Matius 15
15
Tomwat Yahudyar nir wewelmpampane to nordeng nor Ratu Ni faretar
15:1-20
(Mrk. 7:1-23)
1Na ler sa e tomwat Farisyar ketnir ma tuanggurw agamar rof Yerusalem rma ma rakmat Yesus. 2Ma sir rfalak, “Maken, safema Nim manglartar rlangas empninrar nusninrar nir yayatrwar, ma rtame e to rbur limnir a fuky?” 3Ne Yesus nenrat a nbali sir, “Safema kmi mlyangas Ratu Ni faretar nema bise ma myose mlyarat empnir-nusnir nir wewelmpampanar? 4Ratu nfalak: ‘Ka myalang enmir amir.’ Ma nfalak a nbal, ‘Ise ma natanuk yatak ber sir e ka rukun a rfen i.’#Kel. 20:12; 21:17; Im. 20:9; Ul. 5:16 5Nempa kmi to miftutu tomwatar ma rose farane. Kmi mfyalak ber sir feti iane to sale farlan tomwatar sa nfalak ber enany amany farye: ‘Ano Amo, keta to kal sasaf ber a kmi, fali safe ma ka kose ma kal ber a kmi a ne, yakw kal ber Ratu neluk snyompe lo.’ 6Iane feti kmi miftutu tomwate ne ma to nperlu ma nalang enany amany lo. Kmi myose farane iane kmi mdyaun feti Ratu Ni faretar a ne to ubany sasaf lo, ma mdyaun lan empmir-nusmir nir wewelmpampanar ma myose mlyarat. 7Hei tomwatar ma myose felmir farlan tomwat ngamonar! Botuan desar safe ma luryain e nabi Yesaya nfalak na kmi. I nfalak farye:
8‘Tomwatar ye rfalak motak feti rdangin Yakw,
nempa dalmir e to farane ma to rdaun desar Yakw.
9To ubany ma rsampayang ber Yakw,
fali to rlarat Ningw faretar,
ma raftutu lan tomwatar nir wewelmpampane.’”#Yes. 29:13; Mrk. 7:6-7
10Ne Yesus ntar tomwat ngayadin ma nfalak ber sir, 11“Mdyengar fen ngamone safe ma kfwalak ye nema mkyaul myal: tnyamar ma tomwatar ral a na babnir, to nose ma rngeryai na Ratu sounlury, nempa kabain yatkar ma rbie rof babnir a ne ma nose ma rngeryai na Ratu sounlury.”
12Mpe Yesus Ni manglartar rma ma rfalak, “Maken, mufai nre tate feti safe ma Ko mfwalak ber tomwat Farisyar a ne sir rase desar mpa dalmir maninik.” 13Ne Yesus nfalak, “Katutnwar monuk ma Amangw ma namin surga to ntanam keta npal sir nor wakrir. 14#Luk. 6:39Msyalan lonri motak tomwat Farisyar a ne. Sir a ne farlan matbole, mpa farlan matbole nkolat matbole, keta radu a rfufw far meloke dalam.”
15Ne Petrus nfalak, “Maken, no mfwalyole tnyanuk pupule ne isiny ber kam.” 16Ne Yesus nfalak ber Ni manglartar, “Ali kmi to mkyaul myal tnyanuk pupule ne fuky e?” 17Kmi mifai lo nre feti safe-safe monuk ma nti babnir dalam a ne keta to nti dalmir nempa nti kampnir ma rtimudin kalin. 18Nempa kabain yatkar ma tomwatar rfalak iane ma nbie nof dalmir. Mpa ngribatin yatkar ma rbie rof tomwatar dalmir a ne, ma nose ma sir rngeryai na Ratu sounlury.#Mat. 12:34 19Fali andaun yatkar monuk a ne nbie nof tomwatar dalmir nwayat ma rafen, ranronr, ralalin, ramnang, reluk mangtungan lepuskwar, ma rfalak ngribatin yatkar na tomwatar. 20Kabain yatkar monuk a ne nwayat ma tomwatar rngeryai na Ratu sounlury. Nempa farlan rtame ma to rbur limnir, iane to nose ma rngeryai na Ratu sounlury.
Batar sa ma to Yahudi i nalele Yesus
15:21-28
(Mrk. 7:24-30)
21Mpene Yesus nti a ntate ain a ne ma nti nusar sa ma nlosir kote Tirus ma Sidon. 22Bat Kanaan sa nof nuse ne nma ma nakmat Yesus. I nma e nafwayak mpane, “O Mangnrure, Daud empuny, mlwompang yakw nrela! Koli smwangat yatak a nsung anakw bate nwayat ma nawar desar i.” 23Nempa Yesus to nbali bate ne desar. Ne Ni manglartar rfalak ber I, “Maken, mfwalak ber bate ne ma nbali i, koli nlarat kit e nafwayak mpane.” 24Ne Yesus nfalak ber bate ne, “Ratu nsiduk Yakw ma ktwulung lan tomwat Israelar, fali sir farlan domba ma nlai.” 25Nempa bate ne nma ma nlosir Yesus ma nsatngur na sounlury. Ne nfalak, “O Mangnrure Ko, mlwompang yakw nrela!” 26Nempa Yesus nfalak ber bate ne, “Ano, farlan ktwulung ko, iane feleles farlan tomwate ma nyebas angkir nir tnyamar ber aswar.” 27Ne bate ne nfalak, “Amo, botuan desar. Nempa aswar ma ramin mede lebaban biase rane kangkir nir tnyam rufkir ma rfufw rof mede ne nbal.” 28Ne Yesus nfalak ber i, “Ano, ko mulele desar Yakw mpa la kose klwarat safe ma mtwak a ne.” Ntabw nof a ne anaky nangamon desar.
Yesus nafngamone mangafansar yadin
15:29-31
29Lama Yesus nti a ntate ain a ne, I nmpan nalyole twemul Galilea seriny. Ne I nfangat far bubuar das ma namtoran iane. 30Mpe tomwat ngayadin rma ma rakmat I. Sir rma e ronr mangamluktwar, sabaloyar, matbolar, momowar ma mangafanas walyetar a nbal. Sir rnau mangafansar monuk a ne na Yesus sounlury ma nafngamone sir. 31Tomwat ngayadin ma ramin iane rampriang fali rsalan ma Yesus nafngamone mangafansar monuk a ne. Tomwat momowar ratanuk, tomwat sabaloyar rangamon, tomwat mangamluktwar rmpan, ma tomwat matbolar rakeban. Iane nwayat ma tomwatar monuk rdangin Ratu ma tomwat Israelar rsatngur ber I a ne.
Yesus nfane tomwate ribun fat
15:32-39
(Mrk. 8:1-10)
32Ne Yesus ntar Ni manglartar ma nfalak, “Yakw klwompang resi tomwatar ye, fali rlarat Yakw lerar tel ye lo ma nir tnyamar omp lo. Ma Yakw to kwinrang ma rbali sir far nir dasar e ramlafar, fali keta rfufw a na dalamtene let.” 33Ne Ni manglartar rfalak ber I: “Maken, ain ye nkese i mpa tal tnyame tof mpe la tfane tomwat ngayadin ye ma rabotan?” 34Ne Yesus nenrat sir, “Mir rotyar fir a ne?” Ne sir rfalak, “Rotyar itw ma ian angkir ketnir ye.” 35Ne Yesus nfalak ber tomwat ngayadin a ne ma ramtoran bab. 36Ne I nal rotyar itw ma inar a ne ma nose alang ber Ratu. Betno napuse rotyar ma inar a ne, ma nal ber Ni manglartar ma rasaman ber tomwat ngayadin a ne. 37Mpe tomwat ngayadin a ne rtame terik ma rabotan. Ne Yesus Ni manglartar rabutin tnyamar ma nres a ne na botyar itw ma rfen. 38Nof tomwatar monuk ma rtame ne farlan tfayaki merwanar motak e fafa tomwate ribun fat iane to rtafal batar ma kangkir a fuky. 39Mpe Yesus nluan tomwat ngayadin a ne ma rbali sir far nir dasar. Ma I nfangat kumal ma nti yampren Magadan.
ទើបបានជ្រើសរើសហើយ៖
Matius 15: YMD
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Yayasan Pemberdayaan Masyarakat Desa © Wycliffe Bible Translators, Inc. All rights reserved.
