João 3
3
Nicodemos Hetapyawakaplu Jesus Piranapni
1Waneru satu yineru Nicodemos tshinkaluru, judeu chefe-te, fariseu-ne-kni wale.
2Waneya hoyetshno Nicodemos yanwakatlu Jesus waneya wane htshinru:
— Tsru Hixikatshriwa, wimatyi pixa kasruklewakleryi, Hoyakalu yokanreryi klu tshinanu hike yineru himukata kamhaletlu nyi hiyakolukaka pkamhajereru Hoyakalu mimotsatanune.
3Waneya Jesus hihitlu:
— Halikaka ntshinyi, hike himukata jihlokletanru Hoyakalu pohirewaxyawaka hepi kata hma matutkanuklunu.
4Waneya Nicodemos hepomhalu:
— Hanu xawakhe rumukata yineru tsrutsoleji hiyrunuko hmatuxyawakatnaka? Rumukathe jeji runro nanwaka jihlokletatnaka waneya hmatutanutnaka?
5Waneya Jesus wan-tshina:
— Halikaka ntshina, hike himukata jihlokletanu Hoyakalu pohirewaxyawaka hma mathapkatkanuklunu honhaya, Hiwejikaluruya koxa.
6Yineru hmatuxini himaneya yinerni seyni Hoyakalu hiwejinri hmatuxyawaka yineru wale tsonu hiwekkaklewata.
7Hiyáhoni hi himyekanu wane ntshinyawakhi hixa ptowruneka haluka matreta hiyrunukotnaka.
8Hanukta raluka yaleta kanniphalu wane potuko hya. Hixamka jemlu kanniphalu sejire, seyni hi himatlu hyinuwajyawaka sreta hiyrun-koxa hi himatlu rutujyawaka sreta. Waneko pixka rixa ptowru yineru Hoyakalu Hiwejikaluru matuxikatshri.
9Waneya Nicodemos hepomhalu, wla htshina:
— Hanhe rixanu xye?
10Jesus hihitlu, wla htshina:
— Hi he israel-nerune hasrukatshrimkayi seyni xyekaka pirana hi pimata?
11Halikaka, halikaka wla ntshinyi:
— Wunkakhi wimatjemle pirana hiyrunu wunkakhi wetlerutka pirana seyni hixa hi haluk-halixletlu wunkakle.
12Xye tshijne pirana nunkaklexini wanepnawaka hi halixno hanhe xawaka halixanno tenhohne hajeru pirana nunkaklexini?
13Hi satukna yineru tenhohne hatskoxya, seyni Jeji Whene tshinkaluru tenhohne serpijikatshri tsonupka wane ratskoxya.
14Moisés popriwaka yopkaklu hahaje waleptaji hoho rutaklu himnu bronze kamhikolu hiyáhoni waneko pixka raluk-hixletko Jeji Whene tshinkaluru teno rutakko.
15Hiyáhoni wan-rixkona ptowruneka wale halixatshine, riwekanna hikeklu hohne mnikawnakanepa.
Jesus Yokanatka Yine Ralixjenepa Riwekkajyawaka Piranapni
16Hoyakalu psol-tshijneka hajene ramotle tshinanu hyokanatlu hituru satupkalutu ptowru yineru ralixjene hi rupnanna seyni riwekanna hikeklu hohne mnikawnakanepa.
17Klu tshinanu Hoyakalu yokanatlu hituru riwekkajyawakna ptowru neruka seyni hi hyokanatlu hituru yine rapnokaxyawakapa.
18Hiyáhoni Hoyakalu whene halixatshine hi rapnokatkana seyni malixkane rapnokatkana klu tshinanu hi ralixluna Hoyakalu whene satupkalutu.
19Xyekni hapnokaxikolu: Katalu hapokyehitmakna psol-tshijne hajeneko seyni yine yohnik-hamotlu mapchahawaka kataluya klu tshinanu hektutu hkamhajetna.
20Ptowru yineru hektutu kamhatshri hahnanutlu katawaka hiyáhoni rasujyaluna katalu hike mexyawakanuplu hkamhalerna hektutu.
21Seyni yineru, hanuruktako homkahitlu halikakalutu pirana katawaka rutajnawa, rimathexikowaka hkamhaleru Hoyakalu hikchikhihlenrerni wale.
João Batista Hinkaklexyawaklu Cristo Pirana Piranapni
22Waneya wane wkatanu Jesus hiyrunu rasruklene Judeia tshijne rapokatkana. Waneya wan-rutukatka rasrukleneyma. Wane h-batiz-lewjexya.
23Hiyrun-koxa João tshinkaluru Enom poktshi h-batiz-lewakanaxya, Salim poktshistsi hajeruya, klu tshinanu honha wane hi hmahaxya hiyrunu wane hyajetna yine h-batiza-xikowakapna.
24Halikaka waneklu papko João hi hkachitkawa.
25Waneya satkaka João hasrukjetanune yinuwaka hihjekakleta satu judeu-neruyma judeu-ne powratjexikowaka pirana tshinanu.
26Waneya João nwaka hyana, wla htshinruna:
— Kasruklewakleru, jeji honra pimwakanatanru Jordão wenne tujra wnahlu mitshi, puphujtapiranaxinri, haha wale himakni h-batiz-lewjexya. Hiyrun-koxa ptowru yine yanwakjetlu.
27Waneya João wla tshinna:
— Yineru himukata himwaletlu pa hixanu Hoyakalu henejini tsonru.
28Hixni nimetjenhi wla ntshinreru mitshi: “Hi Messias-no hita seyni nyokanatka wale wkatanu napojyawakpatka.
29Yapkaklupa. Hnunrowatatshri yehi, waleni khanunrolu. Seyni hnunrowatatshri himatletjeru repixlu rimotsatlu hnunrowatatshri hiyrunu hyijnakotlu. Hiyrun-koxa hnunrowatatshri tokanu hjemini rumuwata. Hnunrowatatshri hepixatshri pixka nix-hita hiyáhoni numuwpotuthonuka hnunrowatatshri tshinanu.
30Wale hijhalu pnut-potu hya hijhakaluru rixyawaka seyni hita kayaho hijhakalurupno.
Tenhohne Hichpajikatshri Piranapni
31Halikaka tenhohne hichpajikatshri ptowru neruka pnuterutni wale. Seyni xye tshijne hichpajikatshri xye tshijne hajerukni wale hiyrunu xye tshijne hajeru pirana kochtshekatshrini. Tenhohne hichpajikatshri ptowru neruka pnuterutni.
32Runkakletlu retanru pirana hiyrunu hyijnakotanru pirana. Seyni hike yineru haluk-halixletanru runkakle pirana.
33Hanuruktako yineru, runkakle halixatshri, rekhipotutlu halikakni Hoyakalu.
34Hoyakalu yokanatanru, Hoyakalu tokanu runkakletjeta. Klu tshinanu Hoyakalu hi psotsonujiji Hiwejikaluru reneklu seyni Hiwejikaluru psoluka reneklu.
35Hoyakalu Hirtshi hamotlu Whentshi tshinkaluru. Hiyrun-koxa wale towre rutajyalu ptowru potukananuka.
36Wale tshinanu Whentshi tshinkaluru halixatshri himwalu hiweklu hike rixiniko mnikawnakatu. Seyni Whentshi tshinkaluru malixkatu hi rawyalu riwejinri seyni Hoyakalu hapnokaxyalu hikeklu hohne rasujinri.
ទើបបានជ្រើសរើសហើយ៖
João 3: mpdBiblia
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
