Yohana 17
17
Yesu ˆaghasabha Eryobha
1Hano Yesu amariri ghosiikëra ghayo ghoose, aghagharaamereri Mwishaaro, aghasabha akabhugha,
“Oo Taata, eriibhagha reene ˆrekahika. Obhëërëki abhaato obhokumi bhoone obhokoro, eni Omoona waacho, kubha na neeni nëbhëërëki obhokumi bhoocho obhokoro kebhuno bhoonyi. 2Noheere obhotoro bho kobhakangata abhaato bhoose, kubha nebhahë abhaato bhano oheere obhuhöru bho miishe ghyose. 3Obhuhöru bho miishe ghyose nibho bhuno, abhaato bhakumënyë iye mwene uno onyi Eryobha re hëënë, wiiki bhamënyë eni Yesu Kirisito, uno ontomiri. 4Eni neghoghongiri hano mo‑se, gho kohikeerani emeremo ghino ontomiri ghoghiköra. 5Oo Taata, neghusabha wërëki obhokumi bhoone obhokoro, obhokumi obhokoro bhuno neere nabho eriibhagha toonyi haghirohamu, eriibhagha ore okeere ghutëëma ase.
Yesu ˆakabhasabhera abhaanabheegha bhaache
6“Oo Taata, nekohunywire kebhuno onyi iye mo‑bhaato bhano oheere mo‑se ino. Ibho mbaare bhabhaacho, iye okaaha eni. Wiiki mbaköriri ghoose ghano ore obharagheriiri. 7Mbe, mbamënyiri kubha ebheghiro bhyose bhino oheere, mberuure ghokoocho, 8gho kubha nebhabhooriire ghoose ghano ombooriire, nabho mbaghasongʼaaniri. Mbeeche hëënë kubha neruure ghokoocho, wiiki mbakumiri kubha n‑iye ontomiri.
9“Nekobhasabhera bhayo, nteekobhasabhera abhaato bhoose, amare nekobhasabhera abhaato bhano oheere gho kubha m‑bhabhaacho. 10Abhaato bhoose bhano bhaanyi bhabhaane m‑bhabhaacho, wiiki abhaato bhoose bhano bhaanyi bhabhaacho m‑bhabhaane. Obhokumi bhoone obhokoro mboroochiibhu mo‑bhano oheere. 11Eni nteekubha wiiki mo‑se ino, amare ibheere ˆnekaacha ghokoocho. Amare ibho mbakwëndërëra kubha mo‑se ino. Oo Taata Omutööbhiyu, ˆneghaghusabha obhachonge kwo bhotoro bho riina reecho rino oheere, kubha bhabhe egheghiro kimu kinya bhuno itu toonyi. 12Eriibhagha nibheere haghirohamu nabho nebhachongiri kwo bhotoro bho riina reecho rino oheere. Nebhachongiri bhoheene kubha netamorumeeri koru umu mo‑bhaare, nanyinga wuure omorumeeri, kubha ghahikeerane ghano ghaandëkuru mo‑Mandëkö Amatööbhiyu.#17:12 Mööhi Sabhuri 41:9.
13“Oo Taata, ibheere ˆnekaacha ghokoocho. Eni nekobhabhoorera abhaanabheegha bhaane ghoose ghano eriibhagha nekeere neenyi mo‑se ino, kubha ghuchömëru koone koose kubhe mo‑metema gheebho. 14Nebhabhooriire abhaanabheegha bhaane amangʼana ghano oheere. Amare abhaato bha se ino mbabharëghiri, gho kubha ibho taanyi bha se ino, kinya bhuno eni netaanyi o mo‑se ino. 15Oo Taata, nteeghusabha kubha obharuusi mo‑se ino, amare kubha obhatoori no Omobhisa wuure. 16Ibho taanyi bha se ino kinya bhuno eni netaanyi o mo‑se ino. 17Oo Taata, ˆneghaghusabha obhakörë kubha abhaato bhaacho inkongʼorimu mo‑bhuhëënë bhoocho, gho kubha angʼana yaacho niyo obhuhëënë. 18Kinya bhuno ontomiri eni mo‑se, hangʼu hangʼu na neeni nebhatomiri mo‑se. 19ˆNeghiitoora ghokuhökëri iye gho ghiri yaabho, kubha nabho bhatooru ghokoocho mo‑bhuhëënë.
Yesu ˆakabhasabhera bhano bhakomokumi
20“Nteekobhasabhera abheene hangʼu, amare nekobhasabhera bhoose bhano bhakuucha ghonkumi gho ghiri e ghano abhaanabheegha bhaane bhakweghi. 21Neghusabha kubha bhayo bhabhe egheghiro kimu. Taata, neghusabha bhabhe moose yiito, kinya bhuno iye onyi moose yaane, na neeni neenyi moose yaacho. Neghusabha kubha bhabhe egheghiro kimu, kubha abhaato bha mo‑se bhatore ghwishereri kubha n‑iye ontomiri. 22Obhokumi obhokoro bhuno oheere eni, nebhaheere abhaanabheegha bhaane, kubha bhabhe egheghiro kimu, kinya bhuno itu toonyi egheghiro kimu. 23Eni neenyi moose yaabho, na niiye noonyi moose yaane. Neghusabha kubha bhabhe egheghiro kimu inkongʼorimu, kubha gho nchëra iyo abhaato bhoose bha se bhamënyë kubha n‑iye uno ontomiri, wiiki bhamënyë kubha nobhasiighiri kinya bhuno onsiighiri eni.
24“Oo Taata, nekwënda kubha bhano oheere bhabhe haghirohamu na neeni hano neekubha, kubha bhabhorighi obhokumi bhoone obhokoro bhuno oheere, gho kubha ꞉nuushamiri ghonsiigha koru ase ekeere ghutëëmu. 25Oo Taata uno onyi no obhuhëënë, abhaato bha se ino bhatakweche. Amare eni nekweche, wiiki abhaanabheegha bhaane mbeeche kubha n‑iye ontomiri. 26Eni nebheeghiri kebhuno iye onyi, wiiki nekwëndërëra ghuköra hangʼu, kubha bhasiighane kinya bhuno onsiighiri eni, wiiki nibhe moose yaabho.”
ទើបបានជ្រើសរើសហើយ៖
Yohana 17: ntk
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2022 Wycliffe Bible Translators, Inc. All rights reserved
