Yowaho 6
6
5.000 mai kana mai‑ya natafe
1Yama one‑ya Karireya‑ka Wara Webote‑ya Yeso oda eyehe berekawahemarine. Bara mai ati‑ka wara oni Tiberiyadi amani.
2Fara ai one‑ya Yeso nakitame‑ya mai awa, mai dama mai tokobasamakemaroni.
3Oda kobokana, adami webote‑ya oda tokomorosa, oda nahamaroni.
4 # 6:4 Ka‑kariwa feriado oni amani. Ka‑kariwa‑ke mahi koboni yanatonemarine, Yodeo oda toha oda marinabonehe.
5Yeso kiinawame, mai dama mai kabasamake mai‑ya awe,
“Firibi, ebeni‑kaya mai tafe‑ba ai kanikibati?” Yeso ati nemarine.
6Yeso mai‑ya natafebona, hini ene‑bona‑ya wato, i‑di Firibi‑ya haanemarine, fai ati‑ya mitebonaha.
7Firibi ati yanane,
“Ka! Yinero yama anini mahi 200 kane manakone‑nima ne‑ya mai tafe‑ba oda kanikiya, baho kote bide oda daaniya, mai nafi‑ya koboraba awineni.” Firibi ati nemarine.
8Yeso‑ya oda da‑daba oda‑ka owa i‑di Simaho Bedoro sohori i‑di Anidere ati yanane,
9“Yetene oawe, tefe bidi tohene. Baho 5 kana, aba mai fama nani. Yamata bide mai nafi‑ya koboraboneni.” I‑di Anidere ati nemarine.
10“Dai ati ene mai nahorisahi.” Yeso ati nemarine.
Kabihi mese‑ya mai nahamaroni. Mai dama toha, mai makidi 5.000 tohaba awineni.
11Baho‑ya Yeso damakane, Deoso‑ya hiyare, baho‑ya oda‑ya daani bahe, aba mai‑ya daanamakitase, mai nafi‑ya yama oda daanawahamaroni. Hini mai ati‑nima mai tafe‑bone oda nayowamaroni.
12Mai nafi korimanama,
“Yamata kote hasina dai teenahi, abarabonehe.” Yeso ati nemarine.
13Yeso ati ene baho 5 kana oda kaba kote hasina oda teena, hisiri 12 kana kibamaroni.
14Yeso ene kite‑ya mai awa,
“Deoso ati‑ya mi‑mita kakibona yama hani ati na, fare i‑di Yeso tohe awane.” Mai ati namaroni.
15“Yeso oda‑ka hidi‑bona oda ati na, oda ati‑ya nofareya, Yeso oda waratoneya, hidi tabaro‑ya oda towakamebonane, oda‑ka hidi webote tohawahebonaha.” Mai one atibodi ati na,
mai atibodi ati‑ya Yeso wato, ohari toke, adami webote‑ya tokomorosemarine.
Faha baki‑ya Yeso yakane
16Yeso kamare, yama soki yanatoni‑ya Yeso‑ya oda da‑daba oda tokofawama,
17kanawa‑ya oda foyamamaroni, Kafanaho‑ya oda beretokawamabonehe. Yama soki nafiwahiya, Yeso kamaki awisareya,
18boni yanana, faha rike nafemaroni.
19Faha bai‑ya kanawa oda oriniya, Yeso faha baki‑ya kamaki, kanawa yakari‑ya yakane, oda awa, oda habo siitoni kitamaroni.
20“Dai kakomeheriyahi. Fara ama·oni.” Yeso ati nemarine.
21“Se! Sibarini, tifoyahi.” Oda ati namaroni.
Kanawa dori‑ya Yeso foyamaki, faha widi‑ya oda koboni hawa tohamaroni.
Baho‑ya mai nokotonihe
22Yama wahabisari‑ya mai dama mai naha, mai atibodi yama‑ya kadika,
“Yeso‑ya mai da‑daba kanawa ohare‑ya mai towakama, Yeso mai‑ya sawirene.” Mai atibodi ati nameteni.
23Tiberiyadi‑ka mai kake, kanawa‑kaya mai yamakanake, mai dama mai‑ya Yeso natafe‑ka fara yama yakari‑ya mai kobonameteni.
24Mai dama mai naha Yeso‑ya mai nimana, Yeso kamarihi, fara Yeso‑ya oda da‑daba oda wadamarihi na, ihi Tiberiyadi‑ka mai‑ka kanawa‑ya mai haana, Kafanaho‑ya mai kamakemeteni, Yeso‑ya mai sibanabonehe.
25Kafanaho‑ya mai kobonamake, Yeso‑ya mai wasimake, mai ati yanana,
“Ayo, ebeni mahi ite‑ya kobotiniti?” Mai ati namaroni.
26“Owati amosabote dai mitahi. Baho dai kaba ihi owa‑ya dai sibanineni. Deoso ene dai nofabone, owa‑ya dai sibana‑mani, yama sibabisara neni.
27 # 6:27 “Dai abaterabone” yama hani ati na, Deoso tabaro‑ya ai ya‑yaini fawaterabone tamine amani. Yamata dai nokotoniriyahi. Yamata batateni. Oka yamata bara ihi dai abaterabone, fara dai nokotonibisahi. Okobi i‑di Deoso owa‑ya yose, owa‑ya kayawemarine. Yamata bara dai‑ya daa·onaboneni. Dai‑ka Ayo neme‑ke ama·oni.” Yeso ati nemarine.
28“Deoso ati‑nima oda nabone hini yamata‑nima oda ene nibati?” Mai ati namaroni.
29“Deoso ati‑nima dai nabone, Deoso hiyosemari ati dai nofahi.” Yeso ati nemarine.
30“Tiwati oda nofawahabone, tiwa ene kitabote oda awahi.
31 # 6:31 Hibati‑ya Deoso ati ene mahi‑nima mana wiya‑ya mai yaba, baho‑ya mai wamana, mai hikabametemoneni. Ai‑ka idi kabani‑kaya mai yakani‑ya mana‑ya mai kabawaremetemoneni. Fara yama hani ati timitahi,
‘Neme‑ka baho‑ya mai kabametemoneni.’ Deoso‑ka yama hani ati nineni.” Mai ati namaroni.
32“Owati amosabote dai mitahi. Neme‑ka baho‑ya mai kayafamete, Mose ene tohi awirematamonane. Neme‑ka baho amosabote‑ya Okobi daanibisatene.
33 # 6:33 Yeso hini tamine‑ya hiyare, ati‑ya mai watorametemoneni. Neme‑ya yanane, bofe‑ya kise, ene dai abarabone, fare Deoso‑ka baho amane.” Yeso ati nemarine.
34“Ayo, Deoso‑ka baho mahi‑nima oda‑ya daatinahi.” Mai ati namaroni.
35 # 6:35 Ai fimimara, ai bako hokomara Yeso ati ne, Deoso tabaro‑ya ai ya‑yaini fawaterabone tamine amani. “Deoso‑ka baho ama·oni. Owa ene mai fimiraboneni. Owa‑ya mai nofa mai fimimarihi, owati‑ya mai nofa mai baki hokomarihi teboneni.
36Hibati‑ya owa ene dai awa, owati‑ya dai nofi awirini.
37Dai one‑ya Okobi owa‑ya daane, Okobi mai daahina owa‑ya mai nafi nofabone, owa‑ya mai nofiya,
‘Dai‑ya onofi awirini, dai tokahi.’ Oteraboneni.
38Bofe‑ya okemaroni, Okobi ati‑nima onabonehe. Owa‑ya yose‑mari ati‑nima oteni. Hini owati‑nima oterani.
39Owa‑ya yose‑mari haa‑nima yama na‑ya nofane, owa‑ya daahina mai one‑ya fawa·onirabone, yama faina‑bone‑ya mai onakitamaboneni.
40Haa‑nima yama na‑ya Okobi nofane, Bidi mai hiawa, Bidi ati mai hinofa hine mai abateraboneni. Yama faina‑bone‑ya mai onakitamaboneni.” Yeso ati nemarine.
41“Neme‑ka baho ama·oni.” Yeso ati ne,
ati‑ya mai one nofara, Yeso tamine‑ya mai ibi hiyara,
42“Yose bidi i‑di Yeso amane. Neme‑ya kisemona ati ne; neme‑ya kisaremarine. Madi, badi mai na, mai oda watoneni.” Mai ati namaroni.
43“Owa tamine‑ya dai ibi hiyara, dai ati yawariyahi.
44Okobi owa‑ya yosemari, owa‑ya Okobi mai hiyosera, owati‑ya mai nofaraboneni. Owati‑ya mai no‑nofa yama faina‑bone‑ya mai onakitamaboneni.
45‘Deoso mai nafi‑ya kanawatowahebonane.’ Deoso ati‑ya mai mi‑mita‑mete mai‑ka yama hani ati neni.
Okobi mai‑ya kanawato, ati‑ya mai nofa owati‑ya mai nofawahaboneni.” Yeso ati nemarine.
46(Bofe‑ka dai toha Okobi dai awaterani. Owa‑ta Deoso owa‑ya yose‑mari oawabisane.)
47“Owati amosabote dai mitahi. Owati dai no‑nofa dai abateraboneni.
48Baho amosabote‑nima ona ama·oni. Owa ene mai abaraboneni.
49Hibati‑ya ai‑ka idi kabani‑kaya mai yakani‑ya mana‑ya mai kabaware, mai abametemoneni.
50 # 6:50 Baho ai kabiya, Yeso ati ai tokadaba tamine amani. Baho neme‑ke ama·oni. Fara neme‑ya baho kisa, dai kabiya, dai abaraboneni.
51Neme‑ya okisamaroni. Baho‑nima ona ama·oni. Oka baho‑ya mai kaba, mai abateraboneni. Bofe‑ya dai wi‑wina dai‑ya okasomabone, oka baho daa·onaboneni. Oka baho owa eme tamine amani.” Yeso ati nemarine.
52“Hini yamata‑nima Yeso eme ai kababoneni?” Mai ibi hiyara mai ati na, mai yawamaroni.
53 # 6:53 Mai abani Yeso ati ne, Deoso‑ka mai tohara, Deoso tabaro‑ya mai ya‑yairaboneni. “Owati amosabote dai mitahi. Dai‑ka Ayo neme‑ke eme dai kabarihi, dai‑ka Ayo emene dai fawarihi, dai na, dai abani.
54 # 6:54 Yama kaba toha, yama fa‑fawa toha Yeso ati ne, ati ai nofe tamine amane. Yeso ati amosabote amane, fare ati ai nofeya, Deoso tabaro‑ya ai ya‑yaini fawateraboneni. Owa eme‑ya mai kaba, owa emene‑ya mai fawa na, mai abateraboneni. Yama faina‑bone‑ya mai onakitamaboneni.
55Owa eme yama kaba amosabote amani. Owa emene yama fawa amosabote tohaneni.
56Owa eme‑ya mai kaba, owa emene‑ya mai fawa na, oka mai toha, mai‑ya osawiteboneni.
57 # 6:57 Yeso abaharire yama hani ati na, Yeso ya‑yaine tamine amane. Yeso abe, ai manakone‑ya nanahabe, kitamematamonane. Okobi abarene. Okobi owa‑ya yosemari, Okobi ene o·abaharirani. Owa eme‑ya mai kaba, owa ene mai abahariraboneni.
58Neme‑ka baho amosabote ama·oni. Mana‑ya ai‑ka idi mai kaba, mai abametemoneni. Oka baho‑ya mai kaba, mai abateraboneni.” Yeso ati nemarine.
Yeso ati‑ya mai one nofamara
59Fara Kafanaho‑ya Deoso‑ya mai hi‑hiyara‑ke yobe‑ya mai naha, mai‑ya Yeso kanawatomarine.
60Yeso ati oda mita,
“Ati bare, ati oda watorene.” Yeso‑ya oda daba oda one dama ati namaroni.
61Mai ati‑ya Yeso wato,
“Owati bara dai mita, owati dai nofamaraba awineni.
62Neme‑ya dai‑ka Ayo tokomisame dai awiya, owati dai nofaraba awineni.
63Ai atibodi ene ai abarani. Ai abano ababisateni. Dai atibodi tamine‑ya ohiyara, owati dai nofiya, dai abaraboneni.
64Owati‑ya dai one nofarani.” Yeso ati nemarine.
Oda atibodi ati‑ya Yeso wato, ati mai hinofare mai‑ya wato, fai‑ya kahabanebona‑ya wato nemarine.
65 # 6:65 Deoso‑ya mai nofara Yeso‑ya Deoso mai‑ya yoserene. Deoso‑ya mai nofabisiya, Yeso‑ya mai‑ya yosetene. Oda‑ya hiyaramatase,
“Owati‑ya dai one nofara, hibati‑ya owati yanana,
‘Okobi mai‑ya yosere owati‑ya mai nofaraboneni.’ Onamaroni.” Yeso ati nemarine.
66Yeso‑ya oda dabamaro Yeso ati‑ya oda one nofara, mai toka, Yeso‑ya mai sawimaramaroni.
67Mai dama mai tokoma, oda 12 toha oda‑ya Yeso hiyare,
“Dai tokomahareba awini.” Ati nemarine.
68“Ayo, oda toki awirini. Ai abaterabone‑ka hawi yofitikana, ai‑ya yo‑yofikana‑ba ai owa wadarane.
69Deoso‑ka yokana amatini. Tiwati oda nofini.” Simaho Bedoro ati nemarine.
70“Dai 12 toha, dai okadikamaroni, owa‑ya dai dababonehe. Dai okadika Diaboro‑ka yo‑yose dai owa ohari tohabisane.” Yeso ati nemarine.
71Simaho Isikari·oti bidi i‑di Yoda tamine‑ya hiyare, oda 12 toha oda owa amane, fare Yeso‑ya kahabanewahemarine.
ទើបបានជ្រើសរើសហើយ៖
Yowaho 6: jaaNT
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
