Maake 15
15
Pilata bwei Yezu taane
Matiyu 27:1-2, 11-26; Luka 23:1-5, 13-25; Jɔn 18:28–19:16
1Tega na tu ka poore tetete to, Juu tiina kaanem yiga tiina bam, de ba teo kom nakwa bam, de ba zamesem tiina bam, de ba kɔgɔ kom maama ma ba ba ke ni daane. Ba ma ja Yezu ba vɔ, ye ba ja‑o ba vo ba ke Pilata jeŋa ne. 2Pilata ma bwei‑o o we, “Nmo mo ye Juu tiina bam pɛ na?” Yezu ma leiri‑o o we, “Mo kolo nmo na tage to.”
3Juu tiina kaanem yiga tiina bam ma tiini ba ŋɔɔne o taane ba pa‑o. 4Pilata ma jwoori o bwei‑o se o nii, ye o we, “Nmo ba lage n leiri ba taane dem na? Nmo wo nigi ba na ŋɔɔne kolo maama ba pa nmo to na?” 5Yezu daa ta maa wo sɛ se o leiri ba taane dem delodelo. Pilata maa ye yaau ded‑o.
6Bene maama Juu tiina kuri maŋa ná yeini ka yi, ba yeini ba le peeno dedoa mo ba pa nɔɔna bam, nenɛɛne banto na lage wolo to. 7Peeno wodwoŋi déem maa wora, o yere mo Barabas. Ba déem pe‑o mo de balo na dwoni de ba teo kom dedɛɛra ye ba go nɔɔna to. 8Nɔɔna bam ma ba ba la kɔgɔ ye ba daare ba ta de Pilata se o le peeno dedoa o pa-ba ne o na yeini o ke tei to. 9Pilata ma bwei-ba o we, “Á lage se a le wolo na ye Juu tiina pɛ to a yage a pa abam na?” 10O bwei-ba konto kolo ŋwaane o yei we ko ye wo-goo ŋwaane mo kaanem yiga tiina bam ya jaane Yezu ba ke o jeŋa ne. 11Kaanem yiga tiina bam ma soge kɔgɔ kom pa se ba ta de Pilata we, o jege se o yage Barabas mo o pa-ba.
12Pilata laam ma bwei-ba o we, “Ko nam ná ye wolo á na bwoi‑o we Juu tiina pɛ to, amo nam wó ke‑o tɛ mo?” 13Ba ma laare baŋa baŋa ba we, “Pa‑o dagara yuu ne n go.” 14O ma jwoori o bwei-ba o we, “Wonto chɔge bɛ mo?” Ba laam ma tiini ba laare baŋa baŋa ba we, “Pa‑o dagara yuu ne n go.”
15Pilata maa lage se o pa kɔgɔ kom bochare zuri mo. Mo kokuri o ma le Barabas o yage o pa-ba. O ma pa ba fere Yezu, ye o pa-ba chwoŋa se ba ja‑o ba pa dagara yuu ne ba go.
Ba jaane Yezu ba vo ba pa dagara yuu ne
Matiyu 27:27-56; Luka 23:26-49; Jɔn 19:2-3, 17-30
16Soja tiina bam laam ma ja Yezu ba vo ba zo gɔmena tu Pilata sɔŋɔ kom konkɔlɔ ye ba daare ba la ba kɔgɔ kom maama ba ke daane. 17Ba ma pa Yezu zo gare-soŋo. Ba ma daare ba kwei sabare ba ma sɔ yipuga ba pu o yuu ne. 18Ba laam ma seini‑o ba we, “Juu tiina pɛ, denlei.” 19Ba maa jege kasogo ba lɔe o yuu ne kuni dedɛ, ye ba twe lileeru ba yage o yera ne. Ba ma kuni dwoona o yiga ne ye ba ke ne ba na zuli‑o tei to. 20Ba na ke‑o ba mɔne ba ti to, ba ma le gare-soŋo kom ye ba jwoori ba zo‑o o tete gɔrɔ kom. Ba laam ma ja‑o ba nwoŋi ba vo se ba pa‑o dagara kam yuu ne.
21Ba na maa kɛ to, ba ma na nɔɔno wodwoŋi, o yere mo Simon. O nwoŋi Kurene mo. O maa ye Alezanda de Rufus kwo. O déem ya nwoŋi kara mo o ba o yi teo wo o maa kɛa. Soja tiina bam na nɛ‑o to, ba ma fe‑o se o kwei dagara kam o zeŋe se ba vo. 22Ba ma ja Yezu ba vo ba yi jeiga kadwoŋi ba na bwoi we ‘Goligota’ to. Yere dem konto kuri mo ye ‘Yu-kwoli-champoa Peo’. 23Ba na yi da to, ba ma kwei liri sedwoŋi se yere na ye Mura to ba guuri sana wone ba pa Yezu. O maa wo sɛ se o nyɔ.
24Ba laam ma ja‑o ba pa dagara kam yuu ne. Ba ma kwei o gwaaro tem se ba pɔɔre-te ba pa daane. Ba ma ta jɔrɔ se ba nii wɔ mo wó twori kolo o na lage to. 25Ba na page‑o maŋa kalo to maŋe de wɛ na puli de peere tei to.
26Ba ya popone tɔnɔ se ko bere kolo o na chɔge ye ba go‑o to ba meeli da, ye ko we,
JUU TIINA PƐ.#Jɔn 19:19-22
27Ba ma ja ŋweena balei ba pa dagare sedwonna baŋa ne. Ba ma chwi dedoa Yezu jazem ne. Wowom maa wo o jagwia ne. [28Konto to, kolo na popone Wɛ tɔnɔ kom ne to jigi chega de ko na we, “O tɔge de nɔn-balwaaro mo pa se nɔɔna tɛ ba we o ye nɔn-balɔrɔ.”]
29Nɔɔna balo na tɔge da ba kɛ to maa nia ye ba dole ba yuni ba twe‑o. Ba ma yaale‑o ye ba we, “Nii! Nmo ye wolo ya na boŋe se n yigi Wɛ diga kam mo n de tega ne, se n daare n ma da yatɔ n jwoori n fɔge n lɔ-ka. 30Tɔ. Kwaane n tu da dagara kam yuu ne se n vere n tete.”
31Juu tiina kaanem yiga tiina bam de ba zamesem tiina bam de maa ke‑o ba mɔna ba bere daane konto dwoŋi. Ba maa tɛ daane ba we, “O yeini o jwoŋi nɔɔna ŋwea, ye o laam ware o tete ŋwea o jwoŋi. 32O bere o tete we o ye Wɛ Dam Tu Krista wom, de Isarele dwi tiina pɛ. O nam tu dagara kam yuu ne leile se dé nii. Dé ná nɛ konto, dé wó sɛ we o ye chega tu.”#Luka 23:39-45
Nɔɔna balo ba na tɔge ba pa dagare sem baŋa ne to de maa jege‑o ba twea.
33Ko ma vo ko yi maŋa kam wɛ na tu de wo yupare baŋa ne to. Tega kam maama ma ba ka ji lim se ko vo ko yi wɛ-guni maŋa ne. 34Ko na yi luu batɔ to mo Yezu laare baŋa baŋa de kwor-dɛa o we, “Eli, Eli, lema sabaktani?” Taane dento kuri mo, “Amo Wɛ, amo Wɛ, bɛ mo ke ye n yage a yera?”#Lei 22:1
35Nɔɔna balo na zege da ye ba ni taane dem to badaara maa we, “Cheigi-na! O lage o bwoŋi Elija mo se o ba.” 36Ba dedoa laam ma duri o vo o kwei sɔsɔɔ. O ma de-ko sa-nyɔna wone, ye o daare o ke-ko kasogo ni ne o vo o tei o pa Yezu se o nyɔ. O maa we, “Yage se dé cheigi dé nii, Elija wó ba o woli‑o se o tu da na?”
37Yezu laam ma laare baŋa baŋa ye o daare o te.
38Yezu na tege konto to, gare-jale delo na leigi de che Wɛ di-yun-gala kam to ma kaare belei, ko zege ko baŋa ne ko tu ko kwaare ko kuri ne.#Nwoŋim 26:33 39Soja tiina yiga tu wolo na zege Yezu yiga ne to ma na o na tega tei to. O na nɛ to, o maa we, “Nɔɔno wonto ya seene o ye Baŋa Wɛ Bu mo.”
40Kaana badwonna maa tɔge ba wora, ba na zege yiga yiga ye ba nia. Mary wolo ba na bwoi we Magadala to maa wo ba wone, dedaane Mary wodwoŋi wolo na ye nɔn-doŋo Jemsi de Josɛf nu to. Salomi de maa tɔge o wora. 41Kaana banto déem ya tɔge de Yezu Galili ne mo, ye ba yeini ba toŋe ba zeini‑o. Kaana badaara dedɛ de maa wora, ba ya na tɔge ded‑o ba ba Jerusalem.
Ba ke Yezu yera yam yibeeli wone
Matiyu 27:57-61; Luka 23:50-56; Jɔn 19:38-42
42-43Nɔɔno wodwoŋi déem mo wora, o yere mo Josef, o na nwoŋi Arimatea. O maa ye Juu tiina nakwa kɔgɔ kom yiga tu, ye nɔɔna pa‑o zula. O maa jege teena we Wɛ paare dem wó ba o nɔɔna baŋa. Dɛ dem ba na go Yezu to maa ye dɛ delo Juu tiina bam na jege se ba ti ba yiga ba siu dɛ dem ŋwaane to mo. Tega déem ma lage ka yi se ba siu dɛ dem laam yi. Konto ŋwaane Josɛf ma pa o bochare zuri ye o zaŋe o vo Pilata tei. O ma vo o lwoori‑o chwoŋa se o vo o kwei Yezu yera yam o suli. 44Pilata na lɔre we Yezu maŋe o te to mo ko so‑o lanyerane. O ma toŋe nɔɔna se ba vo ba bwoŋi soja tiina yiga tu wom se o ba. O na tu to, o ma bwei‑o se o nii, Yezu seene o te na. 45O na lɔre we o tege to, o ma sɛ se Josɛf vo o kwei o yera yam o taa tei. 46Josɛf ma nwoŋi o vo o yeigi gare-jale delo na lana to. O ma vo o pare Yezu yera yam dagara kam yuu ne. O ma kwei-ya o pipiri de gɔrɔ kom, ye o daare o ja-ya o vo o tiŋi peo bɔɔne wone. Dento maa ye yibeeli ba déem na luga peo yera ne mo. O laam ma bibili kandwɛ-polɔgɔ o ma pe bɔɔne dem ni. 47Mary Magadala de Mary wolo na ye Josɛf wodwoŋi nu to maa zege ba nii mɛ o na tiŋi Yezu yera yam to.
ទើបបានជ្រើសរើសហើយ៖
Maake 15: KBG
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2020, Ghana Institute of Linguistics, Literacy and Bible Translation (GILLBT)