tzobaj winaqi'. Xkatinwurtisaj y xtinben chawe chi xkatok jun nimalej achin chuwech re ruwach'ulew. Y keri' xkatok jun urtisanik chike ch'aqa' chik. 3Y xkenwurtisaj ri xke'urtisan awichin rat. Y ri xtikoyoj itzel pan awi', chuqa' yin xtinya' itzel pa kiwi'. Y awoma k'a rat xkenwurtisaj konojel jay winaqi' richin chijun ruwach'ulew, xcha'. 4Y ri Abram xbe k'a, kan achi'el bin chire roma ri Jehová; y ri Lot ri ruch'utik'ajol xbe rik'in. Y ri Abram k'o k'a oxk'al wolajuj rujuna' toq xel-el chiri' pan Harán. 5Xuk'uaj k'a el ri Sarai ri rixjayil, ri Lot ri ruch'utik'ajol, ronojel ri rubeyomel ri ruch'akon y ri winaqi' ri xeruloq' chiri' pan Harán. Xeruk'uaj k'a el pa ruwach'ulew Canaán. Y toq xapon chiri', 6ri Abram kan xbe-kela' xbe-kela' ri xuben chupan chijun ruwach'ulew y k'ari' xapon k'a pa Siquem ri akuchi k'o-wi jun li'aj paten-che', chiri' pa Moré. Y chupan ri ruq'ijul ri' k'a ek'o na ri rijatzul ri Canaán chiri'. 7Y ri Jehová xbepapo' chuwech ri Abram y xubij chire: Chike konojel awijatzul xtinya-wi re ruwach'ulew re', xcha'. Y jari' ri Abram xuben-q'anej jun porobel richin xuporoj jun kamelabel chuwech ri Jehová roma chiri' xuk'ut-wi-ri' chuwech. 8K'ari' xbe-el pa taq'aj ri chuwi-juyu', chiri' pa relebel-q'ij pa Betel y chiri' xupaba-q'anej ri rachoch ri banon rik'in tzieq y xuben chikikojol ka'i' tinamit; pa qajbel-q'ij k'o-wi ri Betel, y pa relebel-q'ij k'o-wi ri Ai. Y chiri' xuben-q'anej chuqa' jun porobel richin xuporoj jun kamelabel chuwech ri Jehová y kan xuya' ruq'ij. 9Y ri Abram xel-el chiri' y eqal-eqal xapon-qa ri pa xokon.
Toq ri Abram xapon chuwech ri rey richin Egipto
10Y chiri' pa Canaán xpe k'a jun nimalej wayjal, y roma ri' ri Abram xapon pan Egipto y chiri' xbek'oje-wi, rokik niq'ax ri wayjal ri'. 11Y toq ye'apon yan chupan ri ruwach'ulew Egipto, jari' toq xubij-el chire ri rixjayil: Yin wetaman chi kan at jebejoj ok; 12Y toq xkatkitz'et ri achi'a' aj-Egipto xtikibij: La ixoq la' rixjayil rija', xkecha'. Y roma ri' rije' xkinkikamisaj yin, y rat xtikiya' kan ak'aslen. 13Y roma ri' tabij k'a chi at wana'; richin keri' utz k'a xtikiben wik'in yin, y xkik'ase' k'a awoma rat, xcha' ri Abram.
14Y toq xe'apon k'a rije' chiri' pan Egipto, kan keri' na wi xbanatej, ri achi'a' ri aj chiri' toq xkitz'et ri Sarai kan jebel na wi ok xkitz'et. 15Chuqa' ri e tata'al richin ri q'atbel-tzij richin Egipto toq xkitz'et, xbekitzijoj chire ri rey chi k'o jun xten janila ti jebejoj ok. K'ari' rije' xkik'uaj-el k'a pa rachoch ri rey.
16Y roma ri Sarai, ri rey kan utz k'a xuben rik'in ri Abram, y kan xuya' k'a kokoj y nima'q taq rawej, chuqa' xeya' rubur chi achij chi ixoq, ru-camello y rusamajela' chi achi'a' chi ixoqi', ri kan e yuqul pa samaj. 17Jak'a ri Jehová xuya' k'a pe nima-yabil pa ruwi' ri rey y pa kiwi' konojel ri ek'o pa rachoch; yabil ri kan kichin achi'a' y ixoqi', roma ri rey ruk'amon-qa ri rixjayil ri Abram. 18K'ari' ri rey xuteq royoxik ri Abram y xubij chire: ¿Achike k'a roma kere' xaben chuwe? ¿Achike roma man xaq'alajirisaj ta chinuwech chi re ixoq re' awixjayil? 19¿Achike k'a roma xabij chi awana'? Xaben chuwe richin xinch'ob chi xok ta wixjayil. Wakami k'a, ja awixjayil re'. Tak'uaj-el y kabiyin, xcha-el chire. 20K'ari' ri rey xubij chike ri rusamajela' richin tikelesaj-el ri Abram pan Egipto, ri rixjayil, y konojel ri e richin rija'.
ទើបបានជ្រើសរើសហើយ៖
Gén 12: KQC
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Kaqchikel Bible © Bible Society in Guatemala, 2003.