Yowaho 7
7
Yeso ati‑ya sohori mai nofi awisarani
1Makobote Karireya‑ya Yeso yakane, Yodeya‑ya tokaremarine. Yodeya‑ya oda‑ka hidi Yeso‑ya mai ati nanahabamaroni.
2Oda amoni fa‑famaraba niya, Yodeo oda toha oda‑ka feriado yananaboneni. Feriado oni Wa‑wasa tohamaroni.
3Yeso‑ya sohori mai hiyara,
“Ayo, Yodeya‑ya tikahi, tiwati‑ya mai no‑nofa tiwa ene kitabote‑ya mai awabonehe.
4Tiwa tamine‑ya mai nafi mitabone tina, tiwa tikahemoriyahi. Tiwa ene kitabote‑mone tina, tiwa ene‑ya mai nafi awiyahi.” Sohori mai ati namaroni.
5Fara Yeso ati‑ya sohori mai nofi awiramaroni.
6“Hibayata mai dama mai noki‑ya owati toki awisarani. Dai‑ya mai awabisiya, yama sibarini.
7Dai‑ya mai kakoterani.
‘Mai ihi amosarani.’ Ona,
owa‑ya mai kakoteni.
8Mai marinabone mai‑ya dai tokabisahi. Hibayata oki awiraboneni. Hibayata mai dama mai noki‑ya owati toki nofarini.” Yeso ati nemarine.
9Karireya‑ya Yeso oda nahobisamaroni.
10Sohori mai toka, mai nowati‑ya Yeso oda tokomakemaroni, mai noki beheri‑ya.
11Oda marini‑ya oda‑ka hidi Yeso‑ya mai sibana,
“Fai Yeso‑ya?” Mai ati na, mai ati damamaroni.
12Yeso tamine‑ya mai dama mai ibi basana,
“Yeso ati amosane.” Mai one ati na,
“Yeso ati kasiro, ati ene mai dami tosawariteni.” Mai one ati namaroni.
13Hini mai ati‑ya mai kemamaroni, oda‑ka hidi mai‑ya mai nayofinaro.
14Mai marini beheri hawa tohiya, Deoso‑ka yobe‑ya Yeso tokiyome, mai‑ya kanawatomarine.
15Yeso ati‑ya oda‑ka hidi mai mita,
“Ka! Ebeni‑ke Yeso‑ya kanawato timata? Oda‑ka isikora‑ya sawiterene.” Mai ibi hiyara mai ati namaroni.
16Mai ati‑ya Yeso wato, mai‑ya hiyare,
“Hini owati tohi awirini. Owa‑ya yose‑mari ati okaminabisateni.
17Deoso ati dai tokadabiya, hini owati ihi owati yanara, Deoso ati ene owati yananibisa dai wataboneni.
18Hini mai ati ihi yama‑ya mai kanawata,
‘Amosabote ama·oni. Owa dai nofahi.’ Mai ati teni.
Hidi ati‑ya kamine,
‘Owa‑ya yose dai nofabisahi.’ Ati ne,
keyehe‑ya hirire, ati amose hinama toha tene.
19Deoso‑ka yama hani‑ya i‑di Mose kanahanomata ati‑nima dai ene ra, hiniya owa‑ya dai ati nanahabineni.” Yeso ati nemarine.
20“Madi towe tiwa‑ya foye, keyehe‑ya hiritineni. Tiwa oda ati nanahabarani.” Mai dama mai ati namaroni.
21 # 7:21 Sabado‑ya mai‑ka owa‑ya Yeso nakitame ene mai yawametemoneni. “Owa ene dai awa, dai yawawahani.
22I‑di Mose ati ene dai‑ka madehe sowiri tati atori dai wisinakosateni. Ai‑ka idi mai ihi dai toha, makobote i‑di Mose ene tohamaki ne, mai ihi‑nima sabado‑ya dai‑ka madehe sowiri tati atori dai wisinakosateni.
23Mose‑ka yama hani ati ihi sabado‑ya ai one dai wisina, sabado‑ya ai owa onakitamabisa, owa ene dai yawariyahi.
24Owa ene tamine dai kadikariyahi, owatibodi ati dai kadikabisahi.” Yeso ati nemarine.
25Yeso ati‑ya mai mita, Yerosare‑ya mai wi‑wina mai one ati yanana,
“Se! Maki mai sibahine mai hinahabebona, fare amanaraniha?
26Dai awaho, ai dami noko‑ya hiyare, ai‑ka hidi maki‑ya mai weeni awirini.
‘Deoso‑ka Ka‑kadika tohe awane.’ Ai‑ka hidi mai atibodi ati nawama awineni.” Mai ati namaroni.
27 # 7:27 “Deoso‑ka Ka‑kadika kakiya, tabaro ai watorebonane.” Mai ati na, mai tosawarineni. “Yeso tabaro oda wato, Deoso‑ka Ka‑kadika kakiya, tabaro ai watorebonane.” Mai one ati namaroni.
28Deoso‑ka yobe‑ya Yeso mai‑ya kanawatobona mai‑ya hiyare,
“Hehe fara amani. Owa dai wato, owa tabaro oni dai wato neni. Owa‑ya yose‑mari dai watora, owa‑ya yose‑mari amosabote amane.
29Owa‑ya yose‑mari owatobisane.” Ati nemarine.
30Ati mai himite mai one yawa, Yeso‑ya mai waratonabone mai atibodi ati na, Yeso abebona‑ka mahi kobore ene Deoso mai‑ya maakane, Yeso‑ya mai waratoni awiramaroni.
31Yeso ati‑ya mai dami mita, Yeso ati‑ya mai one dama nofawaha,
“Deoso‑ka Ka‑kadika Yeso amane. Yeso ene kitabote tohe, Deoso‑ka Ka‑kadika tohare‑mana, kameya, ene kiti ba‑basi re nane.” Mai ati namaroni, mai ibi basanaro.
32Mai ati‑ya fariseo mai mita, mai yawa, fariseo mai toha, Deoso‑ka yama‑bone‑ya mai da‑daa mai‑ka hidi mai toha, mai na, sekorasa mai‑ya mai yosemaroni, Yeso‑ya mai waratonabonehe.
33Yeso ati yanane,
“Dai tabaro‑ya owa amoni damamaraboneni. Owa‑ya yose‑mari‑ya okomaboneni.
34Owa dai sibaniya, owa dai awami awiraboneni. Okomi‑kaya dai tokomakiteraboneni.” Yeso ati nemarine.
35Oda‑ka hidi mai ibi hiyara,
“Ebeni‑kaya tokabamata? Ai tokomakirabone ati neri, oda one Kereko mai tabori‑ya mai wina mai‑ya tokebona, Kereko mai‑ya kanawatoba awane.
36‘Owa dai sibaniya, owa dai awami awiraboneni. Okomi‑kaya dai tokomakiteraboneni.’ Ati ne,
ati oda watorene.” Mai ibi hiyara mai ati namaroni.
37 # 7:37 “Oka faha dai fawahi.” Yeso ati ne, “Owati‑ya dai nofahi.” Ati nematamonane. Feriado‑ka mahi faina tohe, fare amosabote tohe‑ya Yeso mai‑ya hiyaramatase, ati kite,
“Dai bako hokoya, owa‑kaya dai kamahi. Oka faha dai fawahi.
38Deoso‑ka yama hani ati‑nima owati‑ya mai no‑nofa mai atibodi‑ya faha webote yananiya, faha ihi mai abaraboneni.” Yeso ati nemarine.
39Faha webote Yeso ati ne, Deoso‑ka Doni tamine amane. Yeso bofe‑ya wineya, Deoso‑ka Doni oda‑ya sawi awisare, neme‑ya Yeso tokeya, Yeso ati oda no‑nofa Deoso‑ka Doni oda atibodi‑ya sawiwahemarine.
40Yeso ati‑ya mai mita,
“Deoso ati‑ya mi‑mita kamebona, fare Yeso amane.” Mai one ati nihi,
41“Kirisito amane.” Mai one ati nihi,
“Kirisito Karireya‑ya yanareba awane.
42I‑di Dafi tabaro bote, Bere‑kaya Kirisito wadebonane. Dafi‑ka nodi i‑di Kirisito tohebonane. Deoso‑ka yama hani ati teni. Yeso i‑di Kirisito tohi awireba awane.” Mai one ati nihi neni.
43Yeso ati‑ya mai one nofa, Yeso ati‑ya mai one nofarihi nani.
44Yeso‑ya mai one waratonabone mai ati na, Yeso‑ya mai waratoni awiramaroni.
45Deoso‑ka yobe‑ka sekorasa Yeso‑ya mai waratonabone, hiniya mai wininama,
“Hini yamata ihi Yeso dai kakami awiriti?” Deoso‑ka yama‑bone‑ya mai da‑daa mai‑ka hidi mai toha, fariseo mai toha mai na, mai ati namaroni.
46“Yeso ati‑nima mai one ati terani.” Sekorasa mai ati namaroni.
47Sekorasa mai‑ya fariseo mai weena,
“Yeso keyehe‑ya hirine, ati dai nofa awini.
48Mai‑ka hidi oda toha, Yeso ati‑ya oda one nofaterani.
49Mai one dama Mose ati‑ya mai watora, Yeso ati‑ya mai nofabisa, hini mai‑ya mai yokaboneni.” Fariseo mai ati namaroni.
50Nikodimo fariseo owa tohe. Hibati‑ya Yeso‑ya tokemarine, Yeso ati‑ya mitebonaha. Fariseo mai one ati‑ya Nikodimo mite, mai‑ya hiyare,
51“‘Ai owa ati dai miti dai tohi awireya, dai weerayaho.’ Mose‑ka yama hani ati teni.” Nikodimo ati nemarine.
52“Towe amatini. Karireya‑ka mai ati‑nima tiwati neni. Deoso‑ka yama hani tikadikiyahi. Deoso ati‑ya mi‑mita Karireya‑ya yani tamine sawiterene.” Fariseo mai one ati namaroni.
53Mai tabori‑ya mai nafi tokawahamaroni.
ទើបបានជ្រើសរើសហើយ៖
Yowaho 7: jaaNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
