Juan 1
1
Tũpa ĩñee, meẽ tykove opambava
1Jypyiterãvãĩmba ẽẽ Ñee, hareka hokava Ñee ẽẽ hãndi Tũpa, hãrã hokava Ñee hai Tũpa. 2Jypyiterãvaĩmba Tũpa ẽẽ hãndi kova Ñee. 3Hai rupii opava maĩnunga japoha, hãrã mba'ety hai rupimba japohava. 4Haimba ẽẽhe tykove, hãrã hokava tykove hai kuaretare jysapeka. 5Hãrã hoka hendyva sape timimbivape, hãrã timimbiva katuãã mbove. 6Ĩmemba'ẽ arykai pente kuimbai Tũpa mbouva, Juan he'iashuva. 7Hãrã hokava ou kuaa kaviveva, mbeushu verã kuaretare kova mbai sapeva ryheva, pota opavare jyrojaherã. 8Juan ha'ẽãmba mbai sapeva; koñeĩ mbeu kavive verã ko sapeva ryheva. 9Hãrã ko sapeva añeteĩteva, oumba ko yvy'ĩãrẽ sapehe verã kuaretare. 10Hokava Ñee ẽẽñoĩmba ko yvy'ĩãrẽ, ajemaĩ Tũpa japoteã ko yvy hokava Ñee rupii, tẽvã kuaretare mba'ẽã kuaaseshi reta. 11Hentapetei ou, tẽvã henta ĩrũre myvãhẽãshu. 12Tẽvã opaite myvãhẽshuva hareka jyrojahevare; ikoshi reta Tũpa tayre. 13Ha'eã turuvy hareka tyroo potava rupii oavare; ha'eãvãĩjy kuareta potava rupii, Tũpaivi oava reta rãnga hai. 14Hãma hokava Ñee ikoshi kuareta, hareka iko'i ñanymbyteipi, tynyhẽ jyhaihukue hareka añeteva. Ore heshaha hĩmbipekue, hãrã hokava hĩmbipeva hai Tyray ña'ãpova, Teru meẽshuva tay penteĩ'ia. 15Juan ijetaherã hei: “Kova rãnga hai kueve aijetaheperã haiheva shaykue ouva hai mbaivasuve shyheviva, shara ẽẽmaĩmba hai arykai ndei aarã”. 16Hai jyhaihukue tynyhẽ rupii, opaiteva heta hipityka mbaikavikue. 17Shara Tũpa meẽ ñee mbyparahava Moisés rupii, tẽvã jyhaihukue hareka mbai añeteva vãhẽ Jesucristo rupii. 18Mba'ety heshava Tũpa; tẽvã Tay penteĩ'ia Tuu hãndi ẽvã, opa mbeu ñande marãvara hai.
Juan Bautista mbeu mbavara Cristo
19Kova hai Juan mbeuva, Judiore juhuvisha Jerusalenpe'õre mondo pai ruvishare hareka Levitare hai ẽvãperã, pyrãndushu verãre haira mbava jyve. 20Haipe Juan mbeu kavi hareka ñomiãã: She ha'ẽã Cristo! 21Haipe pyrãndujyshu reta: Mbavara nde? Ndera hai Tũpa ĩñee mbeu'ia Elías? Juan hei: Ha'ẽã rãnga she. Hykuaĩ pyrãndujyshu reta: Akuarã, ndera hai Tũpa ĩñee mbeu'ia hãrõha'õva? Hai hei: Mba'ety. 22Haipema heishu reta: Akuarã, mbaveitera nde? Mbe'uhashu verã jyve yrỹmbouvare. Mbeu ore, mbavaitera nde? 23Juan heishu reta: She rãnga hai sapuke'ia yvy ikoambaipi: “Pymyhẽvãshu tape symyĩ ohova Ñandeja pevarã”, Tũpa ĩñee mbeu'ia Isaias heiva rãĩmi. 24Juan oho ijeta hãndivare hai fariseore jokueva. 25Hãrã heishu reta: Akuarã, marã'ĩrãra rypyrỹmyngarai ha'ẽã nde Cristo, Elías, maĩrã Tũpa ĩñee mbeu'iarãme? 26Juan heishu reta: Yypeĩ, she apyrỹmyngarai; tẽvã pynymbytepe ĩme'ẽ pente pikuaambava. 27Hokava hai shaykue ouva, tẽvã mbaivasuve shyhevi. Jypasa ĩshaĩmba ẽshea ajorashu verã. 28Opaite kova mbai iko tenta Betaniape, ysyryva Jordan hyvaisho kyty, Juan pyrỹmyngarai'i vekuape.
Jesús hai Tũpa Avisha Ray
29Pareemajyrã, Juan hesha Jesús vãhẽ ou hai ẽvãperã hei: Pymãĩhe, kova hai Tũpa Avisha Ray, opa hekyva kuareta retaivi mbai porãmba vekua! 30Kovare rãnga aijetarã hai aihe kueve: “Shaykue ou pente kuimbai mbaivasuve shyheviva; ẽẽmaĩmba hai arykai ndei aarã”. 31She aikuaa kaviã jyve mbavara, tẽvã she ai apyrỹmyngarai yype israelitavare kuaa verã mbavara hai. 32Juan heijy: She rãnga ahesha pykasu rãĩmi vate araivi Espiritu Santo vejyherã. 33She aikuãã jyve mbavara hai; tẽvã shymbou vekua apyrỹmyngarai verã yype heishe: “Ryheshama pente kuimbai vejyhe Espiriturã, hokava hai pyrỹmyngaraiva Espiritu Santopy”. 34She aheshama, hãrã ambeu jyve haiñõĩva Tũpa Tay.
Jesús tynonde mboireare
35Pareemajyrã, hykuaĩ Juan ẽẽjy hãndi mokue mboireare. 36Heshama Jesús haipi hasa ohorã, Juan hei: “Pymãĩhe, hokava hai Tũpa Avisha Ray!” 37Hãrã kova mbo'ehareare mokue'ia henduma Juan heivarã, jyraha hipii Jesús. 38Haipe Jesús mãĩ haykuerã hesha ouhipia retarã pyrãndushu: Mbaivara pyhekapi? Haire hei: Rabi (he'iseva Pyrỹmboi'ia) mapera rikori? 39Jesús heishu reta: Pei pymaĩhe. Jyraha hãndi retarã hesha mapera iko'i, haipe pyta jyve hãndi reta hoka arape; shara ka'aru ora urũndyheama oho'iherã. 40Penteva hendu vekua Juan hareka ohova Jesús haykue, hai Andres, Simón Pedro ñymoña hãndia. 41Andres tynonde japova hai oho heka tichey Simón; hesharã heishu: Vãhẽã rãngashuje Mesias! (He'iseva Cristo). 42Haivi Andres raha Simón Jesús ẽvãpe. Jesús maĩherã heishu: Nde hai Simón, Jonas tay, tẽvã ã'ẽ nymbyheapo Cefas, he'iseva ita (Pedro).
Jesús hẽno Felipe hareka Natanael
43Pareemajyrã, Jesús hei ohojy verã Galilea kyty. Haipe hesha Felipe hãrã heishu: Ei shipive. 44Felipe hai Betsaidape'õ, Pedro hareka Andres iko'iape. 45Haivi Felipe oho heka Natanael, heshamarã heishu: Vãhẽha rãngashu kuimbai, Moisés mbyparahe vekua hareka Tũpa ĩñee mbeu'iare, hokava hai Jesús, José tay Nazaretpe'õ. 46Natanael hei: Katura Nazaretvi õhẽ mbai haikaviva? Felipe heishu: Ei mãĩhese. 47Jesús hesha Natanael vãhẽ ourã hei: Kõõ ou pente Judio añeteĩteva, japumbava. 48Natanael pyrãndushu Jesús: Marãĩra shykuaa? Jesús heishu: Felipe ndei oho mbeunderãvãĩ rãnga aryreshaje, yvyra igo ipe ryvapyrirã. 49Natanael heishu: Pyrỹmboi'ia, nde rãnga hai Tũpa Tay, nde hai Israel Juhuvishavasu. 50Jesús heishu: Aryreshaje igo ipe ryvapyrirã hainderãmeĩra, shyroja? Ryheshave rãngateripo kovaivi mbai vasuveva. 51Jesús heijyshu reta: Ãñeteĩte hai pee, pyheshapokui ara vate'õ jypearã hareka Tũpa jokuevare jupi hareka vejy ñynoĩ'ĩãrẽrã ko kuareta Tay.
ទើបបានជ្រើសរើសហើយ៖
Juan 1: TPJ
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
©2023 LETRA Paraguay
