Sealm 7
7
Sealm VII
Þysne seofoðan sealm Dauid sang þæ he seofode his ungelimp to Drihtne (þæt wæs þa Absalon his sunu hine adrifen hæfde of ðam rice) - þa hine teonode and wyrde Chus Geminis sunu, þa seofode he þæt to Drihtne; and swa deð ælc mann þe þysne sealm singð, mænð his earfoðu to Drihtne; and swa dyde Crist, þa he on eorðan wæs.
1Drihten, min God, to þe ic hopige:
alys me fram eallum þam þe min ehtað, and gefriða me,
2þæt næfre mine fynd ne gripen mine sawle swa swa leo,
for þam ic nat ealles hwa me ahredde and gehæle butan þu wylle.
3Drihten, min God, gif ic to þisum þe me nu swencað þæs geearnod hæbbe,
þæt hi nu doð, oððe ænig unriht wið hi gedon hæbbe,
4oþþe furðum him gulde yfel wið yfle, swa swa hi hit geworhton,
þonne ofslean me mine fynd orwigne - næs þas þe mine frynd beon sceoldon -
5and secan mine fynd mine sawle and þa gefon,
and oftreden on eorðan min lif,
and minne weorðscipe to duste gewyrcen.
6Aris, Drihten, on þinum yrre, and ræs on minra feonda mearce,
and geweorða þe sylfne þara.
Aris, Drihten, to þinum gehate, and do swa swa þu gehete
- þæt wæs, þæt þu woldest helpan unscyldegum.
7Gif þu swa dest, þonne cymð swiðe mycel folc to þinum þeowdome,
and þu uppastihst and hi mid þe lætst to heofonum.
8Drihten, dem folcum and dem me.
Drihten, dem me æfter minum gewyrhtan,
and dem me æfter minre unscæðfulnesse.
9Geenda nu þæt yfel þæra unrihtwisra,
and gerece and geræd þa rihtwisan,
þu, Drihten, þe smeast heortan and ædra and manna geþohtas.
10Mid rihte we secað fultum to þe, Drihten,
for ðam þu gehælst þa heortan rihtra geþohta.
11Þe Drihten þe is rihtwis dema and strang and geþyldig,
hwæðer he yrsige ælce dæge?
12Bute ge to him gecyrren, se deofol cwecð his sweord to eow.
And he bende his bogan; se is nu gearo to sceotanne.
13He teohað þæt he scyle sceotan þæt deaðes fæt (þæt synt, þa unrihtwisan).
He gedeð his flan fyrena þæt he mæge mid sceotan and bærnan
þa þe her byrnað on wrænnesse and on unðeawum.
14He cenð ælc unriht; and hit cymð him sare and his geferum.
15He adylfð þone pytt, and he hine ontynð,
and on þone ylcan befylð.
16Gehweorfe his sar on his heafod,
and on his brægn astige his unriht.
17Ic þonne andette Drihtne æfter his rihtwisnesse
and herie his ðone hean naman and lofige.
ទើបបានជ្រើសរើសហើយ៖
Sealm 7: ASPsa
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
The first 50 psalms are credited to King Alfred the Great and were written in c.890-899 AD, and the last 100 psalms were translated c.900-950 AD by an unknown poet.