Maake 13
13
Lɛɛro telo na wó ba logo baŋa to
Matiyu 24:1-28; Luka 21:5-24
1Yezu laam ma zaŋe se o nwoŋi Wɛ diga kam wone. O na maa kɛ to, o kwaga tɔgena bam dedoa ma ta ded‑o o we, “Berem tu, nii kandwa yanto ba na mɛ ba lɔ diga kam to na lana tei. Nii ka lɔɔm dem na dana tei to.” 2Yezu ma leiri‑o o we, “Nmo seene n nae diga kam na daga tei to na? Ka maama nam wó ba ka to ka saare tega ne. Kandwɛ daa bá daare de dwoŋi baŋa ne.”
3Yezu déem ma vo o jeini Olivi peo kom yuu ne. Wɛ diga kam maa wo o yiga ne yiga yiga. O na jei konto to, Piita de Jemsi de Jɔn de Anduru yerane ma vo o tei, ye ba bwei‑o ba we, 4“Maŋa kɔ mo wonnu tento lage te ke ye Wɛ diga kam chɔge konto? Bɛ mo lage ko ke maana ko pa debam se dé lɔre we wonnu tento maama lage te ji chega?”
5Yezu ma leiri-ba o we, “Fɔge-na á che á tete, se á yé pa nɔɔn-nɔɔno gane abam. 6Nɔɔna dedɛ wó ba abam tei ba ma amo yere ba ta de abam we, banto dedoa dedoa mo ye amo, Wɛ Dam Tu wom. Konto dwoŋi mo ba wó gane nɔɔna dedɛ. 7Á wó ba á na tigura na wora abam jei sem ne, ye á kwori á ni ka ŋwa teene dedwonna ne. Á nam ná lɔre konto, se á yé pa lwia taa jege abam. Wonnu tem konto jege se te ke mo, se ko dae we ko yi logo tiim mo. 8Logo baŋa dwi tiina wó zaŋe ba ke jara de ba dwonna dwi-gɛ tiina, ye teo de ko dwoŋi teo wó zaŋe te mage jara. Tega maa wó ziziŋi jei sedwonna ne, ye kana de wó ba ka taa wora jei dedɛ ne. Yaara yam konto maama nam nye de kaane na bobo se o taa wɔe puga, ye cham daa ta wo kwaga ne to mo.
9Á fɔge á che á tete. Nɔɔna wó ja abam ba vo ba saŋe nakwa tei ne. Ba ta wó ja abam ba fere ba jeerim di sem wone. Abam nam na tɔge amo to, ba wó ja abam ba vo ba saŋe dedɛɛra de pwa tei ne. Konto mo á wó na chwoŋa se á bere-ba Wɛ chega kam. 10Ko nam fe mo se ba da yiga ba tɔɔle Wɛ kwor-ywoŋa kam ba bere logo baŋa dwi tiina maama, se ko lwoori wonnu maama kweelim. 11Maŋa maama ba ná jaane abam ba vo ba saŋe ba nakwa yiga ne, á yé ta‑á jege lwia de á na wó ta kolo to. Abam na wó ba á zege ba yiga ne maŋa kalo to, se á laam ŋɔɔne botare selo Wɛ na wó pa abam to. Ko bá taa ye abam tete taane, se ko ye Wɛ Sin-laao kom mo wó pa á ŋɔɔne. 12Nɔɔna badwonna wó ja ba tete chorro ba ke nɔɔna jeŋa ne se ba go-ba. Kwoa de wó ke ba bia konto dwoŋi. Bia de wó zaŋe ba tiina baŋa ne ye ba pa ba ja-ba ba go. 13Nɔɔna maama wó taa chuli abam, á na ye amo nyem to ŋwaane. Wolo maama nam ná tiini o jege pu-dɛa se ko vo ko kweeli, Wɛ wó jwoŋi konto tu ŋwea.
14Abam nam wó ba á na wo-zɔɔne delo na chɔge Wɛ yere to na wó ba ko zege jei selo na wo maŋe se ko taa wora to ne.”#Danyeli 9:27; 11:31; 12:11 A tɛ abam wolo ná gaga, se n kwaane n ni ko kuri lanyerane.
“Abam ná nɛ wo-lɔŋɔ kom konto, se abam balo na zoore Judea ne to ke lela á nwoŋi á duri á vo peero jei á seigi da. 15Nɔɔno nam ná wo nayuu ne, se o yé tu o zo diga wo se o kwaleme o zela o ja nwoŋi. 16Nɔɔno wolo nam ná wo kara ne, se o daa yé jwoori sɔŋɔ se o kwei o gare-laao o zo. 17Kanto maŋa kam ne ko wó tiini ko taa ye lɛɛro kaana balo na jege pwi to tei ne, de balo na jege bia ye ba ŋɔge yele to tei ne. 18Nam ta‑á lwoori-na Wɛ se cham dem konto yé ba doa nenem maŋa ne. 19Kokuri yaara yalo na lage ya ba da yanto ni ne to wó taa tiini ya chamma ya dwoi yalo na maŋe ya ke boboa ne ye Wɛ ke logo se ko ba ko yi zem to. Yanto nam ná kea, ya dwoŋi daa tera ya na wó ba konto dwoŋi.#Danyeli 12:1 20Baŋa Wɛ ya ná wo pɛ se yaara yam da yam tiri, nɔɔn-nɔɔno ya bá wori. Ko nam ye Wɛ tete nɔɔna balo o na kuri to ŋwaane mo o lage o pa se yaara yam da yam tiri.
21Kanto maŋa kam ne, nɔɔno wolo maama ná tage de abam o we, ‘Nii Wɛ Dam Tu Krista wom, o wo ywo-seeni’, se á yé sɛ konto tu. 22Nɔɔna badaara wó zaŋe ba bere we ba ye Wɛ Dam Tu Krista wom ye ba dae, ye badwonna de bere we banto mo ye Wɛ sampwori ye ba dae. Ba maa wó ke wo-kenkagela de maana, ye chwoŋa ya ná wora, yanto ya wó wane ya soge Wɛ tete nɔɔna balo o na kuri to.#Jeremia 14:14 23Ta‑á cho-na á tete. Amo wuuri a ta a bere abam wonnu tem maama mo ye te maŋa kam ta wo yi.
Nabiin-bu wom wó pɔpɔ o ba logo baŋa
Matiyu 24:29-44; Luka 21:25-36
24Yaara yam konto ná ke ya ti da yanto wone,
‘Wea kam laam wó ji nazwono tim-tim.
Chana kam de daa bá fuŋi pwooni.
25Chalechwe sem de wó kwori wɛyuu ne se to,
ye wɛ-baŋa de wó ziziŋi pa se ko wonnu maama leiri.’#Izaya 13:10
26Maŋa kam konto ne nɔɔna wó na Nabiin-bu wom na maa beene logo baŋa to. O wó taa wo kunkwonnu baŋa ne o beena de dam, ye nenɔŋ-fɔrɔ tiini ko wo o tei ne.#Gurim 1:7 27O laam wó pa se o malese sem nwoŋi se ba se zege logo baŋa dɛ sena sem ne se la o nɔɔna balo Wɛ na kuri tega baŋa de wɛyuu jei maama ne to se ke daane.
28Nam maane-na á nii kaporo na ye tei to. Konto ná yeini ko wora ko kwi vɔɔro, á yeini á lɔre we ko twɛ yadɛ maŋa mo. 29Ko maa ye bedwe mo de á ná nɛ wonnu telo amo na tage a bere abam to ná wora te ke, se á lɔre we maŋa kam laam twɛ ka ti mo. 30A tɛ abam chega ŋwaane to, wonnu tem konto maama wó ba te ke ye abam dwi dem ta wo ti. 31Wɛyuu de tega baŋa maama wó ba te jei, ye amo taane dem ta wó taa jege chega se ko taa vei wuu.
32Nɔɔn-nɔɔno nam yeiri dɛ delo Nabiin-bu wom na lage o jwoori o ba to, ye nɔɔn-nɔɔno yeiri dɛ dem wone maŋa kam o na wó ba to, ko ná maŋe ko ye Wɛ malese sem naa o Bu wom tete de. Ko nam ye amo Kwo Baŋa Wɛ yerane mo yei. 33Á ta‑á fɔge á cho á tete, se á yeiri maŋa kam ko na wó ke to. 34Ko na wó taa ye tei to, ko nye de sɔŋɔ tu na nwoŋi se o beeri o vo yiga yiga tei to. O ma pa o tontoŋena bam ni se ba taa nii o sɔŋɔ kom baŋa ne. O ma pa ba maama dedoa dedoa ba totoŋe. O ma ta de ba dedoa se o taa wo manchwoŋo ni ne o fɔge o nia. 35Abam de jege se á fɔge á ta‑á nii konto dwoŋi mo. Á yeiri maŋa kalo sɔŋɔ tu wom na wó jwoori o ba to. O nam wó wane o ba dedaan-ni ne, naa tete kokoro ne, naa te-pora ni ne, naa wɛ-puli maŋa ne.#Luka 12:35-36 36Konto to, o ná pɔpɔ o ba lela, á yé pa se o ba o peere abam de á tigi á dɔa. 37Amo tɛ de abam de nɔɔna maama we, á jege se á ta‑á cho á tete mo.”
ទើបបានជ្រើសរើសហើយ៖
Maake 13: KBG
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2020, Ghana Institute of Linguistics, Literacy and Bible Translation (GILLBT)