Jon 15
15
Jisas bibi mamjin kawa niah wan modok
1“Nana nambi mamjin kawa niah wan modok. Tadat bibi ajinan goah mwigit li ut leko nanong. 2Mwedas gabarak sera ran kawa dini nana niah wan mambulong. Bi ran kawa goah matka nokok ba makmak ini metan goah manmudok ngate. 3Gimi kam dapmak kawa ah rat makmak ini, li dalekte niah kat rongo dini nana. 4Nanong ba karudok le nana, bi nana nandok le gimi. Wan nomi masan man bulong tigoah kanba dok nga le nana. Tapmak goah wan kawa mambulong tigoah ran kawa nanong man batka tenga nokon bujun.
5“Nana nambi torobihin kawa nanong, ba gimi kam geni ran. Aji ah man dok le nana ba nana nandok le aji nanong bi wan non masan manei kawu lengleng. Ba tigoah kanba dok nga le nana ba kan badi tenga nelel bwirite apma bwaleh. 6Aji ah teba dok nga le nana ba man geni ran kawa niah ramatgu bi mwedasan baiang. Ran kawa nanong ba ran apko vaut bwaleh bi ram gabarani vale kaba ut ah ran map iginan. 7Tigoah kandok le nana, ba dalek ni katrongo dini nana nong ba mandok le gimi. Bi apma nannga ah kan uhleli i nana, ba kaneli apma nanong. 8Bibi meresan kawu tokol mini Tadat entorah wan nomi masan modok. Bi entorah kam leli tapmak ba kanei mamjin nok tarut. 9Nam mwegololo i gimi tapmak goah Tadat mwegololo i nana. Bi kandok gololo le nok mwegololoan. 10Tigoah kanemko li nok dalek telingling, ba karu dok le nok mwegololoan. Tapmak goah namamko li dalek telingling non Tadat bi namdok le non mwegololoan.
11“Nambep tapmak mini gimi metan goah nok rongnan nokok tekabis batti le gimi. Bi rongnan nokomi batmugabis ngate. 12Nok dalek telingling ah namalngi mini gimi ba naah karu mwegololo i aji go. Tapmak goah nat mwegololo i gimi. 13Moan mwegololoan niah manei non aji u walun non mweranni ba naah maneskani non masan u ni. 14Gimi ba kanei walun nok mweranni nante tigoah kanleli apma ah natelngi mini gimi. 15Nat bamuhu gimi ngate i atnan karihni gonani aji ah bibi atnan karih ba tebaililngi apma nga ah non subu mweleli. Gimi kabi walun nok mweran gonan natvep sera leut mini gimi niah nat rongo dini Tadat. 16Kat ba kitulute nana nga ba nat kitulu gimi. Bi nat vajuru gimi nuhu kan ban, bi wan nomi masan manmudok ngate, niah man badi tenga nenokte. Bi tigoah kanuhleli apma i Tadat li nana ba maneskani apma nanong mini gimi. 17Apma bwaleh ah namaskani mini gimi, nante ah karu mwegololo i aji go.”
Tarut at li uruu rat kitriani tarut non Jisas
18“Tigoah tarut at li uruu ran gitriani gimi, ba kan bihni goah rat kitriak bawora nana ba mwegai gimi. 19Tigoah kabatei ajinan ut li uruu ba tarut at li uruu rabat mwegololo i gimi, gonani kabi ajinan ut li uruu. Ba nat kitulu gimi bi kat bamui ajinan ut li uruu nga. Bujun nanong nagoah tarut at li uruu ram gitriani gimi. 20Kan ba malukte apmaan ah nat vep mini gimi. Niah nat vep mini gimi. Niah nat vep nuhu, ‘Atnan karih ba tebaite ni kawu nga sasviri non subu.’ Tigoah ran gitriani nana ba ran gitriani gimi tedapmak. Tigoah ran rong mwetani dalek ba ran rong mwetani dalemi tedapmak. 21Ranlel sera leutnae vanokomi niah rat kapmwaan u gonani kabi nok aji. Gonani rat baililngi Tadat nga niah tesro nana. 22Tigoah nambat ba sipma nga bi nedoptop mini ni ba rabat baililngi nga nuhu rabi ajinan kapmwaan. Ba nanong ba utnen lingsuraknan no kapmwaan ba tebulongte. 23Aji ah mwigitriani nana ba mwigitriani Tadat tedapmak. 24Tigoah nambat ba leli bwerabwera uman ni nga nanong le mase niah aji tebado leltenga ba rabatbai ajinan kapmwaan nga, ba nannga ba rat kita apma ah nat leli bi rat kitriani nana bi Tadat uru. 25Ba apma nanong mangap radanae metan goah manleli ba manrop bwiswis na vehuran niah matpo le Temwat non God niah tevep nuhu, ‘Bujun tei tebulong nagoah rat kitriani nana.’
26“Bejimmi man sipma niah Tabite Kokon nan mwetaknga, mwisipma ben Tadat. Nanesro dini Tadat bi man sipma nedoptop nokon apma ah nat leli. 27Bi goah gimi bi kan dop rorop i topnan apma nanong gonani katok bek le vawonan, bi butdihi ut mwerani.
ទើបបានជ្រើសរើសហើយ៖
Jon 15: APMA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Published by the Bible Society of the South Pacific in 1977.
