Génesis 11
11
Babel kakë torre ꞌakan
1Usa ꞌain ka a nëtëkaman bëtsi bëtsi banan uni banatisamapan ꞌain a menu ꞌikë unikamax achúshi banáinshi banakëxa. 2Usai ꞌi ka auküaxa bari urukë a menu uni chikíkiani ꞌura kuankin me barikin Sinar kakë amia mërakëxa, mërakin ka me sapan upí anubi tsótisa mëratankëx anubi tsóti bërukankëxa. 3Achúshi nëtën ka atúxbi timë́ax kanankëxa: Usa ꞌain ka a unikaman maxáx ꞌimainun tsëpasa ñu akama ꞌakinma Ladrillo ꞌimainun asfalto akama këñun aín xubukama ꞌakëxa.
4Usai kitankëx ka amiribishi kanantëkënkankëxa: Achúshi ëma chaiira ꞌanan kananuna torre ënën menma uarukin chaiorukin naíbëtan sënën ꞌati ꞌain. Usakin ꞌaia iskin ka bëtsi unikaman sinánti ꞌikën a unikamax ka sinánñuira ꞌianan kushiirabu ꞌikën kiax ka kiti ꞌikën, usa ꞌain kananuna nukamax bëtsi mekamanu kuani abístima ꞌain. 5ꞌAínbi ka Nukën ꞌIbun usakian ëma ꞌimainun torre unikaman ënën menma chaiorukin ꞌakë a ubuxun isakëxa.
6Ësokin unikaman ꞌakëbëtan ka Diosan sinánkëxa: Atux ka achúshi ëma chaiira ꞌanan achúshi banáinshi banaia; usa ꞌixun ka ënë ñu mëëti ꞌati sinánxun ꞌaia, bërí ka uínbi ëmitisama ꞌinun ꞌaia. 7Usa ꞌain ka Nukën ꞌIbu Diosan atun ñu ꞌaia istisatankëx kiakëxa, bëtsi bëtsi banan bananun kananuna uni ꞌimiti ꞌain, usai ꞌi ka bëtsin kakëxunbi bëtsin bana kuakámati bënëti ꞌikën. 8Usakian Nukën ꞌIbun ꞌimikëx kamabi menu kuani abískin ka atúan ꞌakë ëma a ënkankëxa. 9A menuxun ka Nukën ꞌIbun achúshi banáinshi banaiabi unikama bëtsi bëtsi banan bananun ꞌimiakëxa, kamabi mekamanu kuania amanu amanu kuantanun, usokëx ka mekama oi amanu amanu kuani abísakëxa. Usokian anuxun Nukën ꞌIbu Diosan uni bëtsi bëtsi banan banamikë kupín ka Babel kakin anëakëxa.
Semnën rëbúnkikama ꞌiá
(1 Cr 1.24-27)
10Ënëkamax ka Semnën rëbúnki ꞌiakëxa. Bakan tita chaiira ꞌikë inúkë rabë́ baritia ꞌain ka Sem cien baritiañu ꞌain, aín bëchikë Arfaxad bakë́ankëxa. 11Usakin ꞌatankëx quinientos baritia ꞌimi tsókin ka Semnën amiribishi xanu ꞌimainun bëbuokin bakë bëchipatëkëankëxa.
12Arfaxad an ka treinta ꞌimainun cinco baritiañu ꞌixun Sélah bëchiakëxa. 13Usakin ꞌatankëx, Arfaxad cuatrocientos tres baritia ꞌimi tsókin, ka xanu ꞌimainun bëburibi okin bakë bëchipatëkëankëxa.
14Sélahnën ka treinta baritiañu ꞌixun Éber bëchiakëxa. 15Usakin ꞌatankëx ka Sélah cuatrocientos tres baritia ꞌimi tsókin xanu ꞌimainun bëbuokin bakë bëchipatëkëankëxa.
16Ébernën ka treinta ꞌimainun cuatro baritiañu ꞌixun ka aín bëchikë Péleg bëchiakëxa. 17Usakin ꞌatankëx ka Éber cuatrocientos treinta baritia ꞌimi tsókin, xanu ꞌimainun bëbuokin bakë bëchipakëxa.
18Pélegnën ka treinta baritiañu ꞌixun ka Reú bëchiakëxa. 19Usakin ꞌatankëx ka Péleg doscientos nueve baritia ꞌimi tsókin ka xanu ꞌimainun bëbu ꞌinun bakë bëchipatëkëankëxa.
20Reú ax treinta ꞌimainun rabë́ baritiañu ꞌixun ka Serug bëchiakëxa. 21Usakin ꞌatankëx ka Reú doscientos siete baritia ꞌimi tsókin ka xanu ꞌimainun bëbu ꞌinun bakë bëchipatëkëankëxa.
22Serug ax treinta baritiañu ꞌixun ka Nahor bëchiakëxa. 23Usakin ꞌatankëx ka Serug doscientos baritia tsóakëxa, tsókin ka xanu ꞌimainun bëbu ꞌinun bakë bëchipatëkëankëxa.
24Nahor ax veintinueve baritiañu ꞌixun ka Térah bëchiakëxa. 25Usakin ꞌatankëx ka Nahor ciento diecinueve baritia ꞌimi tsókin ka xanu ꞌimainun bëbu ꞌinun amiribishi bakë bëchipatëkëankëxa.
26Térah ax setenta baritiañu ꞌixun ka Abram, Nahor ꞌimainun Harán akama bakë bëchiakëxa.
Téradnën rëbúnkikama ꞌiá
27Ënë kamax ka Téradnën rëbúnkikama ꞌiakëxa, ax ka Abram, Nahor ꞌimainun Harán aín papa ꞌiakëxa. Harán ax ka Lotnën papa ꞌiakëxa, 28ax ka Ur kakë anu ꞌikë Caldea me anuax aín papa Térah ꞌisama pain ꞌain ñuakëxa. Anuaxa bakë́an me anuaxbi. 29Usa ꞌain ka Abramnën aín xanu Sarai bimainun, Nahor anribi aín xanu Milcá biakëxa, ax ka Haránnën bëchikë ꞌimainun Iscá aín chirabakë ꞌiakëxa. 30Usa ꞌain ka Sarai ax tuakëma xanu ꞌaish tuáñuma ꞌiakëxa. 31Usa ꞌain ka Térah ax Ur kakë ëma anuax Canaán kakë menu kuani kuankëxa, kuankin ka Abramkëñun aín xanu Sarai aín piaka akëñun aín xuta Lot a Buánkëxa. ꞌAínbi ka Haram kakë ëma anu, bëbatankëx anu tsóti bërúakëxa. 32Usai ꞌitankëx ka Térah Harán kakë ëma anuax doscientos cinco baritia tsótankëx ñuakëxa.
ទើបបានជ្រើសរើសហើយ៖
Génesis 11: cbrPB
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 1978, 1995, 2008, 2022 Wycliffe Bible Translators, Inc. All rights reserved.