मेथा 5
5
येशुगी रीदु क्षो़ स्येपा
(लुका ६:२०-२३)
1मीछोकला शीक्ती, येशु रीला फेप्पालाक धेनी होदुरु श्युक्ती, खोङबागी ङेनेक्या खोङबागी डुङदु होवालाक। 2धेनी खोङबागी खुङक्याला क्षो़ ॱनाङा जेदी सुवालाक,
3“सेमला उटे हो़गीनक्या घीन्गी झ्यीलाप क्षे ले,
घीझ्येरी ॱनाना नाम्खे ग्यासी खुङक्याई लाक।
4सेम्दुक ङ्याङगीनक्या घीन्गी झ्यीलाप क्षे ले,
घीझ्येरी ॱनाना खुङक्याला सेम्सो थोप्कीलाक।
5ॱङ्यामच्युङक्या घीन्गी झ्यीलाप क्षे ले,
घीझ्येरी ॱनाना खुङक्या साश्यीगी दाक्पो झ्युङगीलाक।
6ढाङतेनगी क्षीला तोक्कीन धाङ कोम्गीनक्या घीन्गी झ्यीलाप क्षे ले,
घीझ्येरी ॱनाना खुङक्याई दो़पा खाङगीलाक।
7ॱङीङजेचेनगी मीक्या घीन्गी झ्यीलाप क्षे ले,
घीझ्येरी ॱनाना खुङक्याला ॱङीङजे थोप्कीलाक।
8सेम दाक्पा हो़गीनक्या घीन्गी झ्यीलाप क्षे ले,
घीझ्येरी ॱनाना खुङक्याई को़न्क्षोकला ज्यागीलाक।
9थी़न ढीक्कीनक्या घीन्गी झ्यीलाप क्षे ले,
घीझ्येरी ॱनाना खुङक्या को़न्क्षोकगी से धाङ सेमो ॱनेरी भो़गीलाक।
10ढाङतेनगी क्षीला दुक्पु ङ्याङगीनक्या घीन्गी झ्यीलाप क्षे ले,
घीझ्येरी ॱनाना नाम्खे ग्यासी खुङक्याई लाक।
11“ङी दो़न्दु खेक्याला मीक्याई ॱमेबेप ताङये धाङ दुक्पु ताङये धाङ ख्यी़ कोरला शोक स्येदी छीक ङेन्पा ॱनाछोकक्या ॱनी घाङला, खेक्या घीन्गी झ्यीलाप क्षे। 12नाम्खे श्यीङखामदु खेक्याई क्षीला ज्यागा क्षे हो़तालाक होझ्येरी घागा-कीगी झ्यी घीझ्येरी ॱनाना खेक्याई एन्ला हो़गीन ॱङो़नस्येखेनक्याला, खुङक्याई देरेराङ झ्येरी दुक्पु तावालाक।
छा धाङ हो़गी पे
(मारकु ९:५०; लुका १४:३४-३५)
13“खेक्या जीक्तेनगी छा लाक हीना छागी ढोवागो येना, घाङगी झ्येरी धाब्ले छा डोवा शोये? होदे फीला ॱयुक्ती मीगी काङबी होकला ॱलेम्ये माना, श्येम्मा घीलाः फेन ॱमेथोवालाक।
14“खेक्या जीक्तेनगी हो़ लाक। री खाला क्षाक्कीन यु दे बा ॱमीथुवालाक। 15धेनी क्युङ पारती, होदेला सी़या खा काप्ती मेश्यालाक हीना नाङदु हो़गीन घीरीला हो़ तेरयेगी क्षीला, ताक्ताला श्यालाक। 16देरे झ्येरीराङ खेक्याई ले शाङागो मीक्याई थोरी, नाम्खे श्यीङखामदु श्युक्कीन खीकी यापला तो़पा पुयेला, खेक्याई हो़ मीक्याई दोङदु स्यारतु च्युक।
ॱङो़नस्येखेनक्या धाङ क्षो़ठीमगी कोर
(लुका १६:१७)
17“ङा क्षो़ठीम धाङ ॱङो़नस्येखेनक्याला तोरस्यीक ताङदु होवालाक ॱनेरी ॱमासाम। ङा तोरस्यीक ताङदु होवामेन हीना होदे डुप्तु च्युक्येला होवाहीन। 18ङा खेक्याला धेन्पा ॱनाहीन, ॱनाम-सा ॱङी येरी मेडोगीन थुक्पे, क्षो़ठीम घीरी माडुप्पा क्षो़ठीमगी यीक्टु च्यीक धाङ छेक च्यीया येगीमालाक। 19होझ्येरी क्षो़ठीमगी ठीम च्युङस्योकगी नाङने, च्यीक च्याक्ती श्येम्माक्यालाः होदेरे झ्यीयेला ॱलाप्कीनगो, नाम्खे ग्यासी नाङदु च्युङस्योक चीगीलाक। हीना क्षो़ठीमगी का घीरी ॱरुङगीन धाङ श्येम्माक्यालाः होदेरे झ्यीयेला ॱलाप्कीनगो, नाम्खे ग्यासीरु क्षे चीगीलाक। 20घीझ्येरी ॱनाना ङा खेक्याला ॱनाहीन, खेक्याई ढाङतेन क्षो़ठीमगी ॱलोपो़नक्या धाङ फारुसीपाक्याने ल्हाक मेना, खेक्या नाम्खे ग्यासीदु नामाः ॱमीछी़गीलाक।
खोङडोगी कोरला
21“धाङबी मीक्याला देरे ॱनागीन खेक्याई घोर हो़तालाक, ‘मी ॱमासे धेनी सेगीनक्याला ठीम फोक्कीलाक।’#धेप्थो़न २०:१३; काठीम ५:१७ 22हीना ङा खेक्याला ॱनाहीन, राङगी पी़नमुला ठो़गीन घीरीला ठीम फोक्कीलाक धेनी राङगी पी़नला ॱमेबेप ताङगीनला, छोक्क्षेनगी दोङदु ठीम फोक्कीलाक धेनी श्येम्माक्याला ‘ख्यो़ फेन ॱमेथोक्कीन घोल्लोवा’ ॱनागीनक्या मेगी ॱङ्यावा खोकला डोयेगी ङेन्का हो़तालाक।
23“होझ्येरी ख्यो़ खेरी क्षो़पा क्षो़ठीरु पुली घाङला, ख्यी़ पी़न ख्यी़मुला ठो़री धेतागो ढेन्ना, 24ख्यो़री क्षो़पा क्षो़ठीगी दोङदु श्याक्ती सोङ। धेनी एन्ला खेरी पी़नमुला थी़न्लाम झ्यी धेनी होरी खेरी क्षो़पा पु।
25“ख्यो़ला क्यो़न चुक्कीनमुला ठीम्खाङदु डी़ घाङला, लाम्गारुराङ खी़मुला लाम्साङ थी़न्ढीक झ्यी। देरे मीझ्यीना, खी़ ख्यो़ला ठीम्पो़नगी लाक्पाला धेनी ठीम्पो़नगी ख्यो़ला चो़न्खाङदु चुक्येला ॱमाक्मीगी लागाला ची ग्याप्कीलाक। 26ङा खेक्याला धेन्पाराङ ॱनाहीन, थागी घोमो च्यीक देया माजाङगीन थुक्पे, ख्यो़ देने थारकीमालाक।
लोक्येम धाङ नाङजाङ खा डागीनगी कोरला
27“देरे ॱनागीन खेक्याई घोर हो़तालाक ‘लोक्येम माझ्यी।’#धेप्थो़न २०:१४ 28हीना ङा खेक्याला ॱनाहीन, दो़छाकगी सेमने भोमो च्यीकला ताना, खी़ खोरी सेम नाङदुराङ भोमो देमुला लोक्येम झ्येसारालाक। 29ख्यी़ ॱमीक ॱयेगी ख्यो़ला धीक्पा झ्यीदु च्युक्ना, ॱमीक दे तो़न्दी ॱयुक। घीझ्येरी ॱनाना ली़ घाङजाङ खेरती ॱङ्यावादु ॱयुक्येले, ख्यी़ ली़गी दुबु च्यीक स्योरना घा लाक। 30धेनी ख्यी़ लाक्पा ॱयेगी ख्यो़ला धीक्पा झ्यीदु च्युक्ना, लाक्पा दे चेदी ॱयुक। घीझ्येरी ॱनाना ली़ घाङजाङ खेरती ॱङ्यावादु ॱयुक्येले, ख्यी़ ली़गी दुबु च्यीक स्योरना घा लाक।
31“देरे ॱने हो़तालाक, ‘राङगी केमीने खा ढाये हीन्ना, खी़ मोला खा डागीन यीक च्यीक तेर घोगुलाक।’#काठीम २४:१ 32हीना ङा खेक्याला ॱनाहीन, दो़लोकगी दो़न्दाक माना श्येमा दो़न्दाक्याई झ्येरी, राङगी केमीमुला खा डागीनगी़ मोला लोक्येम झ्यीदु च्युक्वालाक। धेनी खा डागीन भोमो देमुला ॱनामा लेन्गीनगी़या, लोक्येम झ्यीदालाक।
ॱना क्यायेगी कोर
33“याङदा धाङपो मीक्याला देरे ॱनागीनगो खेक्याई घोर हो़तालाक, ‘ॱना शोक्पो ॱमाक्या हीना चोवोमुला ॱना क्यागीनगो डुप्तु च्युक।’ 34हीना ङा खेक्याला ॱनाहीन, ॱना नामा ॱमाक्या। धेनी नाम्खे श्यीङखाम पाङपो चुक्ती ॱना ॱमाक्या घीझ्येरी ॱनाना नाम्खे श्यीङखाम दे, को़न्क्षोकगी श्युक्ठी लाक। 35याङना साश्यी पाङपो चुक्ती ॱना ॱमाक्या घीझ्येरी ॱनाना साश्यी दे, खोङबागी श्याप्तेक लाक याङना येरुसालेम पाङपो चुक्ती ॱना ॱमाक्या घीझ्येरी ॱनाना दे ग्यावु खाक्क्षे#५:३५ को़न्क्षोकगी़ ग्याजा लाक। 36धेनी ख्यी़ राङगी गो पाङपो चुक्ती ॱना ॱमाक्या घीझ्येरी ॱनाना ख्यी़ खेरी गोवागी ॱरा काङ च्यीया काउ याङना नाक्पो शो ॱमीथुवालाक। 37ख्यी़ स्येगीनगो हीन्ना ‘हीन’ मेन्ना ‘मेन’ झ्युङघोगुलाक। देले ल्हाक हुङगीनक्या ङेन्पागोने हुङालाक।
डास्या लेन्येगी कोरला
(लुका ६:२९-३०)
38“देरे ॱनागीनगो खेक्याई घोर हो़तालाक, ‘ॱमीकगी छापला ॱमीक धेनी सोगी छापला सो।’#धेप्थो़न २१:२४; काठीम १९:२१; लेवी २४:२० 39हीना ङा खेक्याला ॱनाहीन, मी ङेन्पाला दोङलेन माझ्यी। ख्यी़ डाबा ॱयेला डाम्चाक श्युरकीनगोला, डाबा श्येम्मागोवा तो़न। 40ख्यो़ला ठीम चेयेला ठीक्ती, ख्यी़ नाङघो़ खेरये झ्यीगीनगोला, ख्यी़ छीघो़गोवा तेर। 41ख्यो़ला मीटार तोङ च्यीक डोयेला उजुक झ्यीगीनगो मुला, मीटार तोङ ॱङी सोङ। 42ख्यो़ने श्युगीनगोला तेर धेनी ख्यो़ने कीङी दो़गीनक्याने ग्याप ॱमालोक।
डाला चेवा झ्यी
(लुका ६:२७-२८,३२-३६)
43“देरे ॱनागीन खेक्याई घोर हो़तालाक, ‘ख्यो़री खीम्चेला चेवा झ्यी#लेवी १९:१८ धेनी ख्यो़री डाला दाङा झ्यी।’ 44हीना ङा खेक्याला ॱनाहीन, राङगी डाक्याला चेवा झ्यी धेनी ख्यो़ला ॱनो़ क्यागीनक्याई दो़न्दु सोवा धेप। 45देरे झ्यीना खेक्या नाम्खे श्यीङखामदु श्युक्कीन, खेरी यापगी से धाङ सेमो झ्युङगीलाक। घीझ्येरी ॱनाना खोङबागी मी ङेन्पा धाङ शाङपो ॱङीगाराला, राङगी ङीमा स्यारतु च्युक्वालाक धेनी ढाङपो धाङ मेढाङा ॱङीगारागी खाला क्षावा पावा जेदालाक। 46राङला चेवा झ्यीगीनला च्यीगा चेवा झ्यीना, ख्यो़ला ज्यागा घी थोप्कीलाक से? ठा धुगीनक्याः देरेराङ मीझ्यीदाई? 47धेनी राङगी पी़नक्याला च्यीगा छाम्डी श्यी़ना, ख्यी़ मी श्येम्माने ल्हाक घी झ्यीदी से? धेपा मीझ्यीगीनक्याः देरेराङ मीझ्यीदाई? 48होझ्येरी नाम्खे श्यीङखामदु श्युक्कीन, ख्यी़ याप फी़न्सुम छोक्पा हो़गीन च्योक्रे, ख्यो़याः फी़न्सुम छोक्पा झ्युङघोगुलाक।”
ទើបបានជ្រើសរើសហើយ៖
मेथा 5: LOY
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society
