मेथा 2
2
स्यार स्योकगी कारचीपाक्या
1ग्यावु हेरोदेगी धी़ला युदेया युगी बेथलेहेमदु येशु ठुरी स्याम्ला, स्यार स्योकने कारचीपाक्या येरुसालेमदु होरी, 2ॱनेवालाक, “याहुदापाक्याई ग्यावु ठुङगीनगो घारु श्युक हो़ताले? घीझ्येरी ॱनाना हेक्याई खोङबागी कारमा स्यार स्योकला थोजुङ धेनी हेक्या खोङबाला क्षाक्छारु होवाहीन।”
3दे ॱहाघोरती ग्यावु हेरोदेगी सेम ठुक्पालाक धेनी खोङमुला येरुसालेमगी मी घीरीगीया सेम ठुक्पालाक। 4धेनी खोङगी क्षो़पो़न क्षे धाङ क्षो़ठीमगी ॱलोपो़न घीरी भो़री, मास्यीकागो घारु ठुङगीनगी कोरला खुङक्याने चाचो़ झ्येवालाक।
5खुङक्याई ॱनेवालाक, “युदेया युगी बेथलेहेमदु ठुङगीलाक, घीझ्येरी ॱनाना ॱङो़नस्येखेनगी देरे ढीक हो़तालाक,
6‘याहुदा युगी बेथलेहेम ख्यो़,
याहुदापा पो़न्पोक्याने, ख्यो़ घाने च्युङा मेन,
घीझ्येरी ॱनाना ख्यी़ नाङने, वाङग्युर झ्यीगीन च्यीक हुङगीलाक।
खो ङी मीरीक ईस्राएलगी झीउ झ्युङगीलाक।’”#मीका ५:२
7धेनी हेरोदेगी कारचीपाक्या खाबा भो़री, कारमा स्यारकीनगी धी़गी कोरला चाचो़ झ्येवालाक। 8धेनी देरे ॱनेरी बेथलेहेमला झावालाक, “धा सोरी टु देला ॱङीरी झ्येरी चो धेनी खेक्याला ॱङेदी, ङाला लो़न खेरती स्योक धेनी ङाः सोरी खोला कुरती झ्यीये हो़तालाक।”
9ग्यावुगी काला ङेन्दी, खुङक्या खोरी लामला सोवालाक। धेनी स्यार स्योकला थोथा कारमागो, खुङक्याई एन-एनला सोरी टु श्युक्सागी थो़रु धेपालाक। 10धेनी कारमा देला थोरी, खुङक्या ॱमीच्यीकी ङ्यामो घेवालाक। 11धा नाङला जुरी, टुगोला खोरी युम मीरीयाममुला ज्यावालाक। धेनी पीमु साला चुक्ती, खुङक्याई खोङबाला क्षाक छावालाक। धेनी तेरगाम खा पेरी, सेर धाङ पो़कार धाङ ढीस्यीमक्या तो़न्दी, खोङबागी दोङला ज्यागाक्या पुवालाक। 12धा ॱमीक्लामला हेरोदेचारु मालोक ॱनेरी ङेन्ता झ्युरी, खुङक्या लाम श्येम्माने राङगी युला लोक्पालाक।
एजेप युदु डो़वा
13कारचीपाक्या सोसारती, चोवो को़न्क्षोकगी भाङछेन च्यीक योसेफगी ॱमीक्लामला ॱङो़न्दी सुवालाक, “ग्यावु हेरोदेगी टु दे सेयेला चाये झ्यीदी, होझ्येरी लारी टु दे धाङ खोङबागी युमला ठीक्ती, एजेप युदु डो़ धेनी ङी ख्यो़ला ॱमेनागीन थुक्पे होदुरुराङ धो़क।”
14धेनी खो लारी टु धाङ खोङगी युम ठीक्ती, छेमुराङ एजेपदु सोवालाक। 15धेनी ग्यावु हेरोदे माढोङगीन थुक्पे, खुङक्या होदुरुराङ धेपालाक। चोवोगी राङगी ॱङो़नस्येखेनगी थोक्ने “एजेप युने ङी से भो़वाहीन”#होशे ११:१ सुङगीन दे डुप्पालाक।
बेथलेहेमदु टुवाक्या सेपा
16धेनी कारचीपाक्याई खोराङला गो कोरकीनगो, हेरोदेगी ॱहाघोरती, खो ॱमीच्यीकी खोङडो लावालाक। धेनी खी़ कारचीपाक्याने घोरकीन छेडाङला तेरी, खोरी ॱमाक्मीक्या तारी, बेथलेहेम धाङ थाकोरगी साजाला, लो ॱङी धाङ होदे होकला हो़गीन टुवा भीजा घीरीला सेदु च्युक्पालाक। 17धेनी ॱङो़नस्येखेन येरेमीयागी सुङगीन दे डुप्पालाक,
18“रामादु के च्यीक घोरपालाक,
ङुगीन धाङ ङुता क्षे ग्याप्कीन,
राहेल मोरी टुवाक्याई क्षीला ङुगीन।
सेम्सो मी़ खे मालेन
घीझ्येरी ॱनाना होदेक्या मालेवालाक।”#येरेमीया ३१:१५
एजेपने लोक्पा
19हेरोदे ढोरी, एजेप युदु योसेफगी ॱमीक्लामला चोवोगी भाङछेन च्यीक ॱङो़न्ते 20सुवालाक, “से देगी ॱरोक लेन्ये झ्यीगीनक्या स्यीजुङ होझ्येरी लोला, खोङबा धाङ खोङबागी युम ठीक्ती ईस्राएल युदु लोक्ती सोङ।” 21धेनी योसेफ लारी टु धाङ खोङगी युम ठीक्ती, ईस्राएल युदु सोवालाक।
22हीना ग्यावु हेरोदेगी छापला, खी़ भीजा आरकेलाउगी युदेयारु ग्यावु झ्यीदी ॱनेरी घोरती, योसेफ होदुरु डोयेला जीक्पालाक। धेनी ॱमीक्लामला मालोक सुङगीनगो छोरती, खो गालील स्योकला सोवालाक। 23धेनी खो सोरी नाजारेत ॱनागीन युदु धेपालाक। धा एम्मा ॱङो़नस्येखेनक्याई थोक्ने, “खोङबाला नाजारेपा सुरी श्युगीलाक।”#२:२३ दे सुङगीन ॱङो़नस्येखेन सु हीन्गीनगो स्येये मेतालाक। सुङगीन दे डुप्पालाक।
ទើបបានជ្រើសរើសហើយ៖
मेथा 2: LOY
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023, Wycliffe Bible Translators, Inc. and Nepal Bible Society
