Markus 1
1
Yohanes mangadiris ni karyayar
1:1-8
(Mat. 3:1-12; Luk. 3:1-18; Yoh. 1:19-28)
1Ye Ibar Ngamone na Yesus ninr Ray Silai, Ratu Anaky. 2Ibar a ne ntabw nof Yohanes mangadiris nma ma nafbotin i ber tomwatar. Luryain e nabi Yesaya narengi na Yohanes ni mamae ne lo na Kitap Lelerap dalam farye:
“Msyalan, I ye ma kswiduk i, Yakw klwuan i ma nbalun nof Ko, ma naflawar dalamtene ber Ko.#Mal. 3:1
3Ma keta i nfalere na ain letkape feti,
‘Mangnrur Silai ma nma ye lo, miflerap dalamtene ber I, ma miflyonri dalamtene ber I.’”#Yes. 40:3
4Mpe Yohanes mangadiris nafdiat safe ma luryain e rarengi na nabi Yesaya ni kitap dalam a ne. I nti ain letkape ma nafwibar ber tomwatar feti ka rtate nir salar ma radiris sir nema Ratu nlure sir. 5Ne tomwatar yadin rof propinsi Yudea ma kote Yerusalem rma ma rakmat Yohanes. Sir rma ma ryoding nir salar ma Yohanes nadiris sir a na wer Yordan. 6Yohanes nfonak rabit ma rose rof unta fuluny ma ni bebebe ne rose rof binatang kulit. Ma ni tnyamar e, tokdise ma wenan. 7I nafbotin farye: “Yakw ye ma kmwa baluan, nempa keta tomwat sa nlarat Yakw ma nma. Ma Tomwate ne Ni kuase silai nlengan nof yakw, mpa kumdu ma ktwatar Ni sabatwem firsir motak e to ubangw. 8Ma yakw kudiris a kmi kor weye, nempa keta I nal Ratu Smwangtany ber a kmi.”
Yohanes nadiris Yesus
1:9-11
(Mat. 3:13-17; Luk. 3:21-22)
9Noak a ne Yesus nma nof kote Nasaret. Nasaret ye namin propinsi Galilea. I nti nakmat Yohanes ma ntak ma nadiris I a na wer Yordan. 10Noak ma Yohanes nadiris monuk Yesus e, I nbie nof weye dalam ma nsalan langit ntakbanril. Ma Ratu Smwangtany nose felany farlan manik merpati ma ntompur I. 11Ne liliri nof surga ma nfalak, “Ko ye Yakw Anakw ma kwamis Ko, ma mufsenange dalangw.”
Smwangat yatkar nir ulun nteman Yesus na ain letkape
1:12-13
(Mat. 4:1-11; Luk. 4:1-13)
12Lama Yohanes nadiris monuk Yesus, Ratu Smwangtany nrure I far ain letkape. 13I namin iano doan lere buty fat, ma noak a ne smwangat yatkar nir ulun dedesar ma nateman I. I namin ain ma binatngar ma rtalir a ne rmorip a na, nempa malaektar rma rof surga ma rlangun I na Ni perluar.
Yesus ntar mangfutar fat ma reluk Ni Manglartar
1:14-20
(Mat. 4:12-17; Luk. 4:14-15)
14Lama tomwatar romat Yohanes ma rnau i a na sel, Yesus nti propinsi Galilea ma nafwibar Ibar Ngamone nof Ratu. 15Ne I nfalak, “Nait ni tewat lo ma Ratu neluk Rai ma nfarete tomwatar na saryamprene. Mpa ka mtyate mir salar ma milele Ibar Ngamone!”
16Noak ma Yesus nmpan nalyole twemul Galilea seriny, I nsalan Simon radu wainy Andreas ma rlui nir fuat fali mangfutar sir. 17Ne Yesus nfalak ber sir, “Mya ma mlyarat Yakw, lere ye to minriak inar lo nempa keta kuftutu kmi ma minriak tomwatar ma rlarat Yakw.” 18Mpe rnau desar nir fuat a ne ma rlarat I. 19Yesus naloran Ni mpampane, ma to dodo nof ain a ne I nsalan Yakobus ma wainy Yohanes. Sir a ne Zebedeus angkir. Noak a ne sir ramin sori ma rasusan nir fuat. 20Ne I ntar sir ma nfalak ma rlarat I. Mpe rti a rtate amany Zebedeus nor ni mangkaryayar na sori ne ma rlarat I.
Yesus natian kalin smwangat yatak nof tomwat sa na kote Kapernaum
1:21-28
(Luk. 4:31-37)
21Yesus nor Ni manglartar rait kote Kapernaum. Nait ma Yahudyar nir ler Sanari I nti das sampayang ma naftutu tomwatar na iano. 22Noak ma rdengar Ni anftutwar a ne sir rampriang, fali natanuk e to nbalak mangaftutu Musa ni faretar nempa natanuk nor Ni kuase farlan rayar sa. 23Noak a ne smwangat yatak nsung tomwatar sa na das sampayang a ne. Mpa tomwate ne nafwayak ma nfalak, 24“Hei Yesus tomwat Nasaret, Ko mpweang ma mose farpe kam? Mwa ma mufyatak kam e? Yakw kufai feti ise Ko. Ko ye Ratu Ni Mangsiduk Ngalerap!” 25Nempa Yesus ntampu smwangat yatak ne ma nfalak, “Mnwau ko! Mbwie mof tomwate ye!” 26Ne tomwate ma smwangat yatak nsung i a ne pelak-polik i ma fwayak fwoik i, ma smwangat yatak a ne nbie desar nof tomwate ne. 27Tomwatar monuk na iane rampriang desar, ma rafalak ber sir feti tomwate ye nbal. I naftutu anftutw beberi ma natanuk nor kuase. Ma nfarete smwangat yatkar e sir rlarat desar. 28Ne ibar na Yesus ne nsor monuk propinsi Galilea ni kateman.
Yesus nafngamone tomwatar yadin
1:29-34
(Mat. 8:14-17; Luk. 4:38-41)
29Yesus nor Yakobus ma Yohanes rti a rtate das sampayang a ne ma rti Simon ma Andreas nir das. 30Noak a ne Simon yanany bate narwa fali isiny mefanas. Ne tomwatar ketnir ma ramin das a ne rasnyalik ma rafbotin ber Yesus feti i nafanas. 31Mpe Yesus nti nakmat i, ma nomat limany, ma ntulung i ma npote i. Ma ntabw nof a ne bate ne isiny to mefanas lo ma nangamon desar. Ne bate ne npote i ma nlangun sir ma rtame.
32Nait ma lere nfufw e, tomwatar ror mangafansar monuk ma tomwatar ma smwangat yatkar rsung sir a ne ber Yesus. 33Iane nwayat ma tomwatar yadin rof kote ne rasesekan sir ma ramdir das souny a ne. 34Ne Yesus nafngamone tomwatar yadin rof nir maningkyar mpane, ma natian smwangat yatkar yadin. Ma I to ninrang ma smwangat yatkar a ne ratanuk fali rafai feti Yesus ye ise I.
Yesus nmpan a nlole yampren Galilea ma nafwibar Ratu Ni ngribatnir
1:35-39
(Luk. 4:42-44)
35Ni bobolisin makrokap e, Yesus npote I ma nti burit. Ne I nti ain tatutkwar sa ma nsampayang na iano. 36Noak ma Simon nor tbwarnir rsalan e, Yesus to namin lo mpa rti ranriak I. 37Lama rtungan I e rfalak, “Tuangguru ali Ko mtwi mpe, mampe tomwatar monuk ranriak Ko ye.” 38Ne nfalak ber sir, “Ni ngafele e mya ma ti kote walyetar na seriny baldu ye nema kufwibar Ibar Ngamone na iano nbal. Fali kmwa saryamprene ye ma kufwibar Ibar Ngamone.” 39Mpe I nti propinsi Galilea ni kateman ma nafwibar Ibar Ngamone na nir das sampangar. Ma natian kalin smwangat yatkar ma rsung tomwatar.
Yesus nafngamone tomwat mangampaul
1:40-45
(Mat. 8:1-4; Luk. 5:12-16)
40Na ler sa e tomwat mangampaul sa nma ma nakmat Yesus. Ne nsatngur a na Yesus sounlury ma nfalak, “Mangnrure, yakw kufai feti Ko Nim kuase ma mufngamone yakw, mpa farlan Ko mpweang e bise ma mufngamone yakw!” 41Mpe Yesus nlompang desar tomwate ne. Ne nsaup limany na i ma nfalak, “Au, Yakw kmpweang ma ko mungamon mpa mungamon lo!” 42Ntabw nof a ne tomwate ma ni maninik mpaul a ne nlai ma nangamon desar. 43Ne Yesus nluan ma nbali i ma nfalak desar ber i, 44“Ka munremi, kete musaur ngrie ye desar ber se nre se motak. Nempa ka mtwi mukmat mangsompe ma mfwatutu tenam ber i, nema nsalan feti mungamon lo. Betno mlwoik nim snyompe ber Ratu, farlan ma rarengi na tetetkar ma luryain e Ratu nal ber Musa ne. Ko mose farane, iane neluk faniak ber tomwatar feti mungamon lo.” 45Nempa tomwate ne nti nasaur ngrie ne ber tomwatar monuk na mpenempen. Iane nwayat ma Yesus to bise ma nti kote dalam ma nfatutu i ber tomwatar, mpa namin lan ain tatutkwar na kote burit. Boloka farane tomwatar monuk rof mpenempen dedesar rma ma rakmat I.
ទើបបានជ្រើសរើសហើយ៖
Markus 1: YMD
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Yayasan Pemberdayaan Masyarakat Desa © Wycliffe Bible Translators, Inc. All rights reserved.