San Lucas 17
17
Ya xyaleswan te mulile
(Mt 18.6-7,21-22; Mr 9.42)
1Te Jesús la yalbey te jnopojeletic yu'une:
—Puersa ay yalesel ta mulil, ja'uc me to, ya me yil swocol te mach'a ya syaleswan ta mulile. 2Melel te mach'a ya yac' yaluc ta mulil jtuluc te mach'atic peq'uel ayique, ja' lec te yacuc yich' chuquel cha' ta snuc' soc te lajuc yich' ch'ojel ochel ta mare. 3Tsajtaya me abaic te ja'exe.
“Teme ay awermano te la sta smul ta atojole, baan, c'opona ta sbelal. Teme la sujt'es yo'tane, pasbeya me perdón yu'un.#Mt 18.15. 4Manchuc teme ya sta smul ta atojol juqueb buelta te jujun c'aale soc teme jujun buelta ya xtal yalbat te ma ba ya spasixe, pasbeya perdón jujun buelta —xi' te Jesuse.
Esmantesbotic xch'uunjel co'tantic
5Te jpuc-c'opetique la yalbeyic te Cajwaltique:
—Esmantesbotic xan xch'uunjel co'tantic ta lec —xiic.
6La yal te Cajwaltique:
—Teme ay jich xch'uunjel awo'tanic jtebuc te bit'il sbac' mostaza te biq'uit naxe, ya me xju' ya awalbeyic in sicómoro-te' to: “Bula aba loq'uel li'to, baan ts'una aba ta mar”, teme ya awute, jich me ya xch'uunbat amandal.
Te bila ya sc'an ya spas te abate
7“Teme ay awabat te sujt'ix tel ta woc'lum, o ta scanantayel awacax ta bay aq'uinal, ¿ya bal awalbey: “Ochan, naclan ta mesa, we'an”, ya bal awut? 8¡Ma jichuc! “Baan, chajbanbon jwe'el. Ya me ac'asesbon tel, yu'un ya xwe'-x'uch'ajon neeluc te jo'one. Patil ya xwe'at te ja'ate”, ya awut. 9¿Soc, ya bal awalbey wocol te awabat yu'un te bit'il la spasbat te awat'el la awalbeye? ¡Ma jichuc! 10Ja' nanix jich te ja'exe, teme la apasix spisil te bila la yalbat te Diose, ya sc'an te jich ya awalic: “Amenotic ta abatil, melel ja' nax la jpastic te bila albototique”, xaex me —xi' te Jesuse.
Jesús la slamantesbey xchamel lajuntul jc'a'el-chameletic
11Te bit'il yac ta beel ta sbelal Jerusalén te Jesuse, c'ax bael ta sq'uinal Samaria soc Galilea. 12Te c'alal c'ot ta ch'in lum, tal ta tael yu'un lajuntul winiquetic te yich'ojic c'a'el-chamele. Q'uejel to tec'ajic ta aw:
13—Jesús, Maestro, c'uxtayawotic —xiic ta aw.
14C'alal la yil te Jesuse, jich la yalbey:
—Baanic, ac'a abaic ta ilel ta stojol te sacerdoteetique#Lv 14.1-32. —xi'.
Te bit'il yacaliquix ta beele, colic ta chamel. 15Te bit'il la yil te jtul te lequix ay te sbaq'uetale, jich sujt' tel ta stojol te Jesuse. Tulan yac ta yawtayel tel yutsilal te Diose. 16Jul stinan sba coel c'alal ta lum ta stojol te Jesuse. La yalbey wocol ta stojol. In te winique samaria-winic stuquel. 17La yal te Jesuse:
—¿Ma bal lajuntuluc te mach'a lecube? ¿Banti ay te baluntulique? 18¿Ja' nax bal in jyanlum winic to te sujt' tel ta yalel wocol ta stojol te Diose? —xi' te Jesuse.
19Soc la yalbey:
—Jajch'an, baan. Colematix ta swenta xch'uunjel awo'tan —xi'.
Te c'alal ya xtal ta ajwalinel te Diose
(Mt 24.23-28,36-41)
20Te fariseoetic la sjojc'obeyic te Jesús te bi ora ya xjajch' ta ajwalinel te Diose. Jich albot yaiyic yu'un:
—Ma chicanuc ta ilel te bi ora ya xjajch' ta mandal te Cajwaltic Diose. 21“La', ilawil li'to” soc “Baan, ilawil lum to” ma'yuc mach'a xi' ta yalel, melel ayix ta awolilic te bit'il ay ta ajwalinel te Diose —xi' te Jesuse.
22Soc la yalbey te jnopojeletic yu'une:
—Ya me sta yorail te awo'tanuc yacuc awilic te Nich'anile manchuc teme ja' nax jun c'aale, ja'uc me to, ma ba ya awilic. 23Ay me mach'atic ya yalbeyex: “La' ilawil, li' ay to” soc: “Conic, quiltic, lum ay to”, ya me yutex, ja'uc me to, ma me xbaex soc ma me x'ats'aclinic bael. 24Yu'un te bi ora ya xtal te Nich'anile, jich me ya xchicnaj tel te bit'il ya xlem tel tsantsewal ta bay juju-jmejch' te ch'ulchane. 25Ja'uc me to, neel ya xc'ax bayal swocol, soc xujt' ma'yuc sc'oplal ya xc'ot ta yo'tanic te ants-winic te cuxulic ta q'uinal ta ora to. 26Jich bit'il ta yorail te Noeje,#Gn 6.5-8. ja' nanix jich yilelic a te c'alal ya xtal te Nich'anile. 27Yacalic ta we'el-uch'ajel, soc yacalic ta nujbinel, soc yacalic ta ch'omtayel, ja' to te bi c'aalil och ta barco te Noeje. Tal te pulemale. Jich lajic ta spisilic.#Gn 7.6-24. 28Jich nix c'ot ta pasel ta yorail te Lote.#Gn 18.20—19.25. Yacalic ta we'el-uch'ajel, soc yacalic ta manbajel chonbajel, soc yacalic ta awal soc yacalic ta spasel snaic. 29Te bi c'aalil loc' tel ta lum Sodoma te Lote, yal tel c'ajc' soc azufre ta yolil ch'ulchan. Jich lajic ta spisilic. 30Jich nix ya xc'ot ta pasel te c'alal ya xchicnaj tel te Nich'anile.
31“Te c'alal ya sta yoraile, te mach'a moem bael ta yamac'ul sba te snae te ay ta yutil sna te sbiluque, ma me x'ochix ta sloq'uesel te c'alal ya xco tele. Soc te mach'a baem ta c'altic a, ma me sujt'ix bael ta sna.#Mt 24.17-18; Mr 13.15-16. 32Juluc me ta awo'tanic te bit'il ay te yinam Lote.#Gn 19.26. 33Te mach'a ya xc'uxtay te xcuxlejale, ya me xch'ay soc. Yan te mach'a ma xc'uxtay te xcuxlejale, ja' me ya xcuxin stuquel.#Mt 10.39; 16.25; Mr 8.35; Lc 9.24; Jn 12.25.
34“Ya calbeyex, teme ya xc'ot ta pasel ta ajc'ubale, ay me cha'tul wayajtic ta jun nax wayibal, jtul ya x'ic'ot soc jtul ya x'ijq'uitayot. 35Soc ta bay cheb antsetic te sjoinej sbaic ta juch' mats'e, jtul ya x'ic'ot soc jtul ya x'ijq'uitayot. [ 36Soc te bay cheb winiquetic te sjoinej sbaic ta at'el ta c'altique, jtul ya x'ic'ot soc jtul ya x'ijq'uitayot] —xi' te Jesuse.
37Te c'alal la yaiyic stojole, la sjojc'obeyic:
—Cajwal, ¿banti ya xc'ot ta pasel? —xiic.
La yal te Jesuse:
—Ja' pajal soc te banti chawal sbaq'uetal te bila lajeme, melel tey ya stsob sbaic tel uuc te xulemetique —xi' te Jesuse.
ទើបបានជ្រើសរើសហើយ៖
San Lucas 17: TZOXCH
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Biblia en Tzeltal de Oxchuc y Tenejapa © Sociedad Bíblica de México, A.C., 2001.
