मत्ती 10
10
यीशु रे बारह चेले
(मरकुस 3.13-19; लूका 6.12-16)
1तेहुकी यीशु आपणे बारह चेले आपु सेटा शादी करे, त्याह दुष्टात्मा पैंदे अधिकार दिना कि त्याह काहडे होर सभी तरहा री बीमारी होर सभी तरहा री कमजोरी का ठीक करे। 2याह बारह प्रेरिता रे ना या साहा: पहिलअ सिमोन, जासूबे पतरस बोला, होर तेऊरअ भाई अन्द्रियास; जब्दी रअ शोहरू याकूब, होर तेऊरअ भाई यूहन्ना; 3फिलिप्पुस, होर बरतुल्मै, थोमा, होर चुंगी माँगण आल़अ मत्ती, हलफई रअ शोहरू याकूब, होर तद्दै, 4शिमोन कनानी, होर यहूदा इस्करियोती जूणी सह ढाकणे बझयाल़ु।
बारह चेले रा सेवा रा काम
(मरकुस 6.7-13; लूका 9.1-6; 10.4-12)
5यीशुये याह बारह चेले बे यह आज्ञा देई करे भेजी : जोह यहूदी नाँई आंदे मतलब अन्यजाति साहा त्या फेरा बे नांई नाहे, होर सामरिया रे कासु नगरे प्रबेश नांई करे। 6पर इस्राएला रे बंशा रे लोका री ही गोझीदी भेडा सेटा बे नाहे। 7होर हाँडदे-हाँडदे यह प्रचार करा स्वर्गा रा राज्य नेड आउआ। 8बीमारी आल़े लोका ठीक करा, मुएदे जिऊंदे करा, कोढ़ी ठीक करा, दुष्टात्मा काढ़ा। तमा जोह मुफ्ता में भेटा तेऊ मुफ्ता में देया। 9आपणी झोली में नांई सुना, होर ना रूपा, होर ना चाँबा डाहे; 10बाता बे ना झोली ड़ाहे , होर ना दुई कुरते, ना बूट होर ना डाहुले, किबेकि मज़दूरा बे तेऊरी रोटी भेटी लोडी। 11जासू कासु नगरे होर ग्राए बे नाहाँ, तेबा पता ला कि तखे कुंण रुकणे लायक साहा। होर नांई नाहणे तणी तमे तखी रहा। 12घरा में नाहदे वक्ते तेऊबै आशीष दे। 13अगर त्याह घरा रे लोका एता लायक होले तेबा थारा कल्याण त्याह पैंदे पूजणा, अगर त्याह एता लायक ना हो तेबा थारा कल्याण तमा सेटा बे बापस इहंणा। 14जोह कोई तमा ग्रहण नांई करे होर थारी गला नांई शुणे, तेऊ घरे या नगरा का निखली करे आपणी ज़ाघा रे धुड़े ठुडके। 15हाऊं तमाबे सच बोला कि न्याय री धयाड़ी तेऊ नगरा री देशा का सदोम होर अमोरा रे नगरा री दशा ज्यादा सहणे लायक हूँणी।
इणे आली मुश्कला रा वक्त
(मरकुस 13.9-13; लूका 21.12-17)
16हेरा, हाऊं तमा भेडा रे साही भेड़िया रे मझे भेजा, एतकी तणी तमे सर्पा साही चलाक होर कबूतरा रे साही भोले बणा। 17पर मणशा का साबधान रहा, किबेकि त्याह तमे सभा में सौंपणे, होर आपणे प्रार्थना घरा में तमाबे कोड़े बाहंणे। 18तमे महा बे न्यायधीश होर राजा रे बराबर त्याह पैंदे, होर अन्यजाति पैंदे गुआही हूँणे बे पजेरने। 19जेबा त्याह तमे ढाकणे बझयाल़णे तेबा यह फिक्र नांई करे कि हामे कासु रीति का याह कैह बोलणा, किबेकि जोह कुछ तमा बोलणाा होला, तेबा तेऊ वक्ते तमाबे खोजणा। 20किबेकि बोलण आले तमे नांई आंन्धे, पर थारे स्वर्गा रे बापू री आत्मा तमामें बोला।
21भाई, भाई होर बापू शोहरू बे, मरने बे दीणे, होर शोहरू आमा बापू रे बिरोधा में उठी करे त्याह मराऊणे। 22मेरे ना री बजा का सभी लोका तमे संघे बइर करना, पर जोह अन्त तणी जोह धीरज डालअ तेऊरा उद्धार हूँणा। 23जेबा तमा एकु नगरा में सताए, तेबा दूजे बै ठुरे। हाऊं तमाबे सच बोला, तमे इस्राएला देशा रे सभी नगरा में नांई फिरी छेकणे कि महा मणशा रे शोहरू इहंणअं।
24चेलअ आपणे गुरु का बड़अ नांई हूँदअ; होर सेबक आपणे मालक का। 25चेले रा गुरु रै, होर सेबका रा मालक रै बराबर हूँणा ही बहू साहा। जेबा त्याह घरा रै मालका बै शैतान बोलू तेबा तेऊरे घरा आले बै कैह कुछ नांई बोलणा !
कासु का डरना?
(लूका 12.2-7)
26तेबा त्या का नाँई डरे, किवेकी किछे भी ढोपू दा नाँई, जोह नाँई खोलणा; होर ना किछे भी गोजु दा नाँई आंदा जो नाँई जाणना। 27जोह कुछ हाऊं तमाबे न्यारे में आज्ञा दीदा, तेऊ तमाबे प्रयाशे में बोला; होर जोह कनेटे तमे शुणा, तेऊ तमे छता पैंदा का प्रचार करा। 28जोह शरीरा बे घात करा, पर आत्मा बे घात नांई करी सकते, त्याका नांई डरा, पर तेऊका ही डरा जोह प्राण होर शरीरा दुही नरका में नष्ट करी सका। 29कैह ढबे में दुई चेली नांई बिकती? तेबा भी थारे बापू री इच्छा रे बिना त्याह मेज़ा का एक भी धरती पैंदे नांई पड़ी सकतअ। 30थारे मुंडा री ज़टा भी सभे गिणी दी साहा। 31एत्तकी तणी डरे नांई; तमे बहू चेली का बढ़ी करे साहा।
यीशु मनण या नांई मनण
(लूका 12.8-9; 12.51-53; 14.26-27)
32जोह कोई मणशा रे सामने महा मनलअ, सह महा भी आपणे स्वर्गीय बापू रे सामने मनण। 33पर जोह कोई मणशा रे सामने मेरा नांई करलो, तेबा महा भी आपणे स्वर्गीय बापू रे सामने नांई करना।
यीशु रै ईहंणे रा परिणाम
(लूका 12.51-53; 14.26-27)
34यह नांई समझा कि हाऊं धरती में लोका रे वीच मिलाप कराउंदअ आउदअ साहा; हाऊं मिलाप कराउंदअ नांई, पर तलबारा चलाऊद आउदअ साहा। 35हांऊ तेबा आऊदअ कि मणशा तेऊरे बापू का, होर शोहरी तेसकी आम्मा का होर बहू तेसकी साशू का अलग करे। 36मणशा रे बईरी तेऊरे घरा रे लोका ही हूँणे। 37जोह आमा होर बापू महा का ज्यादा प्रेम करा, सह मेरे लायक नांई; होर जोह शोहरू या शोहरी महा का ज्यादा जाणा, सह मेरे चेले बणने लायक नांई; 38होर जोह आपणे क्रुस चक्की करे महा पीछे नांई चले सह मेरे लायक नांई आदअ। 39जोह आपणे प्राण बचाउंदा, तेऊ सह नाश करनअ; होर जोह मेरी वजा का आपणे प्राण नष्ट करलो, तेऊ सह भेटण।
ईनाम
(मरकुस 9.41)
40जोह ताह ग्रहण करा, सह महा ग्रहण करा; होर जोह महा ग्रहण करा, सह मेरे भेजणअ आले ग्रहण करा। 41जोह भबिष्यदक्ता बै भविष्यद्वक्ता जाणी करे ग्रहण करे, तेऊ भबिष्यदक्ता रा बदल़ा पांउणा; होर जोह धर्मी बै धर्मी ना जाणी करे, तेऊ धर्मी रा बदला पांउणा। 42जोह कोई याह होछे मेज़ा का एकु मेरे चेले जाणी करे सीधी एक कटोरे में का मेरे ना का ठाडा पाणी पलाए, हाऊं तमाबे सच बोला, तेऊ कासु भी रीति का आपणा ईनाम नांई खोउणा।
ទើបបានជ្រើសរើសហើយ៖
मत्ती 10: ISJNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Inner Seraji (ईनर सराजी) Bible by The Love Fellowship is licensed under Creative Commons Attribution-ShareAlike 4.0 License.
