Matta 9
9
Yesu A Gung Nʊ Nɨ A Swam Swamɨ
(Mar 1:1-12; Luk 5:17-20)
1Yesu a dɔ tɨyamwɛngɔ, a yab wɨmagɔ a shu a tuulɔ nɨ ga dʊʊlǝmɨ. 2Nǝngɔ ja bɛ gǝm nǝn nʊ nɨ bʊtɔgɔ a swam swamɨ, daam a wɨlǝn. Yesu a kuwo nǝtǝm bɨlǝngkɛl jini, nǝngɔ a sʊwa nʊ nɨ a swam swamɨ gɔ, “Bʊla mɨ, maa fulotǝm nǝl. N kǝlǝm mʊn bwɨlangkɛl mʊnɔ.”
3Nǝngɔ kaam nǝb mɛlalɨ diilɔ a sʊwaka a bʊtɔ ji gɔ, “Nʊ nɨ a kal dun Kwaamaɨ.”
4Yesu a kwɛl a nyǝm bʊʊlalɨ jinɔ, nǝngɔ a sʊwa gɔ, “N wɛ a bwɨ jǝ́ maa bwɨlang bʊʊlalɨ lɛ a nǝl jeni? 5Nʊ won a laa jǝlɨ, ja sʊwa gɔ, ‘Ja kǝlǝm mʊn bwɨlangkɛl mʊnɔ,’ jǝbɔ a wʊnɨ ja sʊwa gǝn gɔ, ‘Gun yɔ yɔm mʊnɨ?’ 6Mǝ swɨ lɛ jǝ́ nyǝm gɔ, Bʊla Nǝlɨ nǝngǝn nǝn fɔlɔn kǝlǝmtǝm bwɨlangkɛl a tǝm nɨɨ.” Nǝngɔ a sʊwa balɨ nɨ bʊtɔgɔ a swam swamɨ gɔ, “Gun do wɨlǝn mʊnɔ shu a lɔ.” 7Gǝ tǝgǝn a gun, a shu a lɔ. 8Nǝb nɨ a mʊrkaɨ a kuwo nyɨɨ, nǝngɔ taalɔ a ta jii, ja bǝlá Kwaama nɨ a nǝ nǝbɔ fɔlɔnɨ.
Jotǝm Mattaɨ
(Mar 2:13-17; Luk 5:27-32)
9Yesu a yɔ a kǝgaɨ, nǝngɔ a kuwo kaa nǝl dunɔ nǝn Matta yǝm yo kemʌn tǝm lɛ. Nǝngɔ a sʊwa gǝn gɔ, “Bwang mɨ.” Nǝngɔ a gun a bwang gǝmɨ.
10Kwama Yesu jam jǝjalǝn nɛ a lɔ Mattaɨ, nǝngɔ nǝb yotǝm kemʌn tǝmɔ jǝbɔ nǝb bwɨlangkɛlɔ a lada nyɔ ja bɛɨ, nǝngɔ ja yɨ dakini jǝbɔ gɨɨ jǝbɔ bɛtɔ mɛlalɨ gǝnɨ. 11Nǝbɔ Farisaɨ a kuwo nyɨɨ, nǝngɔ ja sʊwa bɛtɔ mɛlalɨ gǝnɨ gɔ, “N wɛ bwɨ nǝ mɛlalɨ jenɔ ja lɛ jǝbɔ nǝb yotǝm kemʌn tǝmɔ jǝbɔ nǝb bwɨlangkɛlɨ?”
12Nǝn kwama Yesu a nyʊwa nyɨɨ, a sʊwa ji gɔ, “Nǝb nɨ kwamɨgǝnɨ mɨ jǝ saa nǝ bʊʊ lɛ. N nǝb nɨ mɨ kwamɨgǝnɨ gǝ saa lɛɨ. 13Ya jǝ́ mɛla n wɛ jʊ nɨ nʊng lɛɨ, ‘A mǝndɨ n jitǝm bʊnǝn nǝbɨɨ mǝ saa lɛ a daa jen woi, n ke bɔ twɨtǝm yulʌn.’ N ke bɔ jotǝm nǝb dǝngdǝng mǝ bɛɨ, mǝ bɛ jotǝm nǝb bwɨlangkɛl.”
Bʌtʌm Kɛl A Dul Dotǝm Diil Mwɛ
(Mar 2:18-22; Luk 5:33-39)
14Nǝngɔ bɛtɔ mɛlalɨ Yohanaɨ ja bɛ a daa gǝ woi, ja bʌ gǝn gɔ, “Nǝn jǝbɔ nǝbɔ Farisaɨ nǝn do diil mwɛ lɛ. N wɛ a bwɨ bɛtɔ mɛlalɨ mʊnɔ mɨ jǝ do lɛɨ?”
15Nǝngɔ Yesu a jǝla ji gɔ, “Fatǝm balɨgɨɨ ji ji wi bwaa na jǝ dakini a daa bwatǝm naakanɨ ka? Kwamagɔ bɛ lɛ wo wʊnɨ ba jǝ dem jim balɨgɔ lɛɨ, jǝ do diil mwɛmɔ nǝn kwama gɔ.
16“Mɨ nǝn nʊ nɨ baka bɛllɛ galɨ lɛ nǝn mwan dwang fɨɨ. Na ga maa nyɨɨ, mwan dwang fɨgɔ wʊl wʊl bɛllɛ galɨgɔ. Wʊlatǝm gǝnɔ laa laa a galɨgɔ bwɨlatǝmɔ. 17Mɨ nǝn nʊ nɨ tal bʊgɛ fɨ lɛ a sʊwa galɨɨ. Na ga maa nyɨɨ, sʊwagɔ fɛ fɛ, bʊgɛmɔ tǝlam tǝlam, sʊwagɔ kala kala. Bʊgɛ fɨgɔ jǝ tal a sʊwa fɨ. Na ja maa nyɨɨ, ja bʊʊ nǝn ji gwam.”
Bwɛnɔɔlɨ Nǝ Dʊʊgɨɨ Jǝbɔ Nɔɔlɨ Nɨ A Ke Dwang Kwabtǝm Yesui
(Mar 5:21-43; Luk 8:40-56)
18Sʊwa ji kɛlɔ lɛ nyɨɨ, nǝngɔ kaa nǝ dʊʊ nǝbɨɨ a bɛ ba gǝla a jʊng a kǝga gǝnɨ, a sʊwa gɔ, “Kǝngkɔ kǝngkɔ nɨ bwɛnɔɔlɨ mǝndɨ a bʊla! Bɛ ba ya gǝm kang, gun gun nǝn kʊlɨ.” 19Yesu a gun a bwang gǝm jǝbɔ bɛtɔ mɛlalɨ gǝnɔ.
20Kaa nɔɔlɨ wʊnɨ a maa jolɔ kʊb jeli yo gʌ lɛ nǝn tʊʊm jeltǝmɨ, a bɛ a gul gǝn nǝngɔ a ke nyiyo dwang kwabtǝm gǝnɨ, 21a sʊwa a nǝl gǝn gɔ, “Na n dʊʊl gǝn mǝ ke dwalɨ, mǝ nya nya gungtǝm.”
22Yesu a yǝla a dʌng gǝnɨ, nǝngɔ a sʊwa gǝn gɔ, “Bʊla mɨ, maa fulotǝm nǝl. Nǝtǝm bɨlǝngkɛl mʊnɔ a gung ń.” Tʌgo a kang nɔɔlɨ nɨ a gun.
23Yesu ya la lɔ nǝ dʊʊ nǝbɨɨ, ya nya nǝbɔ guu jwalɔ lɛ, nǝbɔ a mʊrka, jǝ ma bwaalɨgɔ lɛ. 24Nǝngɔ a sʊwa ji gɔ, “Jǝ́ nɨ ɨ talɨ, bwɛnɔɔlɨ nɨ a bʊla bɔ bʊlaɨ, dum daa lɛɨ.” Nǝngɔ ja dǝg gǝn dǝgɨ soganɨ. 25Nǝn kwama ja jǝg nǝbɔ a yoolii, a dɔ a ta kang gǝnɔ, nǝngɔ bwɛnɔɔlɨ nɨ a guni. 26Fulon kɛl nɨ a wa tʌgo a tǝmɔ gǝm gwam.
Kululʌmɔ Yo A Nya Kuwotǝm Daa
27Yesu bǝla daagɔ lɛɨ, nǝngɔ kaam kululʌmɔ yo ja bwang gǝm, jǝ jo jangajǝng lɛ nǝn kwaan jǝ sʊwa lɛ gɔ, “Yesu Bʊla Daudaɨ, ji bʊnǝn nǝnɔ!”
28Yesu a dɔ kaa lɔɨ, nǝngɔ kululʌm nɨ a bɛ a daa gǝ woi, Yesu a sʊwa ji gɔ, “Jǝ́ nǝ bɨlǝngkɛl, mǝ nǝn kwaan maatǝmɔ nyɔ ka?”
Nǝngɔ ja jǝla gǝn gɔ, “Ɔɔ Tɛlalɔ!”
29Nǝngɔ a ke nu jini, a sʊwa gɔ, “A dul nǝtǝm bɨlǝngkɛl jenɔ gǝm, mǝ gung jen gung.” 30Nǝngɔ nu jinɔ a wumoi. Nǝngɔ Yesu a mwɛ ji dangǝn gɔ, “Ka jǝ́ jǝla lɛ kaa nǝl a nyʊwa fulon kɛl nɨ.” 31Nǝngɔ ja shu ya ja sʊwa fulon kɛl nɨ a tǝmɔ gǝm gwamɨ.
Nʊ Nɨ Mɨ Sʊwa Kɛl Lɛɨ A Sʊwa Kɛl
32Ja gun jǝ shu lɛɨ, nǝngɔ ja bɛ nǝn nʊ nɨ nǝn bwɛlaaɨ, mɨ sʊwa kɛl lɛɨ. 33Kwama nɨ a jǝgǝm bwɛlaagɨɨ, nǝngɔ nʊ nɨ a sʊwa kɛlɨ, mʊrkalɨ nǝbɨɨ a ta kang a nyiyo, nǝngɔ ja sʊwa gɔ, “Bǝ kuwo bɔ jǝ laatǝm kang nɨ wo nyɔ a mʊgɔ Israila.”
34Nǝngɔ nǝbɔ Farisaɨ gɔ, “N kwaan fɔlɔn nǝblaamɨ, jǝg nǝblaamɔ lɛ nǝnɨ.”
Yesu A Ji Bʊnǝn Nǝbɨɨ
35Nǝngɔ Yesu a kɛla tuulɔngɔ jǝbɔ bɛlɨ tuulɔngɔ gwam mɛla jim lɛ a kantɨn mɛlalɨɨ, kiyo jim fulon kɛl lǝmɨgɔ lɛ a dul fɔlɔn lɔ Kwaamaɨ, gung nǝb twɨlamɔ lɛ jǝbɔ nǝb nɨ mɨ kwamɨgǝnɨ. 36A kuwo mʊrkalɨ nǝbɨɨ a lada nyɨɨ, bʊnatǝmɔ a ta gǝn, jʊ a bwɨɨ jǝ nɔɔ gaalan nɛ, ja kwɨya tǝmɔ nǝn kwan, na kwamɨtɨn nɨ mɨ nǝ tɔɔtǝm woi. 37Nǝngɔ a sʊwa bɛtɔ mɛlalɨ gǝnɨ gɔ, “Kʌsotǝmɔ a lada, nǝb maajɨgɔ nǝn dǝm nyɔ. 38Jǝ́ kela Tɛlalɔ tɔtwamɔ sǝ a twam nǝb kʌsotǝmɔ a tɔtwam.”
ទើបបានជ្រើសរើសហើយ៖
Matta 9: DBD
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©️2024 Luke Initiative for Scripture Translation
