Mark 9
9
Yafukon te fe byane Bita, Jon, te Jemes ge Iyesu te e mwenan bari terere mleng, he nesu rongta nga byanen.
1Te Iyesu te fe mōn ge, “Be fetinan, nam rrō fe byane gimi, worhu e gimi ge mim fyarr ho li, emi lōn myarrmyarr bwe eb tongve ge emi lhe vere ge limhian mwena Yafukon mu rru en, ge rrō me krinen mwenan helan.”
2 # 2 Bita 1:17-18 Ngate bone ge wobung liuse te vya, Iyesu te rrya ge nyesul a; Bita, Jemes te Jon, te te limhi nyesul bya ran wau hu en ōrr ge tesu ho nga hbōsul. Ngate haryelyelan hu te rrwe ran rebe Iyesu ge te mnimnii lon metasul.
3Mwenan ul te fyō ge te fyō, te kor saavi sese fyōfyō bonga ne tan ge fyan ge a, ge vanten ne tan ge fyan ge a eba rrwene e fyōfyō eb yen.
4Bone ge vanten mwena Iyesu ge tesu esu ho le, Elaeja te Mosis terō furrne nyesul. Te terō rrō susur krine Iyesu.
5Bita te fe byane Iyesu ge, “Vanten ne Wuhuran, mu wu ne ge myasum ho li! Emyasu rrwene byarrbyarr eve sul, ge hu eve mam ge, ge hu eve ma Mosis te ge hu mōn eve ma Elaeja.”
6Tebyan ge lusul te myorr tam, Bita telōn yekya ha nge he ne fe.
7 # Mat 3:17; Mak 1:11; Luk 3:22 Ngate sirōrō hu te me tagno nyesul, te tili rral hu te me lon sirōrō, te fe, “Ge a be mweneng terere barite ge long mwe jejeene mwe lam ten, mi rongta nga byanen!”
8Tesu non te belbel ten nga tesu teter tiliuti nyesul. Te tesu rrlōn nga lhe Elaeja te Mosis. Te Iyesu hobōn nga te nga rru krine nyesul.
9Bone ge tesu rrō mraari me fyan metenen wau, Iyesu te surgoro te hel byane nyesul, te te fe, “Emsu rrlōn fe byanen vanten te hu ha ge musum lehe, eb tongve ge ni, Terere Mleng Gentin Vanten, ena myur mōl mōn lon myarran.”
10Tesu rongtafyan tolo Iyesu, te tesu nga rrō tuu flangte tolo Iyesu ge te fe, “Myuran mōl lon myarran, rrō hubsine ha nge le?”
11 # Mal 4:5; Mat 11:14 Ngate tesu whu Iyesu, “Tebyan ha nge vanten ne wuhuran ne lingsenean nyer, em rrō fe ge Elaeja eba me eve mō bwe?”
12Rral mōl nan, Iyesu te surfyaara te fe ge, “Be fetin ten ge Elaeja eba me eve mō bwe, tebyan ge eb nangnangne sese bonga bwe; lo ge Mesaya eb nga me.” Te Iyesu te whu ge, “Tebyan ha mōn nge, Tuuankon me fe ge Terere Mleng Gentin Vanten eb yel tere jenjenan ge eb hel, te vanten ge rrlam efe lōn nga rrmelole nge?
13 “Ni nam rrō fe byane gimi ge, Elaeja te me burr, te vanten nyer ete rrwene sese nyer byanen te yen ge nyer ete rrmelole. Mwe yen ge tolo Yafukon mwe saarō rrutōn rru.”
Vanten ge mwenan rrinketean mu rru ra Iyesu, mwe yekya ge eba rrwene sese bonga.
14Bone ge Iyesu krine Bita, Jemes, te Jon tesu kukur mōl krinen vanten mwena Iyesu rrute, tesu lhe vanten te e lol ge err ho tiliuti nyer, te vanten ne wuhuran ne lingsenean worhu, err ho te err rrō tublirral krine nyer bonga.
15Bone ge vanten nyer ete lhe Iyesu te rrō yel me, err non metenen. Te ete mku me biirin, te err fe, “Neng le.”
16Iyesu te whu nyer ge, “Mim rrō tublirralne ha byane ge nyer a?”
17Vanten hu lon langlang vanten lam ge nyer a te surmōl te fe, “Vanten ne Wuhuran, nate ktu mweneng terere mleng me ne neng tebyan ge sōnhal hu te rru ran, te telōn e ngrengre ne nga susur.
18“Ngamto, bone ge sōnhal ge a, te rrō me ran te hel, te rrō koōne bya fyan lon tan, te myalten te rrō siu lon fan. Te rrō uti lowon, te tablin te rrō ger bonga. Nate whu mwenam vanten ne ōman nyer ge he en korhelale sōnhal ge a, te telōn e ngrengre he ene rrwene.”
19Ngate Iyesu te fe byane nyer ge, “Mwi yi be nge mwenami rrinketean mwe rranga ho! Ena rru krine gimi eb tongve bone ge be? Mi hale terere mleng nan me.”
20Err halen terere nan me ne Iyesu. Bone sōnhal ge a te lhe Iyesu, te rrwene ge terere mleng ge a te rurur, te te murr bya lon tan, te te rrō tōtōrr. Te myalten te rro siu lon fan.
21Ngate Iyesu te whu temyan terere mleng ge a, te fe, “Huwo be vii burr nge rrō rrwene mwi yi a?” Te temyan terere ge a te fe, “Bone ge te e terere kakae nga rru mo tongve lonle ge a.
22“Ngamto sōnhal rrō rrwekya eb toō kabnu lon rruan ge rrō rrwene rrō murr bya lon fyang te bya lon we. Kabria, he he fō ngrengre ge fō rrwene, lo fō lol hane gemya, te fō roōne gemya!”
23Ngate Iyesu te fe, “Tebyan ha ōm rrō whu ge nam ngrengre ge ena rrwene? Vanten ge mwenan rrinketean mu rru mwe yekya eba rrwene sese bonga.”
24Belbel ten nga, temyan terere mleng ge a te ii bya mre, “Mweneng rrinketean mu rru, te rrinketean mwe kakae nga rru. Kabria, ō roōne ni lon mweneng rrinketean kakae ge a!”
25Ngate, Iyesu te lhe ge vanten lam ge nyer a err rrō roroō belbel nga me fyaasi ne nyer. Ngate te sur te hel byanen sōnhal ge a te fe, “Sōnhal ge rrō rrwene bror te bōō, nam rrō fe ō yel metenen terere mleng ge a ge fō lōn nga la mōl bya ran mōn!”
26Ngate, sōnhal ge a te fwifwir bya mre, te te rrwene terere mleng ge a te rurur te hel mōn bwe, ngate te roō metenen. Terere mleng ge a te fu rru te yen ge he te myarr rru burr. Err fe, “Me myarr rru burr.”
27Te Iyesu te roōne terere mleng ge a, te te hal rongrongne veran nga, te halkela bya mre te te fyarr.
28Ngate, bone ge Iyesu te vya lon im, mwenan vanten nyer nga ete krinen bya lon im, te ete whu he, “Tebyan ha nge myarr rrlō kya mya korku sōnhal ge a?”
29Ngate Iyesu te fe, “Tamtamyaōan nga mwe yekya ge eb korhelale sōnhal ge mwi yi a. Sese mwe rranga mōn.”
Ge he vanten hu lon eb jeene ge eb rrutō Iyesu, nge eba me e vanten ne ōman mwenan vanten rrute.
30Bone ge Iyesu te mwenan vanten nyer ete rrwene ōman ge le te nong, ete lngilngi ōrr ge le, te err rrō yel tere Kalili. Bone ge le, Iyesu lon telōn jeene ge te hu ne yekya ōrr ge he ne a rru en,
31tebyan ge te rrō whure mwenan vanten nyer. Ngate, bone ge err mang rrō yel nga tere Kalili bwe, Iyesu te rrō whure nyer ge, “Efe saarōne ge efe lngi Terere Mleng Gentin Vanten bya lon veran mwenan #9:31 Tōnyōn be vanten ge hu ge ōm rrō rrinrrin hakbene, te nge mōn rrō rrinrrin hakbene neng.tōnyōn nyer ge efe toō kabnu, te wobung eve sul nga, nge eb myur mōl te eb totor.”
32Te err rrlōn rrō yekya mwenan wuhuran, te lur te rrō myorr he en wuu mōle.
33Ngate err me Kabeneam en tahi ōrr Kalili, te err hil bya lon im. Te Iyesu te whu nyer ge, “Ha nge mirr rrō saarōne to hal?”
34 # Luk 22:24 Te err ha rongrong nga ho, te err rrlōn surmōl byanen, tebyan ge to hal err rrō tuu lon tobol e nyer ge si e nyer nge mu rru mre mwe saavi nyer rrute.
35 # Mat 20:26-27; 23:11; Mak 10:43-44; Luk 22:26 Te Iyesu te tataa bya fyan, te te je mwenan vanten nyer ge err ve 12, te te fe byane nyer ge, “He ge hu ge eba rrmelole ge eba ktu tamō ne ōrr, nge eba lngi nge eve tene vanten bonga, te eba me e vanten ne ōman nga mwenan vanten bonga.”
36Ngate te halen terere kakae hu, te te rrwene te fyarr lon tobol e nyer. Nge te lngi veran goro, te te fe byane nyer ge,
37 # Mat 10:40; Luk 10:16; Jon 13:20 “Ge hu ge eba kwarr ge eb terfon sene terere hu eb yi li lon #9:37 Bislama me fe, “Long nem blong Jisas.” Te English me fe, “In the name of Jesus.” Te susuran ge a rrō fe ha? “Lon sa Iyesu,” rrō fe lon myayang nga. Bone ge yim rrō rrwene ōman hu mwena Iyesu yim rrō rrwene lon myayan. myayang, mwe yen ge nge ma kwarr ge eb terfon sene ni. Te ge hu ge rrō ktu ni mwi yi le, tōlō rrō rrwene nga me ne ni, rrō rrwene mōn byane ge hu ge mwe sene ni me.”
38Te Jon te fe byane Iyesu ge, “Vanten ne Wuhuran, myate lhe vanten hu te rrō korku sōnhal worhu ran vanten nyer lon myayam, te myarr fe byanen ge, ‘Ō nong ne.’ Tebyan ge nge tōlō e ken ge bu rru.”
39Te Iyesu te fe, “Mi lōn kokorgoro vanten ge mwi yi le, tebyan vanten ge hu ge rrō rrwene bagō mwena Yafukon lon myayang, nge tōlō ngrengre eb sur hakbe ne ni belbel.
40 # Mat 12:30; Luk 11:23 “Mi lhe! Ge hu ge tōlō hakbene ken, be ken ge rru.”
41 # Mat 10:42 Iyesu te hobyarron mwenan susuran te fe, “Nam rrō fe fetinan byane gimi ge, he ge hu eb sene blaye ne we byane gimi tebyan ge mim be mweneng ge ho, mwenan sevyaran ge mo ho lon #9:41 Tōngtōng be ōrr ge Yafukon mu rru en. tōngtōng tōlō ngrengre eba hlal.
He sese hu te rrō hal mōle neng metene Iyesu bya lon fyang, e wu ten ne ge fō lngilngi te fō vya biiri Yafukon.
42 “Terere ge nyer a em rrinkete ni. He vanten hu te rrwene ge hu e nyer te murr lon hakbean, mwenan jenjenan mwe hel ge mwe hel. Bu ten ne ge eba lwō verr an te hu rrlam bya en myurr nan, te tono an bya lon tee.
43-46 # Mat 5:30 “Ge he veram sōn te ge he yem sōn, nyerō sōn eba rrwene ge fō rrō murr lon hakbean, ō takote! Mu wu ne ge fō vya lon myuran ge mu rru ngamto nga krine tahin veram te tahin yem nga. Mwe taavi ge fō a en ōrr hakbe ge fyang nan tōlō ngrengre eb myarr keya krinen veram nyerō te yem nyerō bonga.
47 # Mat 5:29 “Te mōl mōn ge he metam eb rrō rrwene ge fō murr lon hakbean, fō girku! Mu wu ne ge fō rru ran vere ne #9:47 Susuran ne limhian mwena Yafukon te vere ne limhian mwena Yafukon ge nyerō a, mōrō mnimnii kakae rro metene nyerō. Yim ho fyan limhian mwena Yafukon lonle ge a, te vere ne limhian mwena Yafukon eb nga me bwe. Iyesu mang rrō rrwene bwe. Jon 14:2-3limhian mwena Yafukon krinen metam sōn nga. Mwe taavi ge eb koōne neng an bya lon fyang krinen metam nyerō bonga.
48 “En ōrr ge le
“ ‘Ōlrere ge em rrō re tablir em ho ngamto nga,
te err rrlō rrō myarrmyarr.
Te fyang ge rrō ngne nyer mu rru ngamto nga,
tōlō ngrengre eb myarr wobung te hu.’ Asaya 66:24
49 “Yafukon eb koōne fyang bya ran vanten bonga eb yen vanten hu ge rrō koōne tee bya ran meyee.
50 # Mat 5:13; Luk 14:34-35 “Tee mu wu ten; te bone konkon an ne tee mo nong, tōlō ngrengre eb nga rrwe mōle an ge eb konkon mōl mōn. Tebyan sese ge le, emi rrmane jejeean ne Yafukon eb rru rami; eba rrwene myulumluman eb rru lon tobol e gimi.”
ទើបបានជ្រើសរើសហើយ៖
Mark 9: mmg
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© Wycliffe Bible Translators, Inc. All rights reserved.