Maake 8
8
Yezu pɛ nɔɔna 4,000 wodiu se ba di
Matiyu 15:32-39
1Kanto maŋa kam ne, kɔgɔ dedɛ daa ma jwoori ko gilimi daane Yezu tei ne. Ba maa ba jege kolokolo se ba di. Konto ŋwaane Yezu ma bwoŋi o kwaga tɔgena bam se ba ba o tei. O ma ta de-ba o we, 2“Amo jege nɔɔna banto ŋwaŋa de ba na tu ba wo amo tei ne da yatɔ, ye ba laam daa ba jege wodiu se ba di. 3Amo ná pɛ ba viiri ye ba wo di kolokolo, kana wó pa ba beiri chwoŋa ne, kolo ŋwaane ba badaara ya nwoŋi yiga yiga mo ba ba amo tei.” 4O kwaga tɔgena bam ma leiri‑o ba we, “Dé nam wó ke tɛ mo dé na wodiu kagoa kanto yuu ne se ko yi ba maama dim?” 5O ma bwei-ba o we, “Abam jege bworobworo ko mae tetɛ mo?” Ba ma leiri ba we, “Te ye terepɛ mo.”
6Yezu laam ma ta de kɔgɔ kom se ba maama jeini tega ne. O ma kwei bworobwooru terepɛ tem ye o ke Wɛ lei te ŋwaane. O ma ja-te o fɔ fɔ o pa o kwaga tɔgena bam ye banto de laam kwei ba ja vo ba pa nɔɔna bam. 7Ba déem jege ywona fenfee ba woli da. Yezu ma kwei-ya o ke Wɛ lei ye o daare o ta de o kwaga tɔgena bam se ba kwei yanto de ba maŋe ba pa nɔɔna bam maama. 8Ba maama ma di ba su ba daare. Yezu kwaga tɔgena bam laam ma twɛ chichwooru telo na daare to ba su kayɛ serepɛ. 9Balo na wora to déem maŋe de baara morro tena (4,000) mo, ko woli de kaana de bia de.
Yezu laam ma pa se kɔgɔ kom viiri. 10O ma daare o vo o zo nabworo kom de o kwaga tɔgena bam. Ba ma vo ba yi jei sedwoŋi yere na ye Dalemanuta to.
Farisi tiina taane
Matiyu 16:1-12; Luka 12:54-56
11Farisi tiina badwonna déem ma vo Yezu tei se ba ŋɔɔne ded‑o, ye ba nam lage ba maŋe‑o mo ba nii. Ba ma lwoori‑o se o ke wo-kenkagele delo na wó bere-ba we o dam seene de ye Wɛ nyem to. 12O ma tiini o suuri o wone ye o ta o we, “Bɛ mo ye zem nɔɔna bam lage se a ke wo-kenkagele a bere-ba? A tɛ abam chega ŋwaane to, a bá ke maana a pa-ba.”#Matiyu 12:38-42
13O na tage konto to, o ma yage ba tei ye o jwoori o vo o zo nabworo kom se ba vo ba bɛ bubɛ dedem dem.
14Ba déem na wo nabworo kom wone ba maa vei ba bɛ to, Yezu kwaga tɔgena bam ma maane we ba ya swei se ba ja bworobworo ba woli da, ye dedoa yerane mo ba jega. 15Yezu ma ta de-ba o we, “Ta‑á yei-na se á yé pa Farisi tiina bam de abam sabɔle, de Pɛ Herodi de.” 16O na tage de-ba konto to, ba ma ŋɔɔne daane ba we, “Ko ye bworobworo taane mo o tɛa, dé na ba jege to ŋwaane.”
17Yezu ma maane ba na tɛ kolo to, ye o we, “Bɛ mo ye á pa lwia jege abam de bworobworo na tera to ŋwaane? Abam ta wo lɔre Wɛ na jege dam tei to na? Á boboŋa muri mo. 18Á jege yia ye ya ba nae Wɛ chega kam. Á jege zwa ye á ba ni Wɛ taane dem kuri. 19Á maŋe á swei amo na kwei bworobwooru tenu mo a fɔ fɔ a pa nɔɔna morro tenu tem pa ba di. Ba na di ba ti to, abam twɛ chichwooru tem á su kayɛ segera mo?” Ba ma leiri‑o ba we, “Kayɛ fuga-selei mo.”
20O daa ma bwei-ba o we, “Amo daa ta na kwei bworobwooru terepɛ tem a fɔ fɔ a pa nɔɔna morro tena tem to, á twɛ chichwooru tem á su kayɛ segera mo?” Ba ma leiri‑o ba we, “Kayɛ serepɛ mo.” 21O laam ma ta de-ba o we, “Tɔ. Abam daa ta ba ni ko kuri mo na?”
Yezu yɔɔre lilwei
22Ba déem ma vo ba yi Bɛtasida. Nɔɔna badwonna ma ja lilwei ba ja vo Yezu tei ye ba lwoori‑o se o kwei o jeŋa o dwei‑o. 23O ma ja lilwei wom jeŋa o vaŋe o ja nwoŋi teo kom dáa. O ma twe lileeru o ke o yia ne. O ma daare o kwei o jea o zi o baŋa ne. O laam ma bwei‑o o we, “Nmo nae woŋo mo na?” 24Lilwei wom ma zeiŋi o yuu o nii, ye o we, “Amo wae a nae nɔɔna na via. Ba nam nye de teeni mo ye ba via.”
25Yezu daa ma kwei o jea o daŋe nɔɔno wom yia ne. O laam ma fi o yia yam, ye ya jwoori ya nae. O maa wae o nae woŋo maama lanyerane. 26Yezu laam ma ta ded‑o we, o yɔɔre o vo sɔŋɔ, se o daa yé jwoori o zo teo kom wo.
Piita tage Yezu chega kam
Matiyu 16:13-20; Luka 9:18-21
27Yezu de o kwaga tɔgena bam daa ma kɛ ba vo ba yi Kazaria Filipi nawuura yam. Ba na maa vei to, o ma bwei-ba o we, “Nɔɔna yeini ba tɛ ba we amo ye wɔ mo?” 28Ba ma leiri ba we, “Badaara tɛ ba we, nmo ye Jɔn wolo na ye sɛɛm tu to mo. Badaara de maa tɛ ba we, nmo ye Elija mo. Badaara de maa tɛ ba we, nmo ye faŋa faŋa Wɛ sampwori sem dedoa mo.”
29O laam ma bwei-ba o we, “Ko nam ná ye abam, á boŋe se amo ye wɔ mo?” Piita ma leiri‑o o we, “Nmo ye Wɛ Dam Tu Krista mo.”#Jɔn 6:68-69
30Yezu laam ma ta-ba we, ba yé ta o chega kam konto ba bere nɔɔn-nɔɔno.
Yezu bere o toone na wó taa ye tei to
Matiyu 16:21-28; Luka 9:22-27
31Ko zege kanto maŋa kam ne Yezu ma ŋɔɔne o bere-ba we omo Nabiin-bu wom maŋe se o na yaara dedɛ. O maa we, “Juu tiina nakwa bam, de ba kaanem yiga tiina bam, de ba zamesem tiina bam mo wó chuli amo. Ba maa wó ja amo ba go, se a laam jwoori a bi da yatɔ dɛ ne.” 32O maa ŋɔɔne konto ja o bere-ba. Piita ma ja‑o o vo dáa, ye o bwɛ‑o o we o yé taa ŋɔɔne konto dwoŋi. 33Yezu ma guni o nii o kwaga tɔgena bam seeni, ye o leiri o bwɛ Piita o we, “Setaana pɛ, véi dáa a tei ne! Nmo boboŋa yam ye nabiina nyem mo ye ya ba tɔge Wɛ na lage tei to.”
34O laam ma bwoŋi nɔn-kɔgɔ kom maama de o kwaga tɔgena bam se ba ba o tei. O ma ta de-ba o we, “Nɔɔno wolo maama ná lage se o taa tɔge amo kwaga, konto tu jege se o ve o tete boboŋa ye o sɛ yaara, ne wolo na zeŋe dagara o maa vei o toone jei tei to, se o laam ba o taa tɔge-ne. 35Wolo maama nam ná lage se o jwoŋi o tete ŋwea, konto tu wó ga-ka mo. Ko daare wolo maama ná sɛ se o ga o ŋwea amo ŋwaane de Wɛ kwor-ywoŋa kam ŋwaane, konto tu wó jwoŋi ŋwea Wɛ tei ne. 36Nɔɔno nam ná kwaane o jwoŋi logo baŋa wonnu tem maama, ye o laam ná gɛ ŋwea Wɛ tei ne, bɛ nyɔɔre mo o nɛa? 37Kolokolo nam tera nɔɔno na wó wane o kwei o ma jwoŋi o ŋwea Wɛ tei ne. 38Zem nɔɔna bam yiga tera de Wɛ ye ba ke ba tusi dedɛ. Konto to, wolo maama ná kɔre chaveera amo ŋwaane de a taane dem ŋwaane, amo Nabiin-bu wom de wó taa jege chaveera konto tu ŋwaane dɛ dem amo na wó jwoori a ba de nenɔŋ-fɔrɔ ne a Kwo Wɛ na jege tei to, ye Wɛ malese de wó tɔge-ne.”
ទើបបានជ្រើសរើសហើយ៖
Maake 8: KBG
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2020, Ghana Institute of Linguistics, Literacy and Bible Translation (GILLBT)