Mateo 19
19
Ai honita wahawama tamine
1Makobote oda yananamatasa, Karireya‑ya oda sawimara, Yodeya‑ya oda tokoma, Yodaho Faha kowani‑kaya oda tokawahamaroni.
2Yeso nowati‑ya mai dama mai kamake, mai dami‑ya Yeso nakitamemarine.
3Fariseo mai one kamake, mai atibodi yama‑ya dika,
“Yeso ati amosareya, ati oda miteya, oda weenebonane.” Mai atibodi ati na, mai ati yanana,
“Yeso, maki fadi‑ya nofamare, honita wahawamebona ati ne, sibakare?” Fariseo mai ati namaroni.
4“Deoso‑ka yama hani dai kadikara‑mani? Yama yanakani‑ya maki toha, fana toha na‑ya i‑di Deoso wamanematane.
5‘Maki fana‑ya famebona, badi, madi mai na, mai‑ya dabamaterene. Maki fadi‑bone‑ya fame, mai aboni ohariteboneni.’ Deoso‑ka yama hani ati nineni.
6Mai fama mai aboni ohariwamani. Deoso ati ene mai aboni ohariwama, Deoso ene dai arabanahi. Mai honita wahawamariyahi.” Yeso ati nemarine.
7Fariseo mai ati yanana,
“Hini yamata‑bone Mose yama‑ya kanahanomatati?
‘Dai honita wahawamabone, dai‑ka yibote‑ka yama hani‑ba dai daaniya, dai honita wahawamiya, yama sibaraboneni.’ Mose‑ka yama hani ati nineni.” Fariseo mai ati namaroni.
8“Ai‑ka idi mai habi kita ihi mai honita wahawami‑bone‑ka yama hani tamine‑ya i‑di Mose kanahanomatane. Yama yanakani‑ya haa‑nima yama rametemoneni.
9Owati timitahi. Tiwa honita wahawamariyahi. Fadi hini ati ihi maki bare‑ya famawaha, maki daidi ene tohi awire, maki daidi‑ta sibarane. Maki hini ene honita wahawameya, fana one‑ya famawaheya, ene ati kasiro, hiniya siwanane.” Yeso ati nemarine.
10“Haa‑nima yama na, ai fanara, ai sibabisarineni.” Yeso‑ya oda da‑daba oda ati namaroni.
11“Deoso ati ene mai one fana, ai one fanarihi naboneni.
12Ai owa wade dene noko wadare fanarihi, ai owa dene noko mai hinahabe fanarihi, ai owa hini‑ya kayawe fanarihi ne, Deoso‑ya nokotoni oharibisebona hini‑ya kayawane. Hini dai‑ya dai kayawa, dai‑ya dai kayawahi.” Yeso ati nemarine.
Madehe‑ya Yeso kasome
13Yeso‑ya madehe‑ya mai kakama, mai tati‑ya Yeso yehe foribona, Deoso‑ya mai tamine‑ya hiyarebona, mai ati na, madehe‑ya mai kakama, mai‑ya oda ati barinamaroni.
14“Madehe dai ati baririyahi. Madehe owati‑ya nofa, madehe‑nima mai na, Neme‑ke ai nafi‑ka hidi kitabote tohawahe‑ya mai saweboneni.” Yeso ati nemarine.
15Mai tati‑ya Yeso yehe fori, tokawahemarine.
Hika yinero dame kamaki
16 # 19:16 “Ai abaterabone‑kaya” yama hani ati na, Deoso tabaro tamine amane. Maki yetene kamaki, Yeso‑ya hiyare,
“Ayo, hini yamata‑nima obati, ai abaterabone‑kaya osawebonehe?” Ati ne,
17“Tiwa ene amosabone tina, Deoso ohari‑ta amosabotebisa amane. Ai abarabone‑kaya tisawebone tina, Deoso ati‑ya tikadabiya, tisaweboneni.” Yeso ati nemarine.
18“Deoso ati dame, ati kiti ba‑basi ne yofitikanahi, ati‑ya osawebonehe.” Maki ati nemarine.
“Ai owa tinahabarihi, mai fanawi one ti·aharihi, yama tibotirihi, mai one tamine‑ya keyehe‑ya hiritirihi,
19Abi, ami mai na, mai tinofa, hini tiwa tinofi‑nima dai yakari‑ya mai sawe mai tinofa tiyahi.” Yeso ati nemarine.
20“Fara haa‑nima oteni. Hini yamata‑nima onamakitasibati?” Maki ati nemarine.
21“Tiwa ene amosa hinama tohabone tina, tiwa yehe honene nafi daatinahi, manakone waratiniya, mai yahi hone wadara mai‑ya daatinahi. Deoso tabaro‑ya tika yama dama tohaboneni. Eya tiwa ene niya, makobote owa‑ya tisawiyahi.” Yeso ati nemarine.
22Yeso ati‑ya mite, yawe, tokome, hika yama dama toha, hika yama‑ya kayawemarine.
23“Owati amosa dai mitahi. Mai yahi hone dama toha, Neme‑ke ai nafi‑ka hidi kitabote tohawahe‑ya mai dami sawiraboneni.
24Owati dai mitahi. Akoye hodone‑ya kamero tokiyomaterene. Fara‑nima mai naboneni. Mai yahi hone dama Neme‑ke ai nafi‑ka hidi kitabote tohawahebona‑ya mai dami sawiraboneni.” Yeso ati nemarine.
25Yeso ati‑ya oda mita, oda atibodi yama‑ya kadika,
“Ka! Ebeni‑ke sawibati?” Oda ati namaroni.
26Yeso oda‑ya nokotonihi, ati yanane,
“Hini ai ene ai sawiteraboneni. Deoso ene ai one sawibisaboneni. Deoso ene kitabotebisa amane.” Yeso ati nemarine.
27“Ayo, oda‑ka yama nafi towadakosa, tiwa‑ya oda honita daba, hini yamata‑nima ai manakone nibati?” Bedoro ati nemarine.
28“Owati amosa dai mitahi. Mai abamete mai kitamiya, hidi‑ka kadera amosabote‑ya dai‑ka Ayo neme‑ke itaribona, owa‑ya dai da‑daba hidi‑ka kadera amosa‑ya dai nahorihareboneni. Isara·eo‑ka nodi mai ihi‑ya dai kadikiya, mai ihi‑nima mai ihi manakone na dai daanaboneni.
29Owati dai mitahi. Owati‑ya mai tokadaba ihi mai‑ka yama nafi‑ya mai tonawadakosa, mai ihi manakone wadaboneni. Mai‑ka yobe, mai‑ka fadara, mai‑ka ayo, mai‑ka asima, mai‑ka abi, mai‑ka ami, mai‑ka madehe, mai na, mai tonokosa, mai manakone amosa‑ya mai kayafaboneni. Mai manakone fiyakanaboneni. Makobote mai abateraboneni.
30Bofe‑ya hidi webote mai toha, Deoso tabaro‑ya mai bi‑bidi na mai tohabisaba awineni. Bofe‑ya mai bi‑bidi na mai toha Deoso tabaro‑ya hidi mai ba‑basi na mai tohawahaba awineni.” Yeso ati nemarine.
ទើបបានជ្រើសរើសហើយ៖
Mateo 19: jaaNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
