San Marcos 9
9
1Soc la yalbey xan:
—Jamal ya calbeyex, ay mach'atic li' ayic to te ma ba ya xlajique ja' to teme la yilic te ayix ta mandal soc yu'el te Cajwaltic Diose —xi' te Jesuse.
C'atp'uj la yilic te Jesuse
(Mt 17.1-13; Lc 9.28-36)
2Waqueb c'aal ta patil bajt' ta bay toyol wits te Jesuse. Ja' nax la yic' bael te Pedro te Jacobo soc te Juane.#2 P 1.17-18. Tey c'atp'uj la yilic a te Jesuse. 3Te sc'u'-spaq'ue buen sac c'ot soc xlememet nax jichuc toiw. Ma'yuc jtuluc ta balumilal te jich sac ya xc'ot ta saq'uel yu'un te c'u'ule. 4Soc chicnaj tey a te Elías soc te Moisese. Yacalic ta c'op soc te Jesuse. 5Jich te Pedroe la yalbey te Jesuse:
—Maestro, ¡bin nax yutsil te li' ayotic to! Ja' lec ya jpastic oxwol nailwamal. Jun awu'un te ja'ate, jun yu'un te Moisese, soc jun yu'un uuc te Eliase —xi'.
6Te Pedro ma la sna' te bila la yal yu'une, melel bayal xiwenic te jnopojeletique. 7Talic ta axintesel yu'un te tocale. Ay mach'a c'opoj tel ta yolil te tocale:
—Ja' in to, ja' te Jnich'an te bayal c'ux ta co'tane.#Mt 3.17; Mr 1.11; Lc 3.22. Aiybeya awaiyic stojol sc'op stuquel —xi'.
8La yilic ta sjoyobal ta ora nax. Ma'yuc mach'a la yiliquix. Stuquel xanix te Jesuse.
9C'alal yacalic ta coel tel ta wits, te Jesús la spas ta mandal:
—Ma me ayuc mach'a xawalbey yaiy jtuluc te bi la awilique, ja' to teme cha'cux tel ta bay animaetic te Nich'anile —xi'.
10Jich te jnopojeletique la nax yac' ta yo'tanic te bila la yilique. Ja' nax jajch' sjojc'obey sbaic te bit'il ay a te ya xcha'cux tel ta bay animaetic te la yale. 11Soc ay bila la sjojc'obeyic te Jesuse:
—¿Bi yu'un te ya yalic te jts'ibojometic te puersa ja' neel ya xtal te Eliase?#Mal 4.5; Mt 11.14. —xiic.
12La yal te Jesuse:
—Melel nix a te neel ya xtal te Eliase. Soc te melel ya xchajban spisile. Soc jich ts'ibubilix jilel sc'oplal ta Sjun Dios te Nich'anile te bit'il ya xc'ax bayal swocol soc te ma'yuc sc'oplal ya xc'ot ta o'tanile. 13Ja'uc me to, ya calbeyex te xtaluquix te Eliase. La spasbeyic ta stojol te bi la sc'an yo'tanique, jich te bit'il ts'ibubil jilel sc'oplal ta Sjun te Diose —xi' te Jesuse.
Jesús la scoltay jtul querem te ay pucuj ta yo'tan
(Mt 17.14-21; Lc 9.37-43)
14Julic tey a ta bay te yantic jnopojeletic yu'une. La yilic te joytaybilic yu'un tsobol te ants-winiquetique. Ay jts'ibojometic tey a te tulan yacalic ta c'op soc te jnopojeletique. 15Te c'alal la yilic te ants-winiquetic te tal te Jesuse, cham nax la yaiyic yu'un. Animajic bael ta ora ta spatbeyel yo'tan. 16Te Jesús la sjojc'obey:
—¿Bila a te ya awalbey abaique? —xi'.
17La yal te jtule: —Maestro, la quic' tel ta atojol te jnich'ane, yu'un ay pucuj ta yo'tan. 18Bayuc nax ya x'uts'inot yu'un, ya xt'uxanot ta lum yu'un, soc ya xbulan ya'lel sti' soc ya sjets'ulay ye. Tey ya xteub scojt'ol a te sbaq'uetale. La calbeyix te jnopojeletic awu'une te yacuc sloq'uesbon ta yo'tan, ja'uc me to, ma ju' yu'unic —xi' te winique.
19La yal te Jesuse:
—¿Bit'il ayex a ja'ex te jlam alnich'anex te ma'yuc xch'uunjel awo'tanique? ¿Jayeb me xan c'aal te ya joinexe? ¿Jayeb me xan c'aal te ya jts'icbeyex te bit'il ayexe? Ic'bonic tel te quereme —la yut.
20Jich la yic'beyic tel ta stojol. Jich te pucuj la yil te Jesuse. Jich la sjimulay ta ora te quereme. Jich t'uxaj ta lum. Xbalalet nax yu'un, soc bulan ya'lel sti'. 21Te Jesús la sjojc'obey te state:
—¿Sjayebalix ja'wil xjajch'el in to? —xi'.
La yal te state:
—Ta yalalil to. 22Bayal buelta ch'ojot ta c'ajc' soc ta ja' yu'un te pucuje, yu'un ya sc'an smil. Jich yu'un teme ya xju' awu'une, coltaybon. C'uxtayawon soc —xi' ta stojol.
23Te Jesús la yalbey:
—¿Bi yu'un ma xju' cu'un ta ac'op? Spisil ya xju' ta pasel te mach'a jich xch'uunej te yo'tane —xi'.
24Ora c'opoj ta aw te state. Jich la yal:
—Ya xch'uun co'tan. Coltayawon xan te bit'il ma'yuc lec xch'uunjel co'tane —xi'.
25C'alal la yil Jesús te sten sten nax sbaic tel te ants-winiquetique, la scom te pucuje:
—Ja'at, pucuj, uma' soc cojc'at, ya calbat mandal: Loc'an ta yo'tan te quereme soc ma me xcha'ochat xan ta yo'tan —xi' te Jesuse.
26Awun te pucuje soc jipulayot xan jilel yu'un te quereme. Jich loc' ta yo'tan. Lajem jilel yilel te quereme. Ay bayal ta jtul la yalic te lajemixe. 27Ja'uc me to, te Jesús la stsacbey te sc'abe. La sjaches. Jich tejc'aj jajch'el te quereme.
28Och ta na ts'iin te Jesuse. Te jnopojeletic tey la sjojc'obeyic ta stuquel a:
—¿Bi yu'un te ma ju' cu'untic sloq'uesel jo'otic te pucuje? —xiic.
29La yal te Jesuse:
—Ja' in pucujetic to, ma xju' ta loq'uesel, ja' to teme ya apasic ayuno ta sc'oponel Dios yu'un —xi' te Jesuse.
La yal xan Jesús te ya xlaje
(Mt 17.22-23; Lc 9.43-45)
30La yijq'uitayic jilel te banti ayique. Beenic bael ta sq'uinal Galilea. In te Jesuse yo'tanuc ma xna'ot stojol te bit'il tey ayix a, 31melel yac ta sp'ijubtesel te jnopojeletic yu'une. Jich yac ta yalel:
—Te Nich'anile ya me x'ac'ot ta sc'ab te ants-winiquetique. Ya me smilic, ta patil te c'alal lajemix ae, ya me xcha'cux tel ta yoxebal c'aal —xi' te Jesuse.
32Ja'uc me to, te jnopojeletique ma la sna'ic stojol te bila la yale, soc la xi'ic te ya sjojc'obeyic xane.
Te mach'a muc' sc'oplal ya xc'ote
(Mt 18.1-5; Lc 9.46-48)
33C'otic ta lum Capernaúm. C'alal ayix ta na te Jesuse, caj sjojc'obey te jnopojeletique:
—¿Bila a te yacalex ta yaanel tel ta be la caiye? —xi'.
34Ja'uc me to, ma'yuc mach'a la sjac' jtuluc, yu'un ja' la yaanic tel ta be te mach'a muc' sc'oplal yu'unic ta spisilique.#Lc 22.24. 35Jich la snajc'an sba te Jesuse. La yic' tel ta stojol te lajchaytul jnopojeletic yu'une. Jich la yalbey yaiyic:
—Te mach'a ya sc'an te muc' sc'oplal ya xc'ote, peq'uel me ac'a yac' sba, soc ac'a yac' sba ta abatinel#Mt 20.26-27; 23.11; Mr 10.43-44; Lc 22.26. —xi'.
36Soc la yic' tel jtul alal. La stejc'an ta yolilic, soc la spet. Jich la yalbey yaiyic:
37—Te mach'a jo'on ta jwenta te ya yic' ta stojol jtuluc alal jich bit'il in to, jo'on la yic'onix ta stojol abi. In te mach'a la yic'onix ta stojole, ma jtuqueluc nax te yic'ojone, ja' la yiq'uix ta stojol uuc te mach'a la sticunon tele#Mt 10.40; Lc 10.16; Jn 13.20. —xi' te Jesuse.
Te mach'a ma ba scontroinotique, joytic me abi
(Mt 10.42; Lc 9.49-50)
38Te Juan jich la yal:
—Maestro, la quiltic jtul winic te yac ta sloq'uesel pucujetic ta awenta. La jcomtic, melel ma ba sjoinejotic —xi'.
39La yal te Jesuse:
—Ma me x'acomic. Te mach'a ya spas jchajp at'elil ta jwenta, ma xju' te ya sbolc'optayone. 40Melel te mach'a ma scontroinotique, yu'un ja' joytic ta at'el abi.#Mt 12.30; Lc 11.23. 41Te mach'a ya yac'beyex awuch'ic junuc vaso ja' ta swenta bit'il yu'unex te Cristoe, jamal ya calbeyex, ma xch'ay te yutsilal ya yich' yu'une#Mt 10.42. —xi'.
Ay yalesel ta mulil
(Mt 18.6-9; Lc 17.1-2)
42Soc jich la yal xan:
—Mach'auc a te ya yac' yaluc ta mulil jtuluc te mach'atic peq'uel ayic te xch'uunejonique, ja' lec yacuc yich' chuquel muc'ul cha' ta snuc', te ya yich' ch'ojel ochel ta mar. 43Teme ja' ya syalesat ta mulil te ac'abe, boja loq'uel. Ja' lec te jch'ixuc nax ac'ab ya x'ochat ta cuxinel soc. Ja' wocol teme xchebal ac'ab ya xch'ojotat ochel ta infierno ta c'ajc' te ma xtup' sbajt'el q'uinale [ 44ta banti ma xcham syaljaul te mach'atic la sle smulique, soc ta bay ma xtup' sbajt'el q'uinal te c'ajq'ue.]#Mt 5.30. 45Teme ja' ya syalesat ta mulil te awacane, boja loq'uel. Ja' lec te jch'ix nax awacan ya x'ochat ta cuxinel soc. Ja' wocol teme xchebal awacan ya xch'ojotat ochel ta infierno ta c'ajc' te ma xtup' sbajt'el q'uinale [ 46ta banti ma xcham te yaljae, soc ma xtup' sbajt'el q'uinal te c'ajq'ue.] 47Teme ja' ya syalesat ta mulil te jp'ij asite, loq'uesa. Ja' lec te jp'ij nax asit ya x'ochat ta cuxinel soc. Ja' wocol teme xchebal asit ya xch'ojotat ochel ta infierno ta c'ajc' te ma xtup' sbajt'el q'uinale#Mt 5.29. 48ta banti ma xcham te yaljae, soc ma xtup' sbajt'el q'uinal te c'ajq'ue.#Is 66.24.
49“Spisilic ya me yich' yats'amil ta c'ajc' jich bit'il te ya yich' chajbanel ta ats'am spisil te milbil smajt'an te Diose. 50Te ats'ame lec, ja'uc me to, teme laj te xchi'ile, ¿ya bal c'an taluc xan xchi'il?#Mt 5.13; Lc 14.34-35. Ayuc me achi'ilic c'oem jichuc ats'am, soc junuc nax me awo'tan abaic ta apisilic —xi' te Jesuse.
ទើបបានជ្រើសរើសហើយ៖
San Marcos 9: TZOXCH
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Biblia en Tzeltal de Oxchuc y Tenejapa © Sociedad Bíblica de México, A.C., 2001.