Matius 26
26
Mangsomp ulnir ma maken Yahudyar rfat ma lese ma rfen Yesus
26:1-5
(Mrk. 14:1-2; Luk. 22:1-2; Yoh. 11:45-53)
1Lama Yesus naftutu ngriar monuk a ne, I nfalak ber Ni manglartar, 2“Kmi mifai feti bait lerar du a nbal e ni tewat ma tomwat Yahudyar nir ler silai Paskah. Na lere ne keta ranrenre Yakw Tomwate Anaky ma rsangwalu Yakw.”#Kel. 12:1-27
3Noak a ne mangsomp ulnir ma maken Yahudyar rafburat sir na Kayafas ni das. Kayafas a ne ma neluk Mangsomp Silai. 4Ne sir raale andaun feti felan farpe ma romat ramudim Yesus nema bise ma rfen I. 5Nempa sir rfalak, “Ka kete tomat I na ler silai, nema tomwat ngayadin kete rose mimiri.”
Batar sa nbui ngule angat ngafele na Yesus uluny
26:6-13
(Mrk. 14:3-9; Yoh. 12:1-8)
6Noak ma Yesus namin pnu Betania, I nti Simon ni das. Simon ye ma luryain e maninik mpaul diat i. 7Noak ma Yesus ntame e batar sa nma ma nakmat I. Bate ne nonry ngule angat ngafele ma kotkyan desar na botal angkir sa ma rose rof baty marmer. Ne nbui ngule ne na Yesus uluny.#Luk. 7:37-38 8Lama Ni manglartar rsalan farane sir rares ma rfalak, “Safema bate ye nabyate motak ngule angat ngafele ne? 9Safo ngule ne kotkyan desar mpa ni ngafele e nfenri nema bise ma nsaman dotyar a ne ber tomwatar ma rawatan.”
10Nempa Yesus nafai nir andanwar mpa nfalak ber sir, “Msyalan lonri motak i! Ma kete nroke nraki kmi, fali safe ma nose ber Yakw ne nangafel desar. 11Kmi bise ma mtyulung dedesar tomwatar ma rawatan fali dedesar ma ror a kmi. Nempa Yakw e to dodo a nbal e to kor a kmi lo.#Ul. 15:11 12Fali i nbui ngule angat ngafele ne ma nasusan tenangw la ndaf lere ma ror Yakw far Ningw kubur. 13Mdyengar fen ngamone safe ma kfwalak ye, ni botuan e noak ma tomwatar rafwibar Ibar ngamone na mpenempen na saryamprene ye, keta rasaur a nbal safe ma bate ye nose la ranremi i dedesar.”
Yudas Iskariot nfenri Yesus
26:14-16
(Mrk. 14:10-11; Luk. 22:3-6)
14Noak a ne Yudas Iskariot nti nakmat mangsomp ulnir. Yudas ye tomwatar sa nof Yesus Ni manglarat buti resin du a ne. 15Ma nfalak ber sir, “Farlan yakw kunrenre Yesus ber a kmi e keta myal safe ber yakw? Mpe sir ral doit perak buty tel ber i.”#Za. 11:12 16Mpe ntabw nof a ne Yudas nanriak let ngamonar sa ma nanrenre Yesus ber sir.
Yesus nor Ni manglartar rane tnyam Paskah
26:17-25
(Mrk. 14:10-11; Luk. 22:3-6)
17Na ler pertama nof ler silai roti ma to ragi, Yesus Ni manglartar renrat I, “Tuangguru, mpweang ma kam mti masusan tnyam Paskah ma keta tane ne na mpe?”
18Ne Yesus nfalak ber sir, “Mtyi mikmat tomwat sa na kote ne ma mfyalak ber i, mamy Tuangguru nfalak feti ni tewat ma keta Ratu ntetak ber I a ne sesedin lo, ma I nmpeang ma nane tnyam Paskah nor Ni manglartar na nim das.”
19Ne Ni manglartar rose rlarat safe ma Yesus nfalak ber sir a ne ma rasusan tnyam Paskah.
20Ni nronram e Yesus namtoran nor Ni manglarat buti resin du a ne ma raktem a rtame. 21Noak ma rtame e Yesus nfalak, “Mdyengar fen ngamone safe ma kfwalak ye, ni botuan e tomwat sa nof kmi ye keta nfenri Yakw.”
22Lama Ni manglartar rdengar farane dalmir suse, ma leles mpane rfalak ber Yesus, “Tuangguru, yakw tate nre?”
23Ne I nfalak ber sir, “Tomwate ma madu a msob roti na mangkok ye, i ye ma keta nfenri Yakw.#Mzm. 41:10 24Botuan feti Yakw Tomwate Anaky, keta kmwat farlan safe ma rarengi na Kitap Lelerap dalam. Nempa suse maberat desar ber tomwate ma nfenri Yakw, Tomwate Anaky! Ni ngafele e kete ramtoranbabe desar i a na saryamprene ye.”
25Ne Yudas ma keta nanrenre Yesus a ne nfalak, “Tuangguru yakw tate nre?” Ne Yesus nfalak ber i, “Koko ko a mfwalak lo!”
Yesus nal roti ma anggur ber Ni manglartar
26:26-29
26Noak ma Yesus nor Ni manglartar rtame, I nal roti ma nose alang ber Ratu, betno napuse ma nasaman ber sir. Ma nfalak, “Roti ma kal ber a kmi ye, iane Yakw tenangw, myal ma mine!”
27Mpe I nal kompi ma anggur namin a ne, ma nose alang ber Ratu, ma nal ber sir ma nfalak, “Kmi monuk myenum myof kompi ye. 28Fali anggur ye iane Yakw darangw ma ntarbui ber a kmi noak ma kmwat. Yakw darangw a ne ma nafkoran Ratu Ni yoyoding nor tomwatar feti I keta nkes kalin nir salar monuk.”#Kel. 24:8; Yer. 31:31-34 29Yakw kfwalak ber a kmi, “Ni botuan e, nof lere ye keta to kwenum anggur ye lo, terik lere ma kwenum anggur beberi kor a kmi a na ain ma Amangw nfarete neluk Rai.”
Yesus nafbotin feti keta Petrus namsoal I
26:30-35
(Mrk. 14:27-31; Luk. 22:31-34; Yoh. 13:36-38)
30Ne sir rbeu la rdangin Ratu betno Yesus nor ni manglartar rti lenran Zaitun.
31Ne Yesus nfalak ber sir, “Nronram ye keta kmi monuk mifla mtyate Yakw. Fali rarengi na Kitap Lelerap dalam farye: ‘Keta Yakw kfwen mangajak domba, ma Ni dombayar a ne rafla buiyefar sir.’#Za. 13:7 32Nempa noak ma Ratu nafmorip a nbali Yakw, keta kbwalun kof a kmi far propinsi Galilea.”#Mat. 28:16
33Ne Petrus nfalak ber Yesus, “Boloka sir monuk to ralele Ko ma rafla rtate Ko, nempa yakw desar e to kufla ktwate Ko.”
34Yesus nfalak, “Petrus, mdwengar fen ngamone! Ni botuan e nronram ye sife to nkikyeu fuky e ko mumsoal Yakw lain tel e lo.”
35Nempa Petrus nfalak, “Tuangguru, boloka kmwat kor Ko, keta to kumsoal Ko.” Ne Manglarat walyetar a ne leles mpane rfalak farane nbal.
Yesus nsampayang na Getsemani
26:36-46
(Mrk. 14:32-42; Luk. 22:39-46)
36Mpene Yesus nor Ni manglartar rait anir sa ma ngarany Getsemani. Ne I nfalak ber Ni manglartar, “Mimtoran ma mnyengar Yakw na ye, ma ktwi iano ma kswampayang.” 37Ne I nti e nor Petrus ma Zebedeus angkir du. Ntabw nof a ne Yesus namtaut ma dalamy suse desar. 38Mpe I nfalak ber sir, “Yakw dalangw suse desar, ma krwase feti ketla kmwat. Mpa mimin ye ma ka mbyatar myor Yakw.”
39Mpe Yesus nkatar I nof sir betno nsatngur ma nbon ompak ma nsampayang. Ne I nfalak, “Amo o Amo, farlan Ko mpweang e mwalin suse ye mof Yakw nre la? Ma ka kete mose mlwarat Ningw mpempeang, nempa mose mlwarat Ko Nim mpempeang.”
40Lama Yesus nsampayang monuk e nbali I far Ni manglartar tel a ne. Nempa nsalan e rarwa lo. Ne nfalak ber Petrus, “Ko to bise ma mbwatar fen jamar sa mor Yakw e?” 41Ne Yesus nfalak a nbal, “Ka mbyatar dedesar ma msyampayang, nema nait ma smwangat yatkar nir ulun nteman a kmi e kete mfyufw far sale dalam. Botuan feti dalmir rmpeang ma myose mlyarat Ningw mpempeang, nempa koko kmi e to bomir myal ma myose.”
42Ne I nti nsampayang a nbal fen lain du ma nfalak, “Amo o Amo, farlan Ko mpweang ma kwoman suse ye, Yakw klwarat motak. Ma mwinrang ma Ko mose mlwarat Nim mpempeang.” 43Noak ma nbali I ma nsalan sir e lolone rarwa nbal fali to bonir ral matnir tutumpe ne.
44I nti a ntate sir ma nti nsampayang a nbal fen lain tel. Ne nsampayang ma ntak Ratu far luryain ma ntak a ne. 45Lama nsampayang monuk, I nti nakmat Ni manglartar ma nfalak ber sir, “Ali lolone mirwa mbyal e? Msyalan, ni tewat lo ma ranrenre Yakw, Tomwate Anaky ber tomwat salar. 46Mpyote kmi ma ti. Tomwate ma nfenri Yakw ne nma lo.”
Tomwatar romat Yesus
26:47-56
(Mrk. 14:43-50; Luk. 22:47-53; Yoh. 18:1-11)
47Noak ma Yesus lolone natanuk, Yudas nma nor tomwatar yadin. Yudas ye tomwatar sa nof Yesus Ni manglarat buti resin du a ne. Tomwatar yadin a ne rma e ronr smadar ma ebnar. Ma mangsomp ulnir ma mangfaret Yahudyar rsiduk sir ma romat Yesus. 48Yudas ma nfenri Yesus a ne nafbotin faniak ber tomwatar a ne farye, “Tomwate ma keta kbwon I e I a ne lo, ka myomat I!”
49Noak ma sir rait iane, Yudas nal far lury ma nlosir Yesus ma nfalak, “Tuangguru, ngamone ber Ko!” Betno nkoke ma nbon I.
50Ne Yesus nfalak ber i, “Awa, iane ma nwayat ma ko mwa ye e?” Mpe tomwatar ma rma ror Yudas a ne rti ma romat Yesus. 51Nempa tomwatar sa nof Yesus Ni manglartar ma namin iane nles ni smade la nsabit tomwatar sa tlingany ma namosit. Tomwate ne Mangsomp Silai Ni mangkaryayar sa. 52Mpe Yesus nfalak ber i, “Mswifik a mbwali nim smade ne, fali ise ma nles ni smade, keta tomwatar rfen i ror smade nbal. 53Ali ko to mufai e feti farlan ktwak Amangw Ratu ma ntulung Yakw e la nkirim desar Ni malaektar ma nlengan nof kompi buti resin du ber Yakw. 54Nempa farlan Yakw ktwak ma Ratu nose farane, botuan feti safe-safe ma rarengi na Yakw na Kitap Lelerap dalam nof luryain a ne, keta to bise ma rafdiat feleles farlan lere ye.”
55Ne Yesus nfalak ber tomwat ngayadin a ne, “Kmi mifliak feti Yakw e, mpa mya ma myomat Yakw e myonr smadar ma ebnar e? Lerar monuk ma kor a kmi ma kuftutu kmi a na Ratu Ni Das Silai e to myomat Yakw.#Luk. 19:47; 21:37 56Nempa kmi myomat Yakw farye e iane la mifdiat safe ma rarengi na nabyar nir kitpar. Ne Yesus Ni manglartar monuk a ne rafla rtate I.”
Mangtetak agamar rsidang Yesus
26:57-68
(Mrk. 14:53-65; Luk. 22:54-55; Yoh. 18:12-14; 18:19-24)
57Lama tomwatar romat Yesus e sir ror I ber Mangsomp Silai Kayafas. Na iano mangaftutu Musa ni faretar ma mangfaret Yahudyar rafburat sir lo. 58Ma Petrus nlarat Yesus nof dodo motak terik ma nait Mangsomp Silai ni das ni latyompur. Na iano i namtoran nor suldadwar ma nsalan feti keta rose farpe Yesus.
59Mangsomp ulnir ma mangtetak agamar rareke ma ranriak mangtungan lepuskwar ma rfasale Yesus, nema bise ma ral tetetak mamate ber I. 60Noak a ne sir rtar tomwatar yadin ma reluk mangtungan lepuskwar, nempa to bise ma rfatutu Yesus Ni sale. Ma famudi e tomwatar du ma reluk mangtungnar. 61Sir rfalak, “Kam mdengar ma tomwate ye nfalak feti keta I nsose Ratu Ni Das Silai, ma ni lerar tel e nafdiri nbali.”#Yoh. 2:19
62Ne Mangsomp Silai ne namdir ma nfalak ber Yesus, “Ko mdwengar ma mangtungnar a ne rfalak ma rfasale Ko nre! Ma safema Ko to mbwali sir?” 63Nempa Yesus namlin motak. Ne Mangsomp Silai ne nfalak ber I, “Ratu ma nmorip a ne ndengar safe ma Ko mfwalak. No mfwalak ber kam feti Ko ye Ray Silai Ratu Anaky e?”
64Ne Yesus nfalak, “Ko ma mfwalak farane lo. Nempa Yakw kfwalak ber a kmi, ntabw nof lere ye keta kmi msyalan Yakw, Tomwate Anaky ma kumtoran Ratu ma Ni kuase ma nlie nlengan a ne seriny fian. Ma keta msyalan ma ktwompur kof surga na mutan dalam.”#Dan. 7:13
65Mangsomp Silai ndengar farane ne nares#26:65 Tomwat Yahudyar biase rbis nir rabtyar ma neluk faniak feti sir rares. desar mpa nbis ni rabit ma nfalak, “Tomwate ne nafdas I ma nose felany farlan Ratu. Kit to tperlu mangtungan lo fali kit tdengar monuk safe ma koko I a nfalak a ne!”
66Mpa nof a kmi e ka tose farpe I? Mpe tomwatar ma ramin sidang dalam a ne rfalak, “Ka tal tetetak mamate ber I.”#Im. 24:16
67Ne tomwatar ketnir rdikat Yesus souny ma rtut I ma ketnir e rbabal I,#Yes. 50:6 68ma rfalak, “Hei Ray Silai Ko, no mbwet ma mfwalak ber kam feti ise ma nbabal Ko ye?”
Petrus namsoal Yesus
26:69-75
(Mrk. 14:66-72; Luk. 22:56-62; Yoh. 18:15-18; 18:22-27)
69Na noak a ne Petrus namtoran Mangsomp Silai ni das ni latyompur. Ne Mangsomp Silai ni mangkarya batar sa nma iane ma nfalak ber Petrus, “Ko ye biase mor Yesus ma nof Galilea ne nbal nre?”
70Nempa Petrus nulak ma nfalak, “Yakw to kufai feti ko mfwalak safe ye!” 71Ne Petrus nti namdir fofolat fakar burit. Ma mangkarya sa nbal nsalan i ma nfalak ber tomwatar ma ramin iane, “Tomwate ye nbal ma biase nor Yesus ma nof Nasaret a ne.”
72Nempa Petrus nulak a nbal ma nsompe. Ne i nfalak, “Yakw to kufai desar tomwate ne.”
73To dodo a nbal e tomwatar ketnir ma ramin iane rma ma rakmat Petrus. Ma rfalak ber i, “Au, botuan feti ko ye mweluk Yesus Ni manglartar sa nbal nre? Fali nof nim liliri ne kam mafai desar feti ko mof Galilea.”
74Nempa Petrus nangoak a nbali i ma nsompe ma nfalak, “Yakw to kufai desar tomwate ne.” Noak a ne nbal sife nkikyeu. 75Mpe Petrus nanremi safe ma Yesus nfalak ber i, “Keta sife to nkikyeu fuky e ko mumsoal yakw lain tel e lo.” Ne Petrus nbie nof ain a ne ma ntasing ma nasmetur.
ទើបបានជ្រើសរើសហើយ៖
Matius 26: YMD
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Yayasan Pemberdayaan Masyarakat Desa © Wycliffe Bible Translators, Inc. All rights reserved.
