Jon 20
20
Muu niah rat titimi Jisas lelen tei tebulobulong
1Tei jubung bwaleh le Sande, entorah ut tei tebung ngama ba Meri aji havin at Magdala, ban le muu niah rat tipmi Jisas lelen. Tegam ban ba mwi gita goah vet temlilte bahka wan katvin muu nong. 2Mo rop ban ben Saemon Pita nuru datngin tarut non Jisas, niah Jisas temwegololo ini. Te van bi bep mini nuru nuhu, “Rat teli Subu te dini ut le muu, bi tat baililngi ut nga ah rat telngi iginan.” 3Pita nuru datngin tarut non Jisas nong, ramru rop ban le muu niah rat telngi Jisas lelen. 4Ramru rop garu ban, ba datngin tarut non Jisas nong mo rop sasviri Pita bi ban bawo le muu ut ah rat telngi Jisas iginan. 5Te van bi mool mwi sip le muu ba mwi gita sereul ah rat lubwa Jisas lelen. 6Tegai limalen ba Saemon Pita bupngak, bi mwe sip ras le muu. Tegam sip ba mwi gita sereul ah rat ti, ba mamjin Jisas tei tebulongte. 7Bi sereul ah rat lubwa bujun Jisas ini tetpo nge. Tei tebapto tinga mini sereulni nong, ba rat mamki luhmwi bi ram ling gololo ma ini nihken. 8Tegai limalen ba datngin tarut non Jisas niah te van bawo mwe ga sip bi mwi gita, bi bihni mwetaknga nan. 9Ratru leglegini rada ngama i ululan at mwate niah te vep nuhu man dumre bamul radanae dini mete. 10Tarut non Jisas nuru nong ramru mul bamul ut ah ratru dok iginan.
Meri niah aji havin at Magdala te kita Jisas
11Meri tedi rada ngama nedeng wan katvin muu. Entongama ah tedi nedeng ba mool mwi sip le muu, 12ba mwi gita enjil nuru karu ratru goro bwelakte tedap. Ratru sadok ut ah Jisas tetpo iginan. Go te sadok le bujun bi go mwe sadok le wokon. 13Ramru uhleli ini nuhu, “Kom denghi apma?” Ba balu ini bep nuhu, “Rat teli nok Subu, bi bat baililngi ut nga ah rat telngi iginan.” 14Entorah te vep tedapmak nong bi mwe garabukak. Te gam git ba mwi gita Jisas ah tedi, tei tebaililngi tenga nuhu tei ni Jisas. 15Jisas mu uhleli ini nuhu, “Ani kom dehngi apma? Itan ah kom dongvi?” Meri tegam bihni nuhu tei ni aji nan ut leko bi bep mini nuhu, “Tigoah kon neli mamjin Jisas, subu, ba ko vep ut ah kot telngi iginan mini nana, metan goah nan ban nelep bamula.” 16Jisas bep mini nuhu, “Meri.” Meri mwe garabukak bi bep mini li dalen at Isrel nuhu, “Raboni.” Meramnan vehuran nong nuhu, “Sesesrakan.” 17Jisas bep mini nuhu, “Kon ba wuhte nanan, gonani nat bado samul nga ben Tadat, ba ko van ben kisak ni bi nebep rotvi mini ni nuhu nam samul ngama ben Tadat niah bi Temami, bi nok God bi nomi God.” 18Meri niah aji havin at Magdala ban bi bep mini tarut non Jisas nuhu te kita Subu, bi te vep vehuran ahe mini.
Jisas tempa ben non tarutni
19Tei ut tebwarek ni nge le Sande nanong ba tarut non Jisas ram mapma mwetak ut bwaleh, bi ram di dobo le ketap teko, gonani rat temtani Jiusni. Jisas mwe sak mwi di le mase bi bep mini ni nuhu, “Ut terororong nedi masemi.” 20Te vep sera mini ni tedapmak non bi mwe sesra ngaan bi mwarin mini ni. Non tarutni rat wewelip i bwera rongnan nokokte tekabis entorah rat kita Subu. 21Jisas bep mwetani mini ni nuhu, “Ut terororong nedi masemi. Tapmak goah Tadat tesro nana, ba nanong nam masro gimi.” 22Te vep sera mini ni tapmak bi mo ngongos vanoko bi bep mini ni nuhu, “Karu li Tabite Kokon. 23Tigoah kan bihni gabarani kapmwaan non tarutni ba God man bihni gabarani dini ni, ba tigoah kan ba vihni gabarakte no kapmwaan nga ba no kapmwaan man di rada noko.”
Jisas nuru Tomas
24Tomas niah tei datngin tarut non Jisas, niah rat tehu i Mwelap. Tei teba sok tenga mase entorah Jisas tepma bee. 25Tarut non Jisas niah rat kita Jisas entorah tepma bee, ra bep mini Tomas nuhu, “Kamat kita Subu.” Tomas bep mini ni nuhu, “Tigo nante nuhu nam bat kita bwaren nil le ngan bi le wokon bi nelngi warunguk lelen, bi nelngi ngak le bwaren ut ah rat vena le mwarin ba nam ga bihni mwetaknga nan.”
26Sande bwaleh te van ba tarut non Jisas ram mapma mwetak ut bwaleh bi tei ni Tomas. Rat ti le ketap teko ba Jisas mapma mwi di le mase bi bep mini ni nuhu, “Ut terororong nedi masemi.” 27Bep mini Tomas nuhu, “Ko kita ngak nahe. Kolngi warungum dokah, bi ko sangruhwani ngam bi kom malngi le mwarik. Kawute nagoah nom vihni mwetakngaan behbeh, ba ko vihni mwetaknga.” 28Tomas balu ini bep nuhu, “Nok Subu, bi, nok God.” 29Jisas bep mini nuhu, “Ko vihni mwetaknga nak nanong gonani kom gita nana? Rongnan nokok tekabis mini aji ni niah ram bihni mwetaknga entorah rat ba kita nana nga.”
Halan goah aji ahe te ulu buk ah
30Jisas te leli ililnan rowok tegol ni hal kawu lengleng dobo le masen non tarutni, niah teba ulan tenga le buk ahe. 31Ba nat teulu vehuran ni rahe, metan goah ka bat vihni mwetaknga nan nuhu Jisas ba tei ni Kraes bi tei ni Nujun God. Nat teulu tedapmak metan goah ka bat wutdihi masan le han, gonani ka bihni mwetaknga nan vehuran ni rahe.
ទើបបានជ្រើសរើសហើយ៖
Jon 20: APMA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Published by the Bible Society of the South Pacific in 1977.
