Jon 21
21
Datngin tarut non Jisas rat kita Jisas Galili
1Tei limalen ba Jisas mwe sesra mwetani ni mini non tarutni le tahkin ut Taebirias. Tei te leli na tedapmak ahe. 2Saemon Pita bi Tomas niah rat tehu i Mwelap, Nataniel niah tei ni aji at Kena niah Galili, bi nujun Sebedi nuru bi datngin tarut non Jisas nuru karu, rat tepma ut bwaleh. 3Saemon Pita bep mini datngin tarut non Jisas nuhu, “Nama van si nembohni mat.” Ra bep mini nuhu, “Taban sera nga.” Ra ban bi ram sip li aga. Tei bung watnende ba rat bam lepte apma bwaleh nga. 4Entorah metakal tegamra dowo ba Jisas ban mwi di mwatwen sileng li on. Non tarutni rat baililngi tenga nuhu tei ni Jisas. 5Bep mini ni nuhu, “Malgel ni, kat lepte apma io tebu?” Ra balu ini ra bep nuhu, “Apma bwalen tebu.” 6Bep mini ni nuhu, “Karu bohni nomi kubwen mwi sip li maun aga ah mwiji.” Ra bohni, rat gam bep rama rap bamula ba tei temres pon, gonani ik tei te wewelip lelen. 7Datngin tarut non Jisas niah Jisas te mwegololo ini bep mini Pita nuhu, “Subu ihe.” Entorah Saemon Pita te rongo goah tei ni Subu bi mogo bamula karuan bwelan niah te koro bainang bi but vale teh. 8Datngin ni rat ga samulma li aga, rat reva no kubwen ah tei te wewelip i ik. Tei rat ba di tenga nawut dini vini, nawut nan ba tei sasari nuhu ngap ngawul kalim. 9Entorah rat wutwut vaut ba ram gita kaba ah tedi nem mwap, bi bered bi ik rat ti nemnok le veran. 10Jisas bep mini ni nuhu, “Karu lepte datngin ik i kat gamra reva nong.” 11Saemon Pita mwi sip mwe reva kubwen ah te wewelip i ik. Mulngan ik ni nong ba tei tewudelu vabwaleh bi ngawul kalim vapnan kajil. Tei masen ah ik tei tewewelip le kubwen, ka kubwen tei tebamret tenga. 12Jisas bep mini ni nuhu, “Karupma si negan.” Aji le non tarutni teba ga uhleli nga nuhu, “Kik itan?” gonani rat teililngi nuhu tei ni Subu. 13Jisas ban mali bered bi maskani mini ni, mwe lel mwetani tapmak mini ik.
14Tei vakajilan nanong nagoah Jisas te sesra ni mini non tarutni limalen goah te dumre bamul dini mete.
Jisas nuru Pita
15Tei limalen goah rat kan leut sera bi Jisas bep mini Saemon Pita nuhu, “Saemon nujun Jon, kom mwegololo nana ngate vali leut ahe?” Pita balu ini bep nuhu, “Iao Subu, kom maililngi goah nam mwegololo i kik.” Jisas bep mini nuhu, “Kon git gololo goah ram geni bilak nujunuju sipsip.” 16Tei vakaruan ba Jisas bep mwetani mini nuhu, “Saemon nujun Jon, kom mwegololo i nan?” Balu ini bep nuhu, “Iao, Subu, kom mailingi nuhu nam mwegololo i kik.” Jisas bep mini nuhu, “Kon git gololo li goah ram geni bilak sisip ni.” 17Tei vakajilan ba Jisas bep mwetani nuhu, “Saemon nujun Jon, kom mwegololo i nana?” Rongnan nokon Pita te kapmwate ini, gonani Jisas te uhleli nai vakajilan nong nuhu, “Kom mwegololo i nana?” Bep mini nuhu, “Subu, kom maililngi leut sera, ba nam mwegololo ngate i kik.” Jisas bep mini nuhu, “Kon git gololo li bilak sipsip ni. 18Mwetaknga letlet nam bep mini kik entorah kot tei malgel, ba kot woji bamula kik i kaen, bi ko ban ut ah kot toni. Ba entorah kon gamui bujutebwet, ba kon nemrani ngam, bi aji watnende boji kik bi mwatkae kik ban ut ah tebaite nom tonian nga ko bat vante iginan.” 19Le vehuran nong ba Jisas te doptop nokon mete ah Pita bat mat ini, bi bat teskani meresan mini God. Jisas bep mini Pita nuhu, “Ko dahkuru nana.”
Jisas nuru aji le non tarut
20Pita te karabukak, ba mwi gita datngin tarut non Jisas, niah Jisas tei te mwegololo ini. Tei aji nanong niah teol vamaun Jisas entorah ratti negan bi mu uhleli ini nuhu, “Itan nanong niah man bos i kik, Subu?” 21Entorah Pita te kita bi bep mini Jisas nuhu, “Ani gavak u enang ihe, Subu?” 22Jisas balu ini bep nuhu, “Tigoah nam bat toni nuhu bat tok bovani goah nam bat mulma ba ko bihni nuhu mwe gap u kik? Ko dahkuru nana.” 23Vep nan morop ban masen non tarutni na goah Jisas tevep nuhu ajile datngin non tarutni nong ba man ba mat nga. Ba Jisas tei teba vep tenga nuhu man ba mat nga, ba te vep nuhu, “Tigoah nam bat toni nuhu bat tok bovani goah nam bat mulma ba ko bihni nuhu mwe gap u kik?”
24Tei datngin tarut non Jisas nanong niah te vep seresere leut ni rahe, bi teul bata bi tam maililngi nuhu non toptowan ba tei mwetaknga.
Noknan vehuran
25Apma hal kawu lengleng ngama ah Jisas te leli ba tigoah bat ul bwabwalehlakan ini ba nam bihni dopmi nuhu uruu bat ba wuhu buk nga ah bat ulan.
ទើបបានជ្រើសរើសហើយ៖
Jon 21: APMA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Published by the Bible Society of the South Pacific in 1977.
