लुका 22
22
येशु ढोङ धङ् ॱसोम्बुल लोङे केच्च्य २२:१–२४:५३
येशु डलक्ल तोङ्गेन् यहुदा इस्करीयोत्की ढो़ १-६
1यहुदी घयेत् छ्यीबे धी़रीम् सीक्केन् च्युर् मत् ज्यबे ढोप्ची सगेङ्गी धी़रीम् दी ह ॱस्यच्चल ॱलीत् छर हीङ्गो़प्प बेत्। 2ॱनी छ्यो़प्पो़न् चो छ्यीया घयेत् धङ् छ्यो़डीम्गी चयेलम घयेक्की येशु घन्दुक् झ्यीन ॱसो़च्च्ये ब अक् ॱनो़बे झ्यी़ तेब बेत्। ॱनी म दी हुब मी घयेत्ल ज्यीगो़प्प बेत्।
3हीनी यहुदा इस्करीयोत् दील शैतान् स्युब बेत्। हुगो च्युन्नीबु दीबे छीक्नी च्यीक् हीङ्गो़प्प बेत्। 4ॱनी हुगो छ्यो़प्पो़न् चो छ्यीया घयेत् धङ् छ्यो़गङ्गी गोराब घयेक्की पेम्बु घयेत् च्याल फीन्न येशु घन्दुक् झ्यीन हुबे लक्ल तोङ्ज्ये ब अक् ॱनो़न हुबदङ् ढो़ झ्यीब बेत्। 5हीगोल हुब घयेत् गेसक्की हुगोल पयीसक् तीरे छ्यो़त्तुम् झ्यीब बेत्। 6ॱनी हील हुगो थी़न्न, हुगी हुनी झ्यीनी मी गक् मीप्पे यङ्ल येशु हुबे लक्ल तोङ्ज्येमे झ्यी़ ते तेब झ्यीब बेत्।
यहुदी घयेत् छ्यीबे धी़रीम्गी सम ७-२३
7ॱनी च्युर् मत् ज्यबे ढोप्ची सगेङ्गी धी़रीम्गी नङ्ल यो़क्केन् यहुदी घयेत् छ्यीबे ढीक्ल लुक्टुक्की ॱरोक् पुबे ङीन् दी ॱलीब बेत्। 8हुनी येशुगी पत्रुस् धङ् युहन्नाल खीत्रङ् ज्युक्ल यहुदी घयेत् छ्यीबे धी़रीम्गी यङ्ल हज्यरङ्ल गो़बे सज्येमे ढङ् घयेत् ठोक्क झ्यीलेत् सीन्न ॱङान तङ बेत्। 9ॱनी हुबे खोङ्ल घदु ठोक्क झ्यी सीक्केन्? सीन्न ढीब बेत्। 10ॱनी खोङ्गी हुबल खीत्रङ् सार्की नङ्ल ज्युक्ल हुदु छ्यी़नेत् खुर्न युङ्गेन् छ्योगो च्यीक् ठेक्केन् बेत्। ॱनी हुगी तीङ्ल तीङ् दीत्न ज्युक्ल हुगो स्युक्से खीम् दील खीत्रङ् ॱअङ् स्युल ज्युक्। 11ॱनी हुगी खीम्दक्प दील हीन्दुक् झ्यी। चयेलमे नीज्यरङ्ल हीन्दुक् सीगुक्। छ्यीबे धी़रीम्गी यङ्ल ङ धङ् ङे ॱलोप्टुक् घयेत्ल गो़बे सम सज्येल ङीक्की ढीक्ल कोट्ट दी घन यो़प्प? सीगुक् झ्यी। 12ॱनी हुगी खीत्रङ्ल थोक्स्युक्ल यो़क्केन् कोट्ट गर्चम च्यीक् तो़ङ्गेन् बेत्। ॱनी उन हज्यरङ्ल गो़बे यप्च्य घयेत् कुरीक् यो़क्केन् बेत्। ॱनी हुदु कुरीक् ठोक्क झ्यीज्यीत् सीन्न ॱङान तङ बेत्। 13हुनी हुब ॱङीबु फीन्नी खोङ्गी ॱङाब दी डस्सीरङ् ठेप्प बेत्। ॱनी हुबे हुदु छ्यीबे धी़रीम्गी यङ्ल गो़बे सम घयेत् दी ठोक्क झ्यीन स्यक्प बेत्।
14हुनी येशु धङ् ठीक्नल दीब धी़जो़त्ल हुदु जोम्न युङ्न सम दी सदु देप्प बेत्। 15ॱनी ठीक्नल दीबल खोङ्गी हीन्दुक् ॱसुङ बेत्। ङल दुक्प नोङले एल्ला ङ खीत्रङ्दङ् दल यहुदी घयेत् छ्यीबे धी़रीम्गी सम हीगो सगीन् थेस्सी झ्युङ्। 16घन्ड हीन् सीन्न ङे खीत्रङ्ल ॱस्येत् योङ्। हीगी यहुदी घयेत् छ्यीबे धी़रीम्गी समे धो़ङ्गी लेमु घयेत् हीगो डुप्नी, हुनी इगी को़न्ज्योक्की ज्यागक्तु मेन्द, हीगो डस्सीगी सम मीत् स सीन्न ॱसुङ बेत्। 17हुनी गोङ्ज्यङ् च्येम्मे फोप्प च्यीक् खोङ्गी छ्यक्ल ॱनम्न को़न्ज्योक्ल थु छ्यी पुन हुनी हुबल बीन्न हीगो खीत्रङ् नङ्दु गो़न थुङ्। 18ङे खीत्रङ्ल ॱस्येत् योङ्। ह हीनी झ्यीब दी गोङ्गोङ्गी गोङ्ज्यङ् हीगो को़न्ज्योक्की ज्यागक् च्योङे धी़ दी ॱलीत्नी मेन्द, ङ ॱमीत् थुङ् सीन्न ॱसुङ बेत्।
19हुनी खोङ्गी ढोप्ची च्यीक् छ्यक्ल ॱनम्न को़न्ज्योक्ल थु छ्यी पुन हुनी च्यक्न ॱलोप्टुक् दीबल ॱय हीगो लीन्। हीगो खीत्रङ्गी ढीक्ल ॱनङे ङे सी़बु हीनो। हीगो ङ ढेन्सो़ युङ्ज्येल खीत्रङ्गी हीन्दुक् झ्यीन झ्यीज्यीत् सीन्न गो़न टेप्प बेत्। 20सम घयेत् दी से छर्नी, यङ् गोङ्ज्यङ् च्येम्मे फोप्प दी छ्यक्ल ॱनम्न खोङ्गी हीगी फोप्प हीगो कगो़त् धम्स्यक् ॱसम्बे ङे ठक् बेगो। हीगो खीत्रङ् घयेक्की ढीक्ल थो़ङ्गेन् बेत्। 21ङ डलक्ल तोङ्गेन् दी हीन ङदङ् दल पान सगुक्। 22को़न्ज्योक्की थुल यो़प्पल कोलीमीगी ॱरेबु जम्बुलीङ् हीनी डोव दी त डो गोगेन् बेत्। ॱनी हीन्न अक्, कोलीमीगी ॱरेबु डलक्ल तोङ्गेन् हीगो घन्डे दुक्प सीन्न ॱसुङ बेत्। 23ॱनी हुबे रोरङ्सो नङ्दु हुगो ॱसु ब अक्? सीन्न च्यीक्तङ् च्यीक्ल तम् ढीरी चीय बेत्।
स्यप्च्यी़गी ले झ्यीक्केन् छ्यीस्स्योल थो़ङ्गेन् २४-३०
24हुनी हुब रोरङ्सो नङ्दु हज्यरङ्गी छीक्नी ॱसु छ्यीस्स्योल थो़न्न यो़क्केन् बेक्क? सीन्न केच्च्य थुक्री चीय बेत्। 25ॱनी खोङ्गी हुबल ज्यी़त् ॱयोङ्म घयेक्की घुङ्दुरङ् हुबे ज्याबु घयेक्की ॱवङ् तोङ्गेन् बेत्। ॱनी ॱवङ् च्येम्म घयेत्ल ढीन्ज्येङ्गी मी बेत् सीन्न मीङ् तक्केन् बेत्। 26ॱनी हुगो डस्सीगी लेमु खीत्रङ्गी घुङ्दु युङ्ज्ये मीत् युङ्गेन् बेत्। खीत्रङ्गी घुङ्दु ॱसु छ्यीया यो़दङ् हुगी स्यो़न्स्योगी ले डस्सी झ्यीज्यीत्। ॱनी यङ् ॱसु गोयो़प्प झ्यीक्को़दङ् हुगी स्यप्च्यी़बे ले डस्सी झ्यीज्यीत्। 27सम सगेन् धङ् सम स्युगेन् दी घङ्गो छ्यीया बेक्क ॱनी? सम सगेन् दी छ्यीया मेम्बेक्क ॱनी? ॱनी हीन्न अक्, ङ खीत्रङ्गी घुङ्दु स्यप्च्यी़ ज्युक्केङ्गी स्यप्च्यी़ब हीन्। 28ङल छो़त्लीन् गज्येन् युङ्न अक्, खीत्रङ् ङदङ् मुलरङ् देप्प बेत्। 29हुगो झ्यीनी ङे यप्की ङल ज्यागक् च्योङ्ज्येमे ॱवङ् ॱनङ डस्सी ङे एक् खीत्रङ्ल टो़क्केन्। 30हुनी खीत्रङ् ङे ज्यागक्तु ङदङ् दल सज्ये धङ् थुङ्ज्ये ॱनोङ्न, ॱवङ् च्येम्मे स्युडील जेन इस्राएली घयेक्की पुबु च्युन्नीबी़ दुङ्ज्यी़त्ल ॱवङ् च्योङ्ज्ये ॱनोङ्गेन् बेत्।
पत्रुस्की ढीक्ल ॱङो़स्स्यी ३१-३४
31ॱवे शीमोन् शीमोन्, खीत्रङ् घयेत् ढे फुक्मक् ठब डस्सी ठोप्च्येमल शैतान्गी ॱहक् लीन्न दुक्। 32हुगो झ्यीनी शीमोन् रङ्गी छ्य स्यक्प दी स्यीक्च्ये मीप्पे ढीक्ल ङे ॱसुव तबेन्। रङ् फीच्च्य यङ् ॱसीम् ज्युर्न लोक्न युङ्नी हुनी रङ्गी पी़न्ज्या घयेत्ल रङ्गी ॱलोप्स्यीक् टो़च्च्यीत् सीन्न ॱसुङ बेत्। 33ॱनी पत्रुस्की खोङ्ल चोव ज्यीन्दक् ङ नीज्यरङ्दङ् दल चो़ल्लरङ् हीन्, यङ् ॱस्यी गो़रङ् ॱस्यर्न आक्, ङ डो छ्योक् यो़त् झ्यीब बेत्। 34ॱनी हीगी लेल्ल खोङ्गी ॱवे पत्रुस्, ङे रङ्ल ॱस्येत् योङ्। हन्दरङ् छेम्मु झ्यबु भो़त् भो़त्ले एल्ला रङ्गी ङल लेम्म ॱसुम् हुगो ङु ॱमीत् ॱस्यीबेत् सीन्न सीक्केन् बेत्।
ढी पदङ् ॱङीगी ढीक्ल ३५-३८
35हीनी ॱलोप्टुक् दीबल खोङ्गी ङे खीत्रङ्ल पयीसक्, जप्पेक् धङ् जुत्त घन्ड अक् ॱमत् खुर ज्युक् सीन्न तङेन्। ॱनी खीत्ल हुगी यङ्ल घन्डे गो़ज्येक्की तोक्प झ्युङ? सीन्न ढीब बेत्। ॱनी हुबे लेम्बुल घन्डे तोक्प आक् झ्युङ्मोङ् झ्यीब बेत्। 36ॱनी खोङ्गी हुबल ह ॱसुल पयीसक् यो़दङ् हुगो खुर्च्यीत्। ॱसुल जप्पेक् यो़दङ् हुगो खुर्च्यीत्। ॱसुल ढी पदङ् मीन्दुक्क हुगी रोरङ्गी ली़ज्ये छ्यी घो़ दी चोङ्न हीन्न अक्, ढी पदङ् नो़न खुर्च्यीत्। 37ङे खीत्रङ्ल ॱस्येत् योङ्।
खोङ् नक्पो़न् घयेत्तङ् च्यीक्प ॱसम्गेन् बेत् सीरे ॱसुङ्रप्की केच्च्य हीगो ङे मीजील डुप् गोगेन् बेत्। (यशैया ५३:१२)
घन्ड हीन् सीन्न ङे ढीक्ल ढीन यो़प्प घयेत् कुरीक् डुप् डोगेन् बेत् सीन्न ॱसुङ बेत्। 38हुनी हुबे खोङ्ल चोव ज्यीन्दक् तो़दे। हीन ढी पदङ् ॱङी दुक् झ्यीब बेत्। ॱनी हील खोङ्गी हीजो़त् च्यीक्की डीक्केन् बेत्।
गेत्समनीदु येशुगी ॱसुव तबे तम् ३९-४६
39हुनी खोङ् छ्यील थो़न्न ॱएङ्गी डस्सी ओलीप्की लदोक् दील फीम्ब बेत्। ॱनी ॱलोप्टुक् दीब अक् तीङ्ल फीम्ब बेत्। 40ॱनी हुगी ॱसने दील ॱलीत्नी, खोङ्गी हुबल खीत्रङ् दीक्पल छ्यी़ज्ये मीप्पे ढीक्ल ॱसुव तोप्कीन् दो़त् सीन्न ॱङान स्यक्प बेत्। 41ॱनी खोङ् रोरङ् फच्चो़त् च्यीक्ल दो छ्यो़से ॱसनेजो़त् च्यीक्ल फीन्न पीमुङ् चुन हीन्दुक् सीन्न ॱसुव तब बेत्। 42पब, नीज्यरङ्गी थुल झ्युङ्न, दुक्स्यी च्येम्मे फोप्प हीनी थुङ् मीत् गो़ब, या टो़रो झ्यी। ॱनी म दी ङे ॱनो़ब मेम्ब, नीज्यरङ्गी थुल यो़प्प दी युङ्ज्ये यो़प्प तोङ् सीन्न झ्यीब बेत्। 43हुनी इगी तेङ् यी़नी मल्ल भङ्ज्येम्ब च्यीक् खोङ् च्येल्ल थो़न्न युङ्न खोङ्ल ॱलोप्स्यीक् टेप्प बेत्। 44खोङ्ल ॱसीम्दुक्की म दीरङ् दुक्स्यी छ्यीम्मु झ्युङ्नी, हुनी हरुङ् स्यीदङ् झ्यीन ॱसुव तब बेत्। हुनी खोङ्ल ॱमी़रक् ॱस्योर्न म दीरङ् ठक्की थीब डस्सी थीब बेत्।
45ॱसुव दी तप् छर्नी, हुनी खोङ् लोङ्न ॱलोप्टुक् दीब च्याल युङ्न ॱलोप्टुक् दीब ॱसीम्दुक्की ॱअयु छ्यक्न ॱङीत्ल ॱसोङदङ् ठेप्प बेत्। 46ॱनी खोङ्गी हुबल घन्डल ॱङीत् लोक्केन्। लोङ्ल खीत्रङ् दीक्पल छ्यी़ज्ये मीप्पे ढीक्ल ॱसुव तोप्कीन् दो़त् सीन्न झ्यीब बेत्।
येशु सुङे तम् ४७-५३
47हीगो सीक्कीर्रङ् च्युन्नीबु दीनी यहुदा दीगी मी गज्येन् ठीक्न युङ बेत्। ॱनी हुगो रोरङ् येशुल च्युप् झ्यीत्तु खोङ्गी लोल युङ्नी, 48हुगोल येशुगी यहुदा खोक्की कोलीमीगी ॱरेबुल च्युप् झ्यीन डलक्ल तोङ्गेन् हीम्ब? सीन्न ॱसुङ बेत्।
49ॱनी खोङ्दङ् दल यो़क्केन् घयेत् दीबे हुदु युङे मी घयेत् दीब घन्डे धो़ल्ल युङ बेक्क हुगो ॱह घोनी हुबे येशुल चोव ज्यीन्दक् ङीक्की ढी पदङ् बेन् तोङ्ज्ये न? सीन्न ढीब बेत्। 50हुनी च्यीक्की हुदु युङे मी च्यीक्ल बेन्न आम्ज्योक् ॱयेब दी स्योक् स्योन पुर् तङ बेत्। हुगो छ्यो़प्पो़न् चो छ्यीस्स्योगी ॱयोक्पु च्यीक् हीङ्गो़प्प बेत्। 51ॱनी हुल येशुगी मत् झ्यीत्। ह युङेत् सीन्न हुगी ॱयोक्पु दीगी आम्ज्योक् दील सीन्न ढक्तु ची़प्प बेत्।
52ॱनी खोङ् सुङ्दु युङे छ्यो़प्पो़न् चो छ्यीया, छ्यो़गङ्गी गोराब घयेक्की पेम्बु घयेत् धङ् लुङ्बे गेम्बा चो छ्यीया घयेत् दीबल येशुगी हीन्दुक् ॱसुङ बेत्। खीक्की नुक्म ढी पदङ् धङ् ज्युक्प खुर्न ङ झ्यक्पा ब अक् ॱनो़न युङ हीम्ब? 53ङ छीगङ् ङीन् रीम फो़स्स्यी छ्यो़गङ्गी च्यारीदु दो़प्पे यङ्ल खीक्की ङ घन्डल मत् सुङ? हुन्दो क मेन्नक्की ॱवङ् दी युङ्न खीत्रङ्गी धी़ दी ॱलीब बेत् सीन्न ॱसुङ बेत्।
पत्रुस्की येशुल ङु ॱमीत् ॱस्यीबेत् झ्यीब ५४-६२
54हुनी हुब घयेक्की येशु सुङ्न छ्यो़प्पो़न् चो छ्यीस्स्यो दीगी खीम्ल ठीक्न च्येब बेत्। ॱनी पत्रुस् येशुगी तीङ्जो़त् तीङ्जो़त्ल युङ बेत्। 55ॱनी उन धङ्रे घुङ् दीन मी घयेत् मी तङ्न दीगीन् यो़प्प बेत्। ॱनी पत्रुस् हुबदङ् दल देप्प बेत्। 56ॱनी उन ॱयोक्मु च्यीक्की पत्रुस् उन मी ओ़त्ल दो़प्प थोङ्नी हुगी पत्रुस्ल फोरील तेन हीगी मी हीगो ओक् हुगोदङ् दल दो़क्केङ्गी मी च्यीक् हीङ्गो़प्पेत् सीन्न झ्यीब बेत्। 57ॱनी पत्रुस्की लेल्ल ङ मेन्। ङे हुगो ङु ॱमीत् ॱस्यीबेत् सीन्न झ्यीब बेत्। 58हुनी यङ् अच्च्येत् च्यीक्नी ॱयोङ्म च्यीक्की इक् पत्रुस्ल तेन रङ् अङ् हुब ङो़गी च्यीक् हीङ्गो़प्पेत् सीन्न झ्यीब बेत्। हीगी लेल्ल पत्रुस्की ङ मेन् झ्यीब बेत्। 59हुनी छ्युजो़त् च्यीक् ॱसोङ्नी, यङ् मी ॱयोङ्म च्यीक्की हीगी मी हीगो गालीलागी मी बेत्। हीगो गन्दीय हुगी मी हुगोदङ् दल दो़क्केङ्गी मी च्यीक्रङ् बेत् सीन्न झ्यीब बेत्। 60ॱनी पत्रुस्की लेल्ल खोक्की घन्डे तम् सीगो़प्प ङल हुगो ॱस्यो़च्च्ये दीरङ् मीत् सीन्न झ्यीब बेत्। हुगो सील्लोङ् मीक्ल झ्यबु च्यीक् भो़ब बेत्। 61हुनी फत्तेन्नी छुल्ल चोव ज्यीन्दक्की तक्ल लोक्न पत्रुस्ल तेनी, चोव ज्यीन्दक्की एल्ला पत्रुस्ल हरीङ् झ्यबु भो़त् भो़त्ले एल्ला रङ्गी ङल लेम्म ॱसुम् ङु ॱमीत् ॱस्यीबेत् सीक्केन् बेत् सीर दी पत्रुस्ल ढेन्सो़ झ्युङ्नी, 62पत्रुस् छ्यील थो़न्न गन्दीक्म ङी़ब बेत्।
येशुल ॱङीन्जीन् ज्यब ६३-६५
63हुनी येशु सुङ्न दो़क्केन् गोराब दीबे येशुल हीनी ॱङीन्जीन् ज्यप्न दुङ्दक् ॱसेब बेत्। 64हुबे खोङ्गी ॱमीक् दी कक्न ह रङ्ल बेङ्गेन् दी ॱसु बेक्क ॱस्यो़त्ते त, खोक्की ॱङो़स्स्यी दी सीन्न झ्यीब बेत्। 65ॱनी ॱमो़म्बी़त् अयेक्प ॱयोङ्म आक् गज्येन् तङ बेत्।
छ्यो़गी छोक्तेन् छ्यीम्मुल येशु ठीक्प ६६-७१
66हुनी ॱङेट्टो दी नम् लोङ्जो़त्ल लुङ्बे गेम्बा चो छ्यीया घयेत्, छ्यो़प्पो़न् चो छ्यीया घयेत् धङ् छ्यो़डीम्गी चयेलम घयेत् येशुगी ढीक्ल जोम्न छ्यो़गी छोक्तेन् छ्यीम्मु छुब बेत्। ॱनी हुदु येशु ठीक्प बेत्। 67हुबे खोङ्ल को़न्ज्योक्की को़बे च्यप्को़न् ख्रीष्ट् दी खो़त् हीन्न ॱनी, ङीत्ल ॱस्यो़त्लेत् सीन्न ढीब बेत्। हीगी लेल्ल खोङ्गी ङे ॱस्येत्न आक्, हुल खीत्रङ्गी छ्य मीत् स्योक्केन् बेत्। 68ङे तम् ढीन अक्, खीत्रङ्गी हुल लेम्बु ॱमीत् ॱलोक्केन् बेत्। 69ह हीनी झ्यीनी कोलीमीगी ॱरेबु ॱवङ् की़न् च्येम्मे ॱये छ्योदु दो़क्केन् बेत् झ्यीब बेत्। 70हील हुब घयेक्की हुगो हीन्न ॱनी, खो़त् को़न्ज्योक्की ॱरेबु दीरङ् हीम्ब ॱनी? सीन्न ढीब बेत्। हुल खोङ्गी ङ हुगोरङ् खीत्रङ्गी सीक्केन् दीरङ् हीन् ॱसुङ बेत्। 71हीनी हुबे ह हज्यरङ्ल घन्डे पङ्बी़ गो़ज्येत् दी यो़प्प? हज्यरङ्गीरङ् हुगी खनी लब ॱह घोज्युङ् सीन्न झ्यीब बेत्।
ទើបបានជ្រើសរើសហើយ៖
लुका 22: LHM
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 1995 Wycliffe Bible Translators, Inc. and Nepal Bible Society
