लुका 19
19
येशु धङ् जखायस् १-१०
1हुनी येशु यरीहो सार्की घुङ्नी फल्ल डोज्येल हुगी सार् दील स्युब बेत्। 2ॱनी उन गोलदर् घयेक्की चोबो़न् जखायस् सीक्केन् मी छ्युक्पु च्यीक् यो़प्प बेत्। 3ॱनी जखायस्की ॱसीम्ल येशु हुगो घन्दुक् झ्यीब च्यीक् यो़प्प न? ॱनो़न तगीन् थेप्प झ्युङ बेत्। ॱनी हुगो म दी सी़ तुङेत्मु झ्यीनी, मी छेत्मीक्की घुङ्नी हुगी येशु थोङ् ॱमत् छुब बेत्। 4ॱनी हुगी येशु हीगी लम् हीलरङ् युङ्ज्ये बेत् ॱनो़न रोरङ् एल्ला ज्युन फीन्न दोङ्बु च्यीक्ल जेब बेत्। 5ॱनी हुगी दोङ्बु दीगी लोल येशु ॱलीत्नी खोङ्गी यल्ल तेन हुगोल ॱवे जखायस्, ज्योक्सी झ्यीन मल्ल भोप्लेत्। हरीङ् ङ रङ्गी खीम्दु दो़त्तु युङ्गेन् झ्यीब बेत्।
6हुनी जखायस् ज्योक्सी झ्यीन मल्ल भप्न युङ्न गेसक्की खोङ्ल ॱसुमी़ झ्यीब बेत्। 7ॱनी उन यो़प्पे मी घयेत् दीगी हुगो थोङ्नी, हुल हुब मक्का लङ बेत्। हुबे खोङ्जो घन्दुक्म बेक्क? दीक्च्येङ्गी खीम्ल आक् दो़त्तु डोगुक् न झ्यीब बेत्। 8हुनी जखायस् लोङ्न चोव ज्यीन्दक्ल हीन्दुक् झ्यीब बेत्। चोव ज्यीन्दक् ङल घङ् यो़प्पे नोर् घयेत्नी छ्यीक्क टङ्बु घयेत्ल गो़न तीक्केन्। ङे मी ॱसु ॱसी़ च्यानी गोप्नोक् तङ्न घन्ड लीन्न यो़दङ् हुल स्यीगोर् ॱल्हक्मु ॱलोक्न टो़क्केन् सीन्न झ्यीब बेत्। 9ॱनी हीगी लेल्ल येशुगी हरीङ् हीगी ढोङ्बे मीजङ् घयेत् थर्वे लम्ल ॱलीच्च्युङ्। ॱनी म दी हीगो ओक् अब्राहाम्गी ज्यी़त्रङ् बेत्। 10घन्ड हीन् सीन्न हीगो डस्सी तोर्नर घयेत् ॱयेङ्न छी थर्वल तो़न्दु कोलीमीगी ॱरेबु युङ बेत् सीन्न ॱसुङ बेत्।
ॱयोक्पु ॱसुम्ल टङ्ग टेत्न स्यक्पे पी ११-२७
11खोङ्जोसो यरुशलेम्गी लोल ॱलीच्च्येम ॱयेङ बेत्। ॱनी हुगी यङ्ल खोङ्गी केच्च्यल नेङ्गेङ्गी हुगी मी घयेत् दीबे को़न्ज्योक्की ज्यागक् ज्योक्सी युङ्गेन् हीङ्गो़प्पेत् ॱनो़ब छ्यर बेत्। हुगो झ्यीनी, खोङ्गी पी च्यीक् हीन्दुक् सीन्न ॱस्येप्प बेत्। 12मी ढक्पा च्यीक् थक्रीङ्मी़ लुङ्ब च्यीक्की ज्याबुल खो़त्तु डोगेन् बेत्। 13ॱनी डो डोले एल्ला रोरङ्गी ॱयोक्पु च्यु भो़न हुब रीदङ् रील ॱसीर्की टङ्ग री री टेत्न हीगो ङ लोक्न युङ् युङ् थुक्ल फीदुङ्ल तङ्ल स्योक् सीन्न ॱङान स्योक्केन् बेत्। 14हुनी हुगो ॱसोङ् छर्नी, हीनी रोरङ् थो़न्से लुङ्बे मीस्सीर् घयेत् दी हुगी डल लोङ्न, रङ् ङीक्की ज्याबुल ॱमीत् खुर् सीक्केङ्गी केच्च्य ॱस्यो़त्तु मी यरी को़न हुगी तीङ्ल तङ बेत्।
15ॱनी तीङ्ला यङ् हुगो ज्याबुल खो़त्न लोक्न युङ बेत्। युङ्नी हुनी हुगी ॱयोक्पु घयेत् दील टङ्ग फीदुङ्ल तङ दी घजो़त् च्यीक्ल फीदुक्क हुगो तज्येल हुब घयेत् भो़ब बेत्। 16ॱनी ॱएन्स्युक्ल युङ्गेन् ॱयोक्पु दीगी खोङ्ल नीज्यरङ्गी ॱसीर्की टङ्ग च्यीक्पु दी ङे च्युल फीदु ची़त्न यो़त् झ्यीब बेत्। 17ॱनी हुल खोङ्गी ॱस्यङ्ज्युङ्। युङेत्। रङ् ॱयोक्पु गङ्ज्येन् दुक्। ङे रङ्ल ले च्युङेत्मु च्यीक् को़न स्यक्पल रङ्गी हुगी गेन् खुर्न तेन्देन् झ्यीन युङ्दुक्। ह रङ् सार् च्यी़ थोक्ल ॱवङ् च्योङ्गेल्ल को़न स्योक्केन् सीन्न झ्यीब बेत्। 18हुनी ॱयोक्पु ॱयोङ्म च्यीक् युङ्न हुगी खोङ्ल ज्यीन्दक् नीज्यरङ्गी टङ्ग च्यीक्पु दी ङे ॱङल फीदु ची़त्न यो़त् झ्यीब बेत्। 19ॱनी हुल खोङ्गी रङ् सार् ॱङे थोक्ल ॱवङ् च्योङ्गेल्ल को़न स्योक्केन् सीन्न झ्यीब बेत्।
20हुनी ॱयोक्पु ॱयोङ्म च्यीक् युङ्न हुगी खोङ्ल ज्यीन्दक् ॱय हीन नीज्यरङ्गी टङ्ग दी। हीगो ङे घुलक्की तुम्न स्यक्पेन्। 21नीज्यरङ् चुप्पोक्म यो़क्केन् झ्यीनी, ङ ज्यीज्युङ्। नीज्यरङ्गी घन्ड अक् झ्यीन स्यक्पे ॱलम् मीप्पे हुगो खुर्लेत् सीक्केन् बेत्। ॱसो़न्दोक् च्यीक् इक् ॱमत् तबे तो़न्दोक् लीन्दु युङ्गेन् बेत् झ्यीब बेत्। 22ॱनी हुल खोङ्गी रङ्गी तम्गी झ्यीत् झ्यीक्की रङ्ल छ्येप्प को़गेन्। रङ् दी़त्ङेङ्गी ॱयोक्पु च्यीक् दुक्। ङ चुप्पोक्म घन्ड अक् झ्यीन स्यक्पे ॱलम् मीप्पे हुगो खुर्लेत् सीक्केन् धङ् ॱसो़न्दोक् च्यीक् इक् ॱमत् तबे तो़न्दोक् लीन्दु युङ्गेन् हीम्ब रङ्ल ॱस्यो़च्च्ये दुक् न ॱनी। 23हुगो हीन्न ॱनी, खोक्की घन्डल ङे टङ्ग हीगो बेङ्ल ॱलुक्न मत् स्यक्प? ङ लोक्न युङ्नी, स्येन् ङल जज्येत् च्यीक् हीन्न अक्, युङेत् क ॱनी सीन्न झ्यीब बेत्।
24हुनी ज्याबु दीगी उन यो़प्पे मी घयेत् दील हीगी लक्नी टङ्ग च्यीक्पु हुगो लीन्न टङ्ग च्यु यो़प्प च्येम्म दील टो़त् सीन्न ॱङाब बेत्। 25ॱनी उन ॱयोङ्म दीबे ज्याबु दील नीज्यरङ् हुल रोरङ्लरङ् टङ्ग च्यु थम्ब यो़क्केल्ल झ्यीब बेत्। 26हुनी ज्याबु दीगी ङे खीत्रङ्ल ॱस्येत् योङ्। मी ॱसुल दुक्क हुल ॱल्हक्मु तीक्केन् बेत्। ॱनी यङ् ॱसुल मीन्दुक्क हुगो च्यानी रोरङ्ल घङ् यो़प्प दी इक् ठो डोगेन् बेत्। 27ङ ज्याबुल ॱमीत् खुर् सीक्केन् ङे ड घयेत् हुब हीदु ङे दोङ्दु ॱसो़त्तु ठीक्लेत् सीन्न ॱङक्केन् बेत्।
येशुगी यरुशलेम्दु जेप्पे केच्च्य घयेत् १९:२८–२१:४
येशु भोङ्गुल स्यो़न्न यरुशलेम्ल झ्यो़म्ब २८-४०
28ॱनी खोङ्गी केच्च्य हुगो ॱस्येत् छर्नी, खोङ् ॱएन्स्युक्ल झ्यीन यरुशलेम्ल यल्ल झ्यो़म्ब बेत्। 29हुनी खोङ्जोसो ओलीप्की लदोक्की थप्स्यीगी युगङ् बेथ्फागे धङ् बेथानील ॱलीच्च्येम झ्यीनी, खोङ्गी ॱलोप्टुक् ॱङील हीन्दुक् सीन्न तङ बेत्। 30खीत्रङ् ॱङीबु फागी युगङ् फाल ज्युक्। हुगी युगङ् हुल स्युनी, हुदु ॱसु उक् नम्ल अक् मत् स्यो़म्बे भोङ्गु स्यो़म्बो़त्म च्यीक् तान स्यक्प खीत्रङ्ल ठेक्केन् बेत्। ॱनी हुगो खीत्रङ्गी तङ्न हीदु ठीक्लेत्। 31ॱनी मी ॱसी़ खीत्रङ्ल हुगो घन्डल तङ्न ठीक्केन्? सीन्न ढीज्युङ्न ॱनी, हुल हीगो चोव ज्यीन्दक्ल गो़ब झ्युङ्सोङ् सीन्न ॱस्यो़च्च्यीत् सीन्न ॱङान तङ बेत्।
32हुनी हुब ॱङीबु फीन्नी हुन्दुक् दीरङ् ठोक्क यो़प्प ठेप्प बेत्। 33ॱनी हुबे भोङ्गु दी तोङे यङ्ल भोङ्गी़ दक्पु दीगी हीगो घन्डल तङ्न ठीक्केन्? सीन्न ढीब बेत्। 34हील हुबे हीगो चोव ज्यीन्दक्ल गो़ब झ्युङ्सोङ् झ्यीब बेत्।
35हुनी हुबे भोङ्गु दी ठीक्न युङ्नी, हुबे रोरङ्सो़ घो़ घयेत् दी भोङ्गु दीगी थोक्ल ज्यप्तेल्ल ज्यप्नी, हुनी हुगोल खोङ् स्यो़न्न झ्यो़म्ब बेत्। 36ॱनी खोङ् स्यो़न्न झ्यो़म्बे यङ्ल खोङ्दङ् दल यो़प्पे मी घयेत् दीगी रोरङ्सो़ घो़ घयेत् दी पीक्न लम्ल एल्ला तीङ्न फीम्ब बेत्।
37हुनी खोङ्जोसो ओलीप्की लदोक् दी छ्यक्न मल्ल भप्न युङ बेत्। ॱनी खोङ्दङ् दल डोगेन् ॱलोप्टुक् छेत्मीत् यो़प्प बेत्। ॱनी हुब घयेक्की रोरङ्सो़ थोङे ॱस्यीक् छ्यीम्मी़ ले घयेत् दीगी ढीक्ल हुब गेसक्की केत् छ्यीम्मु तो़न्न को़न्ज्योक्ल हीन्दुक् सीन्न यस्सो पुब बेत्।
38चोव ज्यीन्दक्की छेन्नी झ्यो़म्बे ज्याबु हीगो ॱमेल्लम् च्येम्म हीनो। तेङ् यी़दु स्यीव युङ धङ् इगी थोरी चीदु स्युगेल्ल तो़प्प युङ स्योक्च्यीत् सीन्न पुब बेत्।
39ॱनी हुबे छीक्नी फरीसी यरीगी येशुल चयेलम नीज्यरङ्गी ॱलोप्टुक् हुबल हुन्दुक् सीन्न केत् ज्यक्तु ॱमत् ची़त् झ्यीब बेत्। 40हीगी लेल्ल येशुगी ङे खीत्रङ्ल ॱस्येत् योङ्। हीब ॱहरक्प देत्न ॱनी, दोलोक्प घयेत् केत् ज्यक्केन् बेत् सीन्न ॱसुङ बेत्।
यरुशलेम्गी ढीक्ल येशु ङी़ब ४१-४४
41हीनी येशुसो यरुशलेम्गी ॱस्यच्चल ॱलीत्न हुगी सार् दी थोङ्नी, हुनी खोङ् ङी़ब बेत्। 42हुनी खोङ्गी यरुशलेम्गी सार्की ढीक्ल हीन्दुक् ॱसुङ बेत्। हीगी स्यीव दीव युङे केच्च्य हीगो रङ्गी हन्देन् ॱह घोव हीन्न गस्सी युङेत् क। ह मोङ्सोङ्। रङ्गी ॱसीम्बे ॱमीक् दी मत् भीयल ॱमत् थोङ्सोङ्। 43ह हीन्दुक् झ्यीबे धी़ रङ्ल युङ्गेन् बेत्। रङ्गी ड घयेत् युङ्न रङ्ल तीक् खीरी थगोर् ज्यक्केन् बेत्। हुनी रङ् ॱनुप्च्येल च्यारीगी छ्यीनी यल्ल च्यारीदङ् डस्सीगी ॱस चीन युङ्गेन् बेत्। 44हुनी रङ् धङ् रङ्गी नङ्ल यो़प्पे मी घयेत् ढक्ल दप्केन् बेत्। हुनी रङ् म दीरङ् दोलोक्प च्यीगी च्यीक् इक् थोक्चेत् मीप्प, ॱरुम् तोङ्गेन् बेत्। घन्ड हीन् सीन्न को़न्ज्योक् रङ् च्येल्ल झ्यो़म्बे धी़ हीगो रङ्गी ॱह मत् घोसोङ् सीन्न ॱसुङ बेत्।
येशुगी छ्यो़गङ्नी छोङ्बा दीत् तङ ४५-४८
45हुनी खोङ् छ्यो़गङ्गी च्यारीगी नङ् दील स्युन फीन्नी उन यो़प्पे छोङ्बा घयेत् दी कुरीक् दीत् तङ बेत्। 46हुनी खोङ्गी हुब घयेत्ल ॱसुङ्रप्ल हीन्दुक् सीर यो़क्केन् बेत्।
ङे खीम् हीगो ॱसुव तोप्स बेत् सीन्न को़न्ज्योक्की ॱस्येप्प थो़ङ्गेन् बेत्। (यशैया ५६:७)
ॱनी हीन्न अक्, खीत्रङ् घयेक्की हीगो झ्यक्पागी छङ्ल सो़दुक् सीन्न ॱसुङ बेत्।
47हुनी खोङ्गी ङीन् रीम फो़स्स्यी हुदु छ्यो़गङ्दु ॱलोप्स ज्यप्न टेप्प बेत्। छ्यो़प्पो़न् चो छ्यीया घयेत्, छ्यो़डीम्गी चयेलम घयेत् धङ् लुङ्बे गेम्बा छ्यीया घयेक्की येशु ॱसो़च्च्येमे झ्यी़ तेब बेत्। 48ॱनी हीन्न अक्, हुबे घन्ड झ्यी इक् ॱमत् छुब बेत्। घन्ड हीन् सीन्न मीमङ् घयेत् दी खोङ्गी केच्च्यल नेन्दु छेत्मीत् जोम्न युङ्गो़प्प बेत्।
ទើបបានជ្រើសរើសហើយ៖
लुका 19: LHM
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 1995 Wycliffe Bible Translators, Inc. and Nepal Bible Society
