मत्ती 2
2
ज्योतिषियों का पूरब शै आणा
1जोबै हेरोदेस राजा यहूदिया प्रदेश दा राज कौरौ थिया तोबै बैतलहम गांव दा यीशु का जन्म हौआ, तोबै पूरब दै कैई ज्योतिषी यरूशलेम शहर दै आयौ पूछदै लागै, 2“यहूदियों का राजा जैसका जन्म हौए रौआ, कुकै औसौ? औरौ आमुए पूरब दिशा दा तैसकै जन्म कै बारै मुंजी बोताणौ वाल़ा तारा दैखै राए औरौ तैसीखै ढाल़ कौरदै आए रौवै।”
3तैसकै जन्म कै बारै मुंजी शोणेयो हेरोदेस राजा औरौ तैसकै साथौ कै यरूशलेम शहर कै बौहितै सारै लोग डौरे गौवै। 4तैणै यहूदी लोगौ कै सौबी मुख्य यहूदी पुरोहितो औरौ यहूदी शास्त्रीयों खै कौठै कौरेयौ तिनु कैईंदु पूछु, “मसीह कुकै पौयदा हौंदा?” 5तिनुऐ हेरोदेस राजा खै बौल़ौ, “कै यहूदिया प्रदेश कै बैतलहम गांव दा हौंदा जिथुकै मीका पौरमेशवर कै बातौ बौताणौवाल़ै ऐशै लैखै राए:
6‘ओए रै यहूदिया प्रदेश कै बैतलहम गांव, तू कोसी बै बौजैह शै यहूदा कै ओधिपतियो मुंजीदा सौबिदा नानड़ा ना आथी, इथकारिए तांव पौरैशा ऐक ओधिपति निकल़दा, जू मैरै प्रजा इस्राएल देश कै लोगौ का चौराईया बोणदा।’”
7तोबै हेरोदेस राजाए ठिकड़ै बैटै कै उमर का पौता लाणौ कारिए ज्योतिषियों खै चुपी बौएदैयौ तिनु कैईंदु पूछु कै तारा ठीक कोसी सौमय दैखिया थिया। 8औरौ हेरोदेस राजाए ऐजौ बौलेयौ तिनुखै बैतलहम गांव खै भैजै, “कै जांव औरौ तैसी बैटै कै बारै मुंजी ठीक-ठीक पौता कौरौ, औरौ जोबै सै भैटी जांव तौ मुखै शुजा दैया तोबै हांव बै आयौ तैसीखै झोकैयौ ढाल़ कौरु।”
9-10सैजै राजा कै बात शोणेयो हौटै गौवै, औरौ बाटो पुंडा तिनुऐ सैजाई तारा दैखा जू तिनुऐ पूरब दा दैखै राए थिया औरौ तैसी दैखैयो सैजै बैजाए खुश हौवे ऐजा तारा तिनकै आगै-आगै चालदा रौआ; औरौ जिथै सैजा बैटा थिया तैसी घोरो पांदी जाएयो रौकै गौआ। 11औरौ तिनुऐ तैसी घोरो दै जाएयो तैसी बैटै खै तैसकै माँ मरियम कै साथै दैखा, औरौ तिनुऐ झोकैयौ तैसी बैटै खै ढाल़ कौरे, औरौ आपणा-आपणा झोल़ा खौलेयौ तैसीखै सूनु, लोबान औरौ गन्धरस कै भैंट चौढ़ाए। 12तोबै सुईणै दै ऐजै चैतावणी पायौ कै हेरोदेस राजा कै धोरे हौजौ नै जाया, औरौ सै ओकी बाटो बाटी आपणै देशो खै हौटै गौवै।
मिस्र देश कै जाणौ
13तिनकै जाणौ कै बाद, स्वर्गदूतै सुईणै दौ आयौ यूसुफ कै बौल़ौ, “ऊबा बिज़! तैसी भैईया औरौ तैसकी माँ खै नियौ मिस्र देशो कै दौड़ै जा; औरौ जांव तौड़ी मोऐं ताखै नै बुली, तांव तौड़ी तिथी रौया, जिथुखै हेरोदेस राजा ऐसी भैईया खै जोंदा लागै रौआ, कै तैसीखै मरवाऐ दैंव।”
14तोबै सै रातै कै ही ऊबा बिज़ा औरौ भैईया औरौ तैसकै माँ खै नियौ मिस्र देश खै भागै गौआ। 15औरौ हेरोदेस राजा कै मौरणौ तौड़ी तिथी रौआ, इथकारिए जू वचन पौरमेशवर कै बातौ बौताणौवाल़ै होशे कै दवारा प्रभुए बौल़ै राए थिया, सैजा पूरा हौंव, “मोऐं आपणा बैटा मिस्र देश दा बौईदा।”
हेरोदेस राजा दवारा नानड़ै भेईए कै मोरवाणे
16हेरोदेस राजा गुस्से दा भोरै गौआ जोबै तैसी ऐजा पौता लागा कै ज्योतिषिये तैसीआरी धौखा राए कौरे। औरौ तैणै सैनिकौ खै छाड़ै कै बैतलहम गांव दै जाया औरौ आंडे-पांढे कै जौगैह कै सौबी भैईया खै मोरवाए दैंव जिनकै उमर दो सालो कै या तिदै कम औसौ। 17ऐजौ इथकारिए हौ कै पौरमेशवर कै बातौ बौताणौवाल़ै यिर्मयाह कै दवारा पवित्र शास्त्र दो जू बौल़ै राए थियु सैजौ पूरु हौंव।
18“लोगै कोसी कै रूणो कै आवाज़ रामाह#2:18 रामाह ऐक ऐशणी जौगैह थी जिथै दाऊद राजा कै वंश रौंव थिये नोगरो दै शौणै, रुणु औरौ बौड़ा मातम होआ।
राहेल #2:18 राहेल याकूब कै घोरवाल़ी थी।आपणै नानड़िया कारिए रुए रौए थै,
औरौ शान्त नी हौणौ चांव थै, जिथु सै मौरे गौवै थिए।”
मिस्र देश शै पाछु आणौ
19यूसुफ, मरियम औरौ नानड़ा भैईया इबी तौड़ी मिस्र देश दै ही थिए। हेरोदेस राजा कै मौरणौ कै बाद स्वर्गदूतै मिस्र देश दौ यूसुफ खै सुईणै दौ आयौ बौल़ौ। 20“ऊबा बिज़यो औरौ भैईया औरौ तैसकै माँ कै नियौ इस्राएल देश दा हौटै जा, जिथु हेरोदेस राजा औरौ तैसकै लोग मौरे गौवै जू भैईया कै मारणा चांव थिए।”
21औरौ सै ऊबा बिज़यो औरौ भैईया औरौ तैसकै माँ खै आपणै साथै नियौ मिस्र देश कै छोड़ेयौ इस्राएल देश खै हौटै गौआ। 22पौरौ जोबै यूसुफे ऐजौ शुणु कै अरखिलाउस आपणै पिता हेरोदेस राजा कै जौगैह यहूदिया प्रदेश पांदी राज कौरे लौआ, औरौ सै तिथै जाणौ खै डौरे गौआ, औरौ सुईणै दै पौरमेशवर कैईंदी चैतावणी पायौ गलील जिले खै हौटै गौआ। 23औरौ नासरत नांव कै गांव दा बौसै गौआ, कै सैजा वचन पूरा हौंव, जू पौरमेशवर कै बातौ बौताणौवाल़ै यीशु कै बारै मुंजी बौल़ै राए थिया: “तैसीकै नासरत वाल़ा यीशु बौलल़ै।”
ទើបបានជ្រើសរើសហើយ៖
मत्ती 2: SRXNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
