यूहन्ना 5
5
ठती साला रअ बमार ठीक करनअ
1याहा गला बाद यहूदी रे एक जाच होई, यीशु यरूशलेमा बे नाठअ। 2यरूशलेमा में भेड़ा रे दुआरा सेटा एक कुण्ड साहा जासू बे इब्रानी भाषा में बैतहसदा बोला; तेऊरे पाँज़ ओसारी साहा। 3याह में बहू बमार, काणे, लेगड, होर शुके दे अंगा आले (पाणी रे हिलणे री आशा में) पड़ी रहंदा थी। 4किबेकी चुनीदे वक्ता में परमेश्वरा रे स्वर्ग दूत कुंडा में इच्छी करे पाणी हिलाऊंदा थी। पाणी हिलाऊंदा ही जोह कोई पहिले उतरा, सह ठीक हुंदा थी, चाहे तेऊरी भी बीमारी किबे ना हो। 5तखे एक मणश, जोह ठत्ती साला का बीमार थी। 6यीशु सह पढूदअ हेरी करे होर यह जाणी करे कि यह बहू धियाड़ी ओरी ऐसा दशा में पढूदअ आसा, तेऊका, कैह तूह ठीक हूंणा चाँहदा? 7तेऊ बमारे तेऊबै उतर दिना, हे परमेश्वर, माँह सेटा कोहे भी मणश नांई आंधअ कि जेबा पाणी हिलाऊंदा, तेबा महा कुण्डा में उतारे; पर मेरे पूज़दे-पूज़दे दूजअ महा का पहिल उतरा। 8यीशु तेऊबै बोलू, उठ, आपणे मांजे चुआक होर हांड़अ। 9तेउकी सह मणश तेभरी ठीक होऊ, होर आपणें मांजे चुआकी करे हाँडदअ फिरदअ लागअ सह सब्ता री धयाड थी।
10सह सब्ता री ध्याड़ी। ऐतकी तणी यहूदी तेऊका जोह ठीक होऊ, आज सब्ता री धयाड साहा, कानूना रे सावे बिस्तरा चुआकणा तमाबे ठीक नाई आनधा। 11तेऊ तयाबे उतर दिना, जूणी हाऊं ठीक करू, तेऊही महा बे बोलू, आपणे बिस्तरे चुआकअ, होर चालअ फिर। 12त्याहे तेऊका पुछु, सह कुण मणश साहा जूणी ताहबे बोलू, माज़े चुआकअ, होर हांड फिर? 13पर जोह ठीक होऊ, सह ज़ाणदअ, कि सह कुण साहा, किबेकि तेसा जागहा में भीड़ा हुँणे में का यीशु तखा का हटु। 14याह गला बाद सह यीशु देहुरे भेटअ। यीशु तेऊबै बोलू, हेर, तूह ठीक होऊदअ भी पाप नांई करे, ऐडा नां होए कि पाप करी करे ताह पेंदे कोई बड़ी मुसीबत इच्छे। 15तेऊ मणशे नाही करे यहूदी बे बोलू कि जूणी हाऊं ठीक करू सह यीशु साहादअ। 16ऐतकी तणी यहूदी यीशु सताउंदे लागे, किबेकि सह एडे काम सब्ता री धियाड़ी करा थी। 17ऐता में यीशु तयाबे बोलू, मेरअ बापू ऐबर तणी काम करा, होर हाँऊ भी काम करा। 18ऐतकी तणी यहूदी होर भी ज्यादा तेऊ मारने री कोशिशा करदे लागे, किबेकि सह सीधी सब्त री धियाड़ री बिधि चोडदअ, पर परमेश्वरा बे आपण बापू बोली करे आपणे आपुबे परमेश्वरा रे बराबर समझा थी।
शोहरू रा अधिकार
19ऐता पेंदे यीशु तयाबे बोलू, हाँऊ तमाबे सच-सच बोला, शोहरू तमा का किछे नांई करी सकतअ, सीधी सह जोह बापू करदा भालाआ; किबेकि जासू-जासू कामा बापू करा त्याह ही त्या कामा शोहरू भी तेऊ साबे करा। 20किबेकि बापू शोहरू संघे प्यार डाहंदा होर जोह-जोह काम आपु करा, त्या तेऊबै रिहाऊदा शोभला; होर सह ऐताका भी बड़े काम तेऊबै रिहाऊदा कि तमे अचम्भा करे। 21जेहडअ बापू मुएदे चुअका होर ज़ाल़ा, तेहडा ही शोहरू जासू चांहंदा त्या जिऊंदअ करा। 22बापू कासका न्याय नाँई करदअ, पर न्याय करने रे सभे काम शोहरू बे दींदा, 23कि सबे लोका जेह्ड़े बापू रा आदर करा तेहडा ही शोहरू रा भी आदर करा। जोह शोहरू रा आदर नांई करदअ, सह बापू रा जूणी सह भेजुदअ साहा, आदर नांई करदअ। 24हाऊं तमाबे सच-सच बोला, जोह मेरअ बचन शूणी करे मेरे भजणे आले में बुशाह करा, सारी अनन्त जीबन तेऊरा साहा; होर तेऊ पेंदे दण्डा री आज्ञा नाँई हुंदी पर सह मउती का पार होई करे जीबन नाहीं छेकू।
25हाऊ तमा का सच-सच बोला कि वक्त ईहंदा, होर ऐबा साहा, जासू में मुंएदे परमेश्वरा रे शोहरू रे शब्द शूणने, होर जोह शूणले त्या जिऊंणे। 26किबेकि जासू रीति बापू आपणे आपु में जीबन डाहंदा, तेसी रीति में तेऊ आपणे शोहरू बे भी यह अधिकार दीनादा कि आपणे आपा में जीबन डाहे। 27किबे तेऊबै भी न्याय करने रा अधिकार दीनादा आसा, ऐतकी तणी कि सह मणशा रअ शोहरू साहा। 28ऐता में अचम्भा करा; किबेकि सह वक्त ईहंदा कि जेतरे कब्रा में साहा त्या तेऊरे शब्द शूणी करे निखलना। 29जूणी भलाई करी दी त्या जीबना रे पुनरुत्थाना बे उठणे होर जूणी बुराई करी दी त्या दण्डा रे पुनरुत्थाना बे जिऊंणे।
यीशु रे सम्बन्धा में गुआही
30हाँऊ आपणे आपा का किछे नांई करी सकतअ; जेड़ा शूणा, तेहडा न्याय करदा; होर मेरा न्याय सच्चा साहा, किबेकि हाँऊ आपणी इच्छा सगे नाँई पर आपणे भेजणअ आले री इच्छा पूरी करना चाँहदा। 31अगर आपणी गुआही हाँऊ आपे दे, तेबा मेरी गुआही सच्ची नाँई हुँणी। 32एक होर साहा जोह मेरी गुआही दींदा, होर हाँऊ जाणा कि मेरी जोह गुआही सह दींदा, सह सच्ची साहा। 33तमे यूहन्ना का पुछु होर तेऊ सच्चाई री गुआही दींनी। 34पर हाऊं याह गला आपणे बारे में मणशा री गुआही चाहंदअ; तेबा हाँऊ याह गला करा कि तमा उद्धार भेटे। 35सह तअ जलदअ होर चंमकतअ सजींअ, होर तमा कुछ देर तणी तेऊ ज्योति में मगन हुँणा ठीक लागा। 36पर महा सेटा जोह गुआही साहा सह यूहन्ना री गुआही का भी बड़ी साहा; किबेकि जोह काम बापू महा बे पूरा करने बे दींना दा मतलब यह काम जोह हाऊं करा, त्या मेरे गुआह साहा कि बापू हाऊं भेजुदअ। 37होर बापू जूणी हाऊं भेजुदअ, तेहुए मेरी गुआही दींनी दी। तांई कधी भी तेऊरे बोल शब्द शुणु, होर नाह तेऊरा रूप हेरूऊ; 38होर तेऊर बचना मना में स्थिर नांई डाहंद, किबेकी जोह तेऊ भेजी तमे तेऊरा बुशाह नांई करद। 39तमे पवित्र शास्त्रा लोड़ा, किबेकि समझा कि तेता में अनन्त जीबन तंमा भेटा; होर यह सह साहा जोह मेरी गुआही दींदा; 40तेबा भी जीबन पांऊदा तमे माँह सेटा ईहंणा चाहंदा। 41हाऊं मणशा का आदर नांई चाँहदअ। 42पर हाँऊ तमा जाणा कि तमामें परमेश्वर रा प्रेम नांई आंधा। 43हाऊं आपणे बापू रे ना पेंदे आउअद, होर तमे महा ग्रहण करदा; अगर होर कोई आपणे ना में इच्छे, तेबा सह ग्रहण करनअ। 44तमे जोह एकु दूजे का आदर चाहंदा होर माईं सह आदर जोह एकमात्र परमेश्वरा री तरफा का साहा, चाँहंदा, कि कासु साबे बुशाह करी सके? 45यह समझा कि माँह बापू बराबर दोष लाऊणा; तमा पेंदे दोषा लाऊणा आलअ तअ मूसा री व्यवस्था साहा, जासू में तमे आशा डाही दी आसा। 46किबेकि अगर तमे मूसा रा बुशाह करदा, तेबा मेरा भी बुशाह करदा, ऐतकी तणी कि तेऊ मेरे बारे में लिखुदा। 47अगर तमे तेऊरी लिखी दी गला रा बुशाह नाँई करले, तेबा मेरी गला पेंदे केहड़ा बुशाह करणा?
ទើបបានជ្រើសរើសហើយ៖
यूहन्ना 5: ISJNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Inner Seraji (ईनर सराजी) Bible by The Love Fellowship is licensed under Creative Commons Attribution-ShareAlike 4.0 License.
