Matius 27
27
Tomwatar ror Yesus ber Pilatus
27:1-2
1Ni bobolisin desar e mangsomp ulnir ma mangfaret Yahudyar rafburat sir ma rfat ma lese ma rtetak ma rfen Yesus. 2Ne rluan ma rkete Yesus betno ror I ber Pilatus. Pilatus ye gubernur ma nfarete na ain a ne.
Yudas nmat
27:3-10
3Noak ma Yudas ma nfenri Yesus a ne nsalan feti sir ral tetetak mamate ber Yesus, nsesal a nbali i. Mpe i nal doit perak buty tel a ne ma nal a nbali ber mangsomp ulnir ma maken Yahudyar.#Kis. 1:18-19 4Ma nfalak ber sir, “Yakw kose sale lo fali kunrenre tomwate ma to ni sal ma ral tetetak mamate ber I.” Nempa sir rfalak ber i, “Kam to mfaduli. Iane koko ko nim urusan.”
5Mpe Yudas nal doit a ne betno nyebas far Ratu Ni Das Silai dalam. Ne nbali i ma nkete tali na ni dongur ma nfen a nbali i.
6Ne Mangsomp ulnir ral doit a ne ma rfalak, “Tlarat ninr agame ni yayatrwar e to bise ma tnau doit ye na babatak snyompe na Ratu Ni Das Silai, fali tpaki doit ye neluk sewe la tfen tomwate lo.” 7Ne sir raale andaun ma rfat ma lese ma ral doit a ne la rselir tomwat sa ni ompak. Tomwate ne biase nose kabanir nof ompak. Ma ompak ma rselir a ne keta rpaki la rafonak tomwatar ma to Yahudi sir. 8Iane nwayat ma rafngare ompak a ne na Ompak Dare terik lere ye.
9 #
Za. 11:12-13
Sir rose farane la rafdiat safe ma luryain e nabi Yeremia nfalak farye, “Sir ral doit perak buty tel a ne. Iane kotaky ma tomwat Israelar rtetak lo ma rbayar I. 10Ma sir ral doit a ne la rselir ompak rof tomwate ma nose kabanir nof ompak a ne. Ma rose farane feleles farlan ma Mangnrure nfalak ber yakw lo.”
Yesus na Pilatus sounlury
27:11-14
(Mrk. 15:1-15; Luk. 23:1-5; 23:13-25; Yoh. 18:33; Yoh. 19:16)
11Mpene sir ror Yesus ber gubernur Pilatus ma nsidang I. Ne Pilatus nenrat Yesus, “Ko ye Yahudyar nir Rai e?” Ne Yesus nfalak, “Au, koko ko ma mfwalak farane.”
12Boloka mangsomp ulnir ma mangfaret Yahudyar rfalak kabanir yadin la rfasale Yesus, nempa I namlin motak.
13Ne Pilatus nfalak ber Yesus, “Ko mdwengar ma sir rfalak kabanir yadin na Ko la rfasale Ko nre?”
14Nempa Yesus to nfalak sasaf nwayat ma gubernur a ne nampriang desar.
Sir ral tetetak mamate ber Yesus
27:15-26
15Na tomwat Yahudyar nir ler silai Paska mpane e, gubernur biase nalin tomwatar sa nof sel nlarat tomwat ngayadin nir mpempeang. 16Noak a ne sir rnau tomwatar sa na sel ngarany Yesus Barabas. I ngarany a nsor monuk mpenempen fali i nose kabain yatkar. 17Mpa noak ma tomwat ngayadin rafburat sir a na iano, gubernur Pilatus nenrat sir, “Ise ma kmi mpyeang ma kwalin i ber a kmi, Yesus Barabas nre Yesus ma rtar feti Ray Silai?” 18Pilatus nenrat sir farane fali nafai feti mangsomp ulnir ranrenre Yesus ber i fali dalmir maninik Yesus.
19Noak ma Pilatus namtoran kadere ma biase ntetak ngriar a ne, sawany nluan tomwatar sa ma nti nfalak ber i, “Ka kete mlwarat tomwatar ma mukun tomwate ma to ni sal sasaf a ne. Fali lebabe e I nose ma kmwef e to nangafel desar nwayat ma kumtaut.”
20Nempa mangsomp ulnir ma mangfaret Yahudyar rfule tomwatar yadin, nema rtak Pilatus ma nalin Barabas ber sir, ma nal tetetak mamate ber Yesus. 21Ne Pilatus nenrat sir a nbal, “Nof tomwatar du ye ise ma kmi mpyeang ma ktwate i ber a kmi?” Ne sir rfalak, “Barabas.”
22Ne Pilatus nfalak ber sir, “Farlan farane e kmi mpyeang ma kose safe ber Yesus ma mtyar feti Ray Silai ne?” Ne sir monuk rafwayak, “Mswangwalu I!”
23Ne Pilatus nenrat sir a nbal, “Ali Ni sal safe?” Nempa sir rtafal ma rafwayak, “Ka mswangwalu I!”
24Pilatus nafai feti to ubany ma natanuk ber tomwat ngayadin a ne lo, ma nsalan e sir ketla rose mimiri. Mpa nal weye ma nbur tangnir na tomwatar a ne sonirlury ma nfalak, “Yakw kose farye la kfwatutu ber a kmi feti yakw to klwarat a kmi ma kfwen tomwate ye mpa iane koko kmi mir urusan!”#Ul. 21:6-9
25Ne tomwat ngayadin a ne rafwayak, “Au, farane motak! Mswalan lonri motak ma kam mor empmyamar nusmyamar ma mabare Tomwate ye Ni mamate!”
26Mpe i nalin Barabas ber sir, ma nanrenre Yesus ber suldadwar ma rsil a rbabal I ma rsangwalu I.
Suldadwar rkosy a rmalip Yesus
27:27-31
(Mrk. 15:16-20; Yoh. 19:2-3)
27Mpene Pilatus ni suldadwar ror Yesus far Pilatus ni istana, betno rtar suldadw walyetar monuk ma ramin iane, ma rafburat sir ma rkolu Yesus. 28Ne sir ralin Yesus Ni rabit ma ral rabit melawas weympuse daran la rfonak I. 29Sir rwanim makot matdyemin ma rnau na Yesus uluny, ma ral tetekan ma nomat a na limany fian. Ne rsangitil na sounlury ma rkosy I ma rfalak, “Ngamone ber tomwat Yahudyar nir Rai Ko!” 30Sir rdikat I ma ral tetekan rof limany a ne la rababal uluny. 31Lama rawayat monuk I e sir ralin rabit melawas weympuse daran a ne rof I betno ral a rbali Ni rabit la rfonak I. Ne ror I far kote burit ma rsangwalu I.
Tomwatar rsangwalu Yesus
27:32-44
(Mrk. 15:21-32; Luk. 23:26-43; Yoh. 19:17-24)
32Noak ma suldadwar a ne ror Yesus far kote burit ma keta rsangwalu I, sir ratungan ror tomwatar sa nof Kirene ngarany Simon. Ne sir ribut i ma nabare Yesus Ni sangwalu. 33Mpe rait ain sa ngarany Golgota. Golgota ye isiny feti, Ulbati Ain. 34Ne sir ral anggur ma rabali ror kabar sa ma maklangw betno ral ber Yesus. Nempa noak ma I nanak e to nmpeang ma nenum.#Mzm. 69:22
35Lama rsangwalu I, sir rose undi ma rasaman Ni rabtyar.#Mzm. 22:19 36Ne ramtoran iane ma rajake I. 37Na Yesus Ni katutun sangwalu unrun e rarengi farye: “I ye Yesus tomwat Yahudyar nir Rai.” Safe ma rarengi na katutun sangwalu unrun a ne ma neluk lole ber sir la rfasale Yesus nema rukun I.
38Sir rsangwalu I ror mangamnangar du, sa namin balisya fian ma sa e namin balisya bayal.
39Tomwatar ma rlanre ain a ne rawawan ulnir betno rarikan I.#Mzm. 22:8; 109:25 40Sir rfalak, “Hei, Ko ye ma mfwalak feti bise ma mswose Ratu Ni Das Silai, ma keta lerar tel e mufdiri mbwali. Farlan botuan feti Ratu Anaky Ko e mfwair a mbwali Ko ma mtwompur mof sangwalu ne!”#Mat. 26:61; Yoh. 2:19
41Mangsomp ulnir, mangaftutu Musa ni faretar ma mangfaret Yahudyar rarikan I a nbal ma rfalak, 42“Tomwat walyetar e nfair sir, nempa koko I e to bise ma nfair a nbali I! Farlan botuan feti I ye tomwat Israelar nir Rai, no tsalan feti I ntompur nof sangwalu ne nema talele I. 43I nalele Ratu ma nfalak feti Ratu anaky ber I, mpa la tsalan feti farlan Ratu nmpeang e keta nma ma nfair I.”#Mzm. 22:9
44Ma tomwat mangamnangar du ma rsangwalu sir ror Yesus a ne, rarikan I farane nbal.
Yesus nmat
27:45-56
(Mrk. 15:33-41; Luk. 23:44-49; Yoh. 19:28-30)
45Noak a ne lere nfat langit lo, nempa nuse ni kateman makrokap terik jam tiga. 46Ma fafa jam tiga e Yesus nafwayak, “Eli, Eli, lama sabakhtani?” Isiny feti, “O Ratu, Ko ye Ningw Ratu, safema mtwi a mtwate Yakw?”#Mzm. 22:2
47Tomwatar ketnir ma ramin iane rdengar ma Yesus nafwayak farane mpa rafalak ber sir, “No mdyengar, I ntar nabi Elia.” 48Mpe tomwat sa nasnyalik ma nma ma nal kabanir sa ma nbalak spon, ma nsob na anggur manilu, ma ntabak na katutun tubun, betno nau na Yesus sukany ma nwokut.#Mzm. 69:22
49Nempa tomwatar ketnir a rfalak, “Tdaf fen rufuky a nbal, la tsalan feti Elia nma ma nfair I nre tate?”
50Ne Yesus nfalak nor liriny silai betno ntetak Ni sanawe.
51Na noak a ne maloly melabar ma ntikloi neluk sasake na Ratu Ni Das Silai dalam a ne ntarbis a nmpan du nof das terik bab. Ma ruku silai nbal nwayat ma baty silayar rangfefar.#Kel. 26:31-33 52Ma kubrar yadin rtakbanril, nwayat ma Ratu Ni tomwatar ma rmat a ne rmorip a rbali. 53Lama Yesus nmorip a nbali, sir ma rmorip a rbali ne rbie rof nir kubrar, ma rti kote Yerusalem. Na iano tomwatar yadin rsalan sir.
54Noak a ne suldadwar nir ulun numur suldadwar ketnir rajake Yesus. Noak ma rsalan ruku silai, ma safe-safe monuk ma diat sir a ne, ramtaut desar ma rfalak, “Botuan, I ye Ratu Anaky.”
55Na iane batar yadin ma ramdir dodo ma rsalan Yesus. Sir a ne ma rlarat Yesus rof Galilea ma rlangun I. 56Nof sir a ne Maria Magdalena, Maria Yakobus ma Yusuf enany, ma Zebedeus sawany.#Luk. 8:2-3
Tomwatar rafonak Yesus
27:57-61
(Mrk. 15:42-47; Luk. 23:50-56; Yoh. 19:38-42)
57Noak ma lere nfufw lo, tomwat mangoskai sa nma. Tomwate ne ngarany Yusuf ma nof kote Arimatea. I ye Yesus Ni manglartar sa nbal. 58I nti nakmat Pilatus ma ntak Yesus tenany. Ne Pilatus nfarete ma ral Yesus tenany ber i. 59Mpe Yusuf nal Yesus tenany betno nal maloly buri ngafele la nbebe I. 60Nof a ne Yusuf nti nfele Yesus na ni bang beberyar sa. Bange ne betno nkal na lenir sa ma nfen ber baty silayar. Lama Yusuf nfele Yesus na bange ne, nlawe baty silayar sa la nteri bange ne, ma nbali i.
61Nempa Maria Magdalena ma Maria walyetar a ne ramtoran kubur a ne souny.
Tomwatar rajake Yesus Ni kubur
27:62-66
62Ni bobole ne ni tewat ma Yahudyar nir ler Sanari. Ne mangsomp ulnir ma tomwat Farisyar rti rakmat Pilatus. 63Ma rfalak ber i, “Maken, kam manremi noak ma tomwat lepusuk a ne lolone nmorip e I nfalak, ‘Keta lerar tel e Yakw kmworip a kbwali kof mangmwatar lo.’#Mat. 16:21; 17:23; 20:19; Mrk. 8:31; 9:31; 10:33-34; Luk. 9:22; 18:31-33 64Mpa ka mfwarete ma rajake kubur a ne terik lerar tel. Fali farlan tate e keta Ni manglartar rma ma ramnang I, ma rfalak ber tomwatar feti I nmorip a nbali nof mangmwatar lo. Farlan sir rose farane keta rfule tomwatar yadin ma nlengan nof luryain a ne ma rlarat I.” 65Ne Pilatus nfalak ber sir, “Myor suldadwar ye ma rti rajake kubur a ne fen ngamone.” 66Mpe sir rti kubur a ne. Ne rfaniak kubur a ne ror meterai. Ma rfalak ber suldadwar ma rajake kubur a ne fen ngamone.
ទើបបានជ្រើសរើសហើយ៖
Matius 27: YMD
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Yayasan Pemberdayaan Masyarakat Desa © Wycliffe Bible Translators, Inc. All rights reserved.
