Lûqa 12
12
Mebên sey Fêrisîyan
(Metta 10:26-31)
1Ena esna de bi hezaran însanî herikîyayî ameyî cayo ke Îsa uca bi; îzdîhamêko wina zêde bi ke, tay mendbi yewbînan bipelixnê. Verî ke Îsa xîtabê şarî bikero şagirdanê xwu ra wina va: “Mîrazê Fêrisîyan ra, yanî dirîtî ra xwu bipawê. 2Her çiyo ke nimite yo do bêro eşkerakerdiş, her çiyo ke pinanî yo do bêro zanayiş. 3Her çiyo ke şima tarî de vanê, do verê tîje de bêro îlankerdiş. Çiyo ke şima peyê beranê girewteyan de bi pistînî vanê, do serê banan de bi qîrayiş bêro vatiş.
4“Dostê mi, ez şima rê enê vajî, însanan ra metersê; eşkenê bedenî bikişê, feqet nêeşkenê ê ra zêdeyêr bikerê. 5Feqet ez şima rê vajî, esas şima do kamî ra bitersê: O ke kişeno û badê qadir o ke bierzo cehenem ra bitersê. Belê, ez şima rê vana Ey ra bitersê. 6Panc mîrçikî ancax di qurişî kenê. Feqet tek yewa înan bîle nezerê Homayî de bêqîmet nîya. 7Her yew mûya porê şima hûmarite ya. O semed ra metersê. Şima zafê mîrçikan ra hîna biqîmet ê.
8“Ez şima rê enê vajî, çi kesê ke Benîademê Semawî yanî mi verê însanan de qebûl bikerê, ez zî do hizûrê melakanê Homayê de înan qebûl bikerî. 9Feqet o ke mi verê sewbîna kesan de înkar keno, ez zî do ey hizûrê melekanê Homayî de înkar bikerî. 10O ke eleyhê Benîademê Semawî de qisey keno, do bêro efûkerdiş; la o ke Ruhê Miqedesî rê nengan çîneno, esla do nêro efûkerdiş.
11“Gama ke şima vejenê hizûrê cematê xavra û sermiyanan û hukimdaran, endîşe mekerê û mevajê ‘Ma do senî xwu midafea bikerê, ma do çi vajê?’ 12A esna de gereka şima çi vajê Ruho Miqedes do şima ra vajo.”
Mîsalê bûdelayê zengînî
13Miyanê qelebalixî ra yewî Îsayî ra va “Seydayê mi, birayê mi ra vaje wa mîrasî mi dir bare bikero.”
14Îsayî ey ra wina va: “Ey mêrik, kamî ez şima ser o kerda qazî yan zî hakem?” 15Dima ageyra qelebalixî ser û va “Dîqet bikerê, xwu her tewir çimveyşanî ra muhafeze bikerê, çimkî cûya însanî girêdayeyê malê ci yê zafî nîya.”
16Dima eno mîsal înan rê qisey kerd: “Zemanêk yew mêriko zengîn estbiyo. Herrîya ci zêde mehsûl dayo. 17Mêrik xwu rê fikirîyayo vato ‘Cayê mi çinê yo ke ez mehsûlê xwu tede wedarî, ez se bikerî?’
18“Dima zî vato ‘Ez do wina bikerî. Ez do embaranê xwu birijnî û hîna gird virazî. Ez do heme xeleyê xwu, mehsûlê xwu embaranê xwu yê neweyan de wedarî.’ 19Ez do xwu rê vajî ‘Ey ganê mi, malê to yê ke bi serran qîm keno esto. Biewnî rehetîya xwu ra, biwere, bişime, cûyayiş ra keyf bigêre.’
20“Feqet Homayî ey ra vato ‘Hey gidî bêaqil! Emşo ganê to to ra yeno waştiş. Çiyê ke to dayê pêser do kamî rê bimanê?’
21“Aqîbetê kesê ke semedê xwu serwet keno pêser feqet qatê Homayî de zengîn nîyo, a eno yo.”
Hukimranîya Homayî
(Metta 6:25-34)
22Îsayî şagirdanê xwu ra va “Coka ez şima rê vana, endîşe mekerê ke semedê canê xwu şima do çi biwerê yan zî semedê bedenê xwu şima do çi bidê xwu ra. 23Can werd ra, beden zî lîbas ra muhîmêr o. 24Biewnîyê qijikan ra! Ne ramenê ne çînenê, ne kîler ne zî embarê înan esto. Feqet Homa înan keno mird. Şima teyran ra hîna zaf ercîyaye yê 25Şima ra kam eşkeno bi endîşekerdiş emrê xwu yew lehza derg bikero? 26Eke şima nêeşkenê hende zî bikerê, şima qey çiyanê bînan xwu rê kenê derd?
27“Biewnîyê sosinî senî benê pîl. Ê ne şixulîyenê, ne zî lak rêsenê. Ez şima rê enê vajî, bi hende îhtîşamê xwu qral Silêmanî bîle hendayê yewa nînan zî weş kincî nêdaybî xwu ra. 28Ey îman nuqsanî! Homayo ke hende weş kincan dano nebatanê yabanî ra ke ewro estê la siba erzîyenê adir, miheqeq do kincan bido şima ra. 29O wext endîşe mekerê û mekewê dima ke şima do çi biwerê û çi bişimê. 30Şarê ke Homayî nêşinasnenê tim enê çiyan dima yê. Labelê Babîyê şima yo Semawî zano ke şima hewceyê enê çiyan ê. 31Şima Hukimranîya Homayî dima şêrê, do enê heme zî bidiyê şima.
32“Meterse, ey bola qijeke! Çimkî Babîyê şima yê Semawî qerar dayo ke hukimranîya xwu bido şima. 33Malê xwu biroşê, pereyê ci bidê hewcedaran. Bibê wayirê yew kîseyê ke nêbeno kan û asîman de yew serweto ke nêqediyeno. Uca tu dizdêk nêeşkeno şêro nizdîyê ci, gizûz nêeşkeno ey biwero. 34Serwetê şima ça bo, qelbê şima zî do uca bo.”
Her wext amade bên
(Metta 10:34-36; 24:42-51; Marqos 10:38; 13:34-36)
35“Xizmetî rê amade bên; wa qendîlê şima halo taviste de bê! 36Bibê sey xizmetkaranê ke paweyê wayiranê xwu yê ke veywe ra yenê. Gama ke wayirê înan yenê, senî ke ber bicenê, ê zî ca de ber akenê. 37Werre bi ê xizmetkaran gama ke wayirê înan ageyrenê, înan hişyar û amade vînenê! Ez şima rê enê vajî, wayirê înan do polanê xwu wekerê û amadekarî bikerê, do koleyanê xwu sifreyî ser o bidê roniştiş û înan rê xizmet bikerê. 38Wayir biwazo nîmeyê şewe, biwazo wextêko hîna erey bêro, werre bi ê xizmetkaran ke wayir înan hişyar vîneno!
39“Enê baş bizanê: Eke wayirê keyeyî bizano dizd kamcîn saete de yeno, firsend nêdano şelênayişê keyeyê xwu. 40Şima zî her game amade bên, çimkî Benîademo Semawî yew gama ke şima qet nêpawenê de do bêro.”
41Petrûsî persa va: “Wayirê ma, ti enê mîsalî semedê ma vanê, yan semedê her kesî?”
42Îsayî zî wina va: “Yew kehyayo sadiq û biaqil bifikirîyê. Wayirê ci ey ano xizmetkaranê bînan ser û wezîfedar keno ke wext de werd bido înan. 43Werre bi ê kehyayî, wayirê ci wexto ke ageyreno keye, ey karê ci ser o vîneno! 44Ez şima rê enê vajî, wayirê ci, mesûlîyetê heme çiyê ke wayir o, do bido ey. 45Labelê eke o kehya xwu rê vajo ‘Ameyişê wayirê mi rê zaf esto’ û dest pê bikero xizmetkaranê bînan rê ezîyet bikero, biwero, bişimo û serxoş bibo, 46wayirê ci do yew gama ke o nêpaweno de bêro; do bi şîdet ey ceza bikero û ey bêîmanan dir yew bivîno.
47“Xizmetkaro ke waştişê wayirê xwu zano la amadekarî nêkeno û waştişê ci nêano ca, do cezaya ci pîle bo! 48Eyla xizmetkaro ke waştişê wayirê xwu nêzano do se bibo? Eke ceza heq bikero zî do cezaya ey qijek bo. Zaf diyayo kamî, do ey ra zaf bêro waştiş. Çiyo hîna zêde emanetê kamî biyo, do ey ra hîna zêde bêro waştiş.
49“Ez ameya ke dinya eynî bikerî cayê şewateyî. Werrekna enê şewateyî nika ra dest pê bikerdêne! 50Yew elemo zaf pîl esto ke gereka ez ci rê tehemul bikerî. Ez enê şibnena waftîzî#12:50 şibnayiş waftîzî: Manaya umûmî ya waftîzî dekerdiş awe miyan o. Labelê tiya de waftîz ra qesdê Îsayî, behsê çarmix de mergê xwu keno.. Heta ke eno waftîz beno û qediyeno ez çi tengane ancena! 51Şima vanê qey ez ameya aştî biyarî rîyê erdî? Ez şima rê vana nê, aştî nîya, ez ameya ke abiriyayişî biyarî. 52Tiya ra pey, yew aîleya panc kesî, do vera diyan de hîrêyî û vera hîrêyan de diyî abiriyê. 53Babî vera lajî, laj vera babî, dadî vera keyna, keyna vera dadî, vistirî vera veyve û veyve zî do vera vistirîya xwu vindero.”
Famkerdişê emareyan
(Metta 5:25-26; 16:2-3)
54Dima, Îsayî şarî rê wina va: “Eke şima bivînê hetê rojawanî de hewr biyo berz, ca de şima vanê ‘Varitî yena’ û varitî dest pê kena varena. 55Wexto ke vayê başûrî yeno, şima vanê ‘Ewro do zaf germ bo’ û wina beno. 56Gidî şima dirîyên! Şima zanê biewnîyê erd û asmîn ra û rewşa hewayî texmîn bikerê, la çiyê ke ena game qewimîyenê şima fam nêkenê, ne?
57“Şima çiyo raşt ke gereka bêro kerdiş çira nêeşkenê bivînê? 58Mesela, hema ke şima rayirê mehkema de yê, bewnîyê dehwakarê xwu dir pêameyişî. Eger şima nêeşkayî pêbêrê, dehwakar şima anceno hizûrê hakimî. Hakim şima dano qerdîyanî, qerdîyan zî şima erzeno zindan. 59Ez şima rê vana, şima heta qurişo peyîn deynê xwu nêdê, şima nêeşkenê uca ra vejîyê.”
ទើបបានជ្រើសរើសហើយ៖
Lûqa 12: diqSZZ
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© (Active), Wycliffe Bible Translators, Inc. All rights reserved.
