Luke 23
23
Inkowan Ches Jesus Cha Pilate
(Matthew 27:1-2,11-14; Mark 15:1-5; John 18:28-38)
1Et sema emiin a iyangkaama na Hodjos, imakgwat ira et inkowan ches Jesus cha Pilate. 2Idi mimothok ired man, incharom ches Jesus a kigwan cha i “Siyohalan mi ja toon naenaol na kaidian mi. Nainbilin to i nat manbayad kawi koma na binis cha Caesar. Nakigwan to pay i si-kathos Criston ari.” 3Inbagaan men Pilate si Jesus i “Si-kam i ari na Hodjos?” Et insongbat Jesus i “Ahow, agpayso ta kigwan mo.”
4Et kigwan Pilate ired ma aafo na papari tan chakel a toon gwared man i “Nagwariy sipol kon ngaaw a imag niya too.” 5Nem inpili-pilit chen engowan i “Nainpanngalawngaw toy too babaen na toro tho. Iyanchogi did Galilee a iyanchalan cha intiron sahop na Judea ingkathod mimothok chiyed Jerusalem.”
Inkowan Ches Jesus Cha Herod
6Idi inki-ngelan Pilate iwan, inbaga tho i “I-Galilee ja too?” 7Idi iyamtaan to i edafos Jesus cha Galilee a naiyantorayan Herod, inpakowan tos Jesus cha kad-an Herod tep iyaytompong a gwares Herod cha Jerusalem nontan a akow.
8Idi miten Herod si Jesus, imimdeng a pasiya tep ebayag a piyan ton si-nengen. Tep chakel i inki-ngelan to maypangkep Jesus, et piyan ton si-nengen a mengemag na milagro. 9Isonga, chakel i insalodsod to, nem nat simongsongbat si Jesus. 10Et sema iren aafo na papari tan mamaistoro na dinteg a kainakgwat cha askang to, ema-men inbasolan cha. 11Et si Herod tan sosolcharo tho, diyam-damsis ches Jesus et iyang-angja ra. Biyaroan cha ngo na mapteng a inges toy nainbaro na ari. Et inpaoli ches Jesus cha kad-an Pilate. 12Seman met laeng a akow, si Herod tan si Pilate a sigod a kabakal ira, iyankajem ira.
Kigwan Pilate I Ipabono Thos Jesus
(Matthew 27:15-26; Mark 15:6-15; John 18:39—19:16)
13Et inpata-gway Pilate ira ma aafo na papari tan echom a naengibalnay tan tothoo. 14Kigwan tod si-kara i “Intolod jo di ja tood si-kak a kigwan jo i towan saoliy tothoo. Binistigal kod jay cha sangoanan jo, nem nagwariy sipol kon manpaneknek niwa jowan ipabasol cha si-katho. 15Angken si Herod ngo, nagwariy sipol ton ngaaw a imag niya too. Isonga inpaoli tod kad-an mi. Mafoot a nagwariy imag ton ngaaw a maybagay cha ketiy to. 16Isonga, ipabaras ko et ibolos ko.” 17Kigwan Pilate iwan tep mesepol a mengibolos na sa-kin ebalod na tiyawen no timpo na Piyasta na Inda-bas na Anghil.
18Nem sema emiin a too, iyan-iringkas iren kimeljaw a kigwan cha i “Bonom! Si Barabbas i piyan min ibolos mo.” 19Si Barabbas, iyaykalebos tep ekika-chom na daban na sosolcharon Romano cha Jerusalem, tan emono ngo na too.
20Imesel mowan si Pilate ired ma too tep piyan ton ibolos si Jesus. 21Nem inkelkeljaw na tothoo i “Idansam cha koros! Idansam cha koros!” 22Et imesel mes Pilate na maykafintedo ired ma toon kigwan to i “Niyana, ngoy imag ton ngaaw? Nagwariy diyoktalan kon imag ton maybagay cha ketiy to. Isonga, ipabaras ko et ibolos ko.” 23Nem intolo-toloy na toon kimeljaw, et inpili-pilit chen maydanses Jesus cha koros ingkathod aawak si Pilate.
24Et kigwan Pilate i metongpal i inbaga na tothoo. 25Inbolos to ma toon piyan cha, a sema iyaykalebos tep ekika-chom na daban na sosolcharon Romano tan emono ngo na too. Et in-awat tos Jesus cha si-kara say a-magen ched si-katho ma piyan cha.
Indansa Res Jesus Cha Koros
(Matthew 27:32-44; Mark 15:21-32; John 19:17-27)
26Et inkowan na sosolcharos Jesus cha dogad a pengidansaan ched koros. Idi mankokowan ired man, gwariy sa-kin toon iyaspol chen si Simon i ngaran ton i-Cyrene. Mankokowan cha siyodad a edafo did payo-payow. Ida iren ma sosolcharos Simon, et inpilit chen sakbathen toy koros a mantetened cha Jesus. 27Gwara ngoy chakel a toon ketinened cha Jesus, pati bibiin keninangis tan kenginogngog cha si-katho. 28Nem singon Jesus ira ma bibii et kigwan to i “Si-kayon bibiin i-Jerusalem, enog i ningisanak, no diket nangisi yoy angel jo tan aanak jo. 29Tep manmomothok aliy timpo na diga-digat no konen na too i ‘Magesat ira ma biin ebasig a nat iyan-anak a nat engisoso!’ 30No seman a timpo, konen na too i ‘Si-kayon chontog, ekas kayo did si-kawi tan tapoi yo kawi.’ 31Tep no pedigathan chaak a nagwariy basol ko, mema-men pedigathan cha kayon gwariy basol jo.” #23:31 Sema kigwan tod esel na Greeks, sejay: Tep no sejay i a-magen ched kejow a nat emaha, nengoy mepesamak cha kejow a emaha?
32Gwara ngoy chegwen tolisan a inpakiolop iren ma solcharod Jesus say idansa ra ngo ired koros. 33Idi mimothok ired dogad a engaranan na Pohel na Toktok na Too, indansa res Jesus cha koros chiwan. Et indansa ra ngo ira ma chegwen tolisan cha koros cha. Sema sa-ki, gwared gwanan Jesus, tan sema sa-ki ngo, gwared gwili tho. 34Et kigwan Jesus i “Awa, pakawanim ira tep nat amta riy chiyan amaga.” Et bininga-bingay iren ma sosolcharoy baron Jesus, et iyanbobonot ira say amtaen chiy a-daen cha. 35Sema iren too, imakgwat iren kebinoya iy maramen sema iren naengibalnay na Hodjos, iyang-angja ra ngos Jesus i “Tiyolongan toy echom. Mebedin koma ngon tolongan toy angel to no agpayson sema Criston pinispis Afo Chiyos.” 36Iyang-angja ngo iren ma solcharos Jesus. Imesop ired kad-an to et inkayang chiy enpait a inom 37a kigwan cha i “No si-kam i Ari na Hodjos, tolongim i angel mo!” 38Gwara ngoy iyaysolat a iyaypakpak cha sa-pat na toktohan Jesus a kigwan to i “Sejay i Ari na Hodjos.”
39Sema sa-kin tolisan a iyaydansed man, kiyelkelsithan tos Jesus a kigwan to i “Ampet siya iy nat si-kam i Cristo? Tolongim i angel mo, pati si-kawi ngo!” 40Nem sema sa-ki ngon tolisan, inseg-ang ton kigwan to i “Nat entahot mos Afo Chiyos aya? Emangkeda-kamiy man-inges a chosa. 41Seja chosa, iyaybagay cha si-kathayon chegwa kagol na ngaaw a imag tayo, nem seja too, nagwariy imag ton ngaaw.” 42Et kigwan to i “Jesus, enogak i diningding no mantotoray ken ari.” 43Insongbat Jesus i “Sejay a konen kod si-kam, podno. Niman a akow, mekika-chom ked si-kak cha Paradiso.”
Sema Ingkathiy Jesus
(Matthew 27:45-56; Mark 15:33-41; John 19:28-30)
44Chanchani wiy alas dosi et bimolinget i intiron dogad ingkathod alas tris 45tep simalcheng i nihal na akow. Nontan ngon oras, sema kortined timplo, iyanchegwen ebi-nik. 46Et kimeljaw mes Jesus a kigwan to i “Awa, i-kan koy ispiritok cha si-kam.” Idi kincheng ton engowan niwan, etiy. 47Idi mita na kapitan na sosolcharoy epasamak, chijaw tos Afo Chiyos a kigwan to i “Seja too, sigoradon nagwariy imag ton ngaaw!” 48Et emiin a toon esa-nop a manboboya, idi mita riy epasamak, bimetik iren biyegbegbeg chiy pahow cha kagol na engos cha. 49Nem sema emiin a mahaamten Jesus tan sema iren bibiin ekiolo-olop cha si-katho did Galilee, imakgwat chiwed ki-ki-nan et mita ren emiin ira ma epasamak.
Sema Ingkaybeken Jesus
(Matthew 27:57-61; Mark 15:42-47; John 19:38-42)
50Gwariy sa-kin toon iyanngaran na Joseph a sa-kin ma afo na Hodjos. Mapteng tan maronong a too 51et nat iyapolbaran toy niyemnem iren ma echom a aafo a a-magen ched Jesus. Edafos Joseph cha siyodad na Arimathea tan towan sekeriy imothok ali na pantorayan Afo Chiyos. 52Et kimowan cha kad-an Pilate a inbaga tho no mebedin a a-daen toy angel Jesus. 53Et kimowan a in-epas to diy angel chiwa koros a dinibothan to na dofot, et in-ejan tod ma dohang a ekotkothan a batho. Nagwara nin i iyaybeked man. 54Sema akow a Biyarnis, si-kathoy timpo na pengisagana para gwa-gwa thon Sabbath a akow na pan-inana na Hodjos. Mandedenek i akow et chanchanin manchogiy Sabbath. #23:54 Sema Sabbath, manchogid denek na akow na Biyarnis ingkathod denek na akow na Sabaro. 55Sema iren bibiin ekiolo-olop cha Jesus alid Galilee, tined ches Joseph et mita riy kad-an na iyaybekaan Jesus tan sema inpasing Joseph a engi-jan na angel to. 56Et bimetik ma ira et insagana riy dana tan bangbangdon iepjos ched angel Jesus. Idi gwa-gwa thon Sabbath, iyan-inana ira tep seman i bilin Afo Chiyos maypangkep na Sabbath.
ទើបបានជ្រើសរើសហើយ៖
Luke 23: KAR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023 Wycliffe Bible Translators, Inc. All rights reserved.
