लुका 7
7
रोमि कप्तानक बिस्वास
(मति ८:५-१३)
1येसुइ मानुसक भिडसब्के अर्ति दिइसक्लपाछु कफर्नहुम जाइकेभइल। 2उछिका रोमि कप्तानक एक्दमइ मायालु नोकर; मन्देइकुन मोरिकेलाग्ल रहइ। 3येसुक बारेयँ कप्तानेइ सुन्लपाछु, यहुदि अगुवासब्के पाठाइकुन “मेर नोकरके निक पारिदेओ” कइकुन बिन्ति करिके लागाल। 4येसुक लघि यहुदि अगुवा आइकुन जोडदार बिन्ति चाढातिन कहल, “रोमि कप्तान साँच्चिकइ तेउह्र साहेता पाउलाहार योग्यक मानुस हखत। 5किकेकने उहाइ हाम्र जातके माया करित् हसे हाम्र लागि सभाघर पुनु बानाइदेल हखइ।”
6येसु उसबसाङ जाइकेभइल। येसु घरक नजिकइ पुग्लार बेलाके, कप्तानेइ आफ्न साँङगातिसब्के यस्न समचार कहिके पाठाल, “तोहे दुख झुनकरिके हबखाइ, तेउह्राके आफ्न घरभितर लेजिके लायक्क मोइ निजबाटम, 7मोइ आफइ पुनु तेउह्र आघु आइके लायक्क निजबाटम। तर तोहे आग्या दिकेहबखाइ हसे मेर नोकर निक भइत। 8बड्क हाकिमसब्क अधिनयँ मोइ पुनु रहिके पोरित, हसे मेर अधिनयँ पुनु सिपाहिसब बाटइ। मोइ एक्टाके, ‘जाउक्’ कहतम्, उसे जाइत; अर्कके ‘आउक्!’ कहतम्, उसे आइत; हसे आफ्न नोकरके पुनु, ‘यस्के कर’ कहतम्, उहाइ करिहालित।”
9येसुइ इसे कुरा सुनिकुन छक्कइ पोरिकेभइल; हसे आफ्न पाछु लाग्ल मानुससब्क हुलके चाइकुन कहिकेभइल, “मोइ तेउह्रासब्के कहतम्, मोइ इस्राएलिसब्क माझयँ पुनु यत्का धेरइ बिस्वास कर्लाहार मानुस निजभेट्ल।”
10हसे कप्तानेइ पाठाल मानुससब घर फर्किकुन जइतेखना उक्र नोकरचाहिँ निक भइसक्ल रहइ।
येसुइ बिधुइनिक छावाके बाचाइके भइल
11येसु केहाउ दिनपाछु नाइन सहरयँ जाइकेभइल, ओनेन्क चेलासब र मानुससब्क बड्क भिड पुनु ओनेन्क पाछु लाग्ल। 12येसु सहरक केवारियँ आइपुग्ल बेला, एक्टा मोर्ल मानुसके बोकिकुन मलमेसब जाइराख्ते रहत। जोनो मोर्ल मानुसचाहिँ बिधुइनिक एक्टाइ मत्रइ छावा रहइ। मानुससब्क बड्क भिड पुनु उसे बिधुइनिसाङ मलमे जइते रहत। 13जब बिधुइनिक दुख देखिकेभइल प्रभुक मन दयाइ भरिकुन अइल, हसे ओनेनेइ उख्राके कहिकेभइल, “झुनरोउक!” 14हसे येसुइ नजिकइ जाइकुन मोर्ल मानुसक पलङ्गा छिइकेभइल, हसे मलमेसब टक्क ठोडेल। येसुइ मोर्ल मानुसके कहिकेभइल, “ए बाबु, मोइ तेह्राके कहतम्, उठुक्!” 15मोर्ल मानुस जुरुक्कइ उठिकुन बोस्ल र कुरा करिके थाल्ल। येसुइ उसे छवँडके आफ्निक उइयाक जिम्मा लागाइदेल।
16परमेसोरक सक्ति देखिकुन सभइ जेना छक्क पोरिकुन ओनेन्साङ डाराल र परमेसोरक प्रसम्सा कर्तिन कहल, “बड्क एक जेना अगमबक्ता हाम्र माझयँ देखा पोरिकेभइल बाटत। परमेसोर आफ्न मानुससब्के बाचाइके अइल हखत।”
17येसुइ उसे छवँडके बाचाइकेभइल समचार यहुदियायँ र उछिका भइल यतेओते सभइ ठाउयँ फइलिल।
येसुक बारेयँ युहन्नाइ कुरा बुझिके पाठाल
(मति ११:२-१९)
18येसुइ करिकेभइल सभइ कुरा, युहन्नाक चेलासबेइ आफ्न गुरुके सुनाल हसे युहन्नाइ आफ्न दुहइ चेलासब्के बोलाइकुन 19प्रभु येसुक लघि यस्के कइकुन पुछिके पाठाल, “हामे आस कर्ल बाचालार राजा तोहे नइ हखउ कि, हामे अर्कइक पायड चाँइके?”
20हसे येसुक लघि आइकुन उसबेइ पुछ्ल, “हामे आस कर्ल बाचालार राजा तोहे नइ हखउ कि हामे अर्कइक पायड चाँइके? बप्तिस्मा देलाहार युहन्नाइ हाम्राके इसे कुरा पुछिके पाठाल हखइ।”
21येसुइ उहइ बेलाके धेरइ मानुससब्के रोग र भुतसे निक पार्ते रहत र आँखि निजदेख्लाहारसब पुनु आँखि देख्लार भइल। 22येसुइ युहन्नाक चेलासब्के कहिकेभइल, “तोहेसब जे देख्ल र सुन्ल बाटसब, युहन्नाके जाइकुन कहुक्, आँखि निजदेख्लाहारसबेइ देख्ते बाटत, हिठिके नइजेसक्लाहारसब हिठिके सक्ताहात्, कोररोग लाग्ल मानुस राम्र भइल बाटत, बहिरासबेइ सुन्तात्, मोर्लसब बाच्तात् र परमेसोरक खुसिक समचार दुखि गरिबसबेइ पुनु सुनिके पाउताहात्।#यसइ ३५:५-६; ६१:१ 23मेर बारेयँ सङ्का नइजेकर्लाहार मानुस साँच्चिकइ आसिक पाइत!”
24जब युहन्नाक चेलासब जइल, तब येसुइ मानुससब्के उक्र बारेयँ कहिकेभइल, “तोहेसब उजाड-ठाउयँ किति चाहिके जइल? किति बातासेइ हल्लाल निङ्गालाके? 25बाहार किति चाँइके जइल? राम्र लुगा लागालाहार मानुसके? राम्र लुगा लागालाहार मानुस त राजदरबारयँ मोज-मस्तियँ बस्तात्। 26मेराके कहुक् त, तोहेसब किति चाँइके जइल र? किति अगमबक्ताके? हँ, मोइ कहतम्, तोहेसब अगमबक्ता कते पुनु बड्क एक जेनाके देख्ल बाटउ। 27किकेकने धर्मक कितापयँ युहन्नाक बारेयँ यस्के लेख्ल बाटइ, ‘चाहुक्, मोइ मेर दुतके तेर आघु-आघु पाठाते बाटम। हसे उहाइ तेर पायड तयार पारित।#मला ३:१’ 28मोइ तेरासब्के कहतम्, युहन्ना कते बड्क जर्मलाहार मद्धे कोलोउ नइजे बाटइ, तइपुनु जोनो परमेसोरक राज्जेयँ सभइसे नान्हि बाटइ, उसे युहन्नासे पुनु बड्क हखइ।”
29परमेसोरक आग्या साँच्चिकइ ठिक रलाइ कइकुन युहन्नाक अर्ति सुनिकुन मानुससबेइ बप्तिस्मा लेल। तिरो उठालाहार पापि भइकुन पुनु उसबेइ आग्या मानिकुन बप्तिस्मा लेल।#मति २१:३२; लुक ३:१२ 30परमेसोरके इन्कार करिकुन फरिसि र धर्मगुरुसबेइ चाहिँ युहन्नासे बप्तिस्मा निजलेल।
31येसुइ कहिकेभइल, “इसे पुस्ता मानुससब्के मोइ कक्रसाङ दाजिके? उसब कस्न बाटत? 32उसब त बजारयँ बोसिकुन केट-केटि जस्नइ एक-अर्कसे यस्न कुरा कर्ताहात्, ‘हामे तेउह्रसब्क लागि बाँसि बाजाइदेते पुनु तोहेसब निजनाच्ल! हसे दुखक गित गिदाते पुनु, तोहेसब निजरोउल!’ 33बप्तिस्मा देलाहार युहन्ना अइल जोनेइ अङ्गुरक मोद नपिइकुन उपास बस्तेरहत, तोहेसब ओनेन्के भुत लाग्ल मानुस कहल। 34खइते र पिउते मोइ मानुसक छावा अइल, मेराके चाहिँ तोहेसब ‘चाहुक्, उसे घिचुवा, मोदहरे, तिरो उठालाहार र पापिसब्क साङ्घाति’ कइकुन दोस लागाते बाटउ। 35परमेसोरसे बुद्धि पाउलारसबेइ नइ ओनेन्क बुद्धिके ठिक कताहात्।”
येसु सिमोन फरिसिक घरयँ जाइकेभइल
36येसुके एक जेना फरिसिइ खाइके बोलाल, येसु जाइकुन उक्र घरयँ खाइके बसिकेभइल। 37येसु फरिसिक घरयँ खाइके बोसिकेभइल बाटत कइकुन सहरक एक्टि पापि बेटिइ सुन्लि, उहाइ एक्टा सिङ्गमरमरक सिसिभोरि बासालार अत्तर लेइकुन उहइ घरयँ आइपुग्लि।#मति २६:७; मर्कु १४:३; युह १२:३ 38हसे येसुक पछाडिकमाटे आइकुन उसे ठोडेइकुन रोइके थाल्लि र रोउर बोहाइकुन येसुक गोड भिजाइके थाल्लि। ओनेन्क गोड आफ्न बारेइ पोछिकुन चुम्लि#७:३८यहुदि चलनअनुसार गोडयँ चुमिकुन मान कर्लाहार चलन रहइ। र बासालार अत्तर खनेइदेलि। 39येसुके खाइके बोलालार फरिसिइ इसे देखिकुन मनयँ सोचिके थाल्ल, “येसु साँच्चिकइ अगमबक्ता हखत कने त, ओनेन्के छिउलारि कोनि र कस्नि खाल्कि पापिनि बेटि हखि कइकुन जान्तथनाइ।”
40येसुइ ओख्निहिँ उसे फरिसिके कहिकेभइल, “सिमोन, मोइ तेह्राके केहाउ कुरा कइकेपरित।”
उहाइ कहल, “आग्या देओ, गुरुजिउ!”
41येसुइ कहिकेभइल, “सुनुक्, एक जेना साहुसे दुइ जेनाइ रिन लेलरहइ, एक जेनाइ पाँच सय चाँदिक सिक्का र अर्कइ पचास चाँदिक सिक्का। 42दुहइ जेनाइ रिन तिरिके निजसक्लगुनेइ साहुइ रिन छाडिदेल। आबे कहुक् त, साहुके कोनेइ चाहिँ, बढि माया करित्?”
43सिमोनेइ कहल, “मेर बिचारयँ, बढि छेमा पाउलाहार चाहिँ।”
येसुइ कहिकेभइल, “तोइ ठिक कहल बाटस्।”
44ओनेनेइ बेटिपटि फर्किकुन सिमोनके कहिकेभइल, “इख्राके देख्लबाटस? मोइ तेर घरयँ अइल, तोइ मेराके गोड धोइके पानि पुनु निजदेल, तर मेर गोड इहाइ रोउरेइ भिजाइकुन आफ्निक बारेइ पोछिदेलि। 45मेराके तोइ चुमिकुन मान नइजेकर्ल, तर मोइ अइल बेलासे नइ इहाइ गोडयँ चुमि राख्लि बाटि। 46मेर बारयँ तोइ तेल निजलागाइदेल, तर मेर गोडयँ इहाइ बासालार अत्तर पुनु खनेइदेलि। 47इहाइ किति करिके यस्न कर्लि बाटि कइकुन मोइ तेह्राके कहतम्, इक्र धेरइ पाप छेमा भइसक्ल गुनेइ इहाइ मेराके धेरइ माया देखालि। थोरइ पाप छेमा भइल मानुससबेइ चाहिँ थोरइ नइ माया कर्ताहात्।”
48येसुइ बेटिके कहिकेभइल, “तेर पाप छेमा भइसक्ल बाटइ।”
49उछिका खाइके बोस्लाहार मानुससबेइ एक-अर्कयँ कहिके थाल्ल, “इसे कोनो हखइ पाप छेमा कर्लाहार?”
50तर येसुइ बेटिके कहिकेभइल, “तेर बिस्वासेइ तेह्राके बाचाल बाटइ, आबे सान्तिसे जाउक्।”
ទើបបានជ្រើសរើសហើយ៖
लुका 7: DRY
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024 (Active), Mother Tongue Translators Society and Wycliffe Bible Translators, Inc. All rights reserved.
