John 3
3
Sema Tabtabal Jesus Tan Si Nicodemus
1Gwariy sa-kin naengibalnay na Hodjos a Pharisee a iyanngaran na Nicodemus. 2Idi sa-kin dagwi, kimowan cha kad-an Jesus a kigwan to i “Maistoro, amta wi i maistoro ken into-non Afo Chiyos. Tep sema milagron naima-imag mo, nagwaren polos i mebedin a mengemag na inges to man no nagwares Afo Chiyos cha si-katho.” 3Et insongbat Jesus i “Sejay a konen kod si-kam, podnon mayka-chom bengat i tood pantorayan Afo Chiyos no may-anak mowan.” 4Et insalodsod Nicodemus i “Nengoy pesing na toon may-anak mowan no aama wala? Mebedin ayen on-olid ekes na ineto, et may-anak mowan?”
5Et kigwan Jesus i “Sejay a konen kod si-kam, podnon mayka-chom bengat i tood pantorayan Afo Chiyos no may-anak mowan babaen na chanom tan Ispirito Santo. 6Tep sema may-anak babaen na too, too ngo bengat, nem sema may-anak babaen na Ispirito Santo, gwara wiy badon aispiritoan a biyag to. 7Enchek ka masdaaw tep kigwan kod si-kam i ‘Mesepol a may-anak kayo mowan.’ 8Tep sema Ispirito Santo, may-arig cha chahem a onkowan cha piyan ton konan. Naiyayki-ngelan i notheng to, nem sema edafoan to tan konan to, nat mebedin a maamtaan. Inges tod obda na Ispirito Santod too say may-anak iwa too mowan.”
9Et insalodsod Nicodemus i “Nengoy pesing niyay a manbedin?” 10Insongbat Jesus i “Echayaw ken maistorod ja Israel. Apay nga eg mo egwathan i kigwan ko? 11Sejay a konen kod si-kam, podnon sema kigwan mi, sema amta wi, tan sema tinistigoan mi, sema sini-neng mi. Nem eg jo patien. 12Kigwan kod si-kayo iriy maypangkep na dobong, et nat piyati yo. Karkaron nat patien jo no konen kod si-kayo iriy maypangkep na dangit. 13Nagwariy toon kimayang cha dangit et imolid jay say konen tod si-kayo iriy maypangkep na dangit, malaksid cha si-kak bengat a Anak na Toon sima-kod alid dangit.
14“Sema mepesamak alid si-kak, inges toy epasamak chiwa sinan oleg a in-iket Moses cha kejow, et inkayang to nontan a timpon iyan-aha-ahad ira ma polin Israel cha dogad a nagwariy toon naiyan-iya-iyan. #3:14 Sema istoriya maypangkep Moses tan sinan oleg, naebased Numbers 21:4-9. Tep si-kak ngon Anak na Too, mesepol a maydansaak cha koros et onkayangak 15say emiin a naematid si-kak, gwara did si-kariy biyag a nagwariy pengingkaan to. 16Kagol a banay i semek Afo Chiyos cha tood ja dobong, into-no tho diy sa-sa-kin Anak ton metiy say sema naematid Anak to, nat mechosa, no diket gwara did si-kathoy biyag a nagwariy pengingkaan to. 17Tep say kagol na engito-noan Afo Chiyos na Anak tod ja dobong, nat say chosaen na Anak toy too, no diket isalakan to ira.
18“Emiin a naematid Anak to, nat mechosa ira. Nem sema iren nat naematid si-katho, ekowis mala ira et mechosa ira tep nat emati ired ma sa-sa-kin Anak Afo Chiyos. 19Say kagol a kechosaan cha, sema silow a si Cristo, kimowan alid ja dobong, nem piyan pay na tooy enbolinget iy say silow tep ngaaw i naima-imag cha. 20Tep emiin a toon naengamag na ngaaw, en-owes chiy silow, tan nat piyan chen on-esop chiwan, nahol ni mesi-neng i ngaaw a naima-imag cha. 21Nem emiin a toon naengamag na kosto, naimesop ired silow say mesi-neng i naima-imag chiy piyan Afo Chiyos a a-magen cha.”
Sema Kigwan John A Naemonjag Maypangkep Jesus
22Idi iyakcheng iwan, kimowan si Jesus tan disipolos tod sahop na Judea. Imeket ired man nonta piyen akow, et emonjag ira na too. 23Si John a Naemonjag, emonjag ngo na too, nem sema emonjagan to ket, sema siyodad na Aenon a iyay-esop cha siyodad na Salim tep gwariy chakel a chanom chiwan. Et kimowan iriy tood kad-an to, et biyonjagan to ira. 24Tep nontan a timpo, aneng nin maykalebos si John.
25Sema iren disipolos John a Naemonjag, ekisongbat ired sa-kin Hodjo maypangkep na ogadi na pandinis. 26Kimowan iriy disipolos cha John a kigwan cha i “Maistoro, sema toon kadgwam chiwa piig na kolos a Jordan a sema kigwan mod si-kawi, naemonjag kono, et emiin a too, nakimowan ired si-katho.”
27Et insongbat John i “Gwariy karebengan bengat na too no in-i-kan Afo Chiyos cha si-katho. 28Inki-ngelan joy kigwan ko i nat si-kak i Cristo, no diket into-no thoak Afo Chiyos a medebas iy say sema Cristo say isaganak i toon mematid si-katho. 29Say dahin maykasal, kegwen toy bii. Et sema kajem ton mengisagana na kasal, seskeren to, et no iki-ngelan toy esel to, on-imdeng ma. May-arigak chiwa kajem na dahin maykasal tep insaganak i tothoo para cha ikowan alin Cristo, et mimothok ma. Isonga, banay i imdeng ko. 30Et niman mesepol a mas onkayang iy onbabaak.”
Si Jesus A Edafo Did Dangit
31Si Jesus a edafo did dangit, mas ekayang iy say emiin. Say too, edafod dobong, et say nakigwan to, maypangkep niya dobong. Nem sema edafo did dangit, mas ekayang iy say emiin. 32Natinistigoan to ma sini-neng tod dangit tan inki-ngelan tod man, nem nagwariy naemati na nakigwan to. 33Nem sema toon naemati na nakigwan Jesus, tinistigoan to i podnoy ese-esel Afo Chiyos. 34Tep si Jesus a into-no din Afo Chiyos, sema nakigwan to, si-kathoy nakigwan Afo Chiyos tep in-i-kan Afo Chiyos cha si-kathoy emiin a panakabalin na Ispirito Santo. 35Tep si Afo Chiyos a Awa thayo, banay i semek tod Anak to, et inpiyal ton emiin cha si-katho. 36Sema toon naematid Anak Afo Chiyos, gwared si-kathoy biyag a nagwariy pengingkaan to, nem sema toon nat naematid si-katho, nagwared si-katho ma biyag, no diket chosaen Afo Chiyos na ingked ingka.
ទើបបានជ្រើសរើសហើយ៖
John 3: KAR
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2023 Wycliffe Bible Translators, Inc. All rights reserved.
