Jone 16
16
1Pira sau si Jisu, Ira na sakasa aipira sa qa tei ule vanigou tu sagou, ko agou muke tatupe. 2Kode mai iju palenigou pa ruma vavaikamuna sagou, beto ko sa korapa lame sa na totoso tonai ira doru mai vamategou agou sa kode mai doro veinia qai korapa roiti laonia kai roiti jongana tana Tamasa sa na vamatemiu agou. 3Ko na roiti vei inara sa mai roitiniria ira ura qaike gigilai ira sa na Tamaqu beto ara. 4Ba aipira sira na sakasa qa tei pojanigou tu sagou, ko tonai mina kamua sa na totoso mai roiti vei ira sa agou muna roqu vakoititiria sira na paranga qa tei pojanigou tu ara,>> sau si Jisu.
Na Roiti Tana Gagala Tabuna
<<Ego na sakasa aipira sa qake oqani pojanigou ara pa popodalaina, ura ara qa suvere tavitigouqua gu sagou. 5Ba kopira sa ara qa korapa lao tana isa sa garunusiu sara, ba kepore kame agou bi nanasasiu, <Pai muna lao?> biunisiu. 6Ba kopira tu qa ule vanigou na sakasa aipira ara, sa sa pugelia na takulanga sa na bulomiu agou. 7Ba ma pojanigou na sosoto ara sagou: sa jongana jola tamugou sa ara mana taloa riu. Ura vei manake taloa riu sara, poni sa na vaitokai sa minake lame tamugou. Goto vei mana taloa riu sara, sa beto mana garunu lagerenia tamugou ara sisa. 8Ko tonai mina lame isa sa mina udukuria ira pa kasia gusu na veveina na sela, na veveina na tuvisi beto na veveina na vaipitu. 9Qai selania ira sa na veveina na sela, ura koko vei qaike vasosotosiu sara. 10Qai selania ira sa na veveina na tuvisi, ura qa korapa lao tana Tamaqu ko munake bati ligusiu sara. 11Qai selania ira sa na veveina na vaipitu, ura na bangarana na kasia gusu api sa sa tei tapitu tu.
12Qai soku jola sira na sakasa qa oqoro pojanigou ara, ba kopira sa kode munake boka vakoititiria agou sira. 13Ba tonai tu mina lagere sisa, na Gagala sa kolea na sosoto, sa mina toni laonigou pa doruna sosoto. Minake vavakatonia na ona mekana sisa, goto mina vavakatoniria isa sira sa nongororia beto mina ule vanigou sira na sakasa qai korapa lame. 14Isa sa mina valavatasiu ara, ura kode mina teku vakarovo gu taqu beto sa mina ule vanigou sagou. 15Doruna sa isongia na Tamaqu sa taqu, ko sa vei isa sa qa parangania ara, <Kode mina teku vakarovo gu taqu beto sa mina ule vanigou sagou,> qaunia ara,>> sau si Jisu.
Na Takulanga Beto Na Qera
16Pira sau i Jisu, Pana kai iqo totoso beto sa munake batisiu sara, beto sa pa kai iqo totoso mule pa liguna isa beto sa muna batisiu sara, sau si Jisu.
17Poni sa kaki ira na ona sepele sa qai kole vainanasa, <<Na sa ginuana sapi isa vei sa pojanigita isa, <Pana kai iqo totoso beto sa muneke batisiu sara, beto sa pa kai iqo totoso mule pa liguna isa beto sa muna batisiu sara,> saunia isa? Beto ko na sa ginuana sisa, <Ara sa qa korapa lao tana Tamaqu,> saunia isa? 18Ko na sa ginuana sisa <Kai iqo totoso> saunia ina? Ura, ko gita ko ba taqeke gigilai sa isa sa pojai isa!>> qarigu.
19Ba sa tei gigilaiona tu i Jisu sa qai kole nyogua nanasia ira sisa, ko pira sauniria, <<Isa tugu na paranga qa pojai ara, <Pa kai iqo totoso beto sa munake batisiu sara, beto sa pa kai iqo totoso mule pa liguna isa beto sa muna batisiu sara,> qaunia ara, sa qu korapa vainanasania agou? 20Sosoto pa sosoto ma pojanigou ara sagou: kode muna lukana na kekebo sagou, ba na kasia gusu sa mina qera. Agou sa muna takulanga, ba na miu takulanga mina peluku qera. 21Totonai mi popodo sau sa na rereko bogatana sa sa kolea isa sa na takulanga, ura sa kamua sa nona totoso okotona. Ba pa liguna sa tei vaporea tu isa sa na koburu, poni sa sa muma pale isa sa na vitigi ura sa qerania isa sa kai tinoni sa tei podo lame tu pa kasia gusu. 22Ko agou sa kopira sa kolegou na takulanga, ba totonai mana kai doro ligugou mule ara poni sa na bulomiu sa mina pugelia na qera, ko na qera isa sa minake tateku varijo tamugou.
23Ko pa rane isa sa munake tepai kai sa taqu sagou. Sosoto pa sosoto ma pojanigou ara sagou: isa muna tepania na Tamaqu pa isongoqu ara sa mina vanigou tugu. 24Sa kamua kopira sa qu oqoro tepai kai sa pa isongoqu ara sagou; mu tepa ko mu tekua, ko na miu qera mi okoto vatale,>> sau si Jisu.
Ara Qa Tei Vakilasia Tu Sa Na Kasia Gusu
25Pira sau i Jisi, Ira na sakasa aipira sa qa tei vavakato vanigou tu ara pa vavakato vavapada. Ba na totoso sa korapa lame tonai manake vavakato vanigou pa vavakato vavapada sagou, goto kode mana vavakato lolodaka vanigou gu na veveina na Tamaqu sagou. 26Pa rane isa sa agou tu sa muna tepa pa isongoqu ara sagou; ara kode mana tepa vanigou tana Tamaqu qakeu sara. 27Ura na Tamaqu mekaqu sa roroqugou sagou. Sa roroqugou sisa ura agou qu roroqusiu beto qu tei vasosotoa tu sa ara na kokoqu tana Tamaqu sara. 28Qa koko lagere vei tana Tamaqu poni qa lagere pa kasia gusu sara, beto ko kopira mule sa mana taloa pa kasia gusu api ko mana mule lao tana Tamaqu sara, sau si Jisu.
29Poni qai paranga sira na ona sepele, <<Doro! Kopira qu vavakato lolodaka sao, quke vavakato varove pa vavakato vavapada. 30Kopira qe vakabere vatalea agei sa ao qu gigilai doru kai sa, ko maike kilu nanasigo na tinoni beto muna gigilaimua ao sa na manugu qai rorovea. Ko sa vei isa sa agei qe vasosotoa sa na lame veimu tana Tamasa sao,>> qarigu.
31Poni sa oeria i Jisu sira, <<Ai vei, kopira qu vasosoto? 32Vainongoro ko! Na totoso sa korapa lalameona, ko sa tei kamu tu sa kopira, tonai muna okoto nyanyalia na okoto miu eqa mai veinigou sagou, ko muna loa vamekainisiu sara. Ba ara sa nake mekaqu sosoto, ura na Tamaqu sa korapa suvere tavitisiu sara. 33Ira na sakasa aipira sa qa tei pojanigou tu ko pa miu kole kame taqu muna isongia agou sa na bule. Pa kasia gusu kode muna gosoria na vitigi. Ba mu varene! Ara qa tei vakilasia tu sa na kasia gusu!>> sau si Jisu.
ទើបបានជ្រើសរើសហើយ៖
Jone 16: LGA
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2024, Islands Bible Ministries. All rights reserved.
