लूका 18
18
बेयमानय न्यायी अवुर एकल कोड़ीहोन राः उदाहरड़
1हेना वरी फेर ईसु नआँ बिसेय तेय कहनी तेडा कि हमेसा पे बिनतिऊ, अवुर अलोकू असकाटुः लगड नआँ उदाहरड़िय कहनी तेडा। 2“मियाँटंग सहर रे न्यायी होड़ दोहोन दोहो एनु। हेंय भगवान मेनेय बोरो वयू, अवुर कनय होड़ हो मेनेय गदन वकू। 3हेनेन गाँव रे मियाँहोड़ एकल तनय कोड़ीहोन दोहो एना, अवुर हेंय थरे मेजकोः तेय कहनी वयू, ‘ईञाःकू बिरोधिकू वरी बढ़ियाँ ते न्याय केते इंञ मी बंचोविञूँ।’ 4कुछ समय अँगम दो हेंय मेनेय अँजोम गडा, हेना वरी तयोम ते मन रेय पसींद केतेय कहनी तेडा, ‘इंञ भगवान घलि मेनेंञ बोरो वया, अवुर होड़कू हो मेनेंञ गदन वकुआ। 5हेंडे रेहो नेय एकल केनाय कोड़ीहोन बित्ताही तेय अफेत केडिञाँ, तयोम ते अलोय कनारिंञ लगड बढ़ियाँ तेंञ न्यायेआ’।”
6परभु कहनी तेडा, “नेय बढ़ियाँ ते मेनेय न्यायेआ, हेनी घलि ची मेनतेय कहनी यडा? 7अँजोम केडा पे नेय बढ़ियाँ ते मेनेय न्यायेआ, हेनी घली नेय कोड़ीहोन राः टेबोईय अँजोम तेडा। दो भगवान अनेज चुनो केडकुआ हेंकू दिन रात हेंय थरे कू बिनतीः तना, हेंकू राः ची लगड हलिते एरोय अँजोम तेडा? 8इंञ अपे थरेंञ कहनी यडा, भगवान तुरेत्ते हेंकू राः बिनतिय अँजोम यड रेहो, इंञ होड़ होपोन मेजुः तोलोग नआँ धरती रे ठुवा बिसवासी कुंञ ञाँमा।”
फरीसी अवुर मलगुजारी तिला राः उदाहरड़
9कुछ होड़कू अनाकू थरे कू भरोसा तडा कि अले धरमी होड़कू हवे, अवुर एटाः होड़कू कू मेरंग वआ। ईसु नआँ घियाःकू लगड मियाँटंग उदाहरड़िय कहनी तेडा, 10“बा होड़ होड़कींञ मँडिल रे बिनतीः लगड कींञ सेनेना; मियाँहोड़ फरीसी अवुर मियाँहोड़ मलगुजारी तिलाअय दोहो एना, 11फरीसी चड़ाँ केनते नआँ घयते अपन मन रेय बिनती एना, ‘ए भगवान, इंञ अम धन्यावादिंञ ओवा मिताना, इंञ एटाःकू घयते लुटेर, बईमान, बयसा अवुर नेय मलगुजारी तिलाअय घयते कोवाञाँ। 12इंञ हपता रे बार एसिंञ उपासुआ, अवुर इंञ अपन सींड़ कर कमाय राः दसवाँ अंस होंञ एमेया’।”
13“मलगुजारी तिलाअय सँगिंञ रे चड़ाँ केनते अनेज पाप तड हेना राः चलते ते सरग हन घलि मेनेय सँगील गडा, हेंय कुड़ाम तू गील गील तेय कहनी तेडा, ‘ए भगवान, इंञ पापी होड़ थरेम दयाऊ!’ 14#मत्ती 23:12; लूका 14:11इंञ अपे थरेंञ कहनी यडा, ने-नी भगवान राः नँजेर रे धरमिय ठहरो केनते ओड़ाः हनतेय चलो एना। लेकिन फरीसी मेने। कहेकि कनय होड़ हो अनेज बडे गिअंञ मेनतेय पसींदे रेदो, हेंय होडीञियाँ। अवुर कनय होड़ हो अनानेज होडींञ गिअंञ मेनतेय पसींदे रेदो हेंय बडेया।”
चोंडिजकू आसीर्वादिय ओवडकू
(मत्ती 19:13-15; मरकुस 10:13-16)
15हेना वरी होड़कू चोंडिज कुय छुवों लगड ईसु थरे कू अगतेड कू दोहो एनु; तहाँ चेलाकू हेंकू ञेंलतेकू दबेट तेडकुआ। 16ईसु चोंडिजकू अनेज बँदे रेय राःकेड कुतेय कहनी तेडा, “चोंडिजकू इंञ थरे पे इकम मेजवा कू अलोपे मँदा कू, कहेकि भगवान राः राज नेन घियाःकू राः हवे। 17इंञ अपे थरे सही मेतेंञ कहनी यडा, दम भराःअय चोंडिज इंग आप कींञ थरेय बिसवासेआ। नेन घयते भगवान थरे मेनेय बिसवासे रेदो, अवुर हेंय राः सींड़ टेबोः मेनेय मनोवे रेदो, भगवान राः राज रे हेंय एरोय सेनेना।”
धनमान होड़ अवुर अनन्त जीवन
(मत्ती 19:16-30; मरकुस 10:17-31)
18एहूदिकू रेनिय मुखिया ईसुय होंबोर तेडा, “ओ बढ़ियाँअय गुरू, अनन्त जीवन ञँम लगड चिंञ बनोआँ?” 19हेना वरी ईसु हेंय थरेय कहनी तेडा, “अम ची लगड बढ़ियाँ गिअम मेनतेम कहनी वंञ तना? सीरिफ भगवान भर बढ़ियाँ गिआ, अवुर कनय बढ़ियाँ कोवाआ। 20अम हुकूम दोम पपाड़िआ, ‘अलोम लंद फाँदुऊ, कनय अलोम ञेंड गो-जू, अवुर अलोम चोचोरा, जलिया ते गोवाही अलोम ए-मे अपन इंग आप राः सिमाम रखो’।” 21हेंय कहनी तेडा, “नआँ दो सींड़ इंञ चोंनोडिज वरिंञ मनो अगियाडा।” 22नआँ अँजोम केते ईसु हेंय थरेय कहनी तेडा, “अम थरे निहों हो मियाँटंग टेबोः राः कमी इदाना, अमाः सींड़ अन धन केजा केते गरीब कुम हटींगवा, हेंडे अम लगड सरग रे अखीर धन ञँमुआ। पहील ते नअँम करो, फेर इंञ तयोम तेम से-ने।” 23तहाँ धनी होड़ नआँ टेबोः अँजोम केतेय उदास यनु, कहेकि हेंय अखीर धनमानिय दोहो एना।
24ईसु नेय होड़ ञेंलके तेय कहनी तेडा, “धनमान होड़कू भगवान राः राज रे बोल लगड तीमिन किलिस गिआ। 25भगवान राः राज रे धनी होड़ बोल सेथा दो, ऊँट सुजी बुचाः ते खँडाः हेना सहज गिआ।” 26नआँ टेबोः अँजोम तेडकू कहनी तेडा, “हेंडे दो ईया उबारुआ?” 27ईसु कहनी तेडा, “होड़कू सयते मेने होयाआ, हेना भगवान सयते होयाआ।”
28तहाँ पतरस कहनी तेडा, “अँजोम मी, अले ओड़ाः भर रेनकू सींड़कू बगी वते अम तयोम तेले सेनियाडा।” 29हेना वरी ईसु हेंकू थरेय कहनी तेडा, “अपे थरे इंञ सही मेतेंञ कहनी यडा, अगर भगवान राः राज लगड ओड़ाः, चहे इंगत कू, चहे मगत कू, चहे इंगत अपत, अवुर चोंडिज कुय बगी वड रेदो। 30नआँ जिनगी रेहो केय गुना ञँमुआँ। अवुर मेजुः तना, जुग रे अनन्त जीवन कू ञाँमा।”
ईसु अनेज कू ञेंड गो-जा हेना राः बारे ते तीसरा बारिय भविस्यवाड़ी तेडा
(मत्ती 20:17-19; मरकुस 10:32-34)
31हेना वरी ईसु बारहो झन चेलाकू अनेज सुदाय गोःतेड कुआ। हेना वरी हेंकू थरेय कहनी तेडा, “अबू निहों एरुसलेम सहर हनतेबू चलोः तना, अवुर इंञ होड़ होपोन राः बिसेय ते पहील पहीलाःकू भविस्यवक्ताकू जे घयतेकू लिखो केडा, हेना सींड़ उतरोआ। 32अवुर इंञ दुस्मनकू राः ती रेकू जिमाञाँ, अवुर हेंकू ईञाः मजाक कू उड़ोआ, अवुर इंञ कू मेरंग वञाँ, अवुर इंञ थरे कू बे-जेआ। 33अवुर इंञ कोड़ा तेकू ञेंडेञाँ, अवुर कू गोजेञाँ, अवुर इंञ तीसरा दिन रेंञ जियो रिमुआ।” 34लेकिन चेलाकू नआँ टेबोः कनय मेने कू जेर गडा, अवुर नआँ टेबोः राः मतलोब तू उकू तना, अवुर जेय कहनी तेडा हेना टेबोः हेंकू मेने कू जेर गडा।
असी जोमुअय अंद्हा चिकन एना
(मत्ती 20:29-34; मरकुस 10:46-52)
35ईसु अवुर चेलाकू एरीहो सहर बँदे कू तयाःतेड दो, असी जोमुअय अंद्हा सँड़क अड़ी रेय दुड़ूब तना। 36हेना वरी होड़कुय अनवर केतेय होंबोर तेडकुआ, “ची होयाः तना?” 37हेना वरी हेंकू लाय वडिया, “नसरेत रेनिय ईसु चलोः तना।”
38हेना वरी अंद्हा हेना अँजोम केतेय हाक एना, “ओ दाऊद खनदान रेनिय ईसु, इंञ थरेम दयाऊ।” 39मड़ंग मड़ंग तेकू से-ने दोहो एनकू, जपनो कोः लगड कू दबेट सोताडिया, लेकिन हेंय अनावुर अच्छा तेय हाक एना, “ओ दाऊद खनदान रेनिय ईसु, इंञ थरेम दयाऊ।”
40हेना वरी ईसु चँड़ा केनते हेंकू थरेय कहनी तेडा, “इंञ थरे पे अगेयू” तहाँ बँदेतिय तयाःतेड दो ईसु अंद्हाय होंबोर तेडा। 41“अम चीम ञँम बेड़ा यडा? इंञ अम लगड चिंञ बनोआँ?” तहाँ अंद्हा कहनी तेडा, “परभु इंञ ञेंल गिसन यडिञाँ।” 42हेना वरी ईसु हेंय थरेय कहनी तेडा, “अम बिसवास केडा तेम चिकन यना, निहों वरी अम ञेंल सको अमू।” 43हेना वरी हेंय तुरेत्ते मेडतू जीजयानू, तहाँ भगवानिय बडेय वडते ईसु तयोम तेय सेनेना, अवुर सींड़ होड़कू ञेंलकेडिय ते भगवान राःकू स्तुति तेडा।
ទើបបានជ្រើសរើសហើយ៖
लूका 18: ksz
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2022, Wycliffe India. All rights reserved.
